1. Boasa godang donganta gabe malas laho marsiajar?

SAONARI ingkon marsitutu do halak di parkarejoan asa boi martahan. Godang angka donganta na karejo sadari manipat asa boi manarihon keluargana. Adong muse donganta na dao ingananna karejo. Gabe suda ma godang tingkina di pardalanan. Na asing, ingkon godang gogo dipangke nasida di parkarejoan. Ujungna, dung sae karejo, gabe loja hian ma nasida! Alani i, gabe malas ma nasida laho marsiajar.

2. Andigan do tingki na pas di hamu laho marsiajar?

² Alai taboto do, ingkon talehon do tingki laho mamparsiajari Bibel dohot angka publikasinta. Alana i do carana asa boi tongtong hita marale-ale tu Jahowa jala mandapot hangoluan salelengna! (1 Tim. 4:15) Adong donganta na tibu dungo ganup ari laho marsiajar. Ra, ala ndang adong na manggugai jala segar dope pingkiran. Adong muse na marsiajar saleleng piga-piga minut dung botari jala mangarimangi na diparsiajari.

3-4. Pengaturan aha do na dibahen tu publikasinta, jala boasa?

³ Boi ma tadok, ringkot do mangalehon tingki laho marsiajar. Alai aha do na boi taparsiajari? Ra didok rohamuna, ‘Godang do sijahaon. Ndang boi hujaha i sude.’ Piga-piga donganta boi manjaha sude publikasi jala manonton angka video sian organisasi. Alai godang do donganta na maol mangulahon i. Diboto Punguan na Mangaradoti do i. Alani i, dibahen do  pengaturan na baru. Diorui do godang ni publikasi na tercetak dohot na elektronik.

⁴ Umpamana ndang tabahen be Buku Tahunan Saksi-Saksi Yehuwa, alana nunga godang pengalaman ni angka donganta dibahen di jw.org^® dohot JW Broadcasting^® ganup bulan. Jala, Joujou Paboahon edisi umum dohot Sadarlah! dibahen holan tolu hali sataon. Pengaturan on dibahen ndang asa godang tingkinta tu ulaon na asing, alai asa godang do tingkinta laho mangulahon angka “na rumingkot”. (Plp. 1:10) Saonari taulas ma carana mambahen tujuan tingki marsiajar dohot carana mandapot godang laba sian pelajaran pribadi.

5-6. Angka publikasi aha do na ingkon taparsiajari?

⁵ Aha do na parjolo ingkon taparsiajari? Porlu do talehon tingkinta laho mamparsiajari Bibel ganup ari. Diorui do panjahaion Bibel ganup minggu di huria asa gumodang tingkinta mangarimangi dohot mambahen riset sian na tajaha i. Tontu ndang olo hita holan manjaha sambing angka ayat na laho diulas di minggu i. Alai tujuanta asa hona tu roha aha na tajaha i jala mambahen hita lam jonok tu Jahowa.​—Ps. 19:15.

⁶ Aha muse na boi taparsiajari? Tontu ingkon tabahen do persiapan tu Joujou Paboahon Siparsiajaran dohot Parsiajaran Bibel Huria. Dohot do muse angka hatorangan na asing di parpunguan parsitongaan ni minggu. Porlu do muse tajaha Joujou Paboahon edisi umum dohot Sadarlah!

7. Boha do pangkilalaanta molo ndang boi taparsiajari sude na adong di jw.org manang JW Broadcasting?

⁷ Ra didok rohamuna, ‘Boi do i huulahon. Alai songon dia do taringot angka na adong di jw.org dohot angka video na adong di JW Broadcasting? Mansai godang do i sude!’ Pingkirhon ma sada tudosan on. Godang do sipanganon na tabo na diparade di restoran jala ditawarhon do i tu angka na ro. Tontu ndang boi diallang nasida sude na adong disi. Holan piga-piga do na dipillit laho diallang. Suang songon i ma, unang pola metmet rohanta molo ndang boi taparsiajari sude na adong di jw.org manang angka video na adong di JW Broadcasting. Tajaha manang tatonton ma nasa tolapta. Saonari taulas ma aha do lapatan ni marsiajar jala aha na ingkon taulahon asa boi tadapot godang laba tingki marsiajar.

