TINGKI diajari Jesus angka siseanna cara marbarita na uli, dipaboa ibana do ndang sude halak olo manangihon nasida. (Luk. 10:3, 5, 6) Suang songon i ma saonari. Ra, olo do hita pajumpang tu halak na kasar manang parmuruk. Alani i, ra gabe maol do marasi ni roha tu nasida.

Diantusi halak na marasi ni roha do hasusaan na diadopi sasahalak. Lungun do dihilala ibana, jala lomo rohana mangurupi halak sisongon i. Jadi, aha ma na boi masa molo ndang tapatudu asi ni roha tingki marbarita? On boi mambahen hita ndang ringgas be marbarita tu nasida. Gabe ndang boi taurupi nasida. Ringgas ni rohanta marbarita dipatudos songon api. Jadi asa boi tongtong galak api i, ingkon di tambai soban. Alani i, asa ringgas marbarita, ingkon marasi ni roha ma hita!​—1 Tes. 5:19.

Songon dia ma caranta asa marsitutu patuduhon asi ni roha manang sadihari pe i? Saonari, laho taulas ma tolu sitiruon, i ma sian Jahowa, Jesus, dohot apostel Paulus.

Saleleng marribu taon, godang do gabus na dibahen jolma taringot Jahowa. Alai tongtong do ‘basa Ibana tu halak na so umboto mandok mauliate dohot tu halak na jahat’. (Luk. 6:35) Jadi, songon dia ma Ibana patuduhon asi ni roha? Sabar do Ibana tu sude halak. Jala, lomo do rohaNa asa “malua saluhut jolma”. (1 Tim. 2:3, 4) Nang pe sogo rohaNa mangida hajahaton, alai arga do jolma di Jahowa. Jala lomo rohana asa malua nasida.​—2 Ptr. 3:9.

Diboto Jahowa, malo do Sibolis mangaliluhon jolma. (2 Kor. 4:3, 4) Diajarhon do na so sintong taringot Debata tu nasida sian na metmet. Gabe maol ma diantusi nasida na sintong. Alai, olo do Jahowa mangurupi nasida. Aha ma buktina?

Umpamana, songon dia do roha ni Jahowa mangida halak Ninive? Ala ndang mananda Jahowa, godang do hajahaton na diulahon nasida. Alani i, asi do roha ni Jahowa mangida nasida. Jadi, disuru Jahowa ma si Jona laho pasingothon nasida. Didok Jahowa tu si Jona, “Baliksa pala ahu, tung so marasi ni roha ahu mida Ninive, huta na bolon i, na marisi lobi saratus duapulu ribu jolma, angka na so umboto parsirangan ni siamunna dohot sihambirangna?”​—Jona 4:11.

Mansai arga do jolma di Jahowa. Alani i, tatiru ma cara ni Jahowa na marasi ni roha. Songon Jahowa, rade ma hita mangurupi halak asa mananda Ibana, nang pe hira na so olo nasida manangihon.

 Porlu do taboto boasa adong na so olo manjangkon barita na tapasahat. Ra, ala sala do pangantusion ni nasida taringot Bibel. Manang, ala godang do na diida nasida mangangku halak Kristen mangulahon na roa. Ra, ala dibege nasida do hatorangan na so sintong taringot hita. Na asing, ra mabiar molo annon direhei keluargana dohot angka donganna.

Adong do halak na tajumpangi, susa ala hea mandapot pengalaman na so denggan. Songon na dipaboa si Kim sahalak utusan injil, hea do ibana diroro sasahalak tingki marbarita. Alana, di inganan penugasanna godang do halak na susa jala mago arta ni nasida ala porang na hea diadopi. Dihilala nasida ndang adong be pangkirimon. Marsak jala gabe ndang porsea be nasida tu manang ise pe. Alani i, jotjot ma nasida mangorai Sitindangi tingki marbarita.

Jadi, aha ma na mangurupi si Kim? Diingot ibana do ayat na mandok, “Sabar do halak na marbisuk”, na disurat di Poda 19:11, Bibel siganup ari. Ala dirimangi ibana do situasi ni nasida, gabe lam marsitutu ma ibana patuduhon asi ni roha. Adong do piga-piga halak na burju, jala adong do na gabe kunjunganna.

Rimangi ma, ‘Molo ahu gabe nasida, hape adong na hubege angka na so denggan taringot Sitindangi, olo dope ahu manjangkon barita i?’ Ra, olo do muruk hamu tu Sitindangi. Jadi, ingkon marasi ni roha do Sitindangi tu hamu. Songon na didok Jesus, molo lomo rohanta dibahen na denggan tu hita, hita pe ingkon denggan ma maradophon nasida. Jadi, ingkon taantusi do pangkilalaan ni nasida. Jala, ingkon sabar do hita tu nasida nang pe ndang mura mangulahon i.​—Mat. 7:12.

Dipatudu si Paulus do asi ni roha nang pe tu na mamuruki ibana tingki marbarita. Boasa? Alana ibana pe hea do songon i. Didok ibana, “Ginjang do rohangku najolo, huleai do Debata jala hulelei naposona. Alai dipatuduhon do asi ni rohana tu ahu, ai huulahon pe i andorang so porsea do ahu jala ndang huboto na huulahon i.” (1 Tim. 1:13) Diboto do nunga marasi ni roha Jahowa dohot Jesus tu ibana. Jadi, diantusi ma boasa halak mangorai ibana tingki marbarita, ala ibana pe hea do songon i.

Hea do si Paulus pajumpang tu halak na fanatik tingki marbarita. Songon dia ma ibana mangadopi i? Molo tajaha Ulaon ni Apostel 17:16, tingki di Atena ibana, “marsak ma rohana mangida godang ni gana-ganaan na di kota i”. Nang pe songon i, dibahen ibana do topik  taringot na dihaporseai nasida gabe siulason tingki marbarita. (Ul. 17:22, 23) Jadi, si Paulus marbarita mangihuthon situasi ni angka halak ‘asa boi malua deba sian nasida’.​—1 Kor. 9:20-23.

Tatiru ma cara ni si Paulus marbarita tingki pajumpang tu halak na so denggan manangihon hita, manang tu halak na fanatik. Boi ma taulas taringot aha na diantusi nasida, asa boi paboahon “barita na uli” tu nasida. (Jes. 52:7) Didok donganta si Dorothy, “Di inganannami marbarita, godang do halak nunga diajarhon molo Debata i, Debata na kejam jala holan manguhumi do Ibana. Las do rohangku ala porsea dope nasida adong do Debata. Alai, hupaboa do na didok Bibel tu nasida, molo Jahowa i ma Debata na parholong, jala dilehon do pangkirimon tu hita.”

Ingkon masipatoguan ma hita dohot angka dongan tingki marbarita. Songon na didok si Jessica, tingki marbarita ibana dohot angka dongan na asing, ndang olo nasida manaringoti angka pengalaman ni nasida na so denggan tingki marbarita. Gariada, angka pengalaman na denggan do na dihatai nasida, nang pe adong hasusaan na diadopi tingki marbarita.

Tangkas do diboto Jahowa hasusaan na taadopi tingki marbarita. Alai, las hian do rohaNa molo olo hita maniru asi ni rohaNa! (Luk. 6:36) Nang pe sabar Jahowa jala marasi ni roha, alai adong do tingkina Ibana marrimas. Alani i, mansai ringkot do marbarita na uli di tingkinta saonari. (2 Tim. 4:2) Jadi, tongtong ma hita ringgas marbarita. Jala, marasi ni roha ma hita tu “saluhut jolma”.