1. Aha do na didok Bibel taringot sipasingot?

MOLO mambege hata “sipasingot”, aha ma na dipingkirhon hamu? Godang halak marpingkir na laho diuhum do molo adong sasahalak na dipasingot. Alai, sasintongna ndang holan i. Bibel mandok, parohon laba do sipasingot i. Jala, sipata dihaithon do i tu parbinotoan, bisuk, holong, dohot hangoluan. (Poda 1:2-7; 4:11-13) I do alana, molo dipasingot Debata hita, na patuduhon holongNa do i tu hita. Jala, lomo do rohaNa molo hita mangolu salelenglelengna. (Heb. 12:6) Sipata, dipasingot Debata do hita marhite dipinsang, alai ndang hea kejam manang gabe parohon jea i. Sasintongna, adong do na ringkot na boi taparsiajari sian hata “sipasingot”, i ma pangajarion. Dos do i songon natuatua mangajari ianakhonna na hinaholonganna.

2, 3. Songon dia sipasingot boi mangajari jala maminsang hita? (Ida gombar di mula ni parsiajaran.)

² Pingkirhon ma sada contoh. Adong sahalak dakdanak na margoar si Johnny na marbola di jabu. Didok omakna ma, “Johnny, unang marbola ho di jabu, amang! Sega annon angka barangta.” Alai, ndang dioloi ibana hata ni omakna i, tong do ibana marbola di jabu. Ujungna, gabe puntar ma pot ni  bunga! Songon dia ma omak ni si Johnny paingothon ibana? Dipaboa omakna do aha hasalaanna. Lomo rohana asa diantusi si Johnny na ringkot do unduk jala mangoloi aturan na dibahen natuatuana. Alai, asa boi tongtong diingot si Johnny podana i, disimpan omakna ma bola i asa unang marbola jo ibana. Tontu, on mambahen ndang las roha ni si Johnny. Alai, on mangurupi ibana asa tongtong mangingot molo ndang unduk tu natuatua, roa do pangkorhonna.

³ Ala gabe sahalak Kristen, sude do hita gabe keluarga ni Debata. (1 Tim. 3:15) Jahowa ma na gabe Ama di hita. Jadi, ibana do na manontuhon dia na denggan jala dia na so denggan. Dipasingot do hita molo ndang unduk tu Ibana. Molo taulahon na sala jala mangkorhon na roa, sipasingot na mardonganhon holong sian Jahowa mangurupi hita asa tongtong mangingot boasa ringkot unduk tu Ibana. (Gal. 6:7) Mansai holong do Debata tu hita jala ndang olo Ibana molo hita susa.​—1 Ptr. 5:6, 7.

4. (a) Ingkon songon dia do hita mangalatik sasahalak? (b) Aha do na laho taulas di parsiajaran on?

⁴ Molo talehon sipasingot sian Bibel, on mangurupi ianakhon manang parsiajar Bibel asa boi gabe sisean ni Kristus. Tapangke do Bibel laho mangajarhon na denggan tu parsiajar Bibelta jala mangurupi nasida asa mangantusi jala ‘mangaradoti nasa hata naung dipatikkon Jesus tu hita’. (Mat. 28:19, 20; 2 Tim. 3:16) On ma cara ni Jahowa mangalatik nasida asa nasida pe boi dohot mangurupi na asing laho mangihuthon Kristus. (Jaha Titus 2:11-14.) Saonari, taulas ma tolu sungkunsungkun na ringkot: (1) Songon dia sipasingot sian Debata patuduhon na holong do Ibana tu hita? (2) Aha do na boi taparsiajari sian pigapiga halak na hea mandapot sipasingot sian Debata? (3) Songon dia hita boi maniru Jahowa dohot Jesus tingki mangalehon sipasingot?

5. Songon dia sipasingot sian Jahowa patuduhon na holong do Ibana tu hita?

⁵ Alani holong do umbahen na olo Jahowa mangalehon sipasingot, mangajari, jala mangalatik hita. Lomo do rohana molo tongtong hita jonok tu Ibana, jala boi mangolu salelengna. (1 Joh. 4:16) Ndang olo Ibana mambahen gabe jut rohanta manang marmetmet ni roha. (Poda 12:18) Gariada, tongtong do diingot Ibana parangenta na denggan, jala diloas do hita sandiri mambahen haputusan di ngolunta. Tingki tadapot sipasingot marhite Bibel, sijahaon, natuatuanta, manang angka sintua, boi do taida holong ni Jahowa sian i? Umpamana, adong ma sintua na parholong mangalehon sipasingot na lambok tu hita. Ra, ndang tasadari  dope aha salanta. Molo i do na diulahon ibana, na maniru holong ni Jahowa do ibana disi.​—Gal. 6:1.

