1. Laho mangulahon aha do ditogihon Jahowa na tinompaNa?

JAHOWA do Debata na tumimbul, pargogo na so hatudosan jala sitompa saluhutna. Didok si Job tu Jahowa, ”Nuaeng pe asa huboto, tung guru dokmu do luhutna, jala ndang hasundatan sangkap ni roham nanggo sada.” (Job 42:2) Boi do diulahon Jahowa manang aha pe, ndang pola ingkon urupan ni halak na asing. Alai, dipatudu Ibana do holongNa, i ma manogihon na asing asa saulaon dohot Ibana laho pasauthon sangkapNa.

2. Mangulahon ulaon na ringkot aha do Jesus ditogihon Jahowa?

² Nunga parjolo ditompa Debata Jesus andorang so ditompa angka na asing. Dung i, ditogihon Jahowa ma Jesus laho manompa saluhutna. (Joh. 1:1-3, 18) Didok apostel Paulus, ”Ai marhite sian Ibana do ditompa saluhutna, na di banua ginjang dohot na di tano on, na tarida dohot na so tarida i, angka habangsa, angka harajaon, angka gomgoman, angka  parhuasoon; saluhutna i do ditompa marhitehite Ibana, jala marhapatean tu Ibana.” (Kol. 1:15-17) Ndang holan ulaon na ringkot on dilehon Jahowa tu Jesus, alai dipaboa Ibana do songon dia mangulahon i. Sada hasangapon do on di Jesus!

3. Aha do ulaon na dilehon Jahowa tu si Adam jala boasa?

³ Ditogihon Jahowa do jolma asa rap saulaon dohot Ibana. Umpamana, disuru Jahowa do si Adam laho mambahen goar ni angka binatang. (1 Mus. 2:19, 20) Las roha ni si Adam mangulahon ulaon i! Denggan ma diparateatehon angka binatang i, dung i dibahen ma angka goarna. Jahowa do na manompa sude binatang, jala boi do bahenonNa sude goar ni binatang i. Alai, ala dihaholongi si Adam, disuru ma ibana mambahen goar ni angka binatang i. Ulaon ni si Adam na asing muse, disuru do ibana asa mambahen sandok tano on gabe paradeiso. (1 Mus. 1:27, 28) Alai, di pudian ni ari ndang olo be si Adam rap saulaon dohot Debata. Ujungna, susa ma ibana dohot sude pinomparna.​—1 Mus. 3:17-19, 23.

4. Songon dia do jolma boi rap saulaon dohot Debata laho manggohi sangkapNa?

⁴ Ditogihon Debata do muse jolma na asing rap saulaon dohot Ibana. Umpamana, si Noak disuru Jahowa paulihon sada parau asa malua ibana dohot keluargana sian aek na sumar. Disuru do si Musa mamboan bangso Israel ruar sian Mesir. Disuru Jahowa do si Josua manguluhon bangso Israel tu Tano Parjanjian. Disuru do si Salomo pajongjong bagas joro di Jerusalem. Dipillit do si Maria gabe ina ni Jesus. Nasida angka na marsihohot on saulaon dohot Jahowa laho mangulahon lomo ni rohaNa.

5. Ulaon aha do na ingkon taulahon, jala dihaporluhon Jahowa do hita laho mangulahon i? (Ida gombar di mula ni parsiajaran.)

⁵ Ditogihon Jahowa do hita saonari rap saulaon dohot Ibana. Godang do na boi ulahononta laho mangoloi Debata. Umpamana, boi do hita sude dohot tu ulaon marbarita na uli. Sasintongna, boi do Jahowa sandiri laho mangulahon on. Boi do Ibana mangkatai sian surgo tu jolma na di tano on. Didok Jesus, batu pe boi do bahenon ni Jahowa laho mamaritahon taringot HarajaonNa. (Luk. 19:37-40) Alai, dipaloas Jahowa do hita gabe ”dongan pangula” rap dohot Ibana. (1 Kor. 3:9) Disurat apostel Paulus ”Songon dongan saulaon ni Debata hami, huelehelek hami ma hamu angka naung manjalo asi ni roha ni Debata asa unang magopo asi ni roha i dibahen hamu.” (2 Kor. 6:1, Bibel siganup ari) Sada hasangapon do di hita dijou Debata gabe donganNa saulaon. Taida ma na boi mambahen hita marlas ni roha.

6. Songon dia do pangkilalaan ni Jesus tingki rap saulaon ibana dohot Jahowa?

⁶ Marlas ni roha do angka naposo ni Jahowa ala rap saulaon dohot Ibana. Andorang so ro dope Jesus tu tano on, didok ibana, ”Jahowa do nampuna Ahu di mula ni dalanna . . . Ahu do uju i di lambungna pande, jala marolopolop Ahu ariari marmeami tongtong di jolona”. (Poda 8:22, 30) Tingki rap saulaon Jesus dohot Jahowa, marlas ni roha do ibana ala boi dipasidung sude ulaonna jala diboto do na dihaholongi Jahowa ibana. Songon dia molo hita?

