1-2. (a) Boasa ndang longang rohanta ala dibahen Jesus sederhana acara laho mangingot ari hamamatena? (b) Parange ni Jesus na dia do na laho taulas?

BOI do dipatorang hamu aha do na diulahon di ari Parningotan Hamamate ni Kristus? Tontu godang do sian hita na mangingot aha na diulahon di Borngin Parningotan i. Alana sederhana do dibahen acara i. Nang pe songon i, ringkot do acara on diulahon. Ra sungkun-sungkun do rohanta, ‘Alai boasa sederhana dibahen acara i?’

² Tingki di tano on Jesus, sai diajarhon ibana do na ringkot marhite cara na sederhana, tangkas jala mura diantusi. (Mat. 7:28, 29) Dos songon i ma, laho mangingot ari hamamatena, dipaboa Jesus do tu hita cara na sederhana alai ringkot taulahon. Saonari taulas ma taringot acara on jala taboto ma aha na didok Jesus dohot na diulahon ibana di acara on. Gabe taboto ma songon dia serep ni roha, habaranion, dohot holong ni rohana. Jala songon dia hita boi maniru parangena i.

3. Songon na didok di Mateus 26:26-28, aha do na patuduhon molo acara Parningotan dibahen Jesus sederhana? Jala manggombarhon aha do roti dohot anggur i?

³ Rap dohot 11 siseanna na setia do parjolo sahali dibahen Jesus acara on. Sederhana do dibahen acara i. Dibuat ibana ma roti dohot anggur na lobi sian acara Paska na baru sae dope diulahon nasida. (Jaha Mateus 26:26-28.) Didok Jesus ma tu angka siseanna i, molo roti na so  marragi dohot anggur i, manggombarhon daging dohot mudarna na sempurna. On patuduhon na laho dilehon ibana do dirina gabe tobusan laho humongkop nasida. Ra ndang songgot be ra roha ni nasida ala sederhana dibahen Jesus acara na ringkot i. Boasa?

4. Aha do sipaingot ni Jesus tu si Marta na patuduhon molo acara tu Parningotan i dibahen sederhana?

⁴ Taingot ma aha na masa piga-piga bulan andorang so Borngin Parningotan i, i ma di taon na patoluhon tingki pelayanan ni Jesus. Tingki i, ro do ibana tu jabu ni ale-alena si Lasarus, si Marta, dohot si Maria. Huhut mangkata-hatai, diajari Jesus do nasida. Alai molo si Marta, sibuk do paradehon sipanganon. Gabe ndang ditangihon ibana be Jesus. Alani i, dipaingot Jesus ma ibana asa unang suda tingkina holan laho paradehon sipanganon, alana ndang i na rumingkot. (Luk. 10:40-42) Diulahon Jesus do na didok na i, piga-piga jom andorang so mate ibana. Dipastihon ibana do na sederhana acara i dibahen. Sian on, aha na boi taparsiajari sian Jesus?

5. Acara na sederhana on, paboahon aha taringot Jesus, jala songon dia i hombar tu Pilippi 2:5-8?

⁵ Sian pangkataion dohot parniulaon ni Jesus, patuduhon molo ibana halak na serep roha. Alani i ndang longang be rohanta, ala dipatudu Jesus serep ni rohana di borngin andorang so mate ibana. (Mat. 11:29) Diboto ibana do na laho lehononna dirina gabe tobusan tu sude jolma. Jala diboto do na laho paheheon ni Jahowa ibana jala bahenonna gabe raja di surgo. Nang pe songon i, ndang dipangido Jesus asa balga hian dibahen acara laho mangingot ari hamamatena. Gariada didok ibana do tu angka siseanna asa diulahon i holan sahali sataon jala sederhana. (Joh. 13:15; 1 Kor. 11:23-25) Sian i taboto ma, ndang ginjang roha ni Jesus. Tontu las do rohanta alana halak na serep roha do na gabe Rajanta di surgo.​—Jaha Pilippi 2:5-8.

6. Songon dia hita boi maniru serep ni roha ni Jesus tingki mangadopi hasusaan?

⁶ Songon dia hita boi maniru serep ni roha ni Jesus? Marhite manarihon angka na ringkot di donganta. (Plp. 2:3, 4) Ingot ma aha na diulahon Jesus di borngin andorang so mate ibana. Diboto Jesus do ndang sadia leleng nai  laho mate nama ibana. Alai nang pe songon i, tongtong do dipingkirhon ibana angka siseanna na setia i. Alana lungun do roha ni nasida molo mate Jesus. Alani i, di borngin andorang so mate Jesus, diajari, dipatogu jala dipapos ibana do roha ni siseanna. (Joh. 14:25-31) Rumingkot do di Jesus mamparohahon na ringkot di halak na asing sian di ibana sandiri. On patuduhon na serep do rohana. Sitiruon na mansai denggan do on di hita!