6. Songon dia sipasingot patuduhon holong ni Debata nang pe i mambahen sasahalak ndang boi be mandapot tugas di huria?

⁶ Sipata, sipasingot i ndang holan poda sambing. Molo sasahalak mangulahon dosa na balga, ndang boi be ibana mandapot tugas di huria. Alai, on patuduhon na holong Debata tu ibana. Umpamana, sipasingot on mambahen ibana gabe mangantusi na ringkot do mangalehon tingki laho marsiajar Bibel, mangarimangi i, jala martangiang. Boi do i gabe patoguhon paralealeonna tu Jahowa. (Ps. 19:8) Lam leleng, boi do gabe dapotan tugas ibana muse di huria. Jala nang pe sasahalak ingkon dipabali, tong do alani holong ni Jahowa i, asa dijaga huria sian pangkorhon na roa. (1 Kor. 5:6, 7, 11) Ala na tigor do sipasingot sian Jahowa, boi do i mangurupi sasahalak na dipabali mangantusi sadia balga dosana. Jala, i mambahen rohana gabe taronjar asa mulak muse tu Jahowa.​—Ul. 3:19.

7. Ise do si Sebna, jala aha do parangena na roa?

⁷ Laho mangantusi sipasingot sian Debata, taulas ma dua contoh halak na hea dipasingot Jahowa. Sada i ma si Sebna, sahalak Israel na mangolu di tingki ni raja Hiskia. Sada nai, i ma si Graham, sahalak donganta di tingkinta saonari. Ra, sahalak “pangaramoti bagas” ni Raja Hiskia do si Sebna, jala timbo do pangkatna. (Jes. 22:15) Alai, gabe ginjang ma roha ni si Sebna, jala lomo do rohana pasangaphon dirina di adopan ni angka halak. Dibahen ibana do sada tugu na mansai arga tu dirina sandiri jala dibahen muse “hureta hatongamon” laho pangkeonna.​—Jes. 22:16-18.

8. Songon dia Jahowa pasingothon si Sebna, jala songon dia hasilna?

⁸ Ala pasangaphon dirina sandiri do si Sebna, gabe dilehon Debata ma tugasna i  tu halak na asing, i ma si Eliakim. (Jes. 22:19-21) Tingki i, Raja Sanherib sian Assur marsangkap laho manaluhon Jerusalem. Dung i, disuru si Sanherib ma pigapiga naposona dohot tentarana na mansai godang laho mambahen halak Jahudi dohot Raja Hiskia gabe mabiar tu ibana. (2 Raj. 18:17-25) Disuru si Hiskia ma si Eliakim dohot dua halak na asing laho manjumpangi nasida. Sada dongan ni si Eliakim, i ma si Sebna, naung gabe sekretaris. Sian on, boi ma taida molo si Sebna patuduhon serep ni roha, jala ndang gabe metmet rohana manang gabe manolsoli dirina sandiri. Rade do ibana manjalo tugas na so pola timbo. Adong tolu parsiajaran na boi taida sian si Sebna.

9-11. (a) Aha do parsiajaran na ringkot na boi tadapot sian si Sebna? (b) Aha do na taparsiajari sian cara ni Jahowa maradophon si Sebna?

⁹ Parjolo, ala dilehon do tugas ni si Sebna i tu na asing, gabe taingot ma hata sian Bibel na mandok “mambahen hamagoan do ginjang ni roha”. (Poda 16:18, Bibel siganup ari) Ra, adong do tugasta na sumurung di parpunguan, jala gabe diida angka dongan, na ringkot do hita di huria. Molo songon i, tongtong do serep rohanta? Tongtong do taingot molo angka na denggan naung tadapot, sudena i sian Jahowa? (1 Kor. 4:7) Apostel Paulus mandok, “Hupaingot ma ganup hamu: Unang ma torbang rajumi hamu dirimu, lobi sian na patut; alai intap ni na tama ma parrohaonmuna.”​—Rom 12:3.

