JOLMA

Didok di Bibel: “Dang na lao marisuang ditoppa [Debata tano on], alai ditoppa do i lao diingani.”​—JESAYA 45:18.

PORTIBI ON

Didok di Bibel: “Salpu ma sada sundut, ro ma sundut na asing, alai hot do anggo tano on saleleng ni lelengna.”​—PARJAMITA 1:4.

AHA DO MAKSUDNA: Didok di Bibel, dang lao hancurhononna tano on, alai lao diingani do. Jadi, aha do haduan na so adong be di tano on?

PIKKIRHON MA ON: Dipatudos Bibel do tikkitta saonari sarupa tu tikki ni si Noak. Saonari, ‘gok do hajahaton’ di tano on. (1 Musa 6:13) Ala halak na tigor roha do si Noak, diselamatton Debata do ibana dohot keluargana. Alai dimusnahon Debata do akka parjahat tikki ro aek na sumar manang air bah. Songon dia do situasina di tikki i? Didok Bibel, “Hancur do tano on di tikki i alani banjir.” (2 Petrus 3:6) Songon i ma na masa di tikki i. Alai aha do annon na hancur? Dang tano on na hancur di tikki i, alai akka parjahat do na dimusnahon. Jadi, dang adong be nasida di tano on. Tikki didok di Bibel na lao salpu portibi on, dang na maksudna lao dihancurhon portibi na taingani on. Alai akka parjahat do na lao dimusnahon dohot akka pamarettaon na di tano on.

AKKA MASALAH DOHOT KEJAHATAN

Didok di Bibel: “Satokkin nai, dang adong be akka parjahat. Molo dilului ho nasida, dang juppangmu be nasida. Alai molo halak na lambok roha, dilehon do tano on gabe parbagianan ni nasida. Marlas ni roha situtu ma nasida, ai dame do ngolu ni nasida.”​—PSALMEN 37:10, 11.

AHA DO MAKSUDNA: Dang holan di tikki ni si Noak dimusnahon Debata akka na jahat dohot sude pamarettaonna. Alai sahali nai, lao musnahonon ni Debata ma muse akka parjahat dohot akka na mambahen susa sude jolma. Jadi satokkin nai, lao musnahonon ni Debata do sude akka na jahat. Songon na didok panurat psalmen, “Dang adong be akka parjahat.” Jadi, molo dung mamaretta Harajaon ni Debata sian surgo tu tano on, musnahononna ma sude akka na jahat jala sude ma akka jolma mangoloi Debata.

PIKKIRHON MA ON: Las do roha ni pamarettaon na di portibi on mendukung Harajaon ni Debata? Didok di Bibel, dang olo nasida mendukung. Alai dialo nasida do Harajaon ni Debata. (Psalmen 2:2) Jadi aha do na lao dibahen Debata tu nasida? Lao gattion ni Harajaon ni Debata ma sude pamarettaon ni jolma, jala “hot do harajaon i saleleng ni lelengna”. (Daniel 2:44) Jadi, boasa ma ikkon dimusnahon pamarettaon ni jolma?

Didok di Bibel: “Dang marhuaso jolma lao manottuhon lao tudia ibana mangalakka.”​—JEREMIA 10:23.

AHA DO MAKSUDNA: Dang boi jolma i mamaretta dirina sandiri. Dang boi nasida denggan mamaretta halak na asing jala dang boi pasaehon masalah ni nasida.

PIKKIRHON MA ON: Didok Britannica Academic, molo holan sada do pamarettaon ni jolma, “dang boi i pasaehon masalah songon kemiskinan, kelaparan, sahit, bencana alam, porang manang kejahatan”. Didok muse disi, “Piga-piga halak . . . porsea molo marsada sude akka pamarettaon na di portibi on, boi ma pasaehon sude akka masalah i.” Alai nang pe marsada sude akka pamarettaon ni jolma na di portibi on, molo halak na so sempurna dope na mamaretta akka jolma, tong dope dang boi nasida pasaehon akka masalah na dipaboa nakking. Holan Harajaon ni Debata do na boi pasaehon sude akka masalah saleleng ni lelengna.

Songon na didok di Bibel, na lao ro nama ajal ni portibi on jala lao dihancurhon nama sude akka pamarettaon na jahat. Barita on, dang na mambahen gabe mabiar akka halak na burju. Alai, on do na diharappon nasida. Alana lao digatti Debata nama portibi na sursar on gabe portibi na dumenggan.

Andigan do i masa? Di halaman selanjutna, dipaboa ma alusna sian Bibel.