1, 2. (a) Boasa portibi na jahat on dipatudos tu parjahat na laho dipamate? (Ida gombar di mula ni parsiajaran.) (b) Dung diripashon portibi na jahat on, songon dia do pangkilalaan ni angka na di surgo dohot na di tano on?

RIMANGI ma on. Laho dipamate ma sahalak parjahat. Saonari, diboan panjaga ni hurungan ma ibana asa dipamate. Nang pe mangolu dope parjahat i jala sehat idaon, alai laho mate nama ibana.

² Dos do portibi na jahat on tu parjahat na laho dipamate i. Didok di Bibel, ”Na laho salpu do portibi on.” (1 Joh. 2:17) Nunga ditontuhon Jahowa, na laho salpuhononNa ma portibi na jahat on, jala ingkon saut do i. Alai, imbar do ajal ni portibi on tu parjahat na laho dipamate i. Adong do na so satolop molo dipamate parjahat i, ala didok nasida ndang denggan molo dipamate parjahat i. Alai, panguhum na tigor do Jahowa, jala di bagasan hatigoran do Ibana manguhumi portibi on. (5 Mus. 32:4) Ingkon saut do panguhumanNa i. Dung diripashon portibi na jahat on, sude na di surgo dohot na di tano on  mandok na tigor do panguhuman ni Jahowa, jala marlas ni roha situtu ma nasida!

3. Dung ro Harajaon ni Debata, aha do opat masalah na laho disalpuhon?

³ Aha do lapatan ni ”na laho salpu do portibi on”? Lapatanna, salpuhonon ni Debata ma hasusaan, jala ndang adong be i di tano on. On ma ”barita na uli” taringot tu Harajaon ni Debata. (Mat. 24:14) Di artikel on, taulas ma opat masalah na laho disalpuhon tingki ro Harajaon ni Debata: umpamana parjahat, organisasi na jahat, ulaon hajahaton, dohot situasi na lam jahat. Taparsiajari ma taringot (1) pangkorhon ni i tu hita, (2) aha na laho ulahonon ni Jahowa maradophon i, jala (3) aha do na laho manggantihon i.

4. Aha do pangkorhon ni parjahat tu hita?

⁴ Aha do pangkorhon ni parjahat tu hita? Didok si Paulus, ro ma ”hasusaan di angka tingki parpudi”. Didok muse, ”Lam tu jahatna ma angka parjahat dohot panipu.” (2 Tim. 3:1-5, 13, Bibel siganup ari) Tutu do on masa saonari? Godang do na mangkilala pangkorhon ni hajahaton, umpamana dileai, dipasiding, jala dipungkuli. Pigapiga halak tangkas do patuduhon hajahaton na niulahonna. Adong do songon na burju idaon, hape sasintongna jahat do nasida. Nang pe hajahaton i ndang pintor tu hita dibahen, alai marpangkorhon do i tu hita. Lungun do roha tingki mamboto taringot parjahat na kejam tu dakdanak, tu na matua, dohot tu halak na gale. Ulaon ni parjahat on mambahen nasida songon binatang manang Sibolis. (Jak. 3:15) Alai, las do rohanta ala adong pangkirimon sian Jahowa.

5. (a) Aha do na dilehon Jahowa tu halak parjahat? (b) Aha do na laho masa tu halak na so olo marhamubaon?

⁵ Aha do na laho ulahonon ni Jahowa? Dilehon Jahowa do tingki tu parjahat asa marhamubaon. (Jes. 55:7) Nang pe laho ripashononNa portibi on, alai ndang pintor diuhumi Jahowa dope nasida. Tingki ro hasusaan bolon, aha do na laho masa tu halak na so olo marhamubaon dohot na satolop tu hajahaton? Marjanji do Jahowa laho mangaripashon parjahat sian tano on. (Jaha Psalmen 37:10.) Saonari, godang do na manabunihon hajahaton na binahenna asa unang diuhum. (Job 21:7, 9) Alai didok di Bibel, ”Tongtong do diranapi matana angka dalan ni ganup jolma, jala nasa langkalangkana diida Ibana do. Ndang adong haholomon manang linggoman ni hamatean tau partabunian ni halak siula hajahaton.” (Job 34:21, 22) Ndang adong na buni di adopan ni Jahowa. Diboto Ibana do sude ulaon ni parjahat. Dungkon Armagedon, molo talului parjahat i, ndang adong be nasida di tano on!—Ps. 37:12-15.