8. Aha do na boi taulahon tingki mambahen persiapan tu Joujou Paboahon, jala aha do laba na boi dapotmu?

⁸ Tingki marsiajar, manat ma parrohahon na dijaha hamu jala lului ma parsiajaran na ringkot sian na dijaha i. Ingot ma, marsiajar ndang holan manjaha sambing manang manandai alus na adong di paragraf. Umpamana, tingki mambahen persiapan tu Joujou Paboahon Siparsiajaran, parjolo parrohahon ma bagian na laho diulas na adong di mula ni parsiajaran i. Dung i, parrohahon ma judulna, subjudulna, dohot sungkun-sungkun mangulahi. Manat ma jaha parsiajaran i. Parrohahon ma kalimat na paboahon aha na diulas di paragraf i. Somalna dipaboa do i di mula ni paragraf. Dung dijaha hamu ganup paragraf di parsiajaran i, pingkirhon ma aha do hubungan ni paragraf i tu subjudul dohot judul ni parsiajaran i. Surat ma angka hata manang parsiajaran na baru dope diboto hamu, dung i bahen ma riset taringot i.

9. (a) Boasa jala songon dia hita ingkon mamparrohahon angka ayat tingki mangulas Joujou Paboahon? (b) Songon na disurat di Josua 1:8, asing ni manjaha angka ayat ni Bibel, aha do muse na ingkon taulahon?

⁹ Tingki mangulas Joujou Paboahon di  parpunguan, diurupi do hita asa mangantusi isi ni Bibel. Alani i, parrohahon ma sude ayat na adong di parsiajaran i, tarlumobi ayat na laho dijahahon tingki diulas i di parpunguan. Parrohahon ma songon dia hata manang kalimat na di ayat i paboahon parsiajaran na adong di paragraf i. Asing ni i, rimangi ma angka ayat na dijaha i jala pingkirhon ma aha na boi diulahon hamu sian ayat i.​—Jaha Josua 1:8.

10. Hombar tu Heber 5:14, boasa natua-tua porlu mangajari ianakhonna marsiajar dohot mambahen riset tingki ibadat keluarga?

¹⁰ Lomo do roha ni natua-tua asa marlas ni roha ianakhonna tingki mangulahon Ibadat Keluarga. Alani i, ingkon ditontuhon nasida do aha na laho diulas tingki ibadat keluarga. Godang do keluarga na mambahen acara khusus songon mambahen contoh ni parau ni si Noak. Alai ndang ingkon songon i na diulahon ganup minggu. Asing ni mambahen acara khusus manang manonton acara JW Broadcasting, porlu do angka natua-tua mangajari ianakhonna carana marsiajar. Umpamana, ingkon diparsiajari nasida do carana mambahen persiapan tu parpunguan, manang mambahen riset taringot tu parsoalan na diadopi nasida di singkola. (Jaha Heber 5:14.) Molo somal nasida marsiajar Bibel di jabu, gabe mura ma nasida mangantusi aha na diparsiajari di parpunguan dohot di kebaktian, nang pe ndang adong video. Tontu ingkon ditontuhon natua-tua do sadia leleng nasida marsiajar hombar tu umur dohot kemampuan ni ianakhonna.

11. Boasa ringkot taurupi parsiajar Bibelta asa mamboto carana marsiajar Bibel sahalakna?

¹¹ Angka parsiajar Bibelta pe porlu do diurupi carana marsiajar. Tingki parjolo sahali nasida marsiajar Bibel, las do rohanta molo dibahen nasida persiapan tingki laho marsiajar Bibel manang di parpunguan. Alai porlu do taajari nasida carana mambahen riset dohot marsiajar Bibel sahalakna. Hasilna, tingki adong parsoalan, ndang pintor disungkun nasida tu angka dongan di huria. Alai boi do dilului nasida sandiri poda na denggan marhite mambahen riset sian publikasinta.

