1-2. Hombar tu 1 Petrus 4:7, 8, aha do na boi mangurupi hita mangadopi angka sitaonon?

HITA mangolu di ujung ni ari parpudi. Alani i, ra godang do sitaonon na taadopi. (2 Tim. 3:1) Umpamana, dung sae kampanye pemilu di sada negara di Afrika barat, gaor jala marbadai ma angka halak disi. Saleleng onom bulan, bahaya do molo kaluar angka dongan sian jabuna ala marbadai do angka halak di humaliang ni nasida. Di tingki sisongon i, aha do na mangurupi nasida? Laho ma piga-piga donganta tu jabu ni angka dongan na tading di luat na so berbahaya. Sahalak donganta mandok, “Tingki sisongon i, las do rohangku ala boi rap tading dohot angka dongan. Gabe boi ma hami masipatoguan.”

² Tingki ro “hasusaan bolon”, boi do tongtong las rohanta ala adong dongan na mangkaholongi hita. (Pgk. 7:14) Alani i, ringkot do tapatogu sian saonari parale-aleonta dohot angka dongan. (Jaha 1 Petrus 4:7, 8.) Godang na boi taparsiajari sian pengalaman ni si Jeremia. Diurupi angka donganna do ibana asa boi tongtong martahan andorang so dihancurhon Jerusalem. * Songon dia hita boi maniru si Jeremia?

3. (a) Aha do hira-hira na boi mambahen si Jeremia ndang olo mardongan tu angka halak? (b) Aha do na dipaboa si Jeremia tu si Baruk, jala aha do hasilna?

³ Lobi sian 40 taon, tading ma si Jeremia rap dohot angka halak na so setia, termasuk ma i angka tetangga dohot piga-piga sisolhotna na sian hutana, i ma Anatot. (Jer. 11:21; 12:6)  Alai, ndang na gabe ndang olo ibana mardongan tu halak na asing. Gariada, dipaboa ibana do pangkilalaanna tu sekretarisna, i ma si Baruk. Jala sian na disurat si Baruk, gabe taboto ma songon dia pangkilalaan ni si Jeremia. (Jer. 8:21; 8:23; 20:14-18; 45:1) Boi ma tabayangkon, saleleng disurat si Baruk sude na masa tu si Jeremia, gabe masihaholongan jala gabe lam togu ma parale-aleon ni nasida.​—Jer. 20:1, 2; 26:7-11.

4. Aha do na disuru Jahowa ulahonon ni si Jeremia, jala songon dia tugasna i patoguhon parale-aleonna dohot si Baruk?

⁴ Saleleng martaon-taon, barani do si Jeremia paboahon tu halak Israel aha na laho masa tu Jerusalem. (Jer. 25:3) Andorang so ro panguhuman i, disuru Jahowa ma si Jeremia manurathon sipasingotna di sada gulungan laho manjujui angka halak asa marhamubaon. (Jer. 36:1-4) Saleleng marbulan-bulan ma si Jeremia dohot si Baruk rap mangulahon tugas i. Tontu, ala jotjot mangkata-hatai, gabe lam togu ma haporseaon ni nasida.

5. Sian dia taboto molo si Baruk dongan na burju di si Jeremia?

⁵ Dung sae gulungan i disurat, ingkon pos do roha ni si Jeremia tu si Baruk laho paboahon isi ni gulungan i tu angka halak. (Jer. 36:5, 6) Barani do si Baruk laho mangulahon tugas na berbahaya on. Tontu, bangga do si Jeremia tingki laho si Baruk tu alaman ni bagas joro jala manjahahon isi ni gulungan i tu angka halak. (Jer. 36:8-10) Nunga dibege angka pejabat ni Juda aha na diulahon si Baruk, alani i disuru ma asa gogo dijahahon si Baruk gulungan i tu nasida! (Jer. 36:14, 15) Naeng dipaboa nasida do tu Raja Joiakim aha na didok si Jeremia i. Alai didok nasida ma tu si Baruk, “Laho ma ho martabuni rap dohot si Jeremia, asa unang diboto manang ise ingananmuna i.” (Jer. 36:16-19) Sipaingot na denggan do on!