¹⁰ Paduahon, sipasingot na dilehon tu si Sebna, patuduhon molo Jahowa porsea na boi do marhamubaon muse ibana. (Poda 3:11, 12) Gabe sada parsiajaran na denggan do on tu sasahalak na so mandapot tugas na ringkot be di huria. Ndang porlu nasida gabe muruk manang marmetmet ni roha. Tumagon ma tongtong mangalehon na dumenggan tu Jahowa. Ingkon diida nasida do molo sipasingot i patuduhon holong ni Jahowa. Ingot ma, lomo do roha ni Ama na di surgo mangalehon pasupasu tu halak na marserep ni roha. (Jaha 1 Petrus 5:6, 7.) Molo serep rohanta, sipasingot sian Jahowa boi mambahen hita gabe mura diatur dos songon tano liat na lambok.

¹¹ Patoluhon, sian cara ni Jahowa maradophon si Sebna, dapotta ma parsiajaran na ringkot. Sipasingot sian Jahowa patuduhon sogo do rohaNa mangida dosa. Alai sipasingot i patuduhon na holong do rohaNa tu sasahalak na mardosa i. Alana angka na denggan do na diida Jahowa sian jolma. Molo hamu sahalak natuatua manang sintua, olo do hamu maniru cara ni Jahowa tingki mangalehon sipasingot?​—Jud. 22, 23.

12-14. (a) Songon dia pangkilalaan ni pigapiga halak tingki mandapot sipasingot sian Debata? (b) Songon dia do Hata ni Debata mangurupi sahalak donganta mambahen hamubaon, jala aha do hasilna?

¹² Alai, pigapiga halak gabe hansit do rohana tingki dipasingot, jala gabe mandao do nasida sian Debata dohot huria. (Heb. 3:12, 13) Ndang boi be diurupi nasida? Boi do! Taparrohahon ma sada contoh, i ma donganta na margoar si Graham, na hea dipabali jala nunga mulak muse tu huria. Alai dung i, ndang dohot be ibana marbarita jala ro tu parpunguan. Marsitutu do sahalak sintua asa boi jonok tu si Graham, jala dipangido si Graham do asa sintua i mangurupi ibana marsiajar Bibel.

¹³ Didok sintua i, “Adong do ginjang ni roha ni si Graham. Jut do rohana mangida  angka sintua na gabe panitia pengadilan tingki dipecat ibana. Di sada tingki, diulas hami ma angka ayat taringot ginjang ni roha jala aha do pangkorhonna. Dung diulas ayat i, gabe tangkas ma diboto songon dia dirina. Ndang lomo rohana mangida dirina songon i! Tontu on gabe pangkorhon na denggan do! Diboto ibana ma molo saleleng on ginjang ni rohana i songon ‘tiang’ na manutupi simalolongna, jala i do na mambahen ibana gabe susa. Pintor hatop ma ibana mambahen hamubaon. Mulai ma ibana tongtong marpungu muse, denggan marsiajar Bibel, jala jotjot martangiang. Jala, gabe denggan ma ibana manguluhon keluargana. On mambahen mansai las do roha ni tungganeboruna dohot ianakhonna.”​—Luk. 6:41, 42; Jak. 1:23-25.

¹⁴ Didok sintua i do muse, “Sada tingki, adong do hata ni si Graham na mansai hona tu rohangku. Didok ibana, ‘Nunga martaontaon ahu mananda hasintongan, jala hea do ahu gabe perintis. Alai, saonari ma boi huhilala na holong rohangku tu Jahowa.’” Dungkon i, dapot tugas ma si Graham laho mangedar mikrofon di parpunguan. Las do rohana mangulahon i. Didok sintua i ma muse, “Sian pengalamanna i, gabe huboto ma, molo serep do roha ni sasahalak jala olo manjalo sipasingot sian Debata, dapotna ma pasupasu na godang!”

15. Songon dia do caranta asa boi mangalehon sipasingot na denggan?

¹⁵ Asa boi gabe guru na denggan, ingkon gabe murid na denggan ma jolo hita. (1 Tim. 4:15, 16) Jadi, molo dipangke Jahowa do hamu laho mangalehon sipasingot tu dongan na asing, ingkon tongtong ma hamu marserep ni roha jala olo ma hamu mangihuthon tudutudu sian Ibana. Molo diida serep rohamuna, gabe diargai ma hamu jala mura ma halak manjangkon sipasingotmuna. Taulas ma sitiruon sian Jesus.