12. Aha do tujuan na ingkon tabahen tingki marsiajar?

¹² Molo ndang pola lomo rohamuna marsiajar, ra didok rohamu ndang boi las rohamu tingki marsiajar. Sasintongna boi do las rohamu. Mulana unang pola leleng tingkimuna marsiajar. Lam leleng boi do ditambai hamu tingki marsiajar jala bahen ma tujuan.  Tujuanta na rumingkot tingki marsiajar, i ma asa lam jonok tu Jahowa. Alai boi do dibahen hamu tujuan na asing, songon mangalusi sungkun-sungkun ni halak manang mambahen riset taringot parsoalan na taadopi.

13. (a) Patorang ma songon dia angka na marsingkola boi paboahon hasintongan di singkola. (b) Songon dia hamu boi mangulahon poda di Kolosse 4:6?

¹³ Umpamana, molo singkola dope hamu, ra jotjot do donganmu mangarayahon ulang tahun. Ra, lomo do rohamu naeng paboahon hasintongan sian Bibel boasa ndang dohot hamu mangarayahon i. Alai didok rohamu ndang tolap hamu laho paboahon i. Alani i, porlu do hamu marsiajar! Adong dua alasan boasa porlu diulahon hamu i: (1) asa lam pos rohamuna molo ulang tahun i ndang dihalomohon Debata jala (2) asa lam denggan caramuna paboahon hasintongan i. (Mat. 14:6-11; 1 Ptr. 3:15) Boi do disungkun hamu dirimuna, ‘Boasa dirayahon angka donganku ulang tahun?’ Dung i, bahen ma riset sian publikasinta. Sasintongna, ndang maol paboahon hasintongan. Godangan halak mangarayahon ulang tahun ala mangihuthon halak na asing. Alai molo boi dipaboa hamu sada manang dua hatorangan na sintong tu nasida, ra boi do diurupi hamu nasida marsiajar hasintongan.​—Jaha Kolosse 4:6.

14-16. (a) Aha do na boi diulahon tingki mamparsiajari angka buku di Bibel na ndang pola ditanda hamu? (b) Asa boi taantusi taringot buku Amos, aha do na boi taulahon? (Ida kotak “ Lam Mananda Angka Halak na Disurat di Bibel!”)

¹⁴ Umpamana, laho diulas ma di parpunguan taringot 12 panurirang na manurat angka buku Heber na parpudi. Ra ndang pola ditanda hamu angka panurirang i. Molo songon i, lului ma cara asa lomo rohamu mamparsiajari aha na disurat nasida. Songon dia carana?

¹⁵ Na parjolo, sungkun ma dirimuna, ‘Aha do na huboto taringot panurat buku on? Ise do ibana, didia do ibana tading jala aha do karejona?’ Tingki taparsiajari taringot panurat buku i, gabe taantusi ma lapatan ni hata manang tudosan na dipangke ibana. Tingki tajaha Bibel, lului ma hatorangan na patuduhon halak na songon dia do na manurat buku i.

¹⁶ Na paduahon, lului ma andigan do buku i disurat. Boi ma diida hamu “Daftar Buku-Buku Alkitab” na adong di bagian pudi Kitab Suci Terjemahan Dunia Baru. Asing ni i, boi do diida hamu bagan taringot angka panurirang dohot angka raja di Tudutudu Laho Mangantusi Hata ni Debata halaman 14-17. Molo diparsiajari hamu buku taringot surirang, boi ma diurupi hamu asa lam mangantusi songon dia situasi ni halak na mangolu di tingki i. Pingkirhon ma, aha do sipasingot na dipaboa panurirang i? Ise do na rap mangolu dohot ibana? Asa taboto sude hatorangan i, ingkon tapareso do buku na asing na adong di Bibel. Umpamana, molo diparsiajari hamu situasi na masa di tingki ni panurirang Amos, boi ma dijaha hamu buku 2 Raja dohot buku 2 Kronika. Asing ni i, boi ma dijaha hamu buku Hosea, i ma panurirang ra na rap mangolu dohot si Amos. Molo dipareso hamu angka buku na asing na adong di Bibel, gabe diboto hamu ma situasi na masa di tingki ni si Amos.​—2 Raj. 14:25-28; 2 Kron. 26:1-15; Hos. 1:1-2:2; Am. 1:1.

