1-2. Boasa ro hita tu acara Borngin Parningotan ganup taon?

 HAMPIR 2.000 taon naung salpu, mate do Jesus humokkop hita asa boi hita mangolu saleleng ni lelengna. Di borngin andorang so mate Jesus, diparettahon ibana ma akka siseanna asa mangingot pengorbananna i, marhite acara dohot lambang na sederhana i ma roti dohot anggur.​—1 Kor. 11:23-26.

² Ala massai holong rohatta tu Jesus, taoloi do parettana i. (Joh. 14:15) Ro do hita tu acara Borngin Parningotan ganup taon patuduhon na taargai sude pengorbanan ni Jesus tu hita. Contohna, piga-piga minggu sebelum jala dukkon sae Borngin Parningotan, talehon do tikkitta mangarimangi manfaat tobusan ni Jesus tu jolma. Asing ni i las do rohatta mangundang akka halak asa boi ro tu acara i. Jala hita sandiri pe bertekad do ro tu acara i.

3. Aha do na lao tabahas di artikel on?

³ Di artikel on, tabahas ma tolu cara naung diupayahon naposo ni Debata lao mangulahon Parningotan Ari Hamamate ni Kristus: (1) mangihutton pola na dibahen Jesus, (2) mangundang akka halak ro tu Parningotan, jala (3) toktong ro tu Parningotan nang pe maol situasina.

4. Hasittongan aha do na taparsiajari di acara Borngin Parningotan, jala boasa sada hasangapon on di hita? (Lukas 22:19, 20)

⁴ Ganup taon di acara Parningotan, tatangihon ma jamita na dipasahat sian Bibel na paboahon hasittongan na penting taringot tobusan. Misalna boasa massai penting di hita tobusan, jala songon dia hamatean ni sahalak jolma boi manesa dosa ni godang jolma. Dipaingot do muse hita  aha na digombarhon roti dohot anggur, jala ise na boi mangallang dohot manginum i. (Jaha Lukas 22:19, 20.) Asing ni i gabe tarimangi ma muse akka pasu-pasu na lao jaloon ni akka halak na harapanna mangolu salelengna di tano on. (Jes. 35:5, 6; 65:17, 21-23) Sada hasangapon do di hita boi mamboto hasittongan on, alana marmiliar halak di portibi on dang mamboto taringot on, jala dang diargai nasida balga ni pengorbanan ni Jesus tu nasida. Asing ni i, dang dibahen nasida acara Borngin Parningotan sesuai tu pola na dibahen Jesus najolo. Boasa boi tadok songon i?

5. Dung mate akka apostel, songon dia do halak mambahen parningotan ari Hamamate ni Jesus?

⁵ Dung mate akka apostel ni Jesus, adong ma halak Kristen na murtad na mangajarhon na so sittong di huria. (Mat. 13:24-27, 37-39) Diajarhon nasida ma ajaran na so sittong “asa gabe mandao akka sisean sian punguan i”. (Ul. 20:29, 30) Sada sian ajaran na so sittong i mandok ikkon marulak-ulak do Jesus mangalehon dagingna gabe pelean. Hape Bibel mandok “holan sahali ro di saleleng ni lelengna do dipelehon [Jesus] dirina lao manesa dosa ni godang halak”. (Heb. 9:27, 28) Saonari godang do halak na porsea tu ajaran i. Lao ma nasida tiap minggu tu gareja, sipata tiap ari lao mambahen parningotan ari Hamamate ni Jesus. Molo di agama Katolik, didok do acara i “Ekaristi” manang “Misa Kudus”. b Molo gareja na asing, dang pola jotjot mambahen Borngin Parningotan, jala godang do sian pengikutna dang mangattusi lapatan ni tobusan ni Jesus. Sukkun-sukkun do roha ni nasida, ‘Tutu do boi hamatean ni Jesus i manesa dosakku?’ Gabe ragu do nasida ala dipengaruhi akka halak na menganggap dang boi tobusan ni Jesus manesa dosa ni jolma. Alai songon dia do sisean ni Jesus mangurupi akka halak asa mangargai tobusan ni Jesus?

6. Di taon 1872, aha do na diattusi akka Parsiajar Bibel?

⁶ Di taon 1870, dibahen si Charles Taze Russell ma punguan lao mamparsiajari Bibel, na digoari Parsiajar Bibel. Lomo do roha ni nasida mamboto ajaran na sittong taringot tobusan ni Jesus, jala songon dia do seharusna Borngin Parningotan diulahon. Ujungna di taon 1872, disimpulhon nasida ma sian Bibel tutu do Jesus mangalehon tobusan tu sude jolma. Jala dibagihon halak i do hasittongan i tu na asing, contohna marhite bukku, koran, dohot majalah. Dang leleng dukkon i mulai ma dibahen nasida Borngin Parningotan sahali sataon, dos songon na dibahen halak Kristen di abad na parjolo.

