1. Aha do na mambahen hita imbar sian binatang?

DILEHON Jahowa do panggora ni roha tu jolma. I do na mambahen hita gabe imbar sian binatang. Si Adam dohot si Hawa pe adong do panggora ni rohana. Sian dia taboto? Dung mangulahon dosa, pintor martabuni do nasida. On patuduhon na ganggu do panggora ni roha ni nasida ala mangulahon dosa.

2. Boasa panggora ni rohanta dipatudos songon kompas? (Ida gombar di mula ni parsiajaran.)

² Panggora ni roha, i ma pangkilalaan sian roha na paingothon hita jala manogu-nogu hita di parngoluan. Molo ndang tarlatik panggora ni roha ni sasahalak, dos do ibana songon kapal naung sega kompasna. * Boi do gabe lilu kapal i ala diombus alogo. Alai molo denggan do kompasna, boi ma kapten kapal i mangatur asa unang lilu. Suang songon i ma, molo tarlatik do panggora ni rohanta, boi do i denggan manogunogu hita di parngoluan.

3. Songon dia molo ndang denggan talatik panggora ni rohanta?

 ³ Molo ndang denggan talatik panggora ni rohanta, olo do gabe taulahon na sala. (1 Tim. 4:1, 2) Ra, olo do gabe tadok, “na jat denggan do i”. (Jes. 5:20) Didok Jesus do tu angka siseanna, “Na ro ma tingkina songon na marhobas tu Debata ma didok roha ni manang ise na mambunu hamu.” (Joh. 16:2) Songon i do na dihilala angka halak na mambunu si Stepanus. (Ul. 6:8, 12; 7:54-60) Sian najolo, godang do pamimpin agama na mangulahon hajahaton jala sampe mambunu. Didok nasida, songon i ma cara pasonangkon Debata. Alai sasintongna, maralo do i tu uhum ni Debata. (2 Mus. 20:13) Ndang denggan panggora ni roha ni nasida!

4. Songon dia do carana asa boi talatik panggora ni rohanta?

⁴ Jadi, songon dia do carana asa boi talatik panggora ni rohanta? Uhum dohot prinsip na sian Bibel “marguna do i mangajari, maminsang, padengganhon pangalaho, manogu-nogu laho mangulahon na sintong”. (2 Tim. 3:16) Alani i, ingkon taparsiajari do Bibel, tarimangi, dung i taulahon ma. On do cara asa lam taantusi na dihalomohon Debata. Jala, boi ma panggora ni rohanta gabe denggan pasingothon hita. Saonari, taulas ma songon dia cara mamangke uhum dohot prinsip ni Debata laho mangalatik panggora ni rohanta.

5, 6. Songon dia asa marguna uhum ni Debata tu hita?

⁵ Asa marguna uhum ni Debata di ngolunta, ndang sae holan manjaha Bibel. Alai ingkon tahaholongi jala taargai do i. Didok do di Bibel, “Hagigihon hamu ma na jat i, jala haholongi hamu na denggan.” (Am. 5:15) Alai songon dia carana? Ingkon taihuthon ma pingkiran ni Jahowa. Rimangi ma. Umpamana ndang boi hamu renges modom. Jadi, disuru dokter ma hamu asa gok mangallang sayur, olahraga, jala ingkon taratur do ngolumuna. Dung diulahon hamu i, gabe boi ma hamu renges modom! Tontu gabe diargai hamu do tudutudu ni dokter i, ndang i?

⁶ Suang songon i ma Debata. Dilehon Ibana do uhum tu hita, asa unang na roa na tadapot jala asa lam denggan ngolunta. Umpamana, diajarhon Bibel do asa unang margabus, mangoto-otoi, manangko, mangulahon na rorang, mangulahon na jahat, manang mardatu. (Jaha Poda 6:16-19; Pgk. 21:8) Molo nunga taulahon i jala tadapot do na denggan, gabe lam holong ma rohanta tu Debata dohot tu uhumNa.

7. Songon dia do pengalaman sian Bibel mangurupi hita?

⁷ Unang ma jolo tataon hasusaan alani hasalaanta, baru pe taantusi dia na denggan dohot na roa. Alai boi do hita marsiajar sian pengalaman ni angka halak di tingki najolo. Didok di Poda 1:5, “Sai dibege na pistar ma i, asa tamba poda di ibana.” Jadi sian Debata do sude tudutudu na denggan! Umpamana, rimangi ma si Daud na gabe susa ala mangulahon dosa dohot si Batseba. (2 Sam. 12:7-14) Molo tajaha ayat  on, boi ma tasungkun di rohanta, ‘Sasintongna, ingkon songon dia hian do si Daud mangadopi situasi on? Aha ma na huulahon molo mangadopi situasi na sarupa? Gabe huulahon do na rorang songon si Daud? Manang si Josep do hutiru?’ (1 Mus. 39:11-15) Molo tapingkiri do akibatna ala mangulahon dosa, gabe lam ‘tahagigihon ma na jat i’.

