Si Haykanush sahalak penyiar na so tardidi dope sian Armenia, mandapot paspor di jonok ni jabuna. Di paspor i, adong kartu kredit dohot godang hepeng. Dipaboa ibana ma tu tungganedolina sahalak penyiar na so tardidi dope.

Susa do nasida di parhepengon jala adong utangna. Alai, dipaulak nasida do hepeng i tu alamat na di paspor i. Songgot do roha ni halak na magoan i dohot keluargana. Si Haykanush dohot tungganedolina mandok, dipaulak nasida pe i ala marsiajar Bibel do nasida. Tingki na denggan do on di nasida laho paboahon taringot Sitindangi Ni Jahowa, jala dilehon nasida ma publikasinta tu keluarga i.

Naeng dilehon keluarga i ma hepeng hamauliateon tu si Haykanush, alai ndang olo ibana manjalo. Alai marsogotna i, ro ma tungganeboru ni na magoan i manjumpangi keluarga ni si Haykanush laho mangalehon cincin berlian tu ibana.

Godang do halak longang mangida hajujuron ni si Haykanush dohot tungganedolina. Alai, songon dia do molo Jahowa? Longang do rohaNa mangida hajujuron ni nasida?

Ndang maol mandapot alus ni sungkunsungkun i. Boasa? Diboto naposo ni Debata, ummarga do maniru pangalaho ni Jahowa sian berlian, mas manang arta na asing. Na arga di Jahowa ndang dos dohot na arga di jolma. (Jes. 55:8, 9) Alani i, rumingkot do maniru pangalaho ni Jahowa di naposoNa.

Didok do di Bibel taringot bisuk dohot pangantusion. Poda 3:13-15, Bibel Siganup ari mandok, ”Martua ma halak na dapotan habisuhon dohot pangantusion. Gumodang do labana sian apala na dapotan perak, jala ummarga do i sian mas. Ummarga do i sian angka permata; jala ndang tarpatudos i tu manang aha na dihalomohonmu.” Tangkas ma, ummarga do parange na denggan di Jahowa sian angka arta.

Aha do muse na taparsiajari taringot hajujuron?

Debata na jujur do Jahowa. Ndang olo Ibana ”margabus”. (Tit. 1:2) Apostel Paulus paboahon tu halak Kristen di abad na parjolo, ”Tangiangkon hamu ma hami! Ai pos do rohanami, na so pola solsolan ni panggora ni roha i hami, ala huringkoti hami marparange na denggan di na saluhut.”​—Heb. 13:18.

Jesus ma sitiruon na denggan. Umpamana, tingki Sintua ni Malim Kayapas mandok, ”Hupatolon ma Ho tu Debata Siparngolu i, asa dipaboa Ho tu hami, manang na tutu Ho Kristus Anak ni Debata!” Jujur do Jesus paboahon na tutu ibana Messias. Dipaboa ibana do na sasintongna, nang pe i gabe dalan ni Sanhedrin mandok ibana sipangaleai jala patut dibunu.​—Mat. 26:63-67.

Songon dia do molo hita? Molo adong na mangalehon hepeng tu hita alai disuru margabus, olo do hita?

Di tingki parpudi on, maol do hita jujur, ala ”mangkaholongi dirina ma  jolma” jala impolan di perak. (2 Tim. 3:2) Tingki susa di parhepengon manang maol mangalului karejo, adong na mandok ndang sala manangko, manipu dohot mangulahon ulaon na so jujur. Nunga somal pingkiran sisongon i jala ninna rohanasida, ndang boi denggan parngoluonta molo jujur. Adong do halak Kristen na so jujur jala mangomo sian dalan na so tama. Gabe roa ma goar ni nasida di huria.​—1 Tim. 3:8; Tit. 1:7.

Alai, godang do halak Kristen maniru Jesus. Diboto nasida do, maniru pangalaho ni Debata rumingkot sian arta manang hamoraon. I do alana, halak Kristen na poso ndang olo menyontek di singkola asa mandapot nilai na denggan. (Poda 20:23) Molo jujur hita, ndang  sai mandapot hadiah songon si Haykanush. Alai songon na nidok ni Bibel, molo jujur hita ias ma panggora ni rohanta, jala i do na ummarga.

Si Gagik mandok, ”Andorang so Sitindangi, karejo di perusahaan na balga do ahu. Nampunasa perusahaan i ndang olo manggarar pajak na balga. Holan pajak na gelleng do dilaporhon ibana. Ala ahu sahalak menejer, jotjot do ahu disuru asa husogok parkantor pajak, asa unang pola digarar hami sude pajak ni perusahaan i. Ujungna, gabe ditanda ma ahu jolma na so jujur. Alai, dung marsiajar Bibel, kaluar ma ahu sian perusahaan i nang pe godang gajingku disi. Hubahen ma bisnis na baru. Sian mulana, pintor hudaftarhon do izin ni perusahaanku jala hugarar do sude pajakna.”​—2 Kor. 8:21.

Didok si Gagik muse, ”Ndang godang be pandapotanku, jala maol do mangalului hepeng laho mambiayai keluargangku. Nang pe songon i, dumenggan do ngolungku saonari. Gabe ias ma panggora ni rohangku di adopan ni Jahowa, sitiruon ma ahu di dua ianakhonku jala mandapot hak na sumurung di huria. Di adopan ni parkantor pajak dohot angka dongan bisnishu pe, ditanda ma ahu halak na jujur.”

Dihaholongi Jahowa do halak na pasangaphon Ibana marhite maniru pangalahoNa, songon hajujuron. (Tit. 2:10) Molo taulahon i, diurupi Jahowa ma hita. Raja Daud mandok, ”Dakdanak ahu jolo, nunga pola matua ahu, ndang dung dope huida tartading partigor manang mangidoido sipanganon pinomparna i.”​—Ps. 37:25.

Taida ma pengalaman ni si Rut. Ndang ditinggalhon si Rut simatuana si Naomi nang pe naung matua. Dohot do si Rut pinda tu Israel asa boi manomba Debata. (Rut 1:16, 17) Halak na jujur do si Rut jala ringgas karejo. Songon pengalaman ni si Daud, ndang hea Jahowa manadingkon si Rut dohot si Naomi. (Rut 2:2-18) Dilehon Jahowa do lobi sian na dihaporluhon nasida. Dipillit Jahowa ma asa sian ibana ro pinompar ni Raja Daud dohot Messias na dijanjihon!​—Rut 4:13-17; Mat. 1:5, 16.

Sipata, ndang mura di naposo ni Jahowa mangalului na dihaporluhon nasida siganup ari. Nang pe songon i, ndang olo nasida mangulahon na so jujur. Marsitutu do nasida karejo. Maniru pangalaho ni Jahowa songon hajujuron, ummarga do i di nasida sian arta.​—Poda 12:24; Eps. 4:28.

Songon si Rut, Jahowa do na diasahon halak Kristen di liat portibi on. Porsea do nasida tu janji ni Jahowa na mandok, ”Sandok na so tadingkononku do ho; sandok na so pasombuonku do ho!” (Heb. 13:5) Taboto ma, Jahowa boi jala olo mangurupi halak na jujur. Marjanji do Ibana mangalehon na dihaporluhon naposoNa.​—Mat. 6:33.

Arga do berlian manang angka arta di jolma. Alai, hajujuron dohot parange na denggan do na ummarga di Debata na di surgo!