6. Ise do na tongtong mangolu dung diripashon parjahat, jala boasa tadok on barita na uli?

⁶ Ise do na tongtong mangolu dung diripashon angka parjahat? Marjanji do Jahowa, ”Sai na teanon ni angka parlambohi do sogot tano i,  jala hahilashononna hinadeak ni hadameon.” Di psalmen i, tajaha muse, ”Teanon ni angka partigor i do sogot tano i, jala tongtong do nasida maringanan disi.” (Ps. 37:11, 29) Ise do ”parlambohi” dohot ”partigor” i? Parlambohi, i ma halak na unduk jala marsiajar tu Jahowa. Partigor i, i ma na sai mangulahon na nidok ni Debata. Saonari, gumodang do parjahat sian partigor. Alai, holan partigor dohot na lambok roha do na tading di tano na imbaru, jala dibahen nasida ma tano on gabe paradeiso!

7. Aha do pangkorhon ni organisasi na jahat tu hita?

⁷ Aha do pangkorhon ni organisasi na jahat tu hita? Angka organisasi do na mambahen lam godang hajahaton di portibi on. Umpamana, marjuta halak diotootoi organisasi ni agama. Margabus do nasida taringot ise Debata na sasintongna, didok do ndang boi tahaporseai isi ni Bibel, jala diotootoi do angka jolma taringot ari na naeng ro. Pamarentaon na jahat satolop tu porang, paimbarimbarhon halak, jala manusai na pogos dohot na gale. Lam mamora jala lam marhuaso do pamarentaon sisongon i, ala mardingkan jala manjalo suap. Adong do muse perusahaan na mangahut jala manegai lingkungan. Dibuat nasida do untung sian godang halak laho mambahen pigapiga halak asa mamora. Alani i, martanggung jawab do organisasi na jahat taringot tu hasusaan di portibi on.

8. Aha do na didok Bibel na laho masa tu angka organisasi na jahat?

⁸ Aha do na laho ulahonon ni Jahowa? Hasusaan bolon dipungka tingki organisasi politik mamorangi organisasi agama na so sintong, na digombarhon di Bibel songon boruboru na jahat, na digoari Babel na Balga. (Pgk. 17:1, 2, 16; 18:1-4) Laho diripashon ma organisasi agama na so sintong. Alai, aha do na masa tu organisasi na asing na jahat? Di Bibel, dipatudos do nasida songon dolok dohot pulo ala songon na gogo do nasida idaon. (Jaha Pangungkapon 6:14.) Alai didok muse, diripashon ma sude pamarentaon dohot organisasi na mangalo tu Harajaon ni Debata. On ma na gabe ujung ni hasusaan bolon. (Jer. 25:31-33) Dungkon i, ndang adong be organisasi na jahat di portibi on!

9. Boasa pos rohanta na laho adong pamarentaon na denggan di tano na imbaru?

⁹ Aha do na laho manggantihon organisasi na jahat? Dung Armagedon, adong dope organisasi di tano on? Bibel mandok, ”Na maimaima do hita di langit na imbaru dohot di tano na imbaru, inganan ni hatigoran i, hombar tu bagabagana.” (2 Ptr. 3:13) Laho diripashon ma pamarentaon na jahat dohot angka rayatna. Alai, aha do na laho manggantihon i? ’Langit na imbaru dohot tano na imbaru.’ Langit na imbaru, i ma Harajaon ni Debata na diparenta Jesus dohot 144.000 angka na miniahan. Tano na imbaru, i ma halak na gabe rayat di Harajaon ni Debata. Tingki mamarenta, ditiru Jesus dohot  angka na miniahan do Jahowa, Debata na taratur. (1 Kor. 14:33) Alani i, denggan do pamarentaon di ”tano na imbaru”. Adong do angka baoa na dipillit laho mangaradoti godang ulaon. (Ps. 45:17) Nasida diuluhon Jesus dohot 144.000 angka na miniahan. Rimangi ma, sude organisasi na jahat laho digantihon sada organisasi na denggan, na so hea marsangkap na jahat!

10. Aha do ulaon hajahaton na jotjot masa di ingananmuna, jala aha do pangkorhon ni i tu hamu dohot tu keluargamuna?

¹⁰ Aha do pangkorhon ni ulaon hajahaton tu hita? Saonari, godang do hajahaton na taida, songon ulaon na rorang, margabus, dohot hajahaton na asing. Angka hiburan di portibi on mambahen lomo roha ni halak mangulahon i, jala ndang olo mangihuthon aturan ni Jahowa. (Jes. 5:20) Saonari, ingkon diurupi natuatua do ianakhonna asa unang mangihuthon ulaon hajahaton. Alai sasintongna, ingkon marsitutu do hita sude manjaga paralealeonta tu Jahowa di portibi na jahat on.

