1, 2. (a) Boasa sude halak Jahudi mamboto hata di 5 Musa 6:4? (b) Boasa didok si Musa hata on?

SALELENG marratus taon, hata di 5 Musa 6:4 nunga gabe tangiang na jotjot dipangke halak Jahudi. Digoari ma tangiang on Shema, on ma hata na parjolo di ayat i na disurat di bahasa Heber. Songon i ma tangiang ni halak Jahudi ganup manogot dohot borngin, na patuduhon holan Jahowa na disomba nasida.

² On ma hata parpudi sian si Musa tu halak Israel. Taon 1473 SM, nunga sahat bangso Israel di Moab jala nunga rade nasida manaripari sungai Jordan laho bongot tu Tano Kanaan. (5 Mus. 6:1) Nunga 40 taon si Musa manguluhon halak Israel, alani i dipatogu ma roha ni nasida asa boi mangadopi godang hasusaan. Porlu do nasida marhaporseaon jala marsihohot tu Jahowa. Dipatogu si Musa ma rohanasida laho mangulahon i. Dung dipaboa sampulu patik dohot uhum na dilehon Jahowa, didok si  Musa ma sipaingot na ringkot na disurat di 5 Musa 6:4, 5. (Jaha.)

3. Sungkunsungkun aha do sian parsiajaran on na ringkot tapingkirhon?

³ Nunga diboto halak Israel, Debata ”Jahowa Sasadasa do”. Holan Jahowa do na disomba nasida, i ma Debata ni ompunasida. Antong, boasa dipaingot si Musa halak Israel taringot ”Jahowa Sasadasa do”? Songon dia do on hombar tu mangkaholongi Debata sian nasa roha, nasa ateate, dohot nasa gogo? Songon dia do hata di 5 Musa 6:4, 5 marlaba tu hita?

4, 5. (a) Aha do muse lapatan ni hata ”Jahowa Sasadasa do”? (b) Songon dia do Jahowa marimbar sian debata na asing?

⁴ Tandi. Hata ”Jahowa Sasadasa do”, lapatanna ndang adong na asing na songon Ibana. Boasa dipangke si Musa hata on? Hata on paingothon halak Israel holan Jahowa do na ingkon disomba. Ndang ajaran debata sitolu sada na ditaringoti si Musa. Alana, Jahowa, i ma Debata na manompa langit dohot tano on, jala na tama mamarenta saluhutna. Ibana do Debata na sintong, ndang adong Debata na songon Ibana. (2 Sam. 7:22) Ndang boi halak Israel mangihuthon angka halak na tading di humaliang ni nasida na manomba ganaganaan. Dihaporseai nasida do ganaganaan i mangatur sude na masa di tano on.

⁵ Umpamana, halak Mesir manomba dewa Ra, i ma dewa matahari, Nut, i ma dewa langit, Geb, i ma dewa tano, Hapi, i ma dewa Nil, dohot angka dewa binatang. Dipatudu Jahowa do huasoNa maradophon angka dewa on tingki parohon sampulu tulah tu Mesir. Baal do debata na disomba halak Kanaan. Dihaporseai nasida do Baal mangalehon tondi na so boi mate. Porsea do nasida tu dewa langit, dewa udan, dohot dewa ronggur. Di godang inganan, porsea do nasida Baal na mangalinggomi. (4 Mus. 25:3) Ingkon diingot halak Israel, Jahowa do Debata na sintong jala tandi sian na asing.​—5 Mus. 4:35, 39.

6, 7. Aha dope muse lapatan ni ”Sasadasa”, jala songon dia do Jahowa patuduhon ”Sasadasa” do Ibana?

⁶ Marsihohot jala Ndang hea muba. Hata ”Jahowa Sasadasa” boi do lapatanna ingkon saut sude janjiNa dohot ulaonNa. Debata Jahowa ndang mubauba. Ibana Debata na sintong jala marsihohot tu janjiNa. Umpamana, dijanjihon do tu si Abraham, pinomparna na mangingani tano Kanaan. Dipatudu Jahowa do godang tanda halongangan laho pasauthon janjiNa on. Nang pe naung opat ratus tolupulu taon dijanjihon, tongtong do  digohi Jahowa janjiNa jala ndang hea muba sangkapNa.​—1 Mus. 12:1, 2, 7; 2 Mus. 12:40, 41.

⁷ Dung marratus taon, didok Jahowa tu halak Israel na gabe sitindangiNa, ”Ahu do Debata. Ndang adong debata na asing nang di tingki naung salpu, nang di tingki na naeng ro.” Dipasaut Jahowa do sude sangkapNa jala ndang hea muba, didok Ibana, ”Ahu do Debata, jala tongtong do i.” (Jes. 43:10, 13, Bibel siganup ari; 44:6; 48:12) Hak na sumurung do di halak Israel manomba Debata na tongtong marsihohot! Hak na sumurung do i di hita saonari.​—Mal. 3:6; Jak. 1:17.

