GODANG do akka donganta na pinda tu negara na asing lao karejo, alai mulak do muse nasida tu negara asalna. Alani holong ni nasida tu Jahowa dohot tu akka dongan, pinda ma nasida tu inganan na makkaporluhon parbarita. (Mat. 22:37-39) Aha do pengorbanan na dibahen nasida? Jala pasu-pasu aha do na dapot nasida? Taida ma akka pengalaman sian Kamerun Afrika barat.

Di taon 1998 sahalak donganta na margoar si Onésime pinda sian negara asalna, i ma Kamerun. Saleleng 14 taon tinggal ma ibana di luar negeri. Sada tikki di parpunguan, dibege ibana ma sada tudosan taringot ulaon marbarita. Didok parjamita i, “Adong ma dua halak na mardongan na lao makkail. Na sada makkail di inganan na godang dekkena. Alai na sada nai, di inganan na so godang dekkena. Molo diboto ibana unggodang dekke na dapot ni donganna i, pasti olo do ibana pinda tu inganan na godang i dekkena.”

Tudosan i mambahen si Onésime gabe naeng mulak muse tu negara asalna di Kamerun. Ai diboto ibana, godang do halak na olo marsiajar Bibel disi. Alai boi do ibana menyesuaihon muse tu negara asalna hape nungnga martaon-taon ibana tinggal di luar negeri? Jadi dicoba ibana ma jo mulak tu Kamerun saleleng onom bulan. Dung i di taon 2012, pindah ma ibana tu Kamerun lao menetap disi.

Didok si Onésime, “Ikkon menyesuaihon do au muse tu cuaca panas dohot tu situasi disi. Di Bale Harajaon, ikkon terbiasa do au hundul di kursi na hurang nyaman.” Alai didok ibana ma muse, “Molo fokus au tu na diulas, dang huingot be kursi na nyaman najolo i.”

Di taon 2013, marhasohotan ma si Onésime dohot si Géraldine. Si Géraldine nungnga hea tinggal di Perancis saleleng sia taon, alai mulak muse tu Kamerun. Aha do pasu-pasu na dilehon Jahowa tu nasida ala toktong manjumolohon ulaon harajaon? Didok si Onésime ma, “Boi ma hami dohot tu Sikkola tu Parbarita Harajaon jala melayani di Betel. Holan di bagasan sataon adong ma 20 parsiajar Bibel na tardidi di hurianami. Saonari, huboto ma nungnga di inganan na pas be au lao ‘manjala jolma’.” (Mrk. 1:17, 18) Didok si Géraldine ma, “Dapot hami do pasu-pasu na so hea hubayangkon hami.”

Donganta na margoar si Judith pindah tu Amerika Serikat. Alai lomo do rohana naeng mangalehon unggodang tikki dohot gogo tu Jahowa. Didok ibana, “Setiap mulak au tu Kamerun, sai tangis do au tikki naeng marsirang dohot akka parsiajar Bibelhu najolo.” Nang pe songon i, hurang pos dope rohana lao pindah muse tu Kamerun. Alana denggan do karejona jala balga do gajina. Jadi, boi ma diurupi ibana pengobatan ni bapakna di Kamerun. Alai ala pos rohana tu  Jahowa, pindah ma ibana. Memang didokkon ibana, masihol do ibana tu kenyamanan na di Amerika. Jadi martangiang ma ibana tu Jahowa, asa boi ibana mambahen penyesuaian. Jala dipatogu pengawas wilayah dohot istrina do ibana.

Didok si Judith, “Massai las do rohakku ala boi huurupi opat parsiajar Bibelhu tardidi di bagasan tolu taon.” Jala gabe perintis istimewa ma si Judith. Saonari mandongani suamina ma ibana, si Sam-Castel gabe pengawas wilayah. Alai aha ma na masa tu bapakna i? Dapot nasida do rumah sakit di luar negeri na olo mambiayai operasi ni bapakna. Jala marhasil do operasina i.

Sahalak donganta na margoar si Victor pinda tu Kanada. Dung dijaha ibana Joujou Paboahon taringot pendidikan tinggi, dipikkiri ibana ma porlu dope ibana torus sikkola. Jadi dang dilanjutton ibana be kuliahna jala dibuat ibana ma kursus. Didok si Victor ma “Gabe hatop ma au mandapot karejo. Jala boi ma au merintis, i do cita-citakku sian najolo.” Dung i marhasohotan ma si Victor dohot si Caroline. Dikunjungi nasida ma kantor cabang na adong di Kamerun. Dijujui akka dongan na disi do nasida asa pinda tu Kamerun lao marbarita. Didok si Victor ma, “Dang adong alasannami menolak i. Ai sederhana do ngolunami saleleng on, jadi dang pola maol hami mangoloi i.” Nang pe adong do masalah kesehatan ni si Caroline, alai dibahen nasida do keputusan pinda tu Kamerun.

Merintis biasa ma si Victor dohot si Caroline jala mangurupi akka halak na olo marsiajar Bibel. Mulana dang pola ikkon karejo halak i, ala adong dope tabungan. Alai ujungna karejo ma nasida saleleng piga-piga bulan di Kanada, asa boi muse mulak tu Kamerun lao merintis. Pasu-pasu aha ma dapot nasida? Boi ma nasida dohot tu Sikkola tu Parbarita Harajaon, melayani gabe perintis istimewa, jala saonari melayani di proyek pembangunan. Didok si Victor ma, “Ala olo hami maninggalhon kenyamanan najolo i jala marhaposan tu Jahowa, sai diurupi Jahowa do hami.”

