1, 2. Taringot tu aha do hita porlu paposhon dirinta? (Ida gombar di mula ni parsiajaran.)

SONGON na taulas di minggu naung salpu, didok Sibolis ndang marhak Jahowa mamarenta jolma. Didok ibana, ndang tigor pamarentaon ni Jahowa jala martuaan do jolma molo mamarenta dirina sandiri. Tutu do i? Rimangi ma molo hita mangolu salelengna alai hita sandiri na mamarenta. Umlomo do rohanta diparenta Debata? Martuaan do hita molo mangolu salelengna jala ndang Debata na mamarenta?

² Ndang adong na boi mangalusi sungkunsungkun on. Alana ingkon hita sandiri do na mamingkirhon alusna. Dung i, tangkas ma taboto dumenggan do cara ni Jahowa mamarenta jala tama do ibana tapasangap. Pos do rohanta taringot on ala nunga tajaha di Bibel. Saonari, taulas ma na didok Bibel taringot hak ni Jahowa laho mamarenta.

3. Boasa marhak Jahowa gabe Parhuaso na Tumimbul?

³ Holan Jahowa do na tama gabe Parhuaso na Tumimbul. Alana, Ibana do Pargogo na so Hatudosan jala  Sipanompa. (1 Kron. 29:11; Ul. 4:24) Di parnidaan na di surgo, 144.000 na miniahan mandok, ”Ale Tuhan Debatanami, na tama do Ho manjalo hasangapon dohot hamuliaon dohot hagogoon, ai ditompa Ho do saluhutna; hinorhon ni lomo ni roham do, umbahen manjadi angka i jala tartompa!” (Pgk. 4:11) Jahowa do na manompa sasude. Alani i, marhak do Ibana mamarenta sude tompaanNa na di surgo dohot na di tano on.

4. Boasa hakta laho mamillit ndang mambahen hita marhak mangalo tu Debata?

⁴ Ndang adong na ditompa Sibolis. Alani i, ndang marhak ibana laho mamarenta. Tingki Sibolis dohot jolma na parjolo mangalo tu Jahowa, gabe pangalo do nasida. (Jer. 10:23) Marhak do nasida mangalo tu pamarentaon ni Jahowa? Ndang. Hak laho mamillit mambahen hita marhak manontuhon sipilliton, alai ndang gabe marhak hita mangalo Jahowa. Tangkas ma, molo mangalo tu Debata, on patuduhon na sala mamangke do hita di hakta laho mamillit. Alani i, tahaporluhon do uhum dohot panogunoguon ni Jahowa.

5. Boasa sai tigor naung ditontuhon Debata?

⁵ Pingkirhon ma muse boasa marhak Jahowa mamarenta. Marhite hatigoran do Ibana mamangke huasoNa. Didok tu hita, ”Ahu do Jahowa, parasi roha na mangkajongjongkon uhum dohot hatigoran di tano on, ai angka ido lomo ni rohangku.” (Jer. 9:23) Ndang dihaporluhon Jahowa patik ni jolma laho mangurupi Ibana manontuhon na denggan. Ibana sandiri do na manontuhon taringot tu na denggan. Marhite hatigoranNa, dilehon do patikNa tu jolma. Panurat ni psalmen mandok, ”Hatigoran dohot uhum do ojahan ni habangsami.” Alani i, denggan do sude patik, prinsip, dohot aturan na sian Jahowa. (Ps. 89:15; 119:128) Didok Sibolis, ndang tigor pamarentaon ni Jahowa. Hape, Sibolis pe ndang boi mambahen hatigoran tu portibi on.

6. Aha do na mambahen Jahowa marhak mamarenta?

⁶ Na mambahen Jahowa marhak mamarenta, i ma ala marparbinotoan jala marbisuk Ibana manjaga nasa na tinompaNa. Taboto ma on sian cara ni AnakNa pamalumhon sahit na so boi dipamalum dokter. (Mat. 4:23, 24; Mrk. 5:25-29) Nang pe on gabe tanda halongangan di hita, alai ndang sada tanda halongangan i di Jahowa. Diantusi do taringot pamatangta jala boi pamalumhon sude sahit. Boi do Ibana pahehehon angka naung mate, jala manundati bencana alam.

7. Boasa umbisuk Jahowa sian sasude na di portibi on?

⁷ Portibi na nirajaan ni Sibolis ndang boi parohon dame tu jolma. Holan bisuk ni Jahowa do na boi mambahen dame portibi on. (Jes. 2:3, 4; 54:13) Sarupa ma pangkilalaanta tu apostel Paulus na mandok, ”Bagasna i, antong,  hamoraon, hapistaran dohot parbinotoan ni Debata! Na so hasigatan do angka uhumna jala na so habogasan do angka dalanna!”—Rom 11:33.

