1. Aha do na didok si Daud taringot serep ni roha ni Jahowa?

SEREP do roha ni Jahowa. Sian dia taboto? Didok Raja Daud, “Ale Jahowa, diramoti jala dipalua Ho do ahu; nunga marsangap ahu dibahen [serep ni roham].” (2 Sam. 22:36, Bibel siganup ari; Ps. 18:36) Tikki disurat si Daud on, diingot ibana do ra muse tikki ro si Samuel tu jabu ni bapakna, lao mamillit raja Israel na baru. Si Daud do na umposo sian ualu nasida na marhahamaranggi, alai ibana do na dipillit Jahowa gabe raja lao manggantihon si Saul.​—1 Sam. 16:1, 10-13.

2. Aha do na lao taulas di parsiajaran on?

² Tottu, setuju do si Daud tu na didok sahalak panurat Psalmen taringot Jahowa. Didok, “Dipaserep dirina manatap na di angka banua ginjang dohot na di tano on . . . dipatimbul do na pogos i sian gambo. Laho pahundulhon ibana top dohot angka raja ni bangsona.” (Ps. 113:6-8) Di parsiajaran on, jolo taulas ma songon dia Jahowa patuduhon serep ni roha. Jala parsiajaran aha do na boi tadapot sian i, asa boi tapatudu serep ni roha. Dung i, taulas ma aha na boi taparsiajari sian Raja Saul, si Daniel dohot Jesus taringot serep ni roha.

3. Songon dia do Jahowa maradophon hita, jala aha do na boi taida sian i?

³ Sian cara ni Jahowa maradophon akka jolma na so sempurna, takkas ma taboto na serep do rohana. Dang holan panombaonta na dijalo Jahowa, alai dibahen Ibana do hita gabe ale-alena. (Ps. 25:14, Bibel siganup ari) Asa boi hita marale-ale tu Ibana, dilehon Jahowa do Anakna gabe tobusan lao manesa dosatta. Takkas ma taida asi ni roha ni Jahowa tu hita!

4. Aha do na dilehon Jahowa tu hita, jala boasa?

 ⁴ Adong do muse bukti na asing na patuduhon serep do roha ni Jahowa. Ala Jahowa na manoppa hita, sasittongna boi do Jahowa sandiri na manottuhon aha na lao taulahon di ngolutta. Alai, dang songon i dibahen Ibana. Dibahen Jahowa do hita suman tu Ibana, jala dilehon Ibana do tu hita kebebasan lao mamillit. Lomo do rohana asa tasomba Ibana sian nasa rohatta, ala holongta tu Ibana, jala ala taboto laba na tadapot molo taoloi Ibana. (5 Mus. 10:12; Jes. 48:17, 18) Pasti mandok mauliate do hita ala serep do roha ni Jahowa!

5. Songon dia do Jahowa mangajari hita asa marserep ni roha? (Ida gambar sampul.)

⁵ Diajari Jahowa do hita asa marserep ni roha, sian carana maradophon hita. Jahowa do na umbisuk sian nasa na adong di hasiangan on. Nang pe dang porlu di Ibana pandapot ni na asing, alai olo do Ibana manjalo i. Misalna, ditogihon Jahowa do Anakna mandongani Ibana manompa saluhutna. (Poda 8:27-30; Kol. 1:15, 16) Jala, nang pe Jahowa do Debata Natumimbul, alai olo do Ibana mangalehon tugas tu na asing. Contohna, dipillit Ibana do Jesus lao gabe Raja di Harajaonna. Jala dipillit Ibana do 144.000 halak lao mamaretta dohot Jesus. (Luk. 12:32) Dilatik Jahowa do Jesus lao gabe Raja dohot Sintua ni Malim. (Heb. 5:8, 9) Dilatik Jahowa do muse akka halak na lao mamaretta rap dohot Jesus. Alai dang diatur-atur Jahowa songon dia cara ni nasida mangulahon tugasna i. Gariada, pos do roha ni Jahowa boi do nasida mangulahon lomo ni rohana.​—Pgk. 5:10.

6-7. Aha do na boi taparsiajari sian cara ni Jahowa mangalehon tugas tu na asing?

⁶ Sasittongna, dang porlu di Jahowa pangurupion sian manang ise pe. Alai olo do Ibana  mangalehon tugas tu na asing. Tarlumobi ma hita. Misalna, molo sahalak kepala keluarga manang sahalak sintua do hamu di huria, tiru ma Jahowa. Lehon ma tugas tu na asing, alai unang ma gabe diatur-atur hamu sude na diulahon nasida. Molo ditiru hamu Jahowa, gabe boi ma hamu pasaehon karejomuna i. Jala gabe boi ma dilatik hamu na asing asa lam percaya diri nasida. (Jes. 41:10) Aha do muse na boi diparsiajari natua-tua dohot akka sintua sian Jahowa?