11. Aha do na taparsiajari sian panguhuman ni Jahowa tu Sodom dohot Gumora?

¹¹ Aha do na laho ulahonon ni Jahowa taringot tu hajahaton? Pingkirhon ma songon dia Jahowa maradophon hajahaton na masa di Sodom dohot Gumora. (Jaha 2 Petrus 2:6-8.) Sahalak partigor do si Lot. Alai susa do dihilala si Lot dohot keluargana, ala godang hajahaton di humaliangna. Diripashon Jahowa ma inganan i, asa unang adong be hajahaton disi. Panguhuman ni Jahowa di tingki i, gabe sipasingot do tu parjahat saonari. Dos songon tingki Jahowa mangaripashon ulaon hajahaton di tingki naung salpu, laho ripashononNa ma hajahaton na adong saonari.

12. Dung diripashon portibi na jahat on, ulaon aha do na dihirim rohamu laho ulahononmu?

¹² Aha do na laho manggantihon ulaon na jahat? Di tano na imbaru, godang do ulaon na mambahen las rohanta. Umpamana, bahenonta ma tano on gabe paradeiso jala paulionta ma jabunta dohot tu keluarganta. Tajangkon ma marjuta halak na dipahehe, jala taajari ma nasida taringot tu Jahowa dohot sude pasupasu naung nilehonNa tu jolma. (Jes. 65:21, 22; Ul. 24:15) Tingki i, godang ma ulaonta na mambahen las roha jala parohon sangap tu Jahowa!

13. Aha do pangkorhon ni hajahaton na masa di porlak Eden?

¹³ Aha do pangkorhon ni situasi na lam jahat tu hita? Gabe lam jahat do situasi di portibi on ala godang parjahat, organisasi na jahat, dohot ulaon hajahaton. Gabe tahilala ma hasusaan alani porang, hapogoson, dipaimbar alani marga dohot bangso, sahit, dohot hamatean. Ala Sibolis, si Adam, dohot si Hawa mangalo tu Jahowa, masa ma situasi on. Jala mangkorhon do parniulaon ni nasida tu hita sude.

14. Aha do na laho ulahonon ni Jahowa maradophon situasi na lam jahat on?

¹⁴ Aha do na laho ulahonon ni  Jahowa maradophon situasi na lam jahat on? Rimangi ma on. Marjanji do Jahowa laho manalpuhon sude porang. (Jaha Psalmen 46:9, 10.) Ndang adong be sahit. (Jes. 33:24) Ndang adong be hamatean. (Jes. 25:8) Ndang adong be hapogoson. (Ps. 72:12-16) Disalpuhon ma sude situasi na mambahen susa ngolunta. Ndang adong be pangkorhon na roa sian Sibolis dohot angka surusuruanna!—Eps. 2:2.

15. Dungkon Armagedon, aha do na so adong be di tano on?

¹⁵ Rimangi ma songon dia pangkilalaanta mangolu di tano on jala ndang adong be porang, sahit, dohot hamatean! Ndang adong be tentara dohot sinjata. Ndang tahaporluhon be rumah sakit, dokter, perawat, jabu parandungandungon, manang kuburan. Ala ndang adong be hajahaton, ndang porlu be polisi, gombok manang kunci! Laho salpuhonon ni Debata ma sude situasi na mambahen hita susa saleleng on.

16, 17. (a) Songon dia do pangkilalaan ni halak na tongtong mangolu dungkon Armagedon? Bahen ma tudosan. (b) Aha do na boi ulahononmu asa boi malua tingki diripashon portibi na jahat on?

¹⁶ Dung salpu sitaonon dohot hajahaton, songon dia do parngoluonta? Maol do mangarimangi on. Ala nunga leleng taida situasi na jahat, gabe somal ma hita tu situasi i. Tudosanna, halak naung leleng tading di jonok ni stasiun ni kareta api, gabe somal mambege soara na guntur. Halak naung leleng tading di jonok ni inganan ni sampah, gabe ndang bau be dihilala ibana tading disi. Alai, tingki disalpuhon Jahowa sude situasi na jahat, lumbang ma pangkilalaanta!

¹⁷ Aha do na laho manggantihon situasi na lam jahat saonari? Psalmen 37:11 mandok, ”Hahilashononna hinadeak ni hadameon.” Las rohanta ala on do sangkap ni Jahowa tu hita! Saonari, ulahon ma angka ulaon na mambahen hita tongtong jonok tu Jahowa dohot tu organisasiNa. Mansai arga do pangkirimonta i. Rimangi ma i, bahen ma i tongtong adong di roha dohot di pingkiranmuna, jala paboa ma i tu na asing. (1 Tim. 4:15, 16; 1 Ptr. 3:15) Molo diulahon hamu i, pos ma rohamu na boi do hamu tongtong mangolu jala marlas ni roha salelengna tingki salpu portibi na jahat on!