1. Songon na didok Mateus 7:13, 14, boasa boi tadok molo hita adong di sada dalan?

SUDE do hita adong di sada dalan. Tujuanta asa boi mangolu di tano na imbaru na diparade Jahowa di Harajaonna. Ganup ari marsitutu do hita asa torus di dalan tu hangoluan. Alai songon na didok Jesus, soppit do dalan i jala maol do torus mardalan disi. (Jaha Mateus 7:13, 14.) Ala dang sempurna hita, olo do gabe tatinggalhon dalan i.​—Gal. 6:1.

2. Aha do na lao taulas di artikel on? (Ida kotak “ Serep ni Roha Mangurupi Hita Marhamubaon.”)

² Molo naeng torus hita mardalan di dalan na soppit tu hangoluan i, ikkon olo do hita paubahon cara marpikkir, sikap, dohot pangalahotta. Dijujui Apostel Paulus do halak Kristen di Korint, asa ‘tongtong marhamubaon’. (2 Kor. 13:11) Marlakku dope poda i tu hita saonari. Di artikel on lao taulas ma songon dia Bibel boi mangurupi hita marhamubaon, jala songon dia akka dongan na gabe teladan boi mangurupi hita asa toktong di dalan hangoluan. Taulas ma muse boasa sipata maol mangihutton tudu-tudu na dilehon organisasi ni Jahowa. Taida ma songon dia serep ni roha boi mangurupi hita mambahen hamubaon jala toktong marlas ni roha manomba Jahowa.

3. Songon dia do Hata ni Debata boi mangurupi hamu?

³ Sipata dang mura mamareso roha dohot pikkiranta. Boasa? Alana akkal do roha i. Jadi dang sai taboto aha na di bagasan roha dohot pikkiranta. (Jer. 17:9) Gabe olo do hita ‘dioto-otoi dirinta’ sandiri. (Jak. 1:22) Jadi, ikkon tapakke do Hata ni Debata lao mamareso diritta. Boi do Bibel mangurupi hita mamboto aha na adong di roha dohot  “na adong di pingkiranta”. (Heb. 4:12, 13) Hata ni Debata, dos do songon mesin rontgen na boi mangurupi hita mamboto aha na adong di bagasan, na so boi taida sian luar. Alai ikkon serep do rohatta asa boi taulahon poda na sian Bibel manang sian halak na dilantik Debata.

4. Sian dia do taboto na ginjang do roha ni Raja Saul?

⁴ Contoh ni Raja Saul patuduhon, aha na boi masa tu hita molo dang serep rohatta. Ginjang do roha ni si Saul, jala dang diakkui ibana na porlu do ibana mambahen hamubaon. (Ps. 36:2, 3; Hab. 2:4) Misalna dipaboa Jahowa do tu si Saul, na ikkon ulahononna dung manaluhon halak Amalek. Alai dang dioloi si Saul paretta ni Jahowa. Jala tikki ro Panurirang Samuel lao pasingotton ibana, dang diakkui si Saul hasalaanna. Gariada didok ibana dang pola serius hasalaanna i, jala ditudu ibana do halak na asing na manuru ibana mangulahon i. (1 Sam. 15:13-24) Sebelumna pe nga hea dibahen ibana songon i. (1 Sam. 13:10-14) Alai ginjang do roha ni si Saul, dang dipauba ibana cara marpikkirna, gabe dipissang Jahowa ma ibana, jala dang lomo roha ni Jahowa be mangida ibana.

5. Asa unang ginjang rohatta songon si Saul, aha do na porlu tasukkun tu diritta?

⁵ Asa unang ginjang rohatta songon si Saul, porlu do tasukkun diritta, ‘Tikki hujaha poda ni Bibel, marsidalian do au mandok na so tu au poda i? Sai hudok do tu rohakku dang pola balga hasalaan na hubahen i? Gabe halak na asing do hutudu ala ni hasalaan na hubahen i?’ Molo songon i do, porlu do tapauba cara marpikkirta. Molo dang, boi do gabe ginjang rohatta jala boi do gabe dang lomo be roha ni Jahowa marale-ale tu hita.​—Jak. 4:6.

6. Aha do imbar ni Raja Saul dohot Raja Daud?

⁶ Parrohahon ma imbar ni Raja Saul dohot Raja Daud. Dihaholongi si Daud do “patik ni Jahowa”. (Ps. 1:1-3) Diboto si Daud do na dihalomohon Jahowa halak na serep roha jala dihasogohon Ibana halak siginjang roha. (2 Sam. 22:28) Jadi dipaloas si Daud do patik ni Debata paubahon cara marpikkirna. Disurat ibana ma, “Hupuji ma Jahowa na manogunogu ahu, jala di tingki borngin panggora ni rohangku mangajari ahu.”​—Ps. 16:7, Bibel siganup ari.