8. Songon dia do pangkilalaanmu tu cara ni Jahowa mamarenta?

⁸ Tangkas dipaboa di Bibel, Jahowa do na marhak laho mamarenta jala pamarentaonNa do na dumenggan. Di bagasan holong do Ibana mamarenta. Molo tarimangi parangeNa ”na talup jala na asi roha, lambat tarrimas, jala godang denggan basana dohot habonaronna”, gabe las rohanta jonok tu Ibana. (2 Mus. 34:6) Dihaholongi jala diargai Debata do hita. Dumenggan do caraNa mamparrohahon hita sian dirinta sandiri. Didok Sibolis, ditabunihon Jahowa do angka na denggan sian naposoNa. Alai gabus do i. Alana dilehon Debata do AnakNa na sasada i asa boi hita mangolu salelengna.—Jaha Psalmen 84:12; Rom 8:32.

9. Sian dia taboto na diparrohahon Debata do jolma ganup marsadasada?

⁹ Dihaholongi Jahowa do sude jolma. Alai, diparrohahon Ibana do jolma ganup marsadasada. Rimangi ma na masa di tingki naung salpu. Saleleng tolu ratus taon, marhite angka panguhum do Jahowa manogunogu jala mangurupi bangsoNa asa monang mangalo musu. Nang pe songon i, tongtong do Jahowa mamparrohahon jolma ganup marsadasada. Umpamana si Rut. Ndang halak Israel ibana. Alai, ala marsitutu gabe sisomba Jahowa, dapotan pasupasu ma ibana marhite mandapot tungganedoli dohot ianakhon. Asing ni i, sian pinompar ni si Rut do haroro ni Messias. Dung i, dibahen Jahowa do asa disurat taringot ngolu ni si Rut di Bibel. Boi do dirimangi hamu songon dia pangkilalaan ni si Rut dung hehe jala mamboto na tarsurat taringot dirina?—Rut 4:13; Mat. 1:5, 16.

10. Boasa tadok ndang kejam pamarentaon ni Jahowa?

¹⁰ Ndang kejam pamarentaon ni Jahowa. I do alana, marlas ni roha do na mangihuthon Ibana. (2 Kor. 3:17) Didok si Daud taringot tu Jahowa, ”Hatongamon dohot hamuliaon di jolona, hagogoon dohot hinauli masa di bagasan habadiaonna i.” (1 Kron. 16:7, 27) Si Etan panurat ni psalmen mandok, ”Martua ma bangso na umboto olopolop! Angka na marpangalaho di bagasan hatiuron ni bohim, ale Jahowa. Sai marolopolop do nasida manipat ari marhitehite goarmu, jala timbul do nasida hinorhon ni hatigoranmu.”—Ps. 89:16, 17.

11. Songon dia carana asa lam pos rohanta na dumenggan do pamarentaon ni Jahowa?

¹¹ Molo jotjot tarimangi denggan basa ni Jahowa, lam pos ma rohanta pamarentaonNa do na dumenggan. Sarupa ma pangkilalaanta songon  panurat ni psalmen na mandok tu Debata, ”Dumenggan do sadari di angka alamanmu sian saribu ari na asing.” (Ps. 84:11) Jahowa do na manompa hita, diboto do aha na mambahen las rohanta. Umbotoan do Ibana taringot na laho silehononNa tu hita. Sude na pinangido ni Jahowa mangkorhon na denggan do i. Nang pe godang na taulahon laho mangoloi Jahowa, i do na mambahen hita marlas ni roha.—Jaha Jesaya 48:17.

12. Aha do na mambahen hita marpihak tu pamarentaon ni Jahowa?

¹² Taparsiajari di Bibel, dung salpu Harajaon Saribu Taon na diparenta Kristus, adong dope na mangalo tu Debata. (Pgk. 20:7, 8) Aha do na mambahen nasida gabe mangalo? Di tingki i, marsitutu ma Sibolis mangelaela jolma asa mangkaringkothon diri sandiri, jala i do na sai diulahon ibana. Ra, digabusi do jolma marhite mandok na boi do nasida mangolu salelengna nang pe ndang mangoloi Jahowa. Alai, ndang tutu i. Tasungkun ma dirinta, ’Porsea do ahu tu gabus sisongon i?’ Molo tahaholongi Jahowa, pos ma rohanta pamarentaonNa do na dumenggan. Tahagigihon ma gabus sisongon i. Lomo do rohanta mangolu di pamarentaon ni Jahowa, na mangarajai di bagasan holong.

13. Molo tatiru Debata, boasa didok na marpihak do hita tu pamarentaonNa?

¹³ Songon naung taulas, Jahowa do na marhak mamarenta, jala pamarentaonNa do na dumenggan. Alani i, ringkot do marpihak tu pamarentaonNa marhite marsihohot jala maniru Ibana. Molo marsitutu hita maniru Ibana, on patuduhon na tahaholongi do Ibana jala marpihak tu pamarentaonNa.—Jaha Epesus 5:1, 2.