7. Dung dibahen Jesus Borngin Parningotan na parjolo sahali, songon dia do ibana patuduhon habaranion?

⁷ Dung dibahen Jesus Borngin Parningotan na parjolo sahali, dipatudu ibana do habaranion. Sian dia taboto? Dioloi ibana do parenta ni Amana, nang pe ingkon mate ibana ala ditudu gabe parjahat na mangaleai Debata. (Mat. 26:65, 66; Luk. 22:41, 42) Laho pasangaphon jala pabadiahon goar ni Jahowa, tongtong do ibana setia. Gabe sada dalan do on tu angka halak na olo marhamubaon, asa mandapot hangoluan na salelengna. Jala di tingki i dipatogu Jesus do roha ni angka siseanna asa barani nasida laho mangadopi hasusaan di ari na naeng ro.

8. (a) Aha do na dipaboa Jesus tu angka siseanna na marsihohot? (b) Dung martaon-taon mate Jesus, songon dia do angka siseanna patuduhon habaranion?

⁸ Ndang sai dipingkiri Jesus hasusaan na diadopi ibana. Diparrohahon ibana do aha na dihaporluhon angka siseanna. On patuduhon na barani do Jesus. Dung laho si Judas, dibahen Jesus ma acara na sederhana. Acara on paingothon angka na miniahan na laho mandapot laba nasida sian mudar ni Jesus jala na dohot tu perjanjian na imbaru na dibahen  Jesus. (1 Kor. 10:16, 17) Laho mangurupi nasida asa boi tongtong marsihohot jala asa boi rap dohot Jesus di surgo dipaboa ibana do aha na ingkon diulahon nasida na mambahen las roha ni Jahowa. (Joh. 15:12-15) Jala dipaboa Jesus muse angka hasusaan na laho masa tu nasida. Alai, dipatogu Jesus do nasida jala didok “unang ma mabiar!” (Joh. 16:1-4a, 33) Dung martaon-taon, tongtong do ditiru nasida Jesus laho manarihon donganna jala tongtong barani. Nang pe mangadopi hasusaan, tongtong do nasida masiurupan.​—Heb. 10:33, 34.

9. Songon dia do hita maniru habaranion ni Jesus?

⁹ Tatiru ma habaranion ni Jesus. Umpamana, ingkon barani do hita mangurupi angka dongan na dianiaya manang na dipenjara alani haporseaon ni nasida. Tingki masa sisongon i, ingkon barani do hita mambela nasida. (Plp. 1:14; Heb. 13:19) Cara na asing patuduhon habaranion, i ma tongtong ma barani marbarita na uli. (Ul. 14:3) Songon Jesus, ingkon tongtong ma barani hita marbarita nang pe adong na marsogo ni roha dohot na mangorai hita. Ra, olo do hita gabe mabiar alani i. Molo songon i na masa, aha ma na boi taulahon?

10. Di minggu-minggu andorang so ari Parningotan, aha do na ingkon taulahon jala boasa?

¹⁰ Asa lam barani hita, tarimangi ma pangkirimon na tadapot alani tobusan ni Jesus. (Joh. 3:16; Eps. 1:7) Di minggu-minggu andorang so ari parningotan i, lam tapatogu ma pangargaionta tu tobusan i. Carana, tajaha ma Bibel jala tarimangi ma angka na masa tu Jesus andorang so mate ibana. Tingki ro hita tu Borngin Parningotan i lam taantusi ma aha do lapatan ni angka lambang na diparade di acara i. Molo dung taboto aha laba ni na dibahen Jesus dohot Jahowa tu hita sude,  gabe lam togu pangkirimonta. Jala gabe barani ma hita.​—Heb. 12:3.

11-12. Angka aha do naung taulas?

¹¹ Nunga taparsiajari molo Borngin Parningotan ndang holan paingothon hita taringot arga ni tobusan. Alai gabe taboto ma muse serep ni roha ni Jesus dohot habaranionna. Tontu mandok mauliate do hita ala tongtong dipatudu Jesus angka parangena i jala na rade mate humongkop hita! (Heb. 7:24, 25) Laho patuduhon pangargaionta, tongtong ma taulahon Borngin Parningotan i songon na diparentahon Jesus. (Luk. 22:19, 20) Taulahon ma i pas di tanggal 14 Nisan, i ma tanggal na mansai ringkot ganup taon.

¹² Sian acara na sederhana na dibahen Jesus, taboto ma muse parangena na asing na mambahen ibana olo mate humongkop hita. Tingki di tano, ditanda do Jesus alani parangena i. Parangena na dia do i?

13. Songon dia do Johannes 15:9 dohot 1 Johannes 4:8-10 manggombarhon holong na dipatudu Jahowa dohot Jesus, jala ise do na mandapot laba sian i?