7. Aha do na taulahon molo serep rohatta?

⁷ Molo serep rohatta tapaloas do Bibel paubahon cara marpikkirta na sala, asa unang sappe taihutton i. Dipasingot Bibel do hita asa unang manirpang tu kanan manang tu kiri. Jadi, Bibel i songon na mandok, “On do dalan i, i ma dalan i!” (Jes. 30:21) Molo tatangihon Jahowa, godang ma laba na tadapot. (Jes. 48:17) Misalna, dang gabe maila be hita molo dipasingot sasahalak hita. Jala boi ma hita lam jonok tu Jahowa, ala taboto dibahen Ibana do hita songon anak haholonganna.​—Heb. 12:7.

8. Songon na disurat di Jakobus 1:22-25, boasa Bibel dipatudos songon kaca?

⁸ Dipatudos do Bibel songon kaca. (Jaha Jakobus 1:22-25.) Biasana markaca do hita ganup ari molo naeng lao tu luar. Jadi boi ma taida na porlu tapadenggan sian penampilanta, andorang so diida na asing. Suang songon i ma molo tajaha Bibel ganup ari, boi ma taida aha na porlu tapauba sian cara marpikkir dohot sikapta. Godang do na mandapot laba ala manjaha ayat harian ganup manogot. Diloas nasida do na dijaha na i masuk tu pikkiranna. Jadi, sai dilului ma cara mangulahon  ayat harian sadari i. Jala ikkon tabahen do muse jadwal mamparsiajari Bibel dohot mangarimangi i ganup ari. Ala on ma sada cara na rikkot asa boi hita toktong mardalan di dalan na soppit tu hangoluan.

9. Boasa porlu hita dipasingot akka dongan?

⁹ Hea do hamu naeng mandao sian Jahowa? (Ps. 73:2, 3) Olo do ra adong donganta na teladan mangida i. Molo dipasingot ibana hamu olo do hamu manangihon sipasingotna i? Molo olo do hamu denggan ma i, jala mandok mauliate ma hamu ala barani donganmuna i pasingotton hamu.​—Poda 1:5.

10. Songon dia do sikapta molo dipasingot dongan hita?

¹⁰ Bibel mandok, ‘Tanda ni haburjuon do lukka na binahen ni aleale.’ (Poda 27:6) Aha do lapatan ni ayat on? Parrohahon ma contoh on: Bayangkon ma naeng menyeberang jalan raya na rame hamu, alai dang fokus hamu alani HPmuna. Menyeberang ma hamu, dang diida hamu be tu kanan manang tu kiri. Toppu ma adong donganmuna na manarik tanganmuna sian pudi, asa unang hona tabrak hamu. Alani gogona tanganmuna ditarik gabe lukka ma tanganmuna i. Nang pe lukka tanganmuna i jala haccit saleleng piga-piga ari, gabe sogo do rohamuna mangida dongan na manarik tanganmuna i? Daong! Gariada mandok mauliate do hamu ala diurupi. Suang songon i ma, haccit do di mulana tahilala molo adong na pasingotton hita, ala dang sesuai be pakkataion dohot parniulaatta tu prinsip ni Bibel. Alai unang ma jut rohatta molo dipasingot hita. Sada haotoon do i molo muruk hita tikki dipasingot. (Pjm. 7:9) Gariada, ikkon mandok mauliate do hita ala barani donganta i pasingotton hita.

11. Aha do na mambahen sasahalak dang olo manangihon sipasingot sian donganna?

¹¹ Aha do na mambahen sasahalak dang olo manangihon sipasingot sian donganna? Ginjang ni roha. Halak siginjang roha, holan manangihon hata na pageok-geokkon pinggol nasida. Jala “ndang olo be nasida manangihon hasintongan”. (2 Tim. 4:3, 4) Didok roha ni nasida dang porlu be nasida dipasingot. Ai dirippu do umbisuk nasida jala urrikkot sian halak na asing. Alai didok si Paulus do, “Molo adong mandok dirina ringkot, hape ndang songon i, na manggabusi dirina do ibana disi.” (Gal. 6:3) Jala takkas do dipaboa Raja Salomo taringot on. Disurat ibana, “Tagonan do sada dolidoli na pogos jala na bistok sian sada raja naung matua nian hape na oto, na so olo be paingoton.”​—Pjm. 4:13.

12. Songon na disurat di Galatia 2:11-14, aha do na boi taparsiajari sian si Petrus?

¹² Pikkirhon ma na diulahon si Petrus tikki dipasingot si Paulus ibana di jolo ni godang halak. (Jaha Galatia 2:11-14.) Boi do muruk si Petrus tu si Paulus, ala hurang denggan cara ni si Paulus pasingotton ibana. Jala di jolo ni natorop muse ibana dipasingot. Alai marbisuk do si Petrus, dijalo ibana do sipasingot i jala dang sogo rohana tu si Paulus. Gariada di pudian ni ari didok si Petrus do si Paulus i “donganta na tahaholongi”.​—2 Ptr. 3:15.

