1, 2. Boasa didok Debata si Daniel sahalak ”baoa hasudungan ni roha”, jala songon dia do hita maniru si Daniel?

TINGKI ditaban halak Jahudi tu Babel, gok do ganaganaan disi jala pangisina manomba begu. Halak Jahudi na marsihohot songon si Daniel dohot tolu donganna, ndang olo mangihuthon halak Babel. (Dan. 1:6, 8, 12; 3:16-18) Diloas do Jahowa manopa nasida jala holan Ibana do na disomba. Nang pe si Daniel mangolu di tongatonga ni halak na so manomba Jahowa, didok surusuruan ni Debata do ibana ”baoa hasudungan ni roha”!​—Dan. 10:11, 19.

² Dipaboa di Bibel, dipamasuk sitopa hudon do tano liat tu sada cetakan. Saonari taboto, marhuaso do Jahowa mamarenta dohot manopa angka bangso. (Jaha Jeremia 18:6.) Marhak do muse Ibana manopa ganup halak. Alai, ndang dipaksa Jahowa sasahalak asa muba. Lomo rohaNa molo rade hita ditopa Ibana. Di artikel on, taparsiajari ma songon dia asa mura hita ditopa Jahowa.  Taulas ma tolu sungkunsungkun on: (1) Songon dia do bahenonta pasidingkon parange na mambahen hita ndang olo manjalo poda sian Debata? (2) Parange aha do na ingkon tapatudu asa mura hita ditopa? (3) Songon dia do natuatua maniru Debata tingki manopa ianakhonna?

3. Parange aha do na mambahen jogal rohanta? Bahen ma tudosan.

³ Poda 4:23 mandok, ”Sian saluhut sijagaon i, gumodang ma jaga roham, ai sian i do ruar angka mual hangoluan.” Asa unang jogal rohanta, tapasiding ma parange na roa, songon ginjang ni roha, ndang marhaporseaon dohot mangulahon dosa. Molo ndang manat, on mambahen hita ndang mangoloi Jahowa. (Dan. 5:1, 20; Heb. 3:13, 18, 19) On ma na masa tu Raja Usia sian Juda. (Jaha 2 Kronika 26:3-5, 16-21.) Dung gabe raja si Usia, diurupi Jahowa do ibana ala rade mangoloi. Alai dung lam togu harajaonna, ginjang ma rohana. Alani ginjang ni rohana, laho ma ibana tu bagas joro laho manutung daupa di langgatan, sasintongna ingkon malim do na boi mangulahon i. Tingki diorai angka malim ibana, tarrimas ma si Usia! Diuhum Jahowa ma si Usia, hona kusta ma ibana sahat tu na mate.​—Poda 16:18.

4, 5. Aha do na masa molo tapasombu ginjang ni rohanta? Bahen ma tudosan.

⁴ Molo ndang tapasiding ginjang ni roha, olo do dumenggan hita di rohanta sian angka na asing, jala ndang olo be hita manangihon poda sian Bibel. (Poda 29:1; Rom 12:3) On ma na masa tu sahalak sintua na margoar si Jim. Ndang satolop ibana dohot angka sintua di huria taringot sada parsoalan. Si Jim paboahon, ”Hudok ma tu angka sintua i, ndang adong holong ni rohamuna jala hutadingkon ma nasida.” Hirahira onom bulan dungkon i, pinda ma ibana tu huria na asing, alai ndang dilantik be ibana gabe sintua. Hansit ma rohana jala didok rohana ibana do na sintong. Ndang marpungu be ibana saleleng sampulu taon. Diangkui ibana do na ginjang rohana jala disalahon ma Jahowa taringot na masa tu ibana. Nang pe ro angka donganta mangurupi, ndang olo ibana manjangkon.

⁵ Si Jim mandok, ”Sai hupingkiri do pandapot ni angka sintua i, ala didok rohangku sala do nasida.” Na masa tu si Jim patuduhon ginjang ni roha mambahen hita pasintongkon dirinta. Tingki masa sisongon i, gabe songon tano liat na maol ditopa ma hita. (Jer. 17:9) Hea do hansit rohamu dibahen donganta? Muruk do hamu tingki ndang mandapot hak na sumurung be hamu di huria? Gabe ginjang do rohamuna, manang rumingkot do di hamu mardame dohot dongan jala marsihohot tu Jahowa?​—Jaha Psalmen 119:165; Kolosse 3:13.

6. Aha do na boi masa molo taulahon dosa?

⁶ Tingki sasahalak mangulahon dosa jala sai ditabunihon dosana, boi do i mambahen ibana maol manjalo poda sian Debata. On mambahen ibana  mura mangulahon dosa. Sahalak donganta baoa mandok, tingki diulahon na sala ndang pintor mangkuling panggora ni rohana. (Pjm. 8:11) Donganta baoa na asing na jotjot manonton pornografi mandok, ”Gabe jotjot do ahu marungutungut tu angka sintua.” Ala nunga somal ibana manonton pornografi, sega ma paralealeonna tu Jahowa. Tingki adong mamboto hasomalanna on, diurupi sintua ma ibana. Tutu do hita sude mardosa. Alai, molo jotjot hita marungutungut tu halak na mamodai hita jala tongtong mangulahon dosa, boi do on mambahen jogal rohanta.