8, 9. (a) Songon dia do panggora ni rohanta mangurupi hita? (b) Songon dia prinsip ni Jahowa mangurupi panggora ni rohanta?

⁸ Tutu, ndang taulahon be angka na dihasogohon Debata. Alai, ndang sude dipaboa di Bibel taringot ulaon na boi manang na so boi taulahon. Jadi aha ma na ingkon taulahon? Songon dia ma hita mamboto na dia na dihalomohon Debata? Molo tapangke Bibel laho mangalatik panggora ni rohanta, gabe boi ma hita mambahen haputusan na denggan.

⁹ Ala dihaholongi Jahowa do hita, dilehon Ibana ma tudu-tudu asa boi mangalatik panggora ni rohanta. Didok Ibana, “Ahu do Jahowa Debatam, na mangajarhon tu ho bahen hatuaonmu, na manogu ho di dalan sidalananmu.” (Jes. 48:17, 18) Jadi molo tarimangi prinsip na adong di Bibel jala tapamasuk tu rohanta, boi ma i mambahen lam denggan panggora ni  rohanta. Hasilna, gabe lam marbisuk ma hita mambahen haputusan.

10. Songon dia prinsip ni Debata boi mangurupi hita asa mambahen haputusan na denggan, jala songon dia Jesus mamangke prinsip on?

¹⁰ Prinsip boi mangurupi hita mambahen haputusan na denggan. Jadi molo taboto prinsip ni Jahowa, gabe taantusi ma pingkiranNa. Jala, gabe taantusi ma boasa dibahen uhumNa i. Dipangke Jesus do prinsip on laho mangajari siseanna, asa dipingkiri hian pangkorhon ni ulaon ni nasida. Umpamana, molo mura-mura muruk, boi do gabe mangulahon na jahat. Jala molo sai na rorang do na dipingkiri, boi do gabe i na diulahon. (Mat. 5:21, 22, 27, 28) Jadi molo taihuthon prinsip ni Debata, boi do on paingothon hita. Gabe tarlatik ma panggora ni rohanta. Jala boi ma tabahen haputusan na pasangaphon Debata.​—1 Kor. 10:31.

11. Songon dia panggora ni roha ni sude halak boi ndang sarupa?

¹¹ Sude do hita mamangke Bibel laho mangalatik panggora ni rohanta. Alai, sipata ndang sarupa sude panggora ni rohanta di piga-piga situasi. Umpamana, ndang adong disurat di Bibel molo hita ndang boi manginum siinumon na maralkohol. Alai, diorai do hita molo pagodanghu minum manang mabuk. (Poda 20:1; 1 Tim. 3:8) Alai, nang pe ndang ganggu panggora ni rohanta jala ndang pagodanghu hita minum, porlu do tapingkirhon panggora ni roha ni na asing.

12. Aha do na boi taparsiajari sian Rom 14:21?

¹² Dijujui si Paulus do asa taargai panggora ni roha ni na asing. Didok ibana, “Dumenggan ma unang mangallang jagal, manang unang manginum anggur, manang mangulahon manang aha pe na mambahen dongan tartuktuk.” (Rom 14:21) Jadi nang pe ndang sala manginum alkohol, ingkon taargai do panggora ni roha ni donganta. Ra, adong do donganta na parminum hinan tingki ndang marsiajar Bibel dope. Alai dung marsiajar Bibel, gabe muba do ibana jala ndang olo be ibana manginum i apala saotik pe. Tontu, ndang olo hita mambahen ibana mulak muse gabe parminum. (1 Kor. 6:9, 10) Jadi molo tatogihon nasida tu jabunta, unang ma sai tapaksa nasida asa manginum i!

13. Songon dia si Timoteus mangargai panggora ni roha ni na asing?

¹³ Asa boi si Timoteus marbarita tu halak Jahudi, olo do ibana disunat nang pe hansit. Alana diboto ibana porlu do sunat di halak Jahudi. Songon si Paulus, ndang olo ibana mambahen tartuktuk roha ni na asing. (Ul. 16:3; 1 Kor. 9:19-23) Jadi songon si Timoteus, ingkon marsitutu do hita mangargai panggora ni roha ni halak na asing.