⁷ Didok do di Bibel, olo do Jahowa manangihon pandapot ni akka suru-suruan. (1 Raj. 22:19-22) Akka natua-tua, boi do ditiru hamu Jahowa. Sukkun ma pandapot ni ianakkonmuna taringot songon dia mangulahon sada tugas. Jala molo cocok do pandapotna i, boi ma diihutton hamu i.

8. Songon dia do Jahowa patuduhon na sabar do Ibana tu si Abraham dohot si Sara?

⁸ Boi do muse taida na serep do roha ni Jahowa, ala sabar do Ibana. Misalna, sabar do Jahowa nang pe adong na so marpos ni roha tu cara ni Ibana mambahen keputusan. Ditangihon Ibana do si Abraham tikki didok si Abraham dang setuju ibana tu keputusan ni Jahowa lao mangaripasson Sodom dohot Gomora. (1 Mus. 18:22-33) Jala ingot ma cara ni Jahowa maradophon istri ni si Abraham, i ma si Sara. Mekkel do si Sara tikki dibege ibana janji ni Jahowa boi ibana hamil nang pe nungnga matua. Alai dang gabe muruk Jahowa tu ibana. (1 Mus. 18:10-14) Gariada, diargai Jahowa do si Sara.

9. Aha do na boi diparsiajari akka natua-tua dohot akka sintua sian Jahowa?

⁹ Aha do na boi diparsiajari akka natua-tua sian Jahowa? Songon dia do reaksimuna molo ianakkonmuna manang akka dongan di huria dang setuju tu keputusanmuna? Pittor disalahon hamu do nasida? Manang olo do hamu manangihon pandapot ni nasida? Pasti godang do labana molo ditiru akka natua-tua dohot akka sintua Jahowa. Nungnga taulas be aha na boi taparsiajari sian serep ni roha na dipatudu Jahowa. Saonari, taparsiajari ma songon dia hita boi maniru serep ni roha na dipatudu akka naposo ni Jahowa na disurat di Bibel.

10. Songon dia do Jahowa mamakke akka sitiruon sian na asing lao mangajari hita?

¹⁰ Di Bibel, godang do akka sitiruon na dibahen Jahowa lao mangajari hita. (Jes. 30:20, 21) Godang do cerita ni Bibel na boi taparsiajari taringot akka halak na palashon roha ni Jahowa ala patuduhon parange na denggan, misalna serep ni roha. Boi do muse tadapot parsiajaran sian akka halak na so boi patuduhon akka parange na denggan.​—Ps. 37:37; 1 Kor. 10:11.

11. Aha do na boi taparsiajari sian contoh na so denggan na dibahen si Saul?

¹¹ Parrohahon ma aha na masa tu Raja Saul. Mulana, serep do rohana. Tikki poso dope ibana, diboto ibana do aha na so boi ulahononna. Jala, dang pittor olo ibana mandapot godang tanggung jawab. (1 Sam. 9:21; 10:20-22) Alai dung gabe raja, gabe ginjang ma rohana. Diulahon ibana do na so tugasna, hape dang marhak ibana mangulahon i. Di sada tikki, dang sabar si Saul paimahon panurirang Samuel. Dang pos rohana tu cara ni Jahowa manjaga akka naposona. Dipelehon ibana do pelean, hape dang marhak ibana mangulahon i. Ujungna, dang dijalo Jahowa be ibana gabe raja, ala dang lomo be roha ni Jahowa tu ibana. (1 Sam. 13:8-14) Tadapot do parsiajaran na rikkot sian on. Unang ma taulahon na so hakta.

12. Songon dia do si Daniel patuduhon serep ni roha?

 ¹² Taparrohahon ma contoh na denggan sian si Daniel. Dang songon si Saul, saleleng ngoluna toktong do serep roha ni si Daniel. Jala toktong do dipangido ibana tudu-tudu sian Jahowa. Misalna, tikki dipakke Jahowa ibana lao paboahon lapatan ni nipi ni si Nebukadnesar, dang dipasangap si Daniel dirina sandiri. Alai serep do rohana. Dilehon ibana do sude hasangapon i tu Jahowa. (Dan. 2:26-28) Aha do parsiajaranna tu hita? Molo adong akka donganta na lomo rohana manangihon jamitatta, manang molo adong pengalamanta na denggan tikki marbarita, ikkon talehon do sude hasangapon i tu Jahowa. Alana taboto, dang boi taulahon i sude molo so diurupi Jahowa. (Plp. 4:13) Molo taulahon i, na maniru Jesus do hita disi. Boasa?

13. Aha do na taparsiajari sian serep ni roha ni Jesus na dipaboa di Johannes 5:19, 30?

¹³ Nang pe Anak ni Debata jala sempurna Jesus, alai marhaposan do ibana tu Jahowa. (Jaha Johannes 5:19, 30.) Dang hea olo ibana mambuat huaso ni Amana na di surgo i. Pilippi 2:6 mandok, “Ndang hea tarpingkir ibana laho manggulut asa sarupa tu Debata.” Diboto Jesus do aha na boi dohot na so boi ulahononna. Jala diargai ibana do huaso ni Jahowa.