8, 9. (a) Aha do na dipangido Jahowa sian naposoNa? (b) Songon dia do Jesus patuduhon ringkot ni patik ni si Musa?

⁸ Dipaboa si Musa tu halak Israel, ndang hea muba holong ni Jahowa tu nasida. Alani i, holan Jahowa do na ingkon sombaon ni halak Israel jala ingkon haholonganna sian nasa roha, ateate dohot sian nasa gogo ni nasida. Ingkon ajarhonon ni natuatua do tu ianakhonna taringot Jahowa ganup tingki asa ianakhonna rade manomba Jahowa.​—5 Mus. 6:6-9.

⁹ Ndang hea muba sangkap ni Jahowa jala ndang hea muba na pinangidoNa sian angka naposoNa. Asa las roha ni Jahowa, holan Ibana do na ingkon tasomba jala tahaholongi sian nasa roha, pingkiran dohot gogonta. Didok Jesus do i patik na umbalga. (Jaha Markus 12:28-31.) Saonari, taparsiajari ma songon dia parniulaonta patuduhon na porsea do hita tu Debata ”Jahowa Sasadasa”.

10, 11. (a) Aha do lapatan ni holan Jahowa do na tasomba? (b) Songon dia do na poso Jahudi di Babel patuduhon holan Jahowa do na disomba nasida?

¹⁰ Sasada Jahowa do Debatanta. Holan tu Ibana do talehon panombaonta. Ndang boi hita manomba debata na asing manang mangihuthon ajaran na so sintong tingki manomba Jahowa. Ndang holan ala na gumogo manang tumimbul Ibana sian debata na asing. Ibana do Debata na sintong, holan Ibana do na ingkon tasomba.​—Jaha Pangungkapon 4:11.

¹¹ Di buku Daniel, tajaha ma taringot halak Jahudi na poso, i ma si Daniel, si Hanania, si Misael dohot si Azaria. Tingki ndang olo mangallang sipanganon na dipelehon tu ganaganaan, on patuduhon holan Jahowa do na disomba nasida. Ndang olo si Daniel dohot tolu donganna marsomba tu patung mas ni si Nebukadnesar. Jahowa do na dioloi nasida jala tongtong marsihohot.​—Dan. 1:1–3:30.

12. Molo holan Jahowa na tasomba, aha dope na ingkon tapasiding?

¹² Ingkon Jahowa do na rumingkot  di ngolunta. Ingkon manat do hita asa unang adong na mangambati hita manomba Ibana. Aha do na boi mangambati hita manomba Ibana? Marhite sampulu patik, didok Jahowa tu halak Israel asa unang manomba debata na asing manang ganaganaan. (5 Mus. 5:6-10) Saonari, godang do ragam ni ganaganaan. Alai, ndang muba dope na dipangido Jahowa sian hita. Tongtong do Debatanta, ”Jahowa Sasadasa”. Taparsiajari ma songon dia hita saonari pasidingkon ganaganaan.

13. Aha do na mambahen hita mangkaholongi na asing sian Jahowa?

¹³ Disurat do di Kolosse 3:5 (jaha), nasa na manegai paralealeonta tu Jahowa. Dipatudos do di ayat i, hahisapon songon manomba ganaganaan. Boasa songon i? Molo holongan di arta manang hamoraon hita, on boi mangarajai hita. Angka dosa na dipaboa di Kolosse 3:5, umpamana hahisapon, dipatudos songon manomba ganaganaan. Molo tahalomohon angka na dipaboa di ayat i, gabe holongan tusi ma hita sian tu Jahowa. Dung i, ndang sasada Jahowa be Debata di hita. Tontu, ndang lomo rohanta masa i tu hita.

14. Sipaingot aha do na dipaboa apostel Johannes taringot mangkaholongi Debata?

¹⁴ Adong do tudosan na sarupa na dipaboa apostel Johannes. Ibana paingothon, molo dihaholongi sasahalak na adong di portibi on, i ma ”lomolomo ni roha ni daging, giotgiot ni roha ni mata dohot na manenganengahon sinadongan” jala ”ndang di bagasan ibana holong ni roha ni Ama i”. (1 Joh. 2:15, 16) Alani i, porlu manat taparrohahon dirinta asa unang tahaholongi portibi on. Olo do ra gabe taharingkothon hiburan, artis, model ni pangkean dohot gaya ni jolma di portibi on. Manang, tahalomohon ”hatimbulon”, songon singkola na satimbotimbona. (Jer. 45:4, 5) Ala nunga jonok tano na imbaru, tongtong ma taingot hata na patoguhon sian si Musa! Molo taantusi jala pos rohanta tu ”Jahowa Debatanta i, Jahowa Sasadasa”, ingkon tasomba ma Ibana hombar tu lomo ni rohaNa.​—Heb. 12:28, 29.