14, 15. (a) Songon dia do hita asa gabe matoras? (b) Songon dia do halak Kristen na toras maradophon na asing?

¹⁴ Lomo do rohanta asa na taparsiajari ndang holan “ajaran na parjolo taringot tu Kristus”, jala ingkon ‘toras ma hita’. (Heb. 6:1) Alai, ndang jaminan pintor gabe matoras hita molo nunga martaon-taon gabe halak Kristen. Porlu do marsitutu hita asa matoras. Ingkon tatambai do parbinotoanta. Jadi, tajaha ma Bibel ganup ari. (Ps. 1:1-3) Lam jotjot tajaha Bibel ganup ari, lam taantusi ma uhum dohot prinsip ni Jahowa.

¹⁵ Aha do uhum na rumingkot tu halak Kristen? I ma holong. Didok Jesus do tu angka siseanna, “Molo masihaholongan hamu, botoon ni sude jolma ma na siseanku hamu.” (Joh. 13:35) Didok do holong i “patik na umbalga”, jala “sasahalak na mangkaholongi donganna nunga diulahon ibana patik i”. (Jak. 2:8; Rom 13:10) Mansai ringkot do holong i, alana didok di Bibel “holong do Debata”. (1 Joh. 4:8) Alai molo di Debata, holong i ndang holan pangkilalaan sambing. Dipatudu Ibana do i marhite pambahenanNa. Si Johannes mandok, “Marhite on do Debata patuduhon holongna tu hita: Disuru Ibana do Anakna na sasada i tu portibi on asa boi hita mandapot hangoluan marhite ibana.” (1 Joh. 4:9) Tapatudu ma holongta tu Jahowa, Jesus, angka dongan, dohot halak na asing. Molo taulahon songon i, on patuduhon nunga gabe halak Kristen na matoras hita.​—Mat. 22:37-39.

16. Molo nunga matoras hita, boasa gabe lam taargai prinsip ni Bibel?

¹⁶ Molo nunga gabe halak Kristen na  matoras hita, gabe lam taargai do angka prinsip sian Bibel. Molo uhum holan marlangku di sada situasi, alai molo prinsip boi marlangku di godang situasi. Umpamana, ndang diantusi dakdanak, marjea do molo mardongan tu halak na jugul. Jadi, ingkon dibahen natuatuana ma aturan laho manjaga ibana. (1 Kor. 15:33) Alai molo dung matoras dakdanak i, gabe diantusi ibana ma alasanna sian prinsip ni Bibel. Angka prinsip i do na boi mangurupi ibana mamillit dongan na burju. (Jaha 1 Korint 13:11; 14:20.) Lam taboto alasanna sian Bibel, gabe lam tarlatik ma panggora ni rohanta. Lam taantusi ma na dihalomohon Debata asa taulahon.

17. Angka aha do na diparade asa lam denggan hita mambahen haputusan?

¹⁷ Godang do na diparade asa boi tabahen haputusan na palashon roha ni Jahowa. Di Bibel, godang do uhum dohot prinsip na mangurupi hita “asa denggan situtu” jala “gabe rade mangulahon angka ulaon na denggan”. (2 Tim. 3:16, 17) Prinsip ni Bibel boi mangurupi hita mangantusi na dihalomohon Jahowa. Alai ingkon marsitutu ma hita mandapothon i. (Eps. 5:17) Alani i, dilehon do tu hita Indeks Publikasi Menara Pengawal, Panduan Riset untuk Saksi-Saksi Yehuwa, Watchtower Library, PERPUSTAKAAN ONLINE Menara Pengawal, dohot aplikasi JW Library. Molo tapangke on sude, gabe lam denggan ma hita tingki parsiajaran pribadi dohot ibadat keluarga.

18. Aha do na tadapot molo taihuthon uhum dohot prinsip ni Jahowa di parngoluonta?

¹⁸ Lam denggan ma ngolunta molo taihuthon uhum dohot prinsip na sian Jahowa! Didok do di Psalmen 119:97-100, “Mansai huhaholongi do patikmi, sai i do hupingkirpingkiri manipat ari. Bisukan do ahu sian angka musungku dibahen angka tonami, ai gok disi do ahu salelenglelengna. Marrohaan do ahu sian sude angka gurungku, ai sai angka panindangionmi do na huparateatehon. Marrohaan do ahu sian angka natuatua, ai sai huradoti do angka parentam.” Molo tarimangi uhum dohot prinsip ni Debata, gabe lam marbisuk ma hita. Jala molo tapangke uhum dohot prinsip ni Debata mangalatik panggora ni rohanta, “gabe togu ma hita songon Kristus i”.​—Eps. 4:13.