14. Aha do na diulahon Jesus tikki dipangido tu ibana hasangapon na so boi lehononna?

¹⁴ Parrohahon ma aha na didok Jesus tikki dipangido si Jakobus, si Johannes, dohot omak ni nasida hasangapon na so boi dilehon ibana tu nasida. Pittor didok Jesus do, holan Amana na di surgo i do na boi mamillit ise na lao hundul di hambirang dohot di siamun ni Jesus di Harajaon ni Debata. (Mat. 20:20-23) Serep do roha ni Jesus. Diboto ibana adong do na so boi ulahononna. Dang hea diulahon ibana tugas na so dilehon Jahowa tu ibana. (Joh. 12:49) Songon dia do hita boi maniru Jesus?

15-16. Songon dia hita boi mangulahon poda na disurat di 1 Korint 4:6?

¹⁵ Molo taulahon poda na disurat di 1 Korint 4:6, na maniru Jesus do hita disi. Didok di ayat i, “Unang ma ulahon lobi sian na tarsurat i.” Jadi, tikki disukkun halak pandapotta, unang ma tapaksa ikkon dijalo nasida pandapotta i, manang pittor tadok aha na adong di rohatta. Alai, lehon ma poda na adong di  Bibel dohot sian akka sijahaonta. Molo taulahon i, on patuduhon na taakkui do dang sai sude taboto. Serep do rohatta molo taakkui, poda ni Jahowa do na undenggan sian pikkiranta sandiri.​—Pgk. 15:3, 4.

¹⁶ Asing ni pasangappon Jahowa, adong do piga-piga alasan na asing boasa ikkon tapatudu serep ni roha. Saonari, taulas ma songon dia serep ni roha boi mambahen las rohatta jala mangurupi hita asa marsada dohot na asing.

17. Boasa boi marlas ni roha halak na serep roha?

¹⁷ Molo serep do rohatta, gabe boi ma hita marlas ni roha. Boasa? Molo taboto dang sai sude boi taulahon, las do rohatta tikki mandapot pangurupion sian halak na asing. Misalna, parrohahon ma aha na masa tikki dipamalum Jesus sappulu halak na hona kusta. Holan sada do sian nasida na mulak muse lao mandok mauliate tu Jesus, ala nungnga dipamalum Jesus ibana. Diboto ibana do, dang boi malum sahitna i molo so alani Jesus. Jadi mandok mauliate do ibana alani i, jala dipasangap ibana do Jahowa.​—Luk. 17:11-19.

18. Songon dia do serep ni roha boi mangurupi hita asa marsada dohot na asing? (Rom 12:10)

¹⁸ Molo serep do roha ni sasahalak, dang maol ibana marsada jala marale-ale dohot na asing. Boasa? Alana diboto ibana godang do akka parange na denggan sian halak na asing. Las do roha ni halak na serep roha molo adong donganna na marhasil mangulahon tugasna. Dipuji jala diargai ibana do nasida.​—Jaha Rom 12:10.

19. Aha do piga-piga alasan boasa ikkon tapasiding parange ginjang ni roha?

¹⁹ Maol do di halak na ginjang roha lao mamuji halak na asing. Alana didok roha ni nasida, holan ibana do na ikkon dipuji. Sai  dibanding-bandingkon ibana do dirina tu na asing, jala sai naeng bersaing do ibana tu nasida. Dang olo ibana mangalatik na asing dohot mangalehon tugas tu nasida. Halak na ginjang rohana marpikkir holan ibana do na boi denggan mangulahon sada ulaon, dang adong manang ise pe na boi mangulahon i. Jala didok rohana, ibana do na uppetting sian na asing. Gabe mangiburu do ibana molo adong halak na undenggan sian ibana. (Gal. 5:26) Akka halak sisongon i dang boi leleng marale-ale dohot donganna. Alani i, molo adong parange sisongon i di hita, martangiang ma hita tu Jahowa asa diurupi hita ‘paubahon pingkiranta’. Jala asa unang gabe halak na ginjang roha hita.​—Rom 12:2.

20. Boasa ikkon serep rohatta?

²⁰ Mandok mauliate do hita tu sitiruon na dibahen Jahowa tu hita! Takkas do boi taida serep ni roha ni Jahowa sian cara ni Ibana maradoppon akka naposona, jala lomo do rohatta maniru ibana. Lomo do rohatta tong maniru akka naposo ni Jahowa na marserep ni roha. Toktong ma talehon sude hasangapon dohot hamuliaon holan tu Jahowa. (Pgk. 4:11) Molo taulahon i sude, gabe boi ma hita marale-ale tu Jahowa salelengna, ala holong do roha ni Jahowa tu halak na serep roha.