7. Boasa ulaon marbarita mambahen hita marlas ni roha?

⁷ Didok Jesus tu hita marlas ni roha do  hita tingki mangalehon nang tingki manjalo. (Ul. 20:35) Tontu, las do rohanta dung taboto hasintongan jala paboahon i tu na asing. Las do rohanta mangida halak tingki mangantusi hasintongan sian Bibel jala maraleale tu Debata. Tahilala ma muse las ni roha ala marhamubaon nasida. Mansai ringkot do ulaon marbarita na uli on jala parohon las ni roha. Mambahen halak naung maraleale tu Debata mandapot hangoluan salelengna.​—2 Kor. 5:20.

8. Aha do didok pigapiga halak na marlas ni roha ala rap saulaon dohot Debata?

⁸ Molo taurupi halak marsiajar Bibel, las ma roha ni Jahowa jala hita pe marlas ni roha. (Jaha 1 Korint 15:58.) Si Marco, na tinggal di Italia mandok, ”Las do rohangku mangalehon na dumenggan tu Jahowa jala ndang lupa Ibana tu na hubahen.” Songon i muse si Franco na di Italia mandok, ”Marhite hataNa dohot sipanganon partondion naung pinaradeNa, dipaingot Jahowa do hita ganup ari. On patuduhon na dihaholongi do hita jala patuduhon na diargai do aha pe na taulahon tu Ibana. Rap saulaon dohot Debata mambahen las rohangku jala mambahen ngolungku denggan.”

9. Songon dia do paralealeon ni Jesus dohot Jahowa?

⁹ Tingki rap saulaon hita dohot angka dongan na tahaholongi, na patoguhon paralealeonta do tu nasida. Boi ma muse tatanda nasida, taboto aha na ringkot di ngoluna. Nunga marmiliar taon Jesus rap saulaon dohot Jahowa. Mansai togu do holong ni nasida jala ndang adong na boi manegai paralealeonna i. Dipaboa Jesus do songon dia togu ni paralealeonna tu Jahowa tingki didok, ”Sada do Ahu dohot Ama i.” (Joh. 10:30) Marsada ni roha do nasida, jala masiurupan tingki rap saulaon.

10. Boasa ulaon marbarita na uli boi pajonokkon hita tu Jahowa dohot tu dongan na asing?

¹⁰ Dipangido Jesus asa diondingi Jahowa angka siseanna. Boasa? Martangiang ibana, ”ramoti ma nasida di bagasan Goarmu, angka na nilehonmi tu Ahu, asa sada nasida songon Hita!” (Joh. 17:11) Boi do lam tatanda Debata molo taoloi Ibana jala taihuthon aturanNa. Alani i, molo tapajonok tu Jahowa, dung i pajonokonNa ma tu hita. (Jaha Jakobus 4:8.) Tapajonok ma tongtong tu dongan sahaporseaonta, ala rap mangkilala do hita di hasusaan dohot di las ni roha jala dos do na tatuju di parngoluonta dohot nasida. Si Octavia na tading di Inggris mandok, ”Rap saulaon dohot Jahowa pajonokkon ahu tu Ibana nang tu angka dongan na asing.” Didok ibana muse, on boi masa ala paralealeonta marojahan tu ”sada tujuan dohot sada aturan.” Tingki taida dongan  sahaporseaonta marsitutu laho mambahen las ni roha ni Jahowa, lam togu ma paralealeonta tu nasida.

11. Boasa boi lam togu paralealeonta tu Jahowa dohot tu angka dongan di tano na imbaru?

¹¹ Saonari nunga togu holongta tu Debata dohot tu dongan, alai boi do lam togu di tano na imbaru. Tarimangi ma ulaon na palashon roha na laho siulahononta di ari na naeng ro! Jangkononta ma angka halak na dipahehe jala taajari nasida taringot Jahowa. Bahenonta ma muse tano on gabe paradeiso. Di pamarentaon ni Kristus boi ma hita marlas ni roha ala rap saulaon dohot angka halak naung tipak (sempurna). Dung i, lam togu ma paralealeonta tu angka dongan dohot tu Jahowa, Debata na mangalehon nasa na porlu laho ”pasombu lomo ni roha ni nasa na mangolu.”​—Ps. 145:16.

12. Songon dia do ulaon marbarita boi mangondingi hita?

¹² Porlu do jagaonta paralealeonta tu Jahowa tongtong togu. Ala hita jolma na mardosa jala mangolu di portibi na nirajaan ni Sibolis, boi do hita hatop mangihuthon parange dohot ulaon ni portibi on. Boi ma on dipatudos tingki marlange hita di aek na doras na boi mambahen hita maup. Asa unang maup hita, ingkon marlange ma hita sian nasa gogonta. Songon i ma, ingkon taalo do angka parange ni godangan halak na mangolu di portibi na nirajaan ni Sibolis on. Songon dia do ulaon marbarita boi mangondingi hita? Tingki tataringoti goar ni Jahowa manang hataNa Bibel, diurupi do hita asa sai mangingot ulaon na ringkot jala na denggan, na mambahen togu partondionta. (Plp. 4:8) Marbarita na uli patoguhon haporseaonta, alana mangurupi hita asa marningot janji ni Debata dohot mangkaholongi patikNa. On boi mangurupi asa tongtong marparange na denggan jala mangondingi hita sian Sibolis dohot portibi na nirajaanna.​—Jaha Epesus 6:14-17.