14. Songon dia do angka sintua dohot tungganedoli maniru Jahowa?

¹⁴ Nunga taparsiajari di Bibel, marhite holong do Jahowa mamangke huasoNa. Angka tungganedoli dohot sintua na marpihak tu pamarentaon ni Jahowa, rade do maniru Ibana, ndang kejam, jala ndang lomolomo ni nasida. Marsitutu do si Paulus maniru Debata dohot Jesus. (1 Kor. 11:1) Ndang dipaila jala ndang dipaksa ibana halak na asing mangulahon na denggan. Alai, lambok do ibana manjujui na asing mangulahon na denggan. (Rom 12:1; Eps. 4:1; Plm. 8-10) Taboto ma, Jahowa do na ditiru si Paulus. Molo tahaholongi na asing, na marpihak tu pamarentaon ni Jahowa do hita.

15. Molo taargai do na manguluhon hita, songon dia do hita marpihak tu pamarentaon ni Jahowa?

¹⁵ Boi do tapatudu na marpihak hita tu pamarentaon ni Jahowa marhite mangargai jala satolop tu na manguluhon hita. Nang pe ndang taantusi boasa dibahen sada keputusan, alai tongtong ma taihuthon i. Tajangkon ma Jahowa gabe Pamarenta jala unduk tu Ibana, unang songon pangalaho ni portibi on. (Eps. 5:22, 23; 6:1-3; Heb. 13:17) Jala marlas ni roha ma ala diboto Debata do na dumenggan tu hita.

16. Songon dia do keputusan na tapillit patuduhon na marpihak hita tu pamarentaon ni Debata?

 ¹⁶ Marhite keputusan na tapillit, boi do tapatudu na marpihak hita tu pamarentaon ni Debata. Ndang tangkas dipaboa Jahowa taringot aha na boi dohot na so boi taulahon di ngolunta. Alai dipaboa Ibana do prinsipNa tu hita. On mangurupi hita mangantusi na ingkon taulahon. Umpamana, ndang dilehon Jahowa daftar na patuduhon pangkean na dia na boi dipangke dohot na so boi dipangke. Alai dipaboa Ibana, ingkon tanda do hita gabe SitindangiNa sian pangkeanta. (1 Tim. 2:9, 10) Lomo rohaNa asa tapingkirhon pangkorhon ni sipillitonta tu na asing. (1 Kor. 10:31-33) Molo tabahen keputusan hombar tu na dihalomohon Jahowa, boi didok nunga tahaholongi jala marpihak hita tu caraNa mamarenta.

17, 18. Songon dia do angka na mardongan saripe patuduhon na marpihak nasida tu pamarentaon ni Jahowa?

¹⁷ Pingkirhon ma cara ni na mardongan saripe marpihak tu pamarentaon ni Jahowa. Ra, parsaripeon ni nasida ndang songon na hinirim ni roha ala adong parsoalan na borat. Molo masa i, marlaba do molo mamingkirhon cara ni Jahowa maradophon bangso Israel  najolo. Didok Jahowa do dirina songon tungganedoli di naposoNa. (Jes. 54:5; 62:4) Jotjot do bangso i mambahen hansit roha ni Jahowa. Dos songon i ma parsoalan di parsaripeon. Alai, ndang pintor ditadingkon Jahowa bangso Israel. Disalpuhon do hasalaan ni nasida jala tongtong do digohi janjiNa.—Jaha Psalmen 106:43-45.

¹⁸ Lomo do roha ni halak Kristen naung marhasohotan maniru Jahowa. Nang pe adong parsoalan, ndang dilului nasida dalan asa boi marsirang. Diboto nasida, arga do padan parsaripeon i di adopan ni Jahowa. Lomo rohaNa asa rap jala unang marsirang na mardongan saripe. Bibel paboahon, holan pangalangkupon do na mambahen sasahalak boi manirangkon dongan saripena jala marhasohotan muse tu na asing. (Mat. 19:5, 6, 9) Molo marsitutu halak Kristen mampartahanhon parsaripeonna tongtong martua, on patuduhon na marpihak tu pamarentaon ni Jahowa do nasida.

19. Aha do na ingkon taulahon tingki mangulahon na sala?

¹⁹ Ala mardosa dope, sipata hansit do roha ni Jahowa alani parniulaonta. Ala diboto Ibana do taringot on, diparade ma pelean tobusan ni Kristus. Alani i, tingki taulahon na sala, tapangido ma asa disalpuhon Jahowa hasalaanta. (1 Joh. 2:1, 2) Ingkon marsiajar do hita sian hasalaanta. Unang sai marmetmet ni roha ala hea mangulahon na sala. Sai jonok ma tu Jahowa, na rade manalpuhon hasalaan jala mangurupi hita marhamubaon asa tongtong manomba Ibana.—Ps. 103:3.

20. Saonari, boasa ingkon marpihak hita tu pamarentaon ni Jahowa?

²⁰ Di tano na imbaru, Jahowa ma na mamarenta sude jolma jala taparsiajari ma taringot hatigoranNa. (Jes. 11:9) Alai saonari pe, boi do tadapot godang hatorangan taringot prinsip ni Jahowa dohot na dihalomohon rohaNa maradophon sadasada ulaon. Satongkin nai, ndang adong be na mangalo hak ni Jahowa laho mamarenta. Alani i, marsitutu ma hita marpihak tu pamarentaon ni Jahowa marhite unduk tu Ibana, marsihohot, jala maniru Ibana di sude ulaonta.