7. Aha do manfaat na tadapot sian riset na dibahen akka Parsiajar Bibel najolo?

⁷ Saonari godang do manfaat na tadapot sian riset na dibahen akka Parsiajar Bibel i. Boasa tadok songon i? Alani pasu-pasu ni Jahowa, gabe boi ma taattusi hasittongan taringot tobusan ni Jesus jala songon dia tobusan i bermanfaat tu sude jolma. (1 Joh. 2:1, 2) Taparsiajari do muse sian Bibel taringot dua harapan na dilehon Debata, i ma harapan tu akka halak na tarpillit lao mangolu salelengna di surgo, dohot harapan tu marjuta halak lao mangolu salelengna di tano on. Gabe lam jonok ma hita tu Jahowa ala taboto massai holong do rohana tu hita, jala massai godang do manfaat ni tobusan ni  Jesus tu hita masing-masing. (1 Ptr. 3:18; 1 Joh. 4:9) Songon na dibahen akka donganta najolo, lomo do rohatta mangundang akka halak asa dohot tu acara Borngin Parningotan na sesuai tu pola na dibahen Jesus.

8. Aha do naung dibahen naposo ni Jahowa lao mangundang akka halak tu Borngin Parningotan? (Ida gambar.)

⁸ Sian najolo, lomo do roha ni naposo ni Jahowa mangundang akka halak asa ro tu acara Borngin Parningotan. Di taon 1881, akka dongan na tinggal di Amerika Serikat diundang marpungu tu jabu ni sahalak donganta di Allegheny, Pennsylvania, lao mangulahon Borngin Parningotan. Dukkon i, dibahen ma acara Borngin Parningotan di ganup huria. Di bulan Maret 1940, adong ma boa-boa akka penyiar boi mangundang sude halak na berminat di daerah ni nasida asa ro tu acara Borngin Parningotan. Jala di taon 1960, disi ma parjolo sahali Betel mancetak undangan Parningotan lao dibagihon akka dongan di huria. Mulai sian i, nungnga marmiliar undangan Parningotan dibagihon tu akka halak. Boasa tabahen godang tikki dohot upaya lao mangundang nasida?

9-10. Akka ise do na taundang tu Borngin Parningotan, jala aha do manfaatna tu nasida? (Johannes 3:16)

⁹ Lomo do rohatta asa diboto akka halak aha naung diulahon Jahowa dohot Jesus tu hita sude. Ido alana taundang nasida tu Borngin Parningotan. (Jaha Johannes 3:16.) Lomo do rohatta dung ro nasida tu acara Borngin Parningotan,  gabe tergerak nasida lao marsiajar taringot Jahowa jala manomba Ibana. Ise do muse na boi mandapot manfaat sian acara i?

¹⁰ Taundang do muse akka dongan na so aktif. Molo taundang nasida, gabe dipaingot ma nasida na toktong do dihaholongi Debata nasida. Godang do akka dongan na so aktif na manjalo undanganta, jala las do rohatta mangida nasida ro tu Borngin Parningotan. Di acara i, gabe dipaingot ma nasida tu las ni roha na dihilala nasida najolo tikki melayani Jahowa. Taparrohahon ma pengalaman ni si Monika. c Gabe aktif ma muse ibana marbarita saleleng pandemi COVID-19. Dung ro ibana tu acara Borngin Parningotan taon 2021, didok ibana ma, “Istimewa do acara Borngin Parningotan taon on di au. Alana on ma parjolo sahali au di bagasan 20 taon boi marbarita na uli tu akka halak jala mangundang nasida tu Borngin Parningotan. Mandok mauliate do au tu sude naung dibahen Jahowa dohot Jesus, alani i berupaya do au mangundang akka halak asa ro tu Borngin Parningotan.” (Ps. 103:1-4) Dang soal songon dia tanggapan ni halak, berupaya do hita mangundang nasida tu Borngin Parningotan. Pos ma rohatta pasti diargai Jahowa do upayatta i.

11. Aha do buktina dipasu-pasu Jahowa upayatta mambagihon undangan Parningotan? (Haggai 2:7)

¹¹ Dipasu-pasu Jahowa do upayatta mangundang akka halak tu Borngin Parningotan. Misalna di taon 2021 nang pe adong pembatasan alani pandemi COVID-19, adong 21.367.603 halak na ro tu Borngin Parningotan. Hampir dua satonga hali lipat ma i sian godang ni Saksi Jahowa di liat portibi on! Memang dang jumlah ni na ro i na uppetting di Jahowa. Alai las do rohana mangida upaya ganup halak na ro tu Borngin Parningotan i. (Luk. 15:7; 1 Tim. 2:3, 4) Pos ma rohatta, tikki tabagihon undangan i, diurupi Jahowa do hita pajuppang dohot akka halak na marserep ni roha.​—Jaha Haggai 2:7.

