1. Boasa dipatudos Jahowa dirina songon sahalak ina na manusui?

“TUNG tarhalupahon inaina ma posoposona?” I ma na hea disukkun Jahowa di jaman ni panurirang Jesaya. Didok Debata do muse tu akka naposona, “Tung sura pe tarhalupahon nasida, ianggo ahu laos so halupahononku do ho.” (Jes. 49:15) Di ayat on, dibandingkon Ibana do dirina tu sahalak ina. Dibandingkon Ibana do holongna tu akka naposona songon holong ni sahalak ina tu poso-posona. Sahalak donganta borua na margoar si Jasmin mandok, “Holong hian do roha ni sahalak ina tu poso-posona. Jala dang marnasuda holongna i.” Tottu setuju do godang ina tu hata na didok si Jasmin on.

2. Boha do pakkilalaan ni Jahowa molo adong naposona na so aktif be?

² Diboto Jahowa do molo adong naposona na so olo be marbarita jala ro tu parpunguan. Pikkirhon ma, tottu massai lungun do roha ni Jahowa tikki mangida adong marribu naposona na gabe so aktif * ganup taon.

3. Aha do na dihalomohon Jahowa tu akka dongan na so aktif i?

³ Godang do akka donganta na so aktif ujungna gabe mulak muse tu huria. Las do rohatta manjakkon nasida. Lomo do roha ni Jahowa asa mulak muse nasida, jala hita pe songon i do. (1 Ptr. 2:25) Boha do carana mangurupi nasida? Asa boi taalusi sukkun-sukkun i, porlu do taboto, boasa adong donganta na so ro be marpungu dohot marbarita.

4. Aha do na masa tu piga-piga donganta ala makkarikkotton parkarejoanna?

⁴ Adong donganta na so aktif be ala makkarikkotton parkarejoanna. Sahalak donganta sian Asia na margoar si Hung * mandok, “Gabe unggodang do habis tikki dohot gogokku tu parkarejoan. Hurippu do molo godang hepengku, gabe lam mura ma au manomba Jahowa. Jotjot ma au karejo sampe borngin, jala gabe jotjot ma au dang marpungu. Ujungna, dang hea be au ro marpungu. Huhilala, dipakke Sibolis do portibi on asa mambahen lam dao hita sian Jahowa.”

5. Aha do na dihilala sahalak donganta ala gok sitaononna?

⁵ Adong do akka donganta na so aktif be ala gok sitaononna. Parrohahon ma pengalaman ni donganta si Anne sian Inggris na adong lima ianakkonna. Didok ibana, “Sada anakku cacat sian na tubu. Sada borukku dipecat sian huria. Jala adong sada anakku na hona gangguan mental. Marsak hian do au. Dang ro be au marpungu dohot marbarita. Ujungna, gabe dang aktif be au.” Asi do rohatta mangida donganta si Anne dohot keluargana dohot akka dongan na mangadopi situasi na sarupa.

6. Boasa sasahalak gabe mandao sian Jahowa molo dang diulahon ibana poda di Kolosse 3:13?

⁶ Jaha Kolosse 3:13. Adong piga-piga donganta na so aktif, ala haccit rohana dibahen dongan na asing. Didok apostel Paulus, sipata olo do gabe haccit rohatta dibahen akka dongan. Manang olo do tahilala dang adil keputusan na dibahen tu hita. Molo dang manat, olo do gabe jut rohatta alani i. Molo torus muruk hita, boi do i mambahen hita lam dao sian akka dongan. Parrohahon ma pengalaman ni si Pablo, sahalak donganta na tading di Amerika Selatan. Adong do akka dongan na makkatahon na so tutu taringot ibana. Didok nasida do ibana nungnga mangulahon dosa. Porsea do akka sintua tu hatorangan na so tutu i. Gabe dicabut ma tanggung jawab ni si Pablo di huria. Aha do didok ibana? “Muruk ma au, ujungna gabe mandao ma au sian huria.”

7. Aha do na boi masa tu sasahalak molo sai ganggu panggora ni rohana?

⁷ Adong muse donganta na sai targanggu panggora ni rohana ala hea mangulahon dosa di tikki najolo. Dihilala ibana dang holong be Debata tu ibana. Nang pe nungnga marhamubaon jala nungnga disalpuhon Jahowa dosana, sai didok rohana dang tama ibana gabe naposo ni Debata. Songon i ma na dihilala donganta si Francisco. Didok ibana, “Hea do au didisiplin ala mangulahon seks na so patut. Nungnga marhamubaon be au, jala di mulana taratur dope au marpungu. Alai sai marsak do au, jala huhilala dang tama be au gabe naposo ni Debata. Sai torus do ganggu panggora ni rohakku, jala huhilala dang olo Jahowa manalpuhon dosakku. Ujungna, dang ro be au tu parpunguan.” Boha do pakkilalaatta mangida akka dongan na mangadopi akka situasi na diulas nakkin? Asi do rohamuna tu nasida? Jala boha do pakkilalaan ni Jahowa tu nasida?

