TUBU taon 1923 do ahu di Hemsworth, sada huta di Yorkshire, Inggris. Sada ma itongku, goarna si Bob. Tingki marumur sia taon ahu, dapot ni bapa ma pigapiga buku na paboahon songon dia agama na palsu mangotootoi angka halak. Las do roha ni bapa manjaha buku i. Ndang lomo rohana mangida pemimpin agama na munafik. Pigapiga taon dungkon i, ro ma si Bob Atkinson tu jabunami. Diputar ma rekaman jamita ni si Rutherford. Huboto hami ma, sarupa do hape punguan na mambahen jamita i dohot na mambahen buku i. Ditogihon natuatuangku ma donganta si Atkinson mangan tu jabunami ganup borngin. Dialusi ibana ma angka sungkunsungkunnami taringot Bibel. Ditogihon ma hami asa marpungu di jabu ni donganta. Ndang apala dao sian jabunami. Taratur ma hami marpungu, jala jongjong ma sada huria na gelleng di Hemsworth. Ndang piga leleng, ro ma hamba zona (saonari digoari sintua kaliling). Marborngin di jabu ma ibana dohot angka perintis di luat i. Mangkorhon na denggan do on di ahu.

Tingki i, nunga adong bisnis ni keluarganami. Alai didok bapa ma tu itongku ”Molo laho merintis do ho, unang pola be marbisnis hita.” Olo do si Bob. Laho ma ibana gabe perintis tingki marumur 21 taon. Dua taon dungkon i, ahu pe merintis ma. Tingki i, umurhu 16 taon. Ganup ari Sabtu dohot Minggu rap marbarita do ahu dohot angka dongan. Alai, ari Senen sahat tu Kamis holan sahalakku do marbarita. Hupangke do fonograf dohot kartu kesaksian, i ma kartu na gelleng na marisi hatorangan na jempek sian Bibel. Dipasupasu Jahowa do ahu. Adong do sada parsiajar Bibelhu na maju. Ujungna, godangan sian keluargana gabe Sitindangi Ni Jahowa. Sataon dungkon i, dilantik ma ahu gabe perintis istimewa rap dohot si Mary Henshall. Ditugashon ma hami tu Cheshire, luat na so adong dope parbarita na uli.

Saleleng Porang Dunia na paduahon, disuru do angka borua mangurupi na marporang. Diloas do angka pangula ni huria agama na asing, asa ndang dohot mangurupi na marporang. Dirimpu hami  ma na boi do hami songon i. Hape ndang diloas pengadilan. Gabe dipenjara ma ahu 31 ari. Sataon dungkon i, hirahira 19 taon ma umurhu. Dijou ma ahu muse tu pengadilan dua hali, ala ndang olo mangurupi marporang. Alai, dipaulak do muse. Sian on huboto ma, diurupi tondi parbadia do ahu. Dilehon Jahowa do gogo jala dipatogu do ahu.​—Jes. 41:10, 13.

Pajumpang ma ahu dohot si Arthur Matthews taon 1946. Tingki i, baru kaluar sian penjara dope ibana. Tolu bulan ma ibana dipenjara ala ndang dohot marporang. Jadi dung kaluar ibana, pintor dijumpangi ibana do abangna si Dennis, perintis istimewa di Hemsworth. Nunga sian mulai dakdanak diajari natuatuana tu nasida taringot Jahowa. Jala nunga tardidi nasida tingki remaja dope. Ndang sadia leleng dung rap merintis nasida, ditugashon ma si Dennis tu Irlandia. Alani i, gabe sahalak ni si Arthur ma disi. Alani ringgasna, gabe las ma roha ni natuatuangku mangida ibana. Ditogihon ma ibana asa rap sajabu dohot nasida. Tingki mulak tu huta, rap manunsi piring ma ahu dohot si Arthur. Ujungna, gabe masitongosan surat ma hami. Alai di taon 1948, dipenjara ma muse ibana saleleng tolu bulan. Di bulan sada taon 1949 marhasohotan ma hami. Marcita-cita do hami asa tongtong merintis. Manat do hami mamangke hepeng. Asa cukup hepengnami, di tingki cuti, dohot ma hami mamanen. Marhite pangurupion ni Jahowa boi ma hami tongtong merintis.

Hirahira dung sataon, dipapinda ma hami tu Irlandia Utara. Na parjolo tu Armagh dung i tu Newry. Godang do halak Katolik disi. Sogo do roha ni nasida tu agama na asing. Alani i, ingkon manat do hami tingki marbarita. Dibahen ma parpunguan di jabu ni donganta, 16 kilometer sian jabunami. Ualu halak ma na ro marpungu disi. Sipata olo do hami marborngin disi jala modom di lante. Alai marsogotna i, gok ma sipanganonnami. Saonari, godang do Sitindangi Ni Jahowa di luat i. Las do roha mamboto i.

Perintis istimewa do itongku dohot edangku di Irlandia Utara. Alani i, gabe rap ma hami na opat tu kebaktian distrik di Belfast taon 1952. Marborngin ma hami rap dohot donganta si Pryce Hughes di jabu ni sahalak donganta. Sada tingki, mangkatahatai ma hami taringot buku kecil God’s Way Is Love. Buku on, dibahen holan tu halak Irlandia. Dipatorang donganta si Hughes ma maol ni marbarita na uli tu halak Katolik di Republik Irlandia. Diusir do angka donganta sian i, jala dijujui angka pandita do halak asa mangalo angka donganta. Didok donganta si Pryce ma ”Porlu do sapasang na mardongan saripe jala na adong mobilna asa dohot tu kampanye mansarhon buku kecil on di sude luat di negara on.”  * Disi ma didok hami, ”Rade do hami!”

Somalna tingki di Dublin, di jabu ni si Ma Rutland do angka perintis tading. Nunga martaon-taon  ibana manomba Jahowa jala tongtong marsihohot. Hami pe hea do tading di jabuna. Dijual hami ma sude angka artanami. Dung i, laho ma hami mangalului mobil mamangke becak ni si Bob. Dapotnami ma sada mobil na bagak. Alai, ala ndang boi hami manupir, dipangido hami ma tu na manggadis i, asa dipataru mobil i tu jabunami. Bornginna i, hundul ma si Arthur di podoman huhut maranganangan mamboan mobil i. Hape marsogot nai tingki laho dipakaluar si Arthur mobil i, ro ma sahalak donganta misionaris na margoar si Mildred Willett (na gabe tungganeboru ni si John Barr). Ala boi do ibana manupir, diajari ma hami. Dungkon i, boi ma hami manupir mobil i.

Dung i, ingkon dilului hami ma muse inganannami tading. Didok angka donganta do asa unang olo hami tading di truk na dibahen gabe jabu. Alana boi do i annon tutungon ni halak na marsogo ni roha. Jadi dilului hami ma jabu na boi gabe inganannami, alai ndang dapot. Gabe modom di mobil ma hami na opat borngin i. Marsogot nai dapot hami ma truk na dibahen gabe jabu. Dua podomanna jala martingkat. Laos i ma na gabe jabunami. Diparkir hami ma i di inganan ni sahalak parkobun na burju. Ndang hea adong parsoalan alani i. Laho ma hami marbarita tu sada luat, na dao na hirahira 16 sahat tu 24 kilometer sian inganannami i. Dung pinda tu inganan na asing, marbarita ma hami tu angka halak na jonok tu inganannami parkir.

Marbarita ma hami tu sude jabu di dompak tenggara ni Republik Irlandia. Ndang adong paraloan disi. Dilehon hami do lobi sian 20.000 buku kecil tu angka halak disi. Ditongos hami ma goargoar ni halak na marlomo ni roha marsiajar Bibel tu kantor cabang Inggris. Saonari, nunga maratus Sitindangi Ni Jahowa di Irlandia. Sada pasupasu do on!

Pigapiga taon dungkon i, dipapinda ma hami tu selatan ni London. Dung pigapiga minggu, ditelepon kantor cabang Inggris ma si Arthur. Dipangido ma ibana asa gabe sintua kaliling marsogot nai! Dilatik ma hami saleleng saminggu, dung i laho ma hami tu wilayahnami. Jadi, ndang godang be tingki ni si Arthur laho paradehon jamitana. Alai nang pe songon i, sai rade do ibana manjalo tanggung jawab na dilehon Jahowa tu ibana. Ndang soal na maol do i manang ndang. I ma na hutiru sian ibana. Mansai las do rohanami mangulahon tanggung jawabnami. Pigapiga taon naung salpu, tu inganan na so adong parbarita na uli do hami ditugashon, alai saonari sada pasupasu do di hami boi rap dohot angka dongan.

Di taon 1962, digokkon ma si Arthur tu Singkola Gilead. Sada haputusan na balga do on di hami. Alana, ahu ndang di gokkon tu singkola i, hape saleleng sampulu bulan singkola i dibahen. Dung hupingkiri hami, denggan do molo boi si Arthur dohot tu singkola i. Jadi ditugashon kantor cabang ma ahu muse tu Hemsworth gabe perintis istimewa. Dung sataon, mulak ma si Arthur jala ditugashon ma hami gabe pengawas distrik. Negara  Skotlandia, Inggris Utara, dohot Irlandia Utara ma na gabe panugasannami.

Ditaon 1964, ditugashon ma si Arthur gabe hamba cabang di Republik Irlandia. Mulana, tarontokan do ahu. Alana, nunga tabo huhilala rap dohot si Arthur gabe pengawas distrik. Molo huingot muse na salpu i, mandok mauliate do ahu ala boi mangurupi di Betel. Sasintongna, molo tajalo sada tanggung jawab, nang pe ndang tahalomohon i di mulana, sai na pasupasuon ni Jahowa do hita. Mangurupi bagian lektur, mangalompa dohot paiashon ma ulaonku di Betel. Sipata, olo do hami ditugashon gabe pengawas distrik. Pajumpang ma hami dohot angka dongan di negara i. Diida hami ma angka parsiajar Bibel na mambahen hamajuon. On patoguhon paralealeonnami tu angka dongan di Irlandia. Sada pasupasu do on!

Kebaktian Internasional na parjolo sahali di Irlandia, di bahen di kota Dublin taon 1965. * Nang pe godang paraloan alai denggan do acara i mardalan. Total hadirin na ro tu kebaktian i 3.948 halak jala 65 halak ma na tardidi. Na ro sian luar negeri 3.500 halak. Marborngin di jabu ni parhuta i do nasida. Dilehon do surat na mandok mauliate tu angka parjabu, jala dipuji angka parjabu do angka donganta. Sada hamajuon na denggan do on di Irlandia.

Dipasada ma Irlandia Utara dohot Irlandia Selatan di kantor cabang Dublin taon 1966. Asing do on sian hasomalan di pulo i. Alana, somalna ndang marsada halak disi alani politik dohot agama. Alai, las do rohanami mangida angka donganta na sian agama Katolik dohot Protestan hian boi rap manomba Jahowa.

Muba ma parngoluonnami di taon 2011. Tingki i, dipasada ma kantor cabang Inggris dohot kantor cabang Irlandia. Dipapinda ma hami tu Betel na di London. Holsoan ma ahu alani kesehatan ni si Arthur. Didok dokter nunga hona Parkinson ibana. Tanggal 20 Mei 2015 marujung ngolu ma ibana. Jadi saleleng 66 taon ma hami marhasohotan

Pigapiga taon, marsak do ahu jala marhabot ni roha. Najolo, sai didongani si Arthur do ahu. Masihol hian do ahu tu ibana! Alai tingki sisongon i, gabe lam jonok do hita tu Jahowa. Holong do roha ni angka dongan tu si Arthur, jala las do rohangku mamboto i. Ditongos angka dongan na sian Irlandia, Inggris dohot Amerika Serikat do surat tu ahu. Suang songon i nang abang ni si Arthur i ma si Dennis, tungganeboruna, si Mavis dohot boru ni nasida si Ruth dohot si Judy. Diurupi do ahu, jala ndang tardok godang ni pangurupion nasida tu ahu.

Jesaya 30:18 ma ayat na patoguhon rohangku. Didok disi, ”Sai maimaima Jahowa, naeng marpangulahi rohana tu hamu; laos alani borhat ibana asa asianna hamu, ai Jahowa do Debata ni uhum. Martua ma sude na mangkaposi ibana.” Tarapul do roha mamboto na sai maimaima do Jahowa laho manalpuhon sude hasusaanta. Di tano na imbaru, lehononNa ma ulaon na palashon roha tu hita.

Molo huingot muse na salpu i, tangkas ma, Jahowa do na manogunogu jala mamasumasu ulaon marbarita di Irlandia! Sada hasangapon do di ahu ala dohot di ulaon i. Tutu ma, parohon pasupasu do mangulahon na pinangido ni Jahowa.