DI LIAT potibi on, angka agama, songon Katolik Rom, Ortodoks, Budha dohot na asing mangorai pamimpin agamana marhasohotan. Alai, godang do na mandok molo cara on gabe bonsir ni ulaon parmainanon na diulahon angka pamimpin agama.

Alani i, ndang sala molo ta sungkun, tutu do sian Debata uhum na mangorai parbarita na uli marhasohotan? Asa tadapot alusna, ingkon taboto do sian dia do mula ni uhum on, jala songon dia pangkilalaan ni Debata mangida i.

Encyclopædia Britannica paboahon, lapatan ni hata selibat i ma ”ndang marhasohotan jala ndang sampur [hubungan suami istri] dohot manang ise pe. Somalna on diulahon angka pamimpin agama manang parhobasna”. Di jamita ni Paus Benediktus XVI tu Kuria Roma Taon 2006, didok ibana do taringot angka pamimpin agama na so marhasohotan ”i ma hasomalan na masa ndang leleng sian tingki ni angka Apostel”.

Ndang diorai halak Kristen di abad na parjolo marhasohotan. Dipasingot Apostel Paulus do na laho ro angka baoa na mambahen ajaran sian ”angka tondi sipaotooto” jala ”diorai nasida do mardongan saripe”.—1 Timoteus 4:1-3.

Dung di abad na paduahon ma ajaran on dipangke di huria ”Kristen” Barat. Buku Celibacy and Religious Traditions mandok uhum on ”sadalan tu hasomalan na baru na dibahen di Pamarentaon ni Rom na mangorom giotgiot ni daging”.

Di abad na patoluhon, dipatandahon konsili gereja dohot angka Bapak Gereja ma uhum na  mangorai angka parhobas di huria marhasohotan. Didok nasida, ramun do sampur tu manang ise pe jala ndang tama pemimpin agama mangulahon i. Alai, disurat buku Encyclopædia Britannica ma muse ”di ujung ni abad sampulu, godang do angka pastor nang uskup na marhasohotan”.

Angka pemimpin agama diorai marhasohotan dung Konsili Lateran 1123 dohot 1139, na dibahen di Rom, jala i ma na tongtong diihuthon Gareja Katolik Roma sahat tu saonari. Uhum i dibahen, asa unang moru do huaso dohot hepeng ni gareja. Alana molo marhasohotan pastor i, lehononna ma arta ni gareja tu ianakhon nasida.

Tangkas do dipaboa Debata taringot na so marhasohotan di Bibel. Taida ma na didok Jesus taringot halak na so marhasohotan ”ala ni harajaon banua ginjang” na songon ibana. (Mateus 19:12) Didok Apostel Paulus do muse taringot halak kristen na maniru ibana, na so marhasohotan ”ala barita na uli”.—1 Korint 7:37, 38; 9:23.

Nang pe songon i, ndang hea Jesus nang si Paulus mangorai parbarita na uli marhasohotan. Didok Jesus, ndang ”tarbahen” ni saluhut siihuthon ibana ndang marhasohotan. Tingki disurat si Paulus taringot angka na so marhasohotan, tangkas do diakkui ibana, ”Ndang adong nian hujalo patik ni Tuhan i; alai pingkiranku ma.”—Mateus 19:11; 1 Korint 7:25.

Asing ni i, dipaboa do di Bibel godang halak Kristen di abad parjolo na marhasohotan, songon si Petrus. (Mateus 8:14; Markus 1:29-31; 1 Korint 9:5) Sasintongna, ala somal di halak Rom mangulahon parmainanon, didok si Paulus do angka sintua na marhasohotan ingkon ”sada tungganeboruna” jala ianakhonna ”sioloi ajar”.—1 Timoteus 3:2, 4, Bibel siganup ari.

Gariada, didok Bibel do, ”diulahon baoa i ma na tama tu pardihutana” jala ”holan sian dos ni rohamuna be” ma mangulahon hubungan suami istri. (1 Korint 7:3-5) Tangkas ma, ndang diorai Debata parbarita na uli marhasohotan.

Molo ndang sala marhasohotan, boasa ma dipuji Jesus dohot si Paulus angka na so marhasohotan? Alana halak na so marhasohotan boi mangalehon gumodang tingkina laho marbarita na uli. Jala ndang pola hilalaon ni halak na so marhasohotan parungkilon na jotjot diadopi halak na marhasohotan.—1 Korint 7:32-35.

Parrohahon ma pengalaman ni si David na manadingkon karejona di Meksiko jala pinda tu sada huta di Kosta Rika laho marbarita na uli. Dihilala si David do labana ala ndang marhasohotan? Didok ibana, ”Tontu godang labana, ndang mura mangihuthon hasomalan na baru di inganan na baru, alai ala holan diringku do na husarihon, ummura ma huulahon.”

Sahalak anak boru Sitindangi Ni Jahowa na margoar si Claudia, pinda tu luat na mangkaporluhon gumodang parbarita. Didok ibana, ”Las rohangku mangulahon parenta ni Debata. Lam togu ma haporseaon dohot paralealeonku tu Jahowa ala jotjot do huhilala na disarihon Ibana do ahu.”

Unang ma marmetmet ni roha molo ndang marhasohotan. Didok si Claudia muse, ”Ndang soal marhasohotan manang ndang, boi do hita marlas ni roha, saleleng taulahon na dumenggan tu Jahowa.”—Psalmen 119:1, 2.