12. Akka tantangan aha do na mambahen hita maol ro tu Borngin Parningotan? (Ida gambar.)

¹² Nungnga dipaboa Jesus hian, di ari-ari parpudi godang do tantangan na lao taadopi. Misalna tantangan sian keluarga, penganiayaan, porang, sahit, dohot akka na asing. (Mat. 10:36; Mrk. 13:9; Luk. 21:10, 11) Sipata akka tantangan on gabe mambahen hita maol ro tu Borngin Parningotan. Aha do na diulahon akka donganta lao mangatasi tantangan i, jala songon dia Jahowa mangurupi nasida?

13. Aha do buktina dipasu-pasu Jahowa upaya dohot habaranion ni si Artem asa boi mangulahon Borngin Parningotan tikki di penjara?

¹³ Tikki di penjara. Akka donganta na di penjara alani haporseaonna, berupaya do asa boi mangulahon Borngin Parningotan. Taida ma pengalaman ni si Artem. Di taon 2020, dipamasuk ma ibana tu sada sel penjara na marukkuran 17 meter persegi na biasana marisi opat manang lima tahanan. Nang pe di penjara, berupaya do si Artem mambahen lambang ni Parningotan sian akka na adong di ibana. Jala dipersiappon ibana do jamita Parningotan tu ibana sandiri. Alai akka tahanan na di selna i marisap jala marbahasa kotor. Aha do na diulahon si Artem? Dipangido ibana ma tu nasida asa unang marisap jala marbahasa kotor saleleng sajom acara Borngin Parningotan i. Dang  dirippu si Artem setuju do nasida. Didok si Artem, “Hupaboa do tu nasida na lomo rohakku patorakkon taringot acara i.” Nang pe didok nasida dang berminat tu acara i, alai dung diida nasida si Artem mangulahon Borngin Parningotan, gabe disukkuni nasida ma si Artem taringot i.

14. Songon dia do carana naposo ni Jahowa mangulahon Borngin Parningotan saleleng pandemi COVID-19?

¹⁴ Tikki masa pandemi COVID-19. Saleleng pandemi, dang boi naposo ni Jahowa marpungu secara fisik mangulahon Borngin Parningotan. Alai adong dope cara na asing asa boi nasida mangulahon Borngin Parningotan. d Akka huria na boi mengakses internet mangulahon Borngin Parningotan marhite video-conference. Alai boha ma tu akka na so adong akses internetna? Di piga-piga negara, dibahen kantor cabang do pengaturan asa boi jamita i disiarhon di televisi manang di radio. Asing ni i, nungnga direkam kantor cabang jamita i tu lobi sian 500 bahasa asa boi akka halak na tinggal di daerah terpencil mangulahon Borngin Parningotan.  Dibahen akka donganta do muse pengaturan asa dikirim rekaman jamita i tu akka na makkaporluhon.

15. Aha do na boi taparsiajari sian pengalaman ni si Susan?

¹⁵ Tikki ditentang keluarga. Piga-piga dongan mandapot tantangan na borat sian keluargana lao ro tu acara Parningotan. Taparrohahon ma pengalaman ni sahalak parsiajar Bibel na margoar si Susan. Di taon 2021, sadari sebelum acara Borngin Parningotan didok ibana ma tu guru studina, dang boi ibana ro tu acara Borngin Parningotan ala ditentang keluargana. Dijahahon guru studina ma Lukas 22:44. Didok guru studina i ma tu ibana, molo mandapot tantangan na borat, tatiru ma Jesus na martangiang tu Jahowa jala na mangandalhon Ibana. Marsogotna i, dipersiappon si Susan ma akka lambang-lambang tu acara Parningotan i. Jala ditonton ibana ma acara khusus ibadat pagi di jw.org. Bornginna i, sian kamarna diihutton ibana ma acara Borngin Parningotan melalui handphone. Marsogotna dibahen ibana ma pesan tu guru studina, “Mandok mauliate do au ala dipatogu ho do au nattoari. Nungnga huulahon nasa na tarbahenku asa boi dohot tu acara Borngin Parningotan i, jala diurupi Jahowa do au. Dang tardokkon au songon dia las ni rohakku, jala mandok mauliate do au tu Jahowa.” Sarupa do tantanganmuna songon si Susan? Molo songon i, pos ma rohamuna pasti diurupi Jahowa do hamu.

16. Boasa pos rohatta dipasu-pasu Jahowa do upayatta asa boi ro tu acara Borngin Parningotan? (Rom 8:31, 32)

¹⁶ Diargai Jahowa do upayatta asa boi ro tu acara Borngin Parningotan. Pos ma rohatta, dipasu-pasu Jahowa do hita ala taargai sude naung dibahen Jahowa tu hita. (Jaha Rom 8:31, 32.) Alani i, bertekad ma hita asa boi ro tu acara Borngin Parningotan taon on. Jala talean ma unggodang tikki dohot gogotta di ulaon marbarita piga-piga minggu sebelum jala dukkon sae Borngin Parningotan.