17-18. Sian contoh na di paragraf on manang na didapot hamu, paboa ma boasa molo talului godang hatorangan boi mambahen gabe lomo rohanta marsiajar Bibel.

¹⁷ Tingki tajaha Bibel, denggan do molo talului godang hatorangan tu na tajaha i. Umpamana, tingki tajaha bindu 12 surirang ni si Sakaria na paboahon hamamate ni Messias.  (Sak. 12:10) Di ayat 12 didok, mangandungi do “pinompar ni ompu ni si Natan” ala mate Messias. Unang ma holan tajaha sambing, alai boi ma tapingkirhon, ‘Aha do hubungan ni pinompar ni si Natan dohot Messias? Adong do hatorangan taringot on?’ Boi do talului godang hatorangan taringot i. Boi ma tajaha 2 Samuel 5:13, 14 na paboahon molo si Natan i, i ma sada sian anak ni Raja Daud. Na paduahon, boi ma tajaha Lukas 3:23, 31 na patuduhon molo Jesus pinompar ni si Natan sian si Maria. (Ida ma buku Pemahaman jilid 2, halaman 1338.) Songon na taboto, Jesus tubu sian pinompar ni si Daud. (Mat. 22:42) Alai adong lobi sian 20 anak ni si Daud. Tontu longang do rohanta ala tangkas dipaboa si Sakaria na mangandungi do pinompar ni si Natan tingki mate Jesus. Cara songon on boi mambahen lomo rohanta marsiajar Bibel!

¹⁸ Adong muse contoh na asing. Di bindu parjolo buku Lukas, dipaboa do taringot sada suru-suruan na margoar si Gabriel na manjumpangi si Maria. Dipaboa si Gabriel do taringot anak na laho ditubuhon si Maria. Didok, “Gabe sangap ma ibana, goaron ma ibana Anak ni Natumimbul i, jala lehonon ni Debata Jahowa ma tu ibana habangsa ni si Daud amana i. Mamarenta ma ibana gabe Raja tu pinompar ni si Jakkob salelengna.” (Luk. 1:32, 33) Somalna holan hata na parjolo didok si Gabriel do na jotjot taparrohahon na mandok molo Jesus gabe “Anak ni Natumimbul”. Alai didok si Gabriel muse laho ‘mamarenta gabe Raja’ do Jesus. Boi ma tabayangkon aha do hira-hira na dipingkirhon si Maria. Na dirimpu ibana do Jesus na laho manggantihon si Herodes na mamarenta Israel tingki i? Molo gabe raja Jesus, tontu si Maria gabe omak ni raja jala tading ma keluargana di  istana na balga. Alai taboto di Bibel ndang hea dipingkir si Maria songon i. Ndang songon dua sisean ni Jesus, ndang hea dipangido si Maria asa dibahen ibana tu siamun ni Jesus dung gabe raja Jesus di surgo. (Mat. 20:20-23) Sian on, lam taantusi ma, sahalak borua na marserep ni roha situtu do si Maria!

19-20. Hombar tu Jakkobus 1:22-25 dohot 4:8, aha do tujuanta tingki marsiajar?

¹⁹ Taingot ma, tujuanta marsiajar Bibel dohot angka publikasi, i ma asa lam jonok hita tu Jahowa. Jala lomo do rohanta laho mamboto halak na songon dia do hita sasintongna jala aha dope na porlu tapadenggan di dirinta asa mambahen las roha ni Jahowa. (Jaha Jakkobus 1:22-25; 4:8.) Tingki naeng marsiajar Bibel, tapangido ma tondi parbadia ni Jahowa. Tapangido ma asa diurupi hita mandapot godang laba sian na taparsiajari jala mamboto aha na ingkon taulahon.

²⁰ Anggiat ma hita boi gabe songon sahalak naposo ni Debata na dipaboa di Psalmen. Didok, “Sai patik ni Jahowa do lomo ni rohana, jala sai i do dipingkiri rohana arian dohot borngin. . . . Sude na niulana manjadi do.”​—Ps. 1:2, 3.