¹³ Mansai holong do roha ni Jahowa tu hita. Jala holan Jesus do na boi pas maniru holong ni Jahowa. (Jaha Johannes 15:9; 1 Johannes 4:8-10.) I do alana rade Jesus mangalehon ngoluna tu hita. Ndang soal hita halak na dimiahi manang ‘biru-biru na asing’, marhite tobusan tahilala do holong ni Jahowa dohot Jesus. (Joh. 10:16; 1 Joh. 2:2) Sian angka lambang na dipangke di Borngin Parningotan, patuduhon holong dohot asi ni roha ni Jesus tu siseanna. Boasa songon i?

14. Songon dia do Jesus patuduhon holongna tu angka siseanna?

¹⁴ Ndang diparentahon Jesus asa dibahen acara na balga tu Borngin Parningotan i. Alani i, nang pe di penjara angka sisean na miniahan, tongtong do boi diulahon nasida acara on ganup taon, nang pe di situasi na maol. (Pgk. 2:10) On patuduhon holong ni roha ni Jesus do tu nasida.

15-16. Nang pe susa situasi ni angka donganta, songon dia do nasida boi mangulahon Borngin Parningotan?

¹⁵ Sian najolo sahat tu saonari, marsitutu do halak Kristen na sintong laho mangulahon acara Borngin Parningotan. Nang pe di situasi na susa, tongtong do diihuthon nasida tudu-tudu laho mambahen acara i. Taparrohahon ma pengalaman ni donganta si Harold King. Tingki dipenjarahon ibana di Cina, tongtong do diulahon ibana acara i. Sip-sip do dibahen ibana angka lambang i, sian sipanganon na adong di ibana. Asa diboto ibana andigan do Borngin Parningotan diulahon di taon i, manat do dietong ibana tanggalna. Dung jumpang tingkina, marende, martangiang jala marjamita do sahalakna di bagasan penjara i.

¹⁶ Pengalaman na asing, i ma sian angka donganta borua na dipenjarahon di kamp konsentrasi saleleng Porang Dunia II. Tingki di kamp konsentrasi i, sip-sip do dibahen nasida acara tu Borngin Parningotan nang pe terancam ngolu ni nasida. Ala sederhana do lambang na laho diparade tu acara i, gabe boi ma i dibahen nasida. Didok nasida, “Jongjong ma hami marhaliang. Dibahen hami ma kursi na gelleng di tonga-tonga. Dung i ditutup hami ma i mamangke kain na bontar jala dipeakhon hami ma  angka lambang i di ginjangna. Ndang dipangolu hami lampu listrik asa unang habotoan. Alai dibahen hami ma lilin. . . . Diulakkon hami ma muse janjinami tu Jahowa, asa dibahen hami sian nasa gogonami laho pabadiahon goarna.” Tontu, sitiruon do haporseaon ni nasida! Dipatudu Jesus do holongna tu hita ala dibahen ibana sederhana acara Parningotan i. Gabe boi ma i taulahon nang pe di situasi na susa!

17. Sungkun-sungkun aha do na boi tarimangi?

¹⁷ Ala naung jonok Borngin Parningotan, tarimangi ma sungkun-sungkun on, ‘Songon dia do ahu boi maniru Jesus patuduhon holong? Holan diringku do na hupingkiri manang hupingkirhon do angka dongan na asing? Hupaksa do ingkon sempurna na dibahen angka dongan tu ahu, manang boi do huantusi hahurangan ni nasida?’ Tatiru ma Jesus jala tapatudu ma na “sapangkilalaan” do hita dohot angka dongan.​—1 Ptr. 3:8.

18-19. (a) Haduan, aha do na paposhon rohanta? (b) Aha do na ingkon taulahon?

¹⁸ Adong do tingkina ndang ulahononta be Borngin Parningotan ari hamamate ni Jesus. Tingki “ro” Jesus di haporsuhon bolon, papunguonna ma angka “na tarpillit” laho tu surgo. Dungkon i ma ndang ulahononta be Borngin Parningotan.​—1 Kor. 11:26; Mat. 24:31.

¹⁹ Nang pe ndang taulahon be i haduan, pos do rohanta sai ingoton ni naposo ni Jahowa do acara na sederhana i, na manggombarhon serep ni roha, habaranion, dohot holong na dipatudu Jesus. Jala haduan, paboaon ni angka halak na hea dohot tu acara i do muse pengalaman ni nasida tu na asing asa dohot mandapot laba. Alai saonari, asa boi tadapot laba sian acara i, marsitutu ma hita maniru serep ni roha, habaranion, dohot holong ni Jesus. Molo taulahon i, pos ma rohanta sai dipasu-pasu Jahowa do hita.​—2 Ptr. 1:10, 11.