13. Aha do na porlu tapikkirhon andorang so pasingotton sasahalak?

¹³ Molo adong donganta na porlu tapasingot, aha do na porlu tapikkirhon? Andorang so makkatai hita dohot donganta i,  tasukkun ma diritta, ‘Matigorhu do au?’ (Pjm. 7:16 Bibel siganup ari) Biasana halak na patigorhu, dang patuduhon asi ni roha. Ai aturanna sandiri do na dipakke, dang aturan ni Jahowa. Molo dihilala hamu do memang porlu pasingotton donganta i, takkas ma paboa tu ibana masalahna. Jala pakke ma sukkun-sukkun lao mangurupi ibana mamboto sala do na binahenna i. Ingot ma dang boi hita manguhumi donganta. Alai urupi ma ibana paboahon songon dia pakkilalaan ni Jahowa tu na diulahonna i. (Rom 14:10) Tapakke ma Hata ni Debata, jala tatiru ma Jesus na marasi ni roha. (Poda 3:5; Mat. 12:20) Boasa? Alana songon dia caratta maradoppon na asing, songon i do cara ni Jahowa maradoppon hita.​—Jak. 2:13.

14. Aha do na diparade organisasi ni Debata tu hita?

¹⁴ Ditogu-togu Jahowa do hita di dalan tu hangoluan, marhite organisasina na adong di tano on. Organisasi on paradehon akka video, publikasi, dohot parpunguan, na mangurupi hita lao mangulahon poda ni Bibel. Boi do tahaporseai informasi on, ala sian Bibel do i dibuat. Tikki dibahen Punguan na Mangaradoti Organisasi keputusan taringot tu ulaon marbarita, diasahon nasida do tondi parbadia. Nang pe songon i dipareso nasida dope akka keputusan na dibahen nasida, lao mamboto porlu do diuba keputusan i manang na dang. Boasa? Ala “muba do sude na masa di portibi on”, organisasi ni Jahowa pe ikkon menyesuaihon do tu na masa i.​—1 Kor. 7:31.

15. Tantangan aha do na diadopi piga-piga donganta?

¹⁵ Tikki dilehon organisasi pangattusion na baru taringot ajaran ni Bibel dohot prinsip moral na porlu taihutton, mura do tajalo i. Alai, songon dia do sikapta molo dibahen organisasi penyesuaian na berpengaruh tu ngolutta? Misalna piga-piga taon na parpudi on, lam martamba do biaya mambangun dohot mangarawat akka inganan parpunguan. Dibahen Punguan na Mangaradoti Organisasi ma keputusan asa sada Bale Harajaon boi dipakke piga-piga huria. Jadi adong ma piga-piga huria na dipasada, jala adong do Bale Harajaon na dijual. Gabe boi ma  dipakke hepeng ni organisasi lao mambangun Bale Harajaon di inganan na makkaporluhon. Molo di ingananmuna adong Bale Harajaon na dijual, jala adong huria na dipasada, maol do ra hamu mangihutton pengaturan i. Adong do donganta na gabe lam dao pardalanna lao marpungu. Na asing na dohot mambangun jala mangarawat Bale Harajaon i, sukkun-sukkun do ra rohana, boasa ikkon dijual gedung i. Olo do ra dihilala nasida marisuang tikki dohot upaya na dilehon nasida. Alai dipuji do akka donganta on ala olo nasida mangihutton penyesuaian i.

16. Boasa boi hita toktong marlas ni roha molo taihutton poda ni Kolosse 3:23, 24?

¹⁶ Asa boi hita toktong marlas ni roha, taingot ma aha pe na taulahon tu Jahowa do i, jala Ibana do na mangatur organisasina. (Jaha Kolosse 3:23, 24.) Dibahen Raja Daud do sitiruon na denggan tikki mangalehon sumbangan lao mambangun bagas joro. Didok ibana, “Ai ise nian ahu pola, jala ise pola ia bangsongki, tung pola tuk gogonami mangaringgas margugu songon on? Ai marharoroan sian Ho do saluhutna i, jala sian tanganmi do i na hulehon hami tu Ho.” (1 Kron. 29:14) Memang sian Jahowa do sumbangan na talehon tu Ibana. Alai las do roha ni Jahowa molo talehon tikki, gogo, dohot hepengta tu ulaon ni organisasi.​—2 Kor. 9:7.

17. Boasa dang pola metmet rohamuna tikki diboto hamu adong na ikkon dipauba sian dirimuna?

¹⁷ Asa boi toktong mardalan di dalan na soppit tu hangoluan, ikkon tatiru do Jesus. (1 Ptr. 2:21) Molo diboto hamu adong do na ikkon dipauba sian dirimuna, unang ma gabe metmet rohamuna. Sasittongna, i patuduhon na rade do hamu mangihutton tudu-tudu ni Jahowa. Diboto Jahowa do hita jolma na so sempurna. Jadi dang diharappon Ibana asa sempurna hita maniru Jesus.

18. Aha do na porlu taulahon asa boi sahat tu tujuanta?

¹⁸ Sai fokus ma hita sude tu ari na naeng ro. Jala rade ma hita paubahon cara marpikkir, sikap, dohot pangalahotta. (Poda 4:25; Luk. 9:62) Toktong ma serep rohatta, marlas ni roha, jala marhamubaon. (2 Kor. 13:11) Molo taulahon i, didongani “Debata parholong jala na mangalehon dame i ma hita”. Urupanna do hita asa marlas ni roha saonari, jala lehononna do tu hita hangoluan na salelengna di tano na imbaru.