8. Dihalupahon Jahowa do akka halak na hea manomba Ibana? Patorang ma.

⁸ Dang dihalupahon Jahowa akka naposona na so aktif. Jala dang lupa Ibana tu akka naung binahen ni nasida. (Heb. 6:10) Dipaboa panurirang Jesaya do sada tudosan na massai denggan, na patuduhon songon dia  do pakkilalaan ni Jahowa tu naposona. Didok di Bibel, “Parmahanonna ma punguanna songon parmahan, papunguonna ma angka anak ni birubiru tu tanganna jala usungonna di ampuanna.” (Jes. 40:11) Jahowa do na gabe parmahan di hita. Boha do pakkilalaan ni Jahowa molo adong biru-biruna na mandao sian huria? Dipaboa Jesus do alusna. Didok ibana tu akka siseanna, “Songon dia do pandapotmuna? Molo adong sasahalak nampuna 100 biru-biru jala adong sada na lilu, nda tadingkononna na 99 i di dolok jala laho mangalului sada na lilu i? Hudok ma tu hamu, molo dung dapotna i, umbalga do las ni rohana mida biru-biru na sada i sian apala tu na 99 na so lilu i.”​—Mat. 18:12, 13.

9. Di tikki najolo, songon dia do sahalak parmahan na burju manarihon biru-biruna? (Ida gambar sampul.)

⁹ Boasa cocok Jahowa dipatudos songon sahalak parmahan? Alana di tikki najolo, disarihon parmahan na burju do biru-biruna. Misalna si Daud. Dialo ibana do singa dohot gompul asa toktong aman biru-biruna. (1 Sam. 17:34, 35) Pittor diboto sahalak parmahan do molo adong sada biru-biruna na mago. (Joh. 10:3, 14) Lao do ibana manadikkon 99 biru-biruna di handang manang disuru ibana do parmahan na asing lao manjaga i. Dung i, lao ma ibana mangalului biru-biru na mago i. Dipakke Jesus do tudosan on lao paboahon sada parsiajaran na rikkot di hita. Didok ibana, “Ndang lomo roha ni Damang na di banua ginjang i mago agia sada pe sian na metmet on.”​—Mat. 18:14.

10. Hombar tu Hesekiel 34:11-16, aha do na diulahon Jahowa molo adong biru-biruna na mago?

¹⁰ Dihaholongi Jahowa do hita sude, tarmasuk ma akka naposona na mandao sian huria. Marhite panurirang Hesekiel marjanji do Debata, dilului Ibana do akka biru-biruna na mago. Jala diurupi do nasida asa marale-ale muse tu Ibana. Dipaboa do takkas songon dia Ibana mangalului nasida, dos songon cara na dipakke sahalak parmahan Israel molo adong biru-biruna na mago. (Jaha Hesekiel 34:11-16.)  Na parjolo, dilului ma biru-biru i. Porlu do tikki jala ikkon marsitutu do ibana mangulahon on. Dung dapotna biru-biru i, diboan ma i mulak tu handangna. Molo lukka manang male biru-biru i, pittor diubati ibana ma i jala dilehon mangan. Akka sintua na gabe parmahan ni “biru-biru ni Debata”, porlu mamakke cara on lao mangurupi akka na mandao sian huria. (1 Ptr. 5:2, 3) Dilului akka sintua do nasida, diurupi asa mulak muse tu huria, jala dilehon do pangurupion asa marale-ale muse nasida tu Jahowa. *

11. Aha do na ikkon diattusi sahalak parmahan na burju?

¹¹ Diattusi sahalak parmahan na burju do, sipata boi do mago biru-biruna. Jadi molo adong sada biru-biru na mandao sian punguanna, dang na gabe dipukkuli ibana biru-biruna i. Taparrohahon ma songon dia Debata mangapuli piga-piga naposona na hea mandao sian Ibana.

12. Songon dia do Jahowa mangurupi si Jona?

¹² Hea do panurirang Jona lari tikki dilehon tugas sian Jahowa. Alai dang na gabe ditadikkon Jahowa ibana. Songon parmahan na burju, diurupi Jahowa do ibana jala dilehon do gogo asa boi mangulahon tugasna. (Jona 2:8; 3:1, 2) Dung i, dipakke Jahowa do hau labu lao mangajari si Jona asa mangattusi na mararga do ganup jolma di Debata. (Jona 4:10, 11) Aha do parsiajaranna? Unang ma pittor menyerah akka sintua tikki mangurupi akka penyiar na so aktif. Porlu do diattusi nasida aha do na mambahen ibana mandao sian Jahowa. Jala molo mulak ibana tu Jahowa, ikkon dipatudu nasida do holong tu ibana.

