Di perjanjian i, dibahen ma organisasi na baru na margoar Liga Bangsa-Bangsa. Tujuan ni organisasi i, i ma “manjujui angka bangso asa kerjasama mambahen hadameon di liat portibi on”. Godang do angka gareja na dohot tu organisasi i. Konsili Federal Gereja-Gereja Kristus di Amerika mandok, “on ma organisasi politik na dipangke Harajaon ni Debata di tano on”. Jala diutus Konsili on do piga-piga halak asa dohot tu Konferensi Perdamaian Paris. Sada sian nasida mandok, di konferensi i “dimulai ma sejarah na baru di portibi on”.

Hape sasintongna, di taon 1919 dimulai do sejarah na baru, alai ndang adong hubunganna tu konferensi i. I ma sejarah di ulaon marbarita. Dilehon Jahowa do gogo tu naposona asa boi lam ringgas di ulaon marbarita. Alai andorang so i, adong do na ingkon dipauba Parsiajar Bibel.

Di ari Sabtu tanggal 4 Januari taon 1919, dibahen ma pemilihan tu angka dongan na mangaradoti Lembaga Alkitab dan Risalah Menara Pengawal. Di tingki i, donganta si Joseph F. Rutherford do na manguluhon naposo ni Jahowa. Alai dipenjarahon do ibana dohot pitu donganta baoa na asing di Atlanta, Georgia, Amerika Serikat. Ingkon dibahen angka dongan do keputusan, angka dongan na di penjara i do muse na laho dipillit manang diganti.

Tingki di penjara, marsak do donganta si Rutherford ala mamingkirhon taringot organisasi on. Diboto ibana do adong angka dongan na mangkilala dumenggan do dipillit donganta na asing gabe presiden Lembaga. Alani i, dibahen ibana ma surat tu angka dongan, na manjujui nasida asa mamillit donganta si Evander J. Coward gabe panggantina. Didok si Rutherford do di surat i, taringot donganta si Coward, i ma halak na “lambok,” “marbisuk,” jala “setia tu ulaon ni Tuan i”. Alai, godang do donganta na so satolop, jala dipangido nasida asa onom bulan nai dibahen pemilihan i. Satolop do angka pengacara na mangurupi angka donganta na dipenjara i. Saleleng mangulas taringot i, adong piga-piga donganta na gabe jut rohana.

 Didok donganta si Richard H. Barber, adong ma sahalak donganta na dohot tu pertemuan i mangalehon pandapot. Jala pandapot ni donganta i gabe boi pasaehon parsoalan na masa di tingki i. Didok donganta i, “Ndang pengacara ahu nian. Alai taringot na masa on, huboto do na ingkon tongtong hita setia ala songon i do na dipangido Debata. Huhilala ndang adong be keputusan na dumenggan na boi tabahen asing ni mamillit donganta si Rutherford muse na gabe presiden.”​—Ps. 18:26.

Marsogot nai, ro ma si Rutherford mandapothon si A. H. Macmillan. Dituktuk ibana ma pintu penjarana jala dilehon ma surat telegram na dikirim angka donganta tu si Rutherford na marisi hasil ni pemilihan i. Pintor diantusi si Macmillan do isi ni surat i. Didok di surat i, sude angka dongan na mangaradoti Lembaga dipillit muse, jala si Joseph Rutherford, dohot si William Van Amburgh tongtong gabe pamimpin. Ujungna, tongtong do donganta si Rutherford gabe presiden Lembaga.

Tingki dipenjara ualu donganta i, marsitutu do Parsiajar Bibel mangido tanda tangan sian angka halak laho dilehon tu pamarenta asa dipalua angka dongan na dipenjara i. Dapot ni nasida ma lobi sian 700.000 tanda tangan. Alai andorang so dilehon tanda tangan i tu pamarenta, nunga dipalua angka donganta i sian penjara di ari Rabu, 26 Maret 1919.

Dibahen si Rutherford ma jamita tu angka dongan na manjangkon ibana. Didok ibana, “Pos do rohangku molo aha naung taadopi on paradehon hita laho mangadopi situasi na susa di ari na naeng ro. . . . Ndang holan paluahon donganmuna sian penjara na gabe tujuanmuna. . . . Alai na gabe tujuanmuna, i ma parohon pujian tu Jahowa. Dapotan godang pasu-pasu do angka na mangulahon i.”

Sian hasusaan na diadopi angka donganta, tarida ma na ditogu-togu Jahowa do nasida. Tanggal 14 Mei 1919, pengadilan banding paboahon, “Tingki di pengadilan, dibahen do na so tigor tu angka na tartudu i. Alani i, ingkon dibatalhon do tuduhan i.” Denggan do keputusan on. Boasa? Alana ditudu do angka donganta mangulahon hajahaton na serius. Molo holan hukuman ni nasida do na diorui, tongtong do nasida dianggap gabe parjahat. Alai ala dibatalhon tuduhan i jala ndang adong be tuduhan na asing, gabe ndang didok be nasida sahalak parjahat. Hasilna, Hakim Rutherford boi tongtong mamangke hakna laho mangurupi naposo ni Jahowa di Mahkamah Agung Amerika Serikat. Jala jotjot diulahon ibana i dung kaluar sian penjara.

Didok donganta si Macmillan, “Ndang boi hita holan hundul jala ndang mangulahon manang aha paima ro Tuan mamboan hita tu surgo. Taboto do, ingkon taantusi do aha na dihalomohon rohana laho taulahon.”

Ndang boi ditorushon angka donganta na di kantor pusat be ulaon ni nasida. Boasa? Alana saleleng dipenjara angka donganta i, sude alat percetakan na dipangke nunga hancur. Gabe metmet do roha ni nasida, jala piga-piga donganta marpingkir nunga sae be ulaon marbarita.

Adong dope na olo manangihon barita Harajaon na dipaboa angka Parsiajar Bibel? Laho mamboto alusna, dibahen donganta si Rutherford ma sada jamita. Digokkon do sude halak. Didok donganta si Macmillan, “Molo ndang adong na ro tu parpunguan i, huboto hami ma nunga sae be ulaon marbarita.”

Ari Minggu tanggal 4 Mei 1919, nang pe marsahit si Rutherford, dipasahat ibana do jamita di Los Angeles, Kalifornia na marjudul “Pangkirimon tu Sude Halak na Susa”. Adong hira-hira 3.500 halak na ro manangihon jamita i, jala marratus halak mulak ala ndang siat ingananna. Marsogot na i, adong muse 1.500 halak nai na ro. Diboto angka donganta ma, adong dope angka halak na olo manangihon!

Aha na diulahon angka donganta dungkon i gabe sitiruon tu Sitindangi Ni Jahowa di ulaon marbarita sahat tu tingkinta saonari.

Joujou Paboahon 1 Agustus 1919 paboahon, laho dibahen kebaktian di mula ni bulan September di Cedar Point, Ohio. Sahalak parsiajar Bibel na poso sian Missouri, i ma si Clarence B. Beaty mandok, “Sude  halak mangkilala ingkon ro do tu kebaktian i.” Lobi sian 6.000 angka dongan na ro tu kebaktian i. Ndang dirimpu nasa i godang ni halak na ro. Jala na mambahen las roha di kebaktian i, adong lobi sian 200 halak na tardidi di topi ni Tao Erie.

Tanggal 5 September 1919, di ari na palimahon di kebaktian i, donganta si Rutherford pasahathon jamita na marjudul “Sipaingot tu Angka Dongan Saulaon”. Di jamita i dipaboa, adong majalah na baru na margoar The Golden Age. * Dipaboa do disi taringot “angka na baru masa jala adong hatorangan sian ayat ni Bibel na paboahon boasa masa i”.

Sude angka Parsiajar Bibel dijujui asa lam barani marbarita mamangke majalah na baru on. Sada surat na paboahon taringot ulaon di organisasi mandok, “Sude angka naung [tardidi] ingkon mangingot, sada hak istimewa do gabe parbarita. Jala sian saonari, marsitutu ma asa dohot pasahathon barita na uli tu sude jolma.” Godang do angka halak na las rohana dohot marbarita! Hasilna, di bulan Desember, dipangido angka parbarita Harajaon do lobi sian 50.000 majalah na baru.

Di ujung ni taon 1919, diparade jala dipatogu ma muse naposo ni Jahowa. Asing ni i, piga-piga surirang na ringkot taringot ari parpudi nunga digohi. Songon na dipaboa di Maleaki 3:1-4, angka naposo ni Debata pe nunga taruji jala dipabadia. Dipalua do nasida sian “Babel na Balga” jala nunga dilantik Jesus angka “naposo haposan jala na marbisuk”. * (Pgk. 18:2, 4; Mat. 24:45) Saonari, nunga rade angka Parsiajar Bibel mangulahon tugas na dilehon Jahowa tu nasida.