Di taon 2002, sahalak donganta na margoar si Alain, kuliah di Jerman. Dijaha ibana ma risalah na marjudul, Kaum Muda​—Bagaimana Kalian Akan Menggunakan Kehidupan? Artikel i mangurupi ibana mambahen cita-cita na baru. Di taon 2006, dohot ma ibana tu Sekolah Pelatihan Pelayanan. Jala ditugasson ma ibana tu Kamerun, negara ingananna tubu.

Tikki di Kamerun, dapot ni si Alain ma karejo paruh waktu. Dung i dapotna ma karejo na umbalga gajina. Alai khawatir do ibana, so tung moru annon tikkina lao marbarita. Jadi tikki diundang ibana gabe perintis istimewa, pittor dijalo ibana ma. Nang pe ditawarhon bosna tu ibana gaji na umbalga, alai dang diubah ibana keputusanna. Ujungna marhasohotan ma si Alain dohot si Stéphanie, sahalak donganta naung martaon-taon tinggal di Perancis. Tantangan aha do na diadopi ibana dung pinda tu Kamerun?

Didok si Stéphanie ma, “Nang pe adong masalah kesehatanku jala adong alergikku, alai ujungna dapotnami do pengobatan na cocok.” Dipasu-pasu Jahowa do nasida ala toktong martahan. Didok si Alain ma, “Tikki marbarita hami di huta-huta, i ma di Katé, juppangnami ma akka halak na olo marsiajar Bibel. Boi ma hami marsiajar Bibel dohot nasida lewat telepon. Dua sian nasida ujungna tardidi, jala dibahen ma sada kelompok di inganan i.” Didok si Stéphanie ma, “Dang adong las ni roha na umbalga sian na mangurupi halak asa mangalehon diri tu Jahowa.  Saleleng melayani hami dison, dapotnami do las ni roha i.” Saonari si Alain dohot si Stéphanie nungnga melayani gabe pengawas wilayah.

Tardidi do si Gisèle tikki sikkola kesehatan dope ibana di Italia. Lomo do rohana mangida sapasang perintis na mangurupi ibana marsiajar Bibel, ala sederhana do ngolu ni nasida. Gabe taronjar do rohana lao mangalehon unggodang gogo dohot tikki lao mabarita na uli. Jadi merintis biasa ma si Gisèle huhut sikkola.

Lomo do roha ni si Gisèle mulak muse tu Kamerun asa boi marbarita disi, alai dang pos dope rohana. Didok ibana ma, “Adong dope ijinku tinggal di Italia, jadi molo pinda au, dicabut ma annon i.” Alai nang pe songon i, di bulan Mei taon 2016, pinda ma si Gisèle tu Kamerun. Dang leleng dukkon i muli ma ibana tu si Léonce. Dijujui kantor cabang na di Kamerun do nasida asa pindah tu Ayos, sada kota na makkaporluhon godang parbarita.

Songon dia do keadaan di kota Ayos? Didok si Gisèle ma, “Jotjot do disi mate listrik saleleng piga-piga minggu, gabe dang boi be dicas HPnami. Akka halak na disi pe jotjot do gabe dang karejo. Marsiajar ma au mangaloppa mamakke soban. Jala diboan hami do beko dohot senter lao mangalap aek tikki borngin. Hupaima hami ma jolo otik halak di inganan pambuatan ni aek i.” Songon dia do si Gisèle dohot suamina mangatasi situasi i? Didok si Gisèle ma, “Diurupi tondi parbadia ni Jahowa do hami jala sai didukung suamikku do au. Dipatogu akka dongan dohot keluarga do hami jala diurupi do hami di parhepengon.”

Las do roha ni si Gisèle mulak muse tu negara asalna? Didok ibana ma, “Ido! Massai las do rohakku. Memang mulana godang do tantanganna, jala hea do metmet rohanami. Alai berhasil do hami mangatasi i sude. Gabe pos ma rohanami, keputusan na denggan do na hubahen hami. Gabe pos ma rohanami tu Jahowa jala lam jonok ma hami tu Ibana.” Ujungna, boi ma si Léonce dohot si Gisèle dohot tu Sikkola tu Parbarita Harajaon. Jala saonari melayani ma nasida gabe perintis istimewa sementara.

Songon sahalak panjala na barani mangadopi situasi na maol asa boi dapotna godang dekke, songon i ma akka dongan na mulak tu negara asalna. Rade do nasida mambahen pengorbanan asa boi mangurupi akka halak na olo manangihon barita Harajaon. Pasti dang dilupahon Jahowa kerja keras ni akka parbarita on dohot holong na dipatudu nasida tu goarna. (Neh. 5:19; Heb. 6: 10) Molo tinggal di luar negeri hamu, hape diboto hamu negara asalmuna makkaporluhon godang parbarita, olo do hamu mulak? Molo olo hamu, pasti godang do pasu-pasu na dapotmuna.​—Poda 10:22.