7, 8. (a) Songon dia do halak Israel najolo patuduhon na so marhaporseaon nasida? (b) Aha do parsiajaranna tu hita?

⁷ Tingki dipalua bangso Israel sian Mesir, diida nasida do godang tanda halongangan dibahen Jahowa. Alai, dung jonok nasida tu tano na dijanjihon i, dipajogal nasida ma rohana. Boasa? Ala ndang marhaporseaon nasida tu Debata. Ndang marpos ni roha nasida tu Jahowa, gariada marungutungut do nasida tu si Musa. Dipangido nasida muse asa mulak tu Mesir, inganan ni nasida diparhatoban! Didok Jahowa ma, ”Sadia leleng nai sai mangaleai bangso on tu Ahu?” (4 Mus. 14:1-4, 11, Bibel siganup ari; Ps. 78:40, 41) Ala jogal roha ni bangso Israel jala ndang marhaporseaon, mate ma nasida di padang pasir.

⁸ Ala lam jonok hita tu tano na imbaru, lam jotjot ma haporseaonta diunjuni. Tapatogu ma haporseaonta. Songon dia carana? Tarimangi ma hata ni Jesus di Mateus 6:33. Tasungkun ma dirinta, ’Di parngoluonku, pos do rohangku tu poda ni Jesus? Ala mangalului hepeng, olo do ahu ndang marbarita na uli manang ndang ro marpungu? Songon dia do bahenonku molo habis tingki dohot gogongku di parkarejoan? Loasonku do portibi on manopa jala mangambati ahu manomba Jahowa?’

9. Boasa ingkon tauji haporseaonta, jala songon dia do hita mangulahon i?

⁹ Molo ndang taihuthon poda ni Bibel taringot halak na dipabali sian huria, parsaoran na roa manang hiburan, gabe jogal rohanta. Aha do na ingkon taulahon molo masa on tu hita? Ringkot tapatogu haporseaonta! Bibel mandok, ”Uji hamu ma dirimuna [haporseaonmuna] sandiri jala tangkasi hamu ma dirimuna.” (2 Kor. 13:5, Bibel siganup ari) Jujur ma hita tu dirinta, jala tapangke ma Bibel mamodai hita.

10. Aha do na mangurupi hita asa songon tano liat na mura ditopa Jahowa?

¹⁰ Diurupi Debata do hita marhite  Bibel, parpunguan, dohot ulaon marbarita asa boi songon tano liat na mura ditopa. Molo tajaha jala tarimangi Bibel ganup ari, mura ma hita ditopa Jahowa. Disuru Jahowa do raja ni Israel manurat PatikNa jala manjaha i ganup ari. (5 Mus. 17:18, 19) Diboto angka apostel, ringkot do manjaha jala mangarimangi hata ni Debata tu ulaon nasida marbarita. Dipangke nasida do Angka Buku Heber marratus hali tingki mambahen surat, marbarita na uli, jala dijujui do na asing mamangke Hata ni Debata. (Ul. 17:11) Songon i ma hita, ingkon taboto do ringkot ni manjaha jala mangarimangi hata ni Debata ganup ari. (1 Tim. 4:15) On mangurupi hita marserep ni roha jala topaon ni Jahowa ma hita mangulahon lomo ni rohaNa.

11, 12. Songon dia do Jahowa mamangke huria Kristen laho manopa hita hombar tu na ringkot di hita? Bahen ma tudosan.

¹¹ Diboto Jahowa do na porlu di hita jala dipangke do huria Kristen manopa hita. Si Jim na dipaboa di parsiajaran on, manguba parangena tingki adong sintua na mangurupi ibana. Didok si Jim, ”Ndang dilului sintua i hasalaan manang hahuranganku. Alai, dipatudu do serep ni roha tingki mangurupi ahu.” Dung tolu bulan, ditogihon sintua i ma si Jim asa ro marpungu. Didok si Jim, burju do angka  dongan na di huria manjangkon ahu. Holong ni nasida mangurupi ahu manguba pingkiranku. Ndang sai dipingkiri ibana be pangkilalaanna i. Angka sintua dohot tungganeboruna mangurupi ibana mulak muse manomba Jahowa. Dapot ni si Jim do muse laba sian artikel ”Yehuwa Tidak Dapat Dipersalahkan” dohot ”Melayani Yehuwa dengan Loyal” na adong di Menara Pengawal 15 November 1992.