13. Songon dia do pangkilalaan ni sahalak Sitindangi di Australia tingki marbarita na uli?

¹³ Molo talehon tingkinta marbarita na uli, marsiajar jala mangurupi angka dongan di huria boi mangondingi hita asa unang paingotingot hasusaanta. Si Joel na tading di Australia, mandok ”Ulaon marbarita na uli mangurupi ahu asa unang holsoan di parngoluon, paingothon ahu di sitaonon ni godang halak jala paingothon ahu laba ni mangulahon prinsip ni Bibel di parngoluon. Marbarita na uli pe mangurupi ahu asa tongtong marserep ni roha jala mandapot laba ala mangihuthon prinsip ni Bibel. Dung i, mangurupi ahu asa tongtong marpos ni roha tu Jahowa dohot angka dongan di huria.”

14. Molo tongtong hita marbarita, on patuduhon na diurupi tondi parbadia do hita. Boasa boi tadok songon i?

¹⁴ Marhite marbarita na uli lam pos ma rohanta, diurupi tondi parbadia ni Debata do hita. Songon tudosan, autsura ulaonmu mambagihon roti di ingananmuna. Hamu sandiri na manggarar ongkosmu jala ndang digaji hamu laho mangulahon i. Alai, godang na so olo manjalo jala deba ndang lomo rohana mangida hamu mambagihon roti i. Sadia leleng do hamu tahan mangulahon ulaon i? Tontu ndang leleng, olo do ra pintor mandele hamu jala ndang be mangulahon ulaon i. Torop do sian hita na tongtong marbarita na uli nang pe  habis hepeng dohot tingkinta jala nang pe ndang sude na olo manjangkon. Boi sai taulahon on patuduhon hita diurupi tondi parbadia ni Debata.

15. Songon dia do ulaon marbarita na uli hombar tu sangkap ni Debata tu jolma?

¹⁵ Songon dia do ulaon marbarita na uli hombar tu sangkap ni Debata tu jolma? Sangkap ni Debata asa mangolu salelengna jolma di tano on. Jala sangkapNa on, ndang muba nang pe mardosa si Adam. (Jes. 55:11) Dibahen Debata ma dalan laho paluahon hita sian dosa dohot hamatean. Songon dia? Ro Jesus tu tano on mangalehon hangoluanna. Molo taoloi Debata tadapot ma laba sian tobusan on. Dipaboa Jesus do aha na dipangido Debata, jala diparentahon ibana do angka siseanna laho mangulahon i. Tingki marbarita na uli jala taurupi halak gabe aleale ni Debata, on patuduhon na rap do hita saulaon dohot Ibana laho patuduhon holongNa tu jolma asa malua nasida sian dosa dohot hamatean.

16. Songon dia do ulaonta marbarita na uli hombar tu patik ni Debata na umbalga?

¹⁶ Tingki taurupi halak asa mandapot hangoluan, on patuduhon na tahaholongi do nasida dohot Jahowa. ”Ai dipangido rohana do, naeng saluhut jolma malua jala sahat mananda hasintongan i.” (1 Tim. 2:4) Tingki disungkun halak Parise Jesus dia do patik na umbalga, Jesus mandok, ”Sihaholonganmu do Tuhan Debatam sian nasa ateatem, sian nasa hosam dohot sian nasa roham! I do patik raja jala parjolo. Na paduahon on: Sihaholonganmu do donganmi doshon dirim!” (Mat. 22:37-39) Tingki marbarita na uli ma hita patuduhon na taoloi do patik ni Debata on.​—Jaha Ulaon ni Apostel 10:42.

17. Songon dia do pangkilalaanta tu ulaon marbarita na uli?

¹⁷ Tutu, dipasupasu Debata do hita! Dilehon Jahowa tu hita ulaon na mambahen hita marlas ni roha, mambahen hita jonok tu Ibana dohot tu dongan, jala patoguhon paralealeonta tu Ibana. On ma muse tingki di hita laho patuduhon holongta tu Ibana dohot tu dongan. Tontu las do rohanta marnida marjuta halak di liat portibi on manomba Jahowa na ro sian marragam hasomalan. Naposo manang naung matua, na mora manang na pogos, na togos manang na gale, taulahon do sian nasa gogonta marbarita na uli. Boi do tahilala songon si Chantel na sian Prancis, na mandok, ”Na marhagogoon di saluhut hasiangan on, na manompa saluhutna, Debata na martua, mandok tu ahu: Laho! Baritahon! Baritahon taringot Ahu, baritahon sian nasa roham. LehononKu do gogo tu ho marhite Bibel hatangKu, pangurupionKu, sian dongan di liat portibi on, pangajarajarion, jala sipaingot na porlu di tingki dihaporluhon. Dihilala ibana ma ndang adong be ulaon na umbalga manang na sumurung asing ni mangulahon na pinangido ni Jahowa jala rap saulaon dohot Debata!”