15. Boasa dipaingot si Paulus halak Kristen taringot Debata, ”Jahowa Sasadasa”?

¹⁵ Hata ”Jahowa Sasadasa” mangurupi hita mangantusi Jahowa mangkalomohon naposoNa marsada ni roha. Di huria Kristen abad na parjolo, adong halak Jahudi, halak Junani, halak Rom dohot halak sian bangso na asing. Marasingasing do haroroan ni nasida, hasomalan dohot na dihalomohonna. Ndang mura nasida mangihuthon panombaon na sintong. Alani  i, porlu do apostel Paulus paingothon halak Kristen asa manomba sada Debata, i ma Jahowa.​—Jaha 1 Korint 8:5, 6.

16, 17. (a) Surirang na dia do na digohi saonari, jala aha do pangkorhon ni on? (b) Aha do na boi manegai hasadaonta?

¹⁶ Songon dia do di huria Kristen saonari on? Panurirang Jesaya mandok, ”di ujung ni angka ari”, marroan ma halak sian saluhut bangso laho manomba Jahowa. Dohonon ni nasida ma, ”Asa diajarhon tu hita angka dalanna, jala mardalani hita di angka lapangna [dalanNa].” (Jes. 2:2, 3) Las do rohanta ala nunga digohi surirang on saonari! Angka donganta marroan sian marragam bahasa, inganan dohot hasomalan. Nang pe songon i, marsada do hita sude manomba Debata Jahowa. Alai, olo do adong hasusaan na masa ala marasingasing do haroroanta be.

¹⁷ Umpamana, songon dia do pangkilalaanmu maradophon donganta na asing hasomalanna? Asing bahasana,  pangkeanna, cara marpingkir dohot sipanganonna. Olo do hamu marsaor tu nasida? Songon dia do hamu maradophon sintua na umposo sian hamu, manang sintua na sian bangso na asing? Molo ndang manat hita, on boi manegai hasadaonta di huria.

18, 19. (a) Aha do poda na dipaboa di Epesus 4:1-3? (b) Aha do na boi taulahon asa tongtong huria marsada ni roha?

¹⁸ Songon dia do hita pasidingkon parange sisongon i? Dipodai si Paulus do halak Kristen di Epesus. Marragam do haroroan ni halak na tading di kota on. (Jaha Epesus 4:1-3.) Didok ibana muse taringot parange songon haburjuon, halambohon, hasabaron dohot holong. Parange on dos songon tiang na manahan bangunan asa togu. Alai, ingkon marsitutu do manjaga sada bangunan asa tongtong togu. Didok si Paulus asa marsitutu nasida ”mangaradoti hasadaon ni Tondi”.

¹⁹ Ingkon marsitutu do hita manjaga hasadaon di huria. Songon dia hita mangulahon i? Parjolo, porlu tapatudu parange na dipaboa si Paulus, i ma haburjuon, hasabaron, halambohon dohot holong. Paduahon, ingkon marsitutu do hita patuduhon hasadaon ni tondi ”pinadomu ni dame”. Parsalisian dos songon lubang na mambahen hita ndang marsada. Alani i, ingkon marsitutu do hita pasidingkon parsalisian asa tongtong dame jala marsada ni roha.

20. Songon dia do hita patuduhon na taantusi do lapatan ni ”Jahowa Debatanta i, Jahowa Sasadasa”?

²⁰ ”Jahowa Debatanta i, Jahowa Sasadasa do.” Hata on patoguhon roha! Patoguhon roha ni halak Israel asa marhabengeton manaon hasusaan tingki bongot tu tano Kanaan. Hata on pe patoguhon rohanta mangadopi hasusaan bolon jala gabe parsidohot tu Paradeiso. Tongtong ma panombaonta talehon tu Jahowa. Ingkon tahaholongi jala tasomba Ibana sian nasa roha, pingkiran dohot gogonta. Ingkon marsitutu do hita manjaga hadameon dohot hasadaon tu angka donganta. Molo tongtong taulahon songon on, papunguon ni Jesus ma hita tu punguan ni birubiru, jala idaonta ma hata ni Jesus na digohi, ”Ro ma hamu, angka na pinasupasu ni Damang, tean hamu ma harajaon i, na pinature di hamu sian haoojak ni tano on!”​—Mat. 25:34.