16. Parsiajaran aha do na boi tatiru sian Jesus taringot mangalehon sipasingot dohot mangajari?

¹⁶ Tongtong do Jesus unduk tu Amana, nang pe di situasi na maol. (Mat. 26:39) Dipaboa ibana do tu angka siseanna, sian Amana do sude bisuk dohot na niajarhonna i. (Joh. 5:19, 30) Serep do roha ni Jesus, jala tongtong unduk, i do na mambahen ibana gabe guru na marasi roha. Gabe las ma roha ni angka halak na jonok tu ibana. (Jaha Mateus 11:29.) Marhite pangkataionna, dipatogu Jesus do angka halak na marmetmet ni roha dohot na gale. (Mat. 12:20) Tingki marsoal angka apostelna taringot ise na umbalga sian nasida, burju jala lambok do Jesus pasingothon nasida.​—Mrk. 9:33-37; Luk. 22:24-27.

17. Parange na songon dia do na mangurupi angka sintua laho mangaradoti huria?

¹⁷ Tingki sintua mangalehon sipasingot sian Bibel, ingkon ditiru nasida do Kristus. Alana sian i tarida na olo do nasida mangihuthon tudutudu sian Debata dohot  AnakNa. Disurathon apostel Petrus do, “Parmahan i hamu ma punguan ni Debata na di hamu, unang songon na pinaksa, sian las ni roha ma mangihuthon Debata; unang ala ni pangomoan hailaon, sian ringkot ni roha ma! Unang ma songon angka na mamaksa natorop; alai gabe tiruan ma hamu di angka na pinarmahan!” (1 Ptr. 5:2-4) Dapotan laba do sintua molo unduk tu Debata dohot Kristus, songon i nang angka halak na diurupi nasida.​—Jes. 32:1, 2, 17, 18.

18. (a) Aha do na dihalomohon Jahowa asa diulahon natuatua? (b) Songon dia do Debata mangurupi angka natuatua?

¹⁸ Songon dia taringot mangalehon sipasingot dohot mangalatik di keluarga? Dipaboa Jahowa do tu angka na manguluhon keluarga, “Unang gintali hamu angka anakkonmuna; pagodanggodang hamu ma nasida di bagasan ajar dohot poda ni Tuhan i!” (Eps. 6:4) Ringkot do mangalatik dohot mangalehon sipasingot? Molo tajaha di Poda 19:18 (Bibel siganup ari), disi didok, “Ajari ma anakkonmu di tingki boi dope ajaran. Molo so diajari ho nasida, dohot do ho na mambahen sega nasida.” Jahowa mangalehon angka natuatua tanggung jawab laho mangalehon sipasingot tu ianakhonnasida. Molo ndang diulahon i, gabe nasida do na martanggungjawab disi! (1 Sam. 3:12-14) Alai, dilehon Jahowa do bisuk dohot gogo na dihaporluhon tu angka natuatua. Boi do i didapot molo nasida martangiang jala mangondolhon Hata ni Debata dohot tondi parbadia laho manogunogu nasida.​—Jaha Jakkobus 1:5.

19, 20. (a) Pasupasu aha do na tadapot molo tajalo sipasingot sian Debata? (b) Aha do na laho taulas di parsiajaran na mangihut?

¹⁹ Molo tajalo sipasingot sian Debata, jala tatiru cara ni Jahowa dohot Jesus tingki mangalehon sipasingot, boi ma hita gabe dapot godang pasupasu! Gabe dame ma hita sude di keluarga dohot di huria. Gabe tahilala ma songon dia na dihaholongi, diargai, jala marpos ni roha. Gumodang do muse hadameon dohot las ni roha na boi tadapot di ari na naeng ro. (Ps. 72:7) Sipasingot sian Jahowa paradehon hita asa boi rap mangolu salelenglelengna di bagasan keluarga na dame, jala Jahowa ma na gabe Ama di hita. (Jaha Jesaya 11:9.) Molo tongtong taingot on, gabe taantusi ma molo sipasingot i sada cara na denggan sian Debata laho patuduhon holongNa tu hita.

²⁰ Di parsiajaran na mangihut, taulas ma taringot sipasingot di keluarga dohot di huria. Taulas ma songon dia hita boi mangalehon sipasingot tu dirinta sandiri. Jala taulas ma adong do na humansit muse sian hansit na dihilala ala mandapot sipasingot.