¹² Dung i, gabe sintua ma muse si Jim. Diurupi jala dipatogu ibana ma haporseaon ni sahalak donganta na pangkilalaanna sarupa songon ibana. Dirimpu ibana togu paralealeonna tu Jahowa, hape sasintongna ndang! Disolsoli ibana do ginjang ni rohana na mambahen ibana mangida hagaleon ni na asing jala ndang mamingkiri na rumingkot.​—1 Kor. 10:12.

13. Songon dia do ulaon marbarita na uli mangurupi hita patuduhon parange na denggan, jala songon dia do i marlaba tu hita?

¹³ Ulaon marbarita na uli tongtong mangurupi hita marserep ni roha. Boasa boi songon i? Tingki marbarita, ingkon denggan do parangenta jala ingkon tapatudu parbue ni tondi. (Gal. 5:22, 23) Mangarimangi pangalaho ni Debata tingki marbarita na uli, mangurupi hita gabe halak na burju. Molo tatiru Jesus, rade ma halak manangihon barita na tapasahat jala muba ma pandapot ni nasida tu hita. Umpamana, dua halak Sitindangi di Australia marbarita tu sahalak borua, alai muruk ma borua on jala diusir ma nasida. Burju do Sitindangi on mangalusi jala laho ma nasida sian i. Dung i, disolsoli borua on ma pambahenanna, jala ditongos ma surat tu kantor cabang. Didok ma, ”Loak hian do huhilala ala sogo rohangku tu dua Sitindangi na pasahathon hata ni Debata jala palaohon nasida.” Sian pengalaman on, taida ma labana molo lambok hita tingki marbarita. Tutu ma, tingki marbarita hita mangurupi na asing, hita pe diurupi patuduhon parange na denggan.

14. Aha do na ingkon ulahonon ni natuatua asa denggan manopa (mangajari) ianakhonna?

¹⁴ Las do roha ni dakdanak marsiajar jala mura do nasida diajari. (Mat. 18:1-4) Denggan ma molo natuatua mangurupi ianakhonna mangantusi jala mangkaholongi hasintongan sian na metmet. (2 Tim. 3:14, 15) Ingkon tongtong do adong hasintongan i di bagasan roha ni natuatua jala diulahon di parngoluon. On mangurupi ianakhon ni nasida mangkaholongi hasintongan. Tingki dipinsang, diantusi ianakhonna ma molo pinsangpinsang i patuduhon holong ni Jahowa dohot natuatuana.

15, 16. Songon dia do bahenon ni natuatua patuduhon pos ni roha ni nasida tu Debata tingki dipabali anakna sian huria?

 ¹⁵ Sipata, nang pe naung diajarhon hasintongan tu dakdanak, olo do nasida manadingkon hasintongan jala dipabali sian huria. Gabe susa ma keluarga. Sahalak donganta borua sian Afrika Selatan mandok, ”Tingki dipabali itongku sian huria, songon na mate ma ibana dihilala hami. Lungun pangkilalaan!” Aha do na diulahon nasida? Mangihuthon tudutudu sian Bibel. (Jaha 1 Korint 5:11, 13.) Diboto natuatuana do, adong do labana molo mangoloi patik ni Debata. Pos do roha nasida molo dipabali sasahalak sian huria, i patuduhon holong ni Jahowa tu ibana. Ndang olo nasida mangkatahatai tu na dipabali i molo so adong na ringkot.

¹⁶ Songon dia do pangkilalaan ni ianakhonna i? Didok ibana, ”Huboto do ndang sogo roha ni keluargangku tu ahu, alai na mangoloi Jahowa dohot organisasiNa do nasida.” Didok muse, ”Tingki tapangido asa diurupi jala disalpuhon Jahowa hasalaanta, taboto ma na ringkot do Jahowa di hita.” Pingkirhon ma las ni roha ni keluarga on dung mulak anakna manomba Jahowa! Las ma rohanta molo tongtong taoloi Debata.​—Poda 3:5, 6; 28:26.

17. Boasa ingkon tongtong taoloi Jahowa saleleng ngolunta, jala songon dia do on parohon laba tu hita?

¹⁷ Panurirang Jesaya paboahon taringot halak Jahudi na mulak sian Babel, nasida mandok, ”Ale Jahowa. Ho do amanami! Tano do ianggo hami, jala ho do sitompa hami, jala jadijadian ni tanganmu do hami sudena.” Dipangido nasida muse tu Jahowa, ”Unang tongtong paingotingot hajahatonnami! Ua ida jala tatap hami, ai bangsom do hami sude!” (Jes. 64:7, 8) Molo marserep ni roha jala tongtong taoloi Jahowa, arga ma hita di Ibana songon si Daniel. Tongtong ma hita ditopa Jahowa marhite HataNa, tondiNa dohot organisasiNa, jala di ari na naeng ro, digoari ma hita ”anak ni Debata”.​—Rom 8:21.