13. Sian pengalaman ni panurat Psalmen 73, aha do na boi taparsiajari taringot Jahowa?

¹³ Hea do metmet roha ni sahalak naposo ni Debata na manurat Psalmen 73, ala diida ibana lam sonang do ngolu ni akka parjahat di tikki i. Hea do didok rohana, dang adong gunana mangulahon lomo ni roha ni Debata. (Ps. 73:12, 13, 16) Aha ma na diulahon Jahowa? Dang na gabe muruk Jahowa tu  ibana. Gariada, disurat do hata ni panurat Psalmen i di Bibel. Ujungna, diattusi ibana ma parale-aleon tu Jahowa do na ummarga sian sude. (Ps. 73:23, 24, 26, 28) Aha ma parsiajaranna? Akka sintua, unang ma pittor manguhumi molo adong na makkilala dang adong labana manomba Jahowa. Ikkon diattusi akka sintua do, boasa songon i pakkataion dohot parniulaon ni donganta i. Dung i, baru ma diboto nasida ayat dia na boi patoguhon rohana.

14. Boasa si Elia porlu diurupi, jala songon dia Jahowa mangurupi ibana?

¹⁴ Hea do si Elia lari sian Ratu Isebel. (1 Raj. 19:1-3) Dirippu ibana dang adong be panurirang ni Jahowa. Jala dihilala ibana dang marlapatan akka ulaonna saleleng on. Gabe marsak situtu do ibana, jala dipangido ibana tu Debata asa tumagon ma mate ibana. (1 Raj. 19:4, 10) Dang gabe muruk Jahowa tu si Elia. Gariada dipapos Jahowa do rohana, dang holan sahalakna na manomba Jahowa. Boi do pos rohana tu huaso ni Jahowa, jala godang dope tugas na boi ulahononna. Sabar do Jahowa manangihon si Elia, jala dilehon do tugas na baru tu ibana. (1 Raj. 19:11-16, 18) Aha do parsiajaranna? Sude hita tarlumobi akka sintua, ikkon lambok do maradoppon biru-biru ni Jahowa. Ra olo do muruk ibana manang makkilala dang mararga dirina di adopan ni Jahowa. Alai ikkon rade do akka sintua manangihon ibana tikki dipaboa ibana pakkilalaanna. Jala porlu do dipapos nasida rohana, na holong do roha ni Jahowa tu ibana.

15. Hombar tu Johannes 6:39, boha do pakkilalaan ni Jesus mangida biru-biru ni Debata?

¹⁵ Aha do na dipangido Jahowa asa taulahon molo adong biru-biruna na mago? Boi ma hita marsiajar sian Jesus. Diboto ibana do, mararga do di adopan ni Jahowa sude biru-biruna. Jadi marsitutu do Jesus mangurupi halak Israel na songon biru-biru na lilu asa mulak muse tu Jahowa. (Mat. 15:24; Luk. 19:9, 10) Parmahan na burju do Jesus. Jadi, marsitutu do ibana asa unang adong biru-biru ni Jahowa na mago.​—Jaha Johannes 6:39.

16-17. Ikkon songon dia do akka sintua maradoppon akka dongan na so aktif? (Ida kotak “ Boha do Pakkilalaan ni Biru-biru na Mago.”)

¹⁶ Dijujui apostel Paulus do akka sintua di huria Epesus asa maniru Jesus. Didok ibana, “Ingkon urupanmuna do na gale. Ingot hamu ma hata ni Tuan Jesus na mandok, ‘Umlas do roha ni halak na mangalehon sian na manjalo.’” (Ul. 20:17, 35) Sian ayat i taboto ma, martanggung jawab do akka sintua lao manarihon akka naposo ni Jahowa. Sahalak sintua di Spanyol na margoar si Salvador mandok, “Molo hurimangi na sai disarihon Jahowa do akka biru-biruna, gabe taronjar ma rohakku asa marsitutu mangurupi nasida. Pos do rohakku, lomo do roha ni Jahowa asa husarihon nasida.”

¹⁷ Akka donganta na so aktif na dipaboa di parsiajaran on nungnga diurupi asa mulak tu Jahowa. Saonari on, godang do donganta na so aktif sasittongna lomo rohana asa mulak muse tu Ibana. Di parsiajaran na mangihut, umbagas ma muse taulas songon dia carana mangurupi nasida.