Cerita na adong di 5 Musa 22:25-27 ndang na laho patuduhon na marsala do baoa i manang na ndang. Alana tutu do ibana marsala. Alai, patik i naeng patuduhon, molo borua i ndang marsala. Parrohahon ma hatoranganna.

Di 2 Musa 22:23, 24 Bibel siganup ari, dipaboa do taringot sahalak baoa na mangulahon seks na so patut “di tonga ni huta” dohot sahalak borua naung martunangan. Marsala do baoa i disi. Alana borua naung martunangan dos do i songon naung marhasohotan. Songon dia taringot borua i? Didok di ayat i, ndang “marsurak ibana hape di tonga ni huta”. Molo marsurak ibana, begeon ni angka halak do i. Gabe boi ma ibana dipalua. Alai ndang marsurak borua i. Alani i, dohot do borua i mangulahon seks na so patut. Marsala do nasida na dua.

Alai di Patik i, dipaboa do situasi na asing: “Molo adong sada baoa pajumpang di tongandalan dohot sada namarbaju naung martunangan, gabe diperkosa namarbaju i, holan baoa i do sipamateon. Ndang boi hahuaon namarbaju i, ai ndang adong dosana na patut mambahen ibana diuhum mate. Dos do i songon sada halak na mate dibunu so sian pamotoanna. Ai di ruar ni huta do boruboru i diperkosa, tung sura pe marsurak ibana mangido pangurupion, ndang adong na boi mambege.”​—5 Mus. 22:25-27, Bibel siganup ari.

Di situasi sisongon i, boi do diputushon angka hakim ndang marsala borua i. Boasa? Alana, ‘marsurak do ibana mangido pangurupion, alai ndang adong na boi mambege’. Ndang dohot ibana mangulahon seks na so patut. Alai molo baoa i, tongtong do marsala. Alana, dipangke ibana do kekerasan jala “diperkosa namarbaju i” hape nunga martunangan ibana.

Nang pe patik i patuduhon na so marsala borua i, sian cerita on dipatudu do muse na marsala baoa i ala nunga diulahon pemerkosaan dohot seks na so patut. Boi do pos rohanta na ‘tangkas do i disulingkiti’ angka hakim jala dibahen nasida keputusan hombar tu aturan ni Debata naung jotjot dipaboa.​—5 Mus. 13:15; 17:4, Bibel siganup ari; 2 Mus. 20:14.