1, 2. (a) Songon dia do molo ndang adong Bibel? (b) Songon dia do asa gumodang laba na tadapot tingki manjaha Bibel?

SONGON DIA do molo ndang adong Bibel? Ndang adong be tudutudu na manogunogu hita. Ndang taboto hasintongan taringot Debata, hangoluan, dohot ari na naeng ro. Asing ni i, ndang taboto aha naung diulahon Jahowa tu naposoNa najolo.

² Alai mandok mauliate do hita ala dilehon Jahowa do Bibel tu hita. Jala marjanji do Ibana sai na hot do hataNa i saleleng ni lelengna. Dienet apostel Petrus do hata na tarsurat di Jesaya 40:8. Ndang apala tangkas didok na Bibel do na dipaboa di ayat i. Alai, tontu marlangku do na tarsurat di ayat i tu Hata ni Debata. (Jaha 1 Petrus 1:24, 25.) Gumodang do laba na tadapot molo tajaha Bibel di bahasa na taantusi. Jala diboto angka halak na mangkaholongi Hata ni Debata do i. Alani i ma, saleleng maratus taon godang halak na marsitutu manerjemahon Bibel, nang pe mangadopi paraloan. Alana,  dihalomohon Debata do asa sude halak ”malua jala sahat mananda hasintongan i”.​—1 Tim. 2:3, 4.

3. Aha do na laho taulas di artikel on? (Ida gombar di mula ni parsiajaran.)

³ Di artikel on taulas ma, songon dia Bibel tongtong martahan nang pe (1) muba bahasa, (2) muba pamarentaon na paubahon bahasa na gumodangan dipangke halak, jala (3) godang paraloan. Aha do labana molo taulas taringot on? Gabe lam taargai ma Bibel dohot pangarangNa.​—Mik. 4:2; Rom 15:4.

4. (a) Songon dia do bahasa boi muba? (b) Sian dia do taboto na so siida boi Jahowa? Jala songon dia do pangkilalaanta mamboto i?

⁴ Lam leleng, muba do bahasa. Rimangi ma songon na masa di bahasamuna. Olo do sada hata na dipangke najolo, ndang dos be lapatanna songon saonari. Suang songon i ma na masa di hata Heber manang hata Junani na dipangke laho manurat Bibel najolo. Ndang sarupa be hata Junani manang hata Heber na najolo tu saonari. Godangan halak ndang be mangantusi hata na dipangke laho manurat Bibel najolo. Adong do pigapiga halak mandok asa boi mangantusi Bibel, denggan do molo ni parsiajaran hata Heber dohot hata Junani najolo. Alai sasintongna ndang godang laba ni i. * Las ma rohanta ala Bibel manang pigapiga bagianna nunga diterjemahon, hirahira di bagasan 3.000 bahasa. Alana, lomo do roha ni Jahowa asa ”saluhut bangso dohot marga dohot hata dohot houm” mangantusi HataNa. (Jaha Pangungkapon 14:6.) Tontu gabe las ma rohanta mamboto na so siida bohi jala parholong do Debatanta.​—Ul. 10:34.

5. Aha do na mambahen Bibel Batak Toba ringkot?

⁵ Ala muba bahasa ingkon muba do terjemahan ni Bibel. Mura do Bibel diantusi tingki baru diterjemahon dope. Alai dung marpulupulu taon, maol ma antusan. Umpamana songon Bibel Batak Toba, parjolo sahali diterjemahon hirahira taon 1800an. Godang do halak Batak Toba na mamangke Bibel on. Jala jotjot do dihatahon halak Batak Toba pigapiga hata na adong di Bibel tingki nasida mangkatahatai. * Godang do disurat goar ni Debata i ma Jahowa, di Angka Buku Heber manang Padan na Robi. Alai ndang adong tarsurat goar on, di Angka Buku Junani manang Padan na Imbaru.

6. Aha do na mambahen Bibel Terjemahan Dunia Baru sumurung?

 ⁶ Tingki baru kaluar Bibel Batak Toba mura do i diantusi halak. Alana hata na dipangke di Bibel i, hata na somal dihatahon halak di tingki i. Alai dung marpulupulu taon gabe maol ma antusan Bibel i. Ala hata najolo do na dipangke. Jala songon i ma na masa tu Bibel terjemahan na asing. Alai las do rohanta mamboto Bibel Terjemahan Dunia Baru marsitutu mamangke hata na mura antusan, hata na dipangke halak sisaonari. Dibahen do terjemahan on di lobi sian 150 bahasa dohot ma i di bahasa Indonesia. Alani i, godang ma halak na boi mangantusi isi ni Bibel. Ala tangkas jala mura antusan, boi ma Hata ni Debata hona tu rohanta. (Ps. 119:97) Alai na mambahen Bibel Terjemahan Dunia Baru gabe sumurung sian sude terjemahan, i ma ala disurat do goar ni Jahowa mangihuthon teks aslina.

7, 8. (a) Ditaon 200an SM ndang diantusi halak Jahudi be hata Heber, boasa? (b) Aha do Septuaginta Junani i?

⁷ Boi do muba bahasa na dipangke molo marganti na mamarenta. Alai marjanji do Jahowa sai na boi do antusan ni halak isi ni Bibel. Umpamana, parrohahon ma na masa tu halak Jahudi najolo. Disuru Debata do nasida manurat 39 buku na adong di Bibel. Ala nasida do ”hasahatan ni angka pandok ni Debata” na parjolo i. (Rom 3:1, 2) Mulana di hata Heber dohot di hata Aram do angka buku i disurat, alai hirahira taon 200an SM mamarenta ma si Aleksander Agung. Gabe hata Junani ma na dipangke di sude luat pamarentaonna. Alani i gabe ndang diantusi halak Jahudi be hata Heber manang hata Aram. (Dan. 8:5-7, 20, 21) Ala hata Junani do na dipangke nasida, gabe maol ma nasida mangantusi Bibel, na disurat di hata Heber. Antong songon dia do carana asa boi diantusi nasida Hata ni Debata?

⁸ Hirahira 250 taon andorang so tubu dope Jesus, diterjemahon ma lima buku na parjolo di Bibel tu hata Junani. Pigapiga leleng dungkon i, dibahen ma Septuaginta Junani. I ma Angka Buku Heber naung diterjemahon tu hata Junani. On ma Angka Buku Heber na parjolo sahali ditanda angka halak.

9. (a) Aha do pangkorhon ni Septuaginta dohot terjemahan na parjolo tu angka halak na manjaha Bibel najolo? (b) Sian Angka Buku Heber, ayat dia do na dihalomohon hamu?

⁹ Ala adong Septuaginta Junani gabe boi ma halak Jahudi na marbahasa Junani mangantusi Angka Buku Heber. Boi do dapot rohamuna songon dia las ni rohanasida ala boi manjaha Bibel di bahasa ni nasida sandiri? Ujungna diterjemahon ma Bibel manang pigapiga buku sian Bibel tu bahasa Siria, Gotik, dohot Latin. Gabe lam godang ma halak na mangantusi jala mangkalomohon Hata ni Debata. Dos songon hita, adong do pigapiga ayat na dihalomohon nasida. (Jaha Psalmen 119:162-165.) Sian on taida ma tongtong do  martahan Hata ni Debata, nang pe muba bahasa dohot pamarentaon.

10. Boasa holan saotik halak na mangantusi isi ni Bibel di tingki ni si John Wycliffe?

¹⁰ Saleleng martaontaon godang do pamarenta na mangambati penerjemahan ni Bibel. Alai, adong do angka halak na marsihohot tu Debata. Marsitutu do nasