1. Songon na disurat di 2 Korint 3:1-3, boasa sada hasangapon di hita mangurupi sasahalak marsiajar Bibel jala tardidi? (Ida gambar sampul.)

SONGON dia do pakkilalaanmuna tikki diida hamu adong parsiajar Bibel na tardidi di huriamuna? Tottu marlas ni roha do hamu! (Mat. 28:19) Tarlumobi ma molo hamu do na mangurupi ibana marsiajar Bibel, pasti las hian do rohamuna! (1 Tes. 2:19, 20) Tikki tardidi parsiajar Bibel, na patuduhon kerja keras do sude anggota ni huria, alana dang holan na manguluhon parsiajar Bibel i na mangurupi ibana. I do alana didok di Bibel, parsiajar Bibel na tardidi i ma ‘surat na patuduhon hita parhobas’.​—Jaha 2 Korint 3:1-3.

2. (a) Aha do sukkun-sukkun na porlu tapikkirhon, jala boasa? (b) Aha do parsiajaran Bibel i? (Ida surat na di toru.)

² Opat taon na parpudi on, adong do hira-hira sappulu juta parsiajaran Bibel * na dilaporhon ganup bulan di liat portibi on. Saleleng opat taon i, adong do lobi sian 280.000 na tardidi ganup taon. Songon dia do carana hita boi mangurupi marjuta halak na marsiajar Bibel i asa tardidi? Ala sabar do Jahowa, dilehon ma kesempatan tu akka halak asa boi gabe Sitindangina. I do alana ikkon marsitutu hita mangurupi nasida asa tardidi, ala otik nai nama tikkina!​—1 Kor. 7:29a; 1 Ptr. 4:7.

3. Aha do na lao taulas di artikel on taringot cara manguluhon parsiajaran Bibel?

 ³ Ala massai rikkot do mambahen sisean saonari, disukkun Punguan na Mangaradoti Organisasi do akka kantor cabang cara mangurupi parsiajar Bibel asa tardidi. Di artikel on dohot di artikel na mangihut, boi ma tadapot parsiajaran sian akka perintis na marpengalaman, misionaris, dohot pengawas wilayah. * (Poda 11:14; 15:22) Dipaboa nasida do aha na porlu bahenon ni na manguluhon parsiajaran Bibel dohot parsiajar Bibel, asa boi marhasil. Di artikel on, taulas ma adong lima na porlu bahenon ni parsiajar Bibel asa mambahen hamajuon jala tardidi. Taurupi ma nasida mangulahon i.

4. Aha do na porlu taboto taringot marsiajar Bibel di jolo ni pintu?

⁴ Godang do akka donganta manguluhon parsiajaran Bibel di jolo ni pintu. Memang denggan do mambahen parsiajaran Bibel mamakke cara sisongon on. Alai biasana satokkin do i jala dang taratur dibahen ganup minggu. Sipata dilehon ma informasi sian Bibel tu ibana marhite telepon manang SMS. Alai gabe songon i ma torus carana marsiajar Bibel sappe marbulan-bulan. Molo songon i do carana marsiajar, dang boi ra ibana tardidi ala otik do tikki dohot upayana marsiajar Bibel.

5. Aha do na didok Jesus di Lukas 14:27-33 na boi mangurupi hita mambahen sisean?

⁵ Dibahen Jesus do tudosan lao paboahon na porlu diulahon sasahalak asa gabe siseanna. Tudosan i paboahon sasahalak na naeng mambangun menara, dohot sahalak raja na naeng lao marporang. Didok Jesus asa boi dibangun menara i, ikkon ‘jolo hundul do ibana mangetong sipalaoonna’. Jala andorang so lao sahalak raja marporang, ikkon ‘jolo hundul do ibana manjalo poda’ asa boi monang. (Jaha Lukas 14:27-33.) Jadi didok Jesus, ikkon diboto sasahalak do aha na porlu ulahononna asa boi gabe siseanna. Alani i, porlu do tajujui parsiajar Bibelta asa taratur marsiajar ganup minggu. Boha do caratta mangulahon i?

6. Aha do na porlu diulahon hamu asa boi parsiajar Bibelmuna mambahen hamajuon?

⁶ Ulas ma dang holan sada ayat, alai  piga-piga ayat sian Bibel. Tikki diida hamu parjabu i nungnga menikmati parsiajaran i, sukkun ma ibana boha do molo rap hundul hamu marsiajar Bibel. Sian alusna boi ma diboto hamu na serius do ibana marsiajar Bibel manang na dang. Asa lam godang na diparsiajari ibana, sukkun hamu ma boha do molo dua hali saminggu hamu marsiajar. Alai dang cukkup holan i, godang nai dope na ikkon diulahon.

7. Aha do na porlu diulahon sahalak guru tikki persiapan?

⁷ Tikki naeng marsiajar Bibel, porlu do sahalak guru persiapan. Ikkon jolo dijaha ibana do bahan parsiajaran i dohot akka ayatna. Porlu do botoonna aha na rikkot sian parsiajaran i. Ikkon pikkirhononna do judul ni parsiajaran i, subjudul, sukkun-sukkun, ayat na porlu dijaha, gambar, dohot akka video na boi mangurupi ibana patorakkon parsiajaran i. Tikki persiapan, ikkon dipikkirhon ibana do parsiajar Bibelna i. Ikkon dipikkirhon ibana do muse songon dia cara patorakkon parsiajaran i sederhana jala takkas, asa boi diattusi jala diulahon ibana parsiajaran i.​—Neh. 8:8; Poda 15:28a.

8. Songon na dipaboa Apostel Paulus di Kolosse 1:9, 10, aha do na porlu tatangiakkon taringot tu parsiajar Bibelta?

⁸ Tikki persiapan, porlu do tong tatangiakkon parsiajar Bibelta tu Jahowa. Tapangido ma tu Jahowa asa diurupi hita mangajarhon hasittongan ni Bibel asa hona tu rohana. (Jaha Kolosse 1:9, 10.) Pikkirhon ma, hira-hira adong do di parsiajaran i na maol diattusi ibana manang na so boi dijalo ibana. Ingot ma tujuanta, i ma mangurupi ibana asa boi tardidi.

9. Songon dia do cara mangurupi parsiajar Bibel mambahen persiapan?

⁹ Las do rohatta molo taratur parsiajar Bibelta marsiajar. Lam diargai ibana ma aha naung diulahon Jahowa dohot Jesus jala lam lomo ma rohana marsiajar. (Mat. 5:3, 6) Asa boi dapotna laba sian parsiajaran i, ikkon fokus do parsiajar Bibel tu na diparsiajari ibana. Tapatorang ma tu ibana rikkot ni mambahen persiapan. Ikkon dijaha ibana do parsiajaran i jala ikkon dipikkirhon ibana cara mangulahon parsiajaran i di parngoluonna. Boha do caramuna mangurupi parsiajar  Bibel i? Rap ma hamu persiapan dohot parsiajar Bibelmuna asa diboto ibana carana persiapan. * Patorang ma tu ibana songon dia carana mandapot alus ni sukkun-sukkun ni parsiajaran i. Jala patudu ma tu ibana cara manandai holan kata kunci, asa mura diingot ibana alusna. Pangido ma tu ibana mangalehon alus dang holan sian na tarsurat di paragraf i, alai sian hatana sandiri. Molo diulahon ibana i, boi ma taboto nga sadia godang pangattusionna. Alai adong do muse na asing na ikkon diulahon parsiajar Bibel i.

10. Boasa rikkot manjaha Bibel ganup ari, jala aha do na porlu diulahon ibana asa boi dapotna laba sian panjahaionna i?

¹⁰ Asing ni marsiajar Bibel ganup minggu dohot guruna, adong do tong na ikkon diulahon parsiajar Bibel. Ikkon makkatai do ibana tu Jahowa jala manangihon Jahowa marhite manjaha Bibel ganup ari. (Jos. 1:8; Ps. 1:1-3) Urupi ma ibana mamakke lembar “Jadwal Pembacaan Alkitab” na adong di jw.org. * Jujui ma ibana mangarimangi aha na diajarhon Bibel taringot Jahowa, asa boi dapotna laba sian panjahaionna i. Jala urupi ma ibana mamboto songon dia ibana mangulahon aha na diparsiajarina i ganup ari.​—Ul. 17:11; Jak. 1:25.

11. Songon dia do hita boi mangurupi parsiajar Bibel mamboto cara martangiang na denggan, jala boasa ikkon martangiang ibana ganup ari tu Jahowa?

¹¹ Jujui ma parsiajar Bibelmuna asa martangiang tu Jahowa ganup ari. Martangiang ma hamu sian nasa rohamuna andorang so marsiajar, dohot dung sae marsiajar. Tangiakkon ma ibana jala dok ma goarna di tangiangmuna i. Tikki dibege ibana tangiangmuna i, diboto ibana ma rikkot ni martangiang sian ias ni roha tu Jahowa marhite goar ni Jesus Kristus. (Mat. 6:9; Joh. 15:16) Molo ganup ari do parsiajar Bibelmuna i manangihon Jahowa marhite manjaha Bibel, jala makkatai tu Jahowa marhite tangiang, gabe lam jonok ma ibana tu Debata. (Jak. 4:8) Molo taratur do ibana mangulahon i, gabe taronjar ma rohana lao mangalehon diri jala tardidi. Aha dope na porlu diulahon ibana?

12. Songon dia hita mangurupi parsiajar Bibelta asa marale-ale tu Jahowa?

¹² Lomo do rohatta asa parsiajar Bibelta mangattusi parsiajaran i. Alai dang holan i, ikkon boi do i hona tu rohana asa boi diulahon ibana parsiajaran i. Songon i do na diulahon Jesus. Dang holan boi diattusi halak aha na diajarhon ibana, alai dibahen ibana do parsiajaran i hona tu roha ni nasida. Ujungna, gabe olo ma nasida mangihutton Jesus. (Luk. 24:15, 27, 32) Taurupi ma parsiajar Bibelta asa solhot marale-ale tu Jahowa. Molo taurupi ibana, boi ma Jahowa gabe Ama, Debata, dohot Ale-alena. (Ps. 25:4, 5) Tikki marsiajar Bibel, taurupi ma nasida mangida parange ni Jahowa. (2 Mus. 34:5, 6; 1 Ptr. 5:6, 7) Topik aha pe na diulas hamu, haitton ma i tu parange ni Jahowa. Urupi ma parsiajar Bibelmuna mangargai parange ni Jahowa songon holongna, haburjuonna, dohot asi ni rohana. Jesus mandok “parenta na umbalga jala na parjolo”, i ma ‘makkaholongi Jahowa’ sian nasa roha. (Mat. 22:37, 38) Alani i, urupi ma parsiajar Bibelmuna makkaholongi Jahowa sian nasa rohana.

13. Songon dia do hamu boi mangurupi parsiajar Bibelmuna mamboto parange ni Jahowa?

¹³ Paboa ma tu parsiajar Bibelmuna, boasa holong rohamuna tu Jahowa. Molo diulahon hamu i, gabe taronjar ma rohana marale-ale tu Jahowa jala makkaholongi Ibana. (Ps. 73:28) Misalna, paboa ma ayat na dijaha hamu manang kalimat na adong di publikasitta na hona tu rohamuna taringot holong, bisuk, huaso, dohot keadilan ni Jahowa. Paboa ma tu ibana, on ma na mambahen hamu lam makkaholongi Jahowa. Adong dope na ikkon diulahon parsiajar Bibel, asa boi nasida tardidi.

14. Songon na dipaboa di Heber 10:24, 25, boasa parpunguan boi mangurupi parsiajar Bibel mambahen hamajuon?

¹⁴ Asa boi parsiajar Bibelta tardidi, tajujui ma nasida ro tu parpunguan. Akka donganta na marpengalaman paboahon, tikki ro parsiajar Bibelna tu parpunguan gabe hatop ma dibahen nasida hamajuon. (Ps. 111:1) Donganta na asing muse patorakkon tu parsiajar Bibelna, godang do na boi diparsiajari ibana sian parpunguan na so boi dapotna molo holan  marsiajar Bibel. Jaha Heber 10:24, 25 tu parsiajar Bibelmuna, jala patorang ma tu ibana laba na boi dapotna molo ro tu parpunguan. Putarhon ma video Aha do na Dipatupa di Bale Harajaon? * Urupi ma parsiajar Bibelmuna asa boi torus marpungu ganup minggu.

15. Aha do na boi taulahon lao manjujui parsiajar Bibelta asa taratur marpungu?

¹⁵ Aha do na boi diulahon hamu molo parsiajar Bibelmuna dang ro dope marpungu, manang dang taratur dope ibana marpungu? Semangat ma hamu paboahon tu ibana aha na diparsiajari hamu di parpunguan. Tikki dibege ibana boasa las rohamuna marpungu, gabe olo do ra ibana marpungu. Lehon ma tu ibana majalah Joujou Paboahon dohot lembar Hangoluan dohot Pangkobasion ni Halak Kristen na lao diparsiajari di minggu i. Patudu ma tu ibana aha na lao diulas di parpunguan na mangihut, jala sukkun ma topik na dia do na menarik di ibana sian bahan na lao diulas i. Tikki ro parjolo sahali parsiajar Bibelmuna tu parpunguan, gabe boi ma diida ibana imbar ni parpunguanta i dohot parpunguan ni agama na asing na hea diida ibana. (1 Kor. 14:24, 25) Disi ma ibana pajuppang dohot akka dongan na boi gabe sitiruonna, asa mambahen hamajuon jala tardidi.

16. Boha do caratta mangurupi parsiajar Bibelta asa olo tardidi, jala aha do na lao taulas di parsiajaran na mangihut?

¹⁶ Boha do caratta mangurupi parsiajar Bibelta asa olo tardidi? Tapaboa ma tu ibana rikkot ni marsiajar Bibel. Tajujui ma ibana asa marsiajar ganup minggu, jala mambahen persiapan andorang so marsiajar. Tajujui ma muse nasida asa martangiang tu Jahowa jala manjaha Bibel ganup ari, asa lam solhot parale-aleonna tu Jahowa. Ikkon tajujui do muse nasida asa taratur ro tu parpunguan. (Ida kotak “ Aha do na Porlu Diulahon Parsiajar Bibel Asa Boi Tardidi”.) Di parsiajaran na mangihut lao taulas ma, adong dope lima cara na boi taulahon lao mangurupi parsiajar Bibelta asa tardidi.