6. Aha do na diulahon si Jeremia dohot si Baruk tingki adong na marsogo ni roha tu nasida?

 ⁶ Dung mambege hata ni si Jeremia, muruk hian ma Raja Joiakim. Ditutung ibana ma gulungan i jala diparentahon ma asa dipenjarahon si Jeremia dohot si Baruk. Alai ndang mabiar si Jeremia. Dibuat ibana do muse gulungan na baru, dung i dilehon tu si Baruk. Dipaboa si Jeremia do muse sipasingot sian Jahowa tu si Baruk. Dung i, disurat si Baruk ma muse “sude na tarsurat di buku na ginulung na parjolo” na ditutung si Joiakim, Raja ni Juda.​—Jer. 36:26-28, 32, Bibel siganup ari.

7. Aha do hasilna ala rap saulaon si Jeremia dohot si Baruk?

⁷ Somalna, gabe lam togu do parale-aleon ni sasahalak dohot donganna molo hea nasida rap mangadopi sitaonon. Alani i boi ma tabayangkon, saleleng rap si Baruk dohot si Jeremia manurat gulungan na ditutung Raja Joiakim i muse, tontu gabe lam solhot jala lam togu do parale-aleon ni nasida. Songon dia hita boi maniru si Baruk dohot si Jeremia?

8. Aha do na mambahen hita maol marale-ale dohot na asing, alai boasa ndang menyerah hita?

⁸ Ra, maol do hita paboahon tu halak na asing aha na tahilala molo hea adong na mambahen hansit rohanta. (Poda 18:19, 24) Manang tahilala ndang adong tingki dohot gogonta laho marale-ale dohot dongan na asing. Alai unang ma menyerah. Molo lomo rohanta asa diurupi angka dongan tingki masa hasusaan, ingkon tapatogu do parale-aleonta dohot nasida sian saonari. Sada cara na ringkot na boi taulahon, i ma paboahon aha na tapingkirhon dohot aha na tahilala.​—1 Ptr. 1:22.

9. (a) Songon dia Jesus patuduhon na pos do rohana tu angka donganna? (b) Molo tapaboa aha na adong di roha dohot pingkiranta, boasa i boi mambahen lam togu parale-aleonta dohot na asing? Paboa ma contohna.

⁹ Pos do roha ni Jesus tu angka donganna. Alani i, dipaboa ibana do sude na di rohana tu nasida. (Joh. 15:15) Boi do tatiru Jesus. Boi do tapaboa tu na asing angka aha na mambahen hita marlas ni roha, marsak, dohot na mambahen jut rohanta. Tingki adong sasahalak na paboahon aha na di rohana tu hamu, denggan ma tangihon. Ra gabe diboto hamu ma, sarupa do hape cara marpingkir, pangkilalaan dohot tujuanmuna. Pingkirhon ma contoh sian si Cindy, sahalak donganta borua na marumur 29 taon. Mardongan do ibana dohot sahalak perintis na marumur 67 taon na margoar si Marie-Louise. Rap marbarita do nasida ganup ari Kamis manogot. Godang do na dihatai nasida. Didok si Cindy, “Lomo do rohangku mangkata-hatai dohot angka dongan taringot angka na ringkot. On mangurupi  ahu asa lam mananda nasida.” Songon si Cindy, molo dipaboa hamu aha na adong di roha dohot pingkiranmuna tu angka dongan, jala denggan ditangihon hamu nasida tingki mangkatai, on mambahen lam togu parale-aleonmuna.​—Poda 27:9.

10. Hombar tu Poda 27:17, aha do labana molo rap saulaon hita dohot dongan sahaporseaon?

¹⁰ Dos songon na masa tu si Jeremia dohot tu si Baruk, tingki rap saulaon hita dohot dongan sahaporseaon, boi ma taida parange ni nasida na denggan. Jala lam solhot ma hita tu nasida. (Jaha Poda 27:17.) Umpamana, boha do pangkilalaanmuna tingki marbarita jala diida hamu donganmuna barani patorangkon haporseaonna, manang paboahon taringot Jahowa dohot sangkapna? Tontu gabe lam holong do rohamu tu ibana.

11-12. Paboa ma contohna songon dia rap marbarita dohot angka dongan boi patoguhon parale-aleonmuna.

¹¹ Pingkirhon ma dua pengalaman na patuduhon songon dia rap marbarita dohot angka dongan boi patoguhon parale-aleonta. Donganta si Adeline na marumur 23 taon manogihon donganna si Candice laho tu inganan na mangkaporluhon parbarita. Didok ibana, “Lomo do rohanami asa lam ringgas marbarita jala marlas ni roha. Porlu do hami dipatogu laho mangalehon na dumenggan tu Jahowa.” Aha ma laba na dapot ni nasida? Didok ibana muse, “Dung sae marbarita, dihatai hami ma songon dia pangkilalaannami, aha na patoguhon rohanami, jala songon dia Jahowa mangurupi hami di ulaon marbarita. Lomo do rohanami mangkata-hatai songon i. Jala gabe lam solhot ma parale-aleonnami.”

¹² Dua donganta borua na sian Prancis na so marhasohotan dope na margoar si Laïla dohot si Marianne marbarita saleleng lima minggu di Bangui, ibukota ni Republik Afrika Tengah. Didok si Laïla, “Jotjot do hami mangadopi hasusaan, alai ala masihaholongan jala jotjot hami paboahon aha na adong di bagasan rohanami, gabe lam togu ma parale-aleonnami. Huida ma, mura do si Marianne  pahombarhon diri tu situasi na baru. Holong do rohana tu angka halak disi jala ringgas do ibana marbarita. Gabe lam huargai ma ibana.” Ndang ingkon pinda hamu tu luar negeri laho mandapot laba na sarupa. Tingki marbarita hamu rap dohot angka dongan di huria, on ma tingkina hamu laho mananda nasida jala patoguhon parale-aleonmuna.

13. Ala jotjot rap saulaon hita dohot angka dongan, sipata aha do na masa?

¹³ Sipata, ala jotjot rap saulaon hita dohot angka dongan, ndang holan angka na denggan na taida sian nasida. Alai, dohot do hahurangan ni nasida. Aha do na mangurupi hita asa boi tongtong marale-ale nang pe adong hahurangan ni nasida? Taparsiajari ma muse contoh sian si Jeremia. Laho taulas ma, aha na mangurupi ibana mangida parange na denggan sian angka donganna jala manalpuhon hasalaan ni nasida.

14. Aha do na diparsiajari si Jeremia taringot Jahowa, jala songon dia i mangurupi ibana?

¹⁴ Si Jeremia do na manurat buku Jeremia. Jala, ibana do ra na manurat buku 1 dohot 2 Raja-raja. Sian tugas on, diida si Jeremia ma songon dia Jahowa marasi ni roha tu jolma na so sempurna. Umpamana, diboto ibana do ala marhamubaon Raja Ahab, didok Jahowa ndang na laho idaonna jea na masa tu keluargana. (1 Raj. 21:27-29) Jala diboto si Jeremia do, umjahat do si Manasse sian si Ahab. Alai disesa Jahowa do dosana ala marhamubaon. (2 Raj. 21:16, 17; 2 Kron. 33:10-13) Sian angka contoh on, gabe diurupi ma si Jeremia asa maniru Jahowa. Sabar do ibana jala marasi ni roha tu angka donganna.​—Ps. 103:8, 9.

15. Songon dia si Jeremia maniru hasabaron ni Jahowa tingki ndang marsitutu si Baruk mangulahon tugasna?

¹⁵ Pingkirhon ma songon dia si Jeremia mangurupi si Baruk tingki hea ibana ndang marsitutu mangulahon tugasna. Ndang pintor didok roha ni si Jeremia na so boi be si Baruk diurupi. Diurupi ibana do si Baruk marhite paboahon sipasingot sian Jahowa na tangkas alai lambok. (Jer. 45:1-5) Aha do na boi taparsiajari sian contoh on?

16. Songon na didok di Poda 17:9, aha do na ingkon taulahon asa tongtong togu parale-aleonta tu dongan na asing?

¹⁶ Tontu, ndang boi tapangido angka donganta asa sempurna. Molo marale-ale hita tu sasahalak, ingkon tajaga do parale-aleonta i asa tongtong togu. Molo diulahon nasida na sala, denggan ma talehon sipasingot sian Bibel. (Ps. 141:5) Molo jut rohanta dibahen nasida, tasalpuhon ma i. Jala unang be tataringoti hasalaanna i tu ibana manang tu halak na asing. (Jaha Poda 17:9.) Sian apala mamparrohahon hahurangan ni angka dongan, tumagon ma tapatogu parale-aleonta dohot nasida di ari parpudi on! Molo taulahon i, gabe lam togu ma parale-aleonta dohot nasida. Ringkot do i taulahon sian saonari, ala tahaporluhon do dongan na burju saleleng hasusaan bolon.

17. Boasa boi tadok si Jeremia gabe dongan na burju tingki susa?

¹⁷ Dipatudu si Jeremia do molo ibana dongan na burju di tingki susa. Umpamana, dung dipalua si Ebedmelek ibana sian sumur na margambo, mabiar do si Ebedmelek ala naeng dibunu angka pejabat ibana. Tingki dibege si Jeremia taringot i, ndang holan sip ibana manang didok rohana, boi do si Ebedmelek pasaehon parsoalanna sandiri. Nang pe di penjara si Jeremia, marsitutu do ibana patoguhon si Ebedmelek marhite paboahon janji ni Jahowa tu ibana.​—Jer. 38:7-13; 39:15-18.

18. Hombar tu Poda 17:17, aha do na ingkon taulahon tingki angka dongan mangadopi hasusaan?

 ¹⁸ Saonari, marragam do hasusaan na diadopi angka dongan. Ra, adong do na hona bencana alam manang susa alani porang. Tingki masa i, ra boi do tatogihon nasida tading di jabunta. Manang, boi do talehon sumbangan tu nasida. Alai sude hita, boi do mangido tu Jahowa asa diurupi nasida. Tingki taboto adong angka donganta na marmetmet ni roha, ra ndang taboto aha na laho tadok dohot na laho taulahon. Alai boi do taurupi nasida. Umpamana, talehon ma tingkinta tu nasida. Denggan ma tatangihon tingki dipaboa nasida songon dia pangkilalaanna. Asing ni i, boi do tapaboa ayat favorit na patoguhon roha. (Jes. 50:4) Alai na rumingkot, ingkon rade do hamu mangurupi angka dongan tingki dihaporluhon.​—Jaha Poda 17:17.

19. Songon dia parale-aleon na tapatogu sian saonari mangurupi hita di ari na naeng ro?

¹⁹ Ingkon marsitutu do hita marale-ale jala patoguhon parale-aleonta i sian saonari. Boasa? Alana, marsitutu do angka musu mambahen gabus asa unang marsada jala asa unang marpos ni roha be hita tu angka dongan. Alai, ndang na laho marhasil nasida. Ndang boi dibahen nasida hita gabe ndang mangkaholongi angka donganta. Jala ndang boi disegai nasida parale-aleonta na togu. Gariada, parale-aleonta i ndang holan martahan sahat tu ajal ni portibi on. Alai martahan do i saleleng ni lelengna!