Tingki botari di ari Minggu, si Kenneth dohot si Filomena na tading di Curaçao, manjumpangi sada keluarga na marsiajar Bibel tu nasida.

Dipaboa si Kenneth, ”Dung sahat hami disi, tutup do jabuna alai adong mobil na baru kaluar. Hira na adong ma na mangonjar rohangku asa hutelepon tungganeboru ni parjabu i.”

Dialusi borua i ma jala didok baru pe borhat tungganedolina karejo. Dung diboto naung di jolo jabuna si Kenneth dohot si Filomena, dibungka ma pintu jala ditogihon ma nasida masuk.

Diboto nasida ma, na baru tangis do borua i. Tingki dipungka si Kenneth parsiajaran Bibel marhite tangiang, tangis ma muse borua i. Lambok ma disungkun nasida, aha do na masa.

Dipaboa borua i ma, na laho bunu diri hian nama ibana di botari i, jala bahenonna do surat tu tungganedolina, alai tompu ma si Kenneth manelepon, gabe ndang sae be dibahen surat i. Dipaboa ma na mandele do ibana, jadi diapuli ma ibana marhite hata sian Bibel. Lumbang ma pangkilalaanna dung manangihon hata apulapul i.

Didok si Kenneth, ”Mandok mauliate do ahu tu Jahowa ala dijujui do hami laho mangurupi borua i, jala dionjar do rohanami marhite surusuruan manang tondi parbadia asa pintor hutelepon ibana!” *

Tutu do na ditogutogu Debata si Kenneth dohot si Filomena marhite surusuruan, tondi parbadia manang huaso na asing? Manang, holan na kebetulan do si Kenneth na manelepon i?

Ndang tangkas dope taboto. Alai na taboto, dipangke Debata do surusuruanNa laho mangurupi angka halak di partondion. Umpamana, Bibel mandok dipangke Debata do sada surusuruan laho manogihon sahalak parbarita, i ma si Pilippus, asa diurupi sahalak Etiopia na mangalului panogunoguon di partondion.​—Ulaon ni Apostel 8:26-31.

Godang do agama na porsea adong do angka tondi na ditompa laho mangulahon lomo ni roha ni Debata manang laho manjaga sasahalak. Godang halak porsea molo ulaon ni surusuruan boi mangkorhon tu nasida. Alai, godang muse do halak na so porsea adong surusuruan.

Tutu do adong surusuruan? Molo songon i, sian dia do mulana? Aha do na didok Bibel taringot tu surusuruan? Adong do pangkorhonna tu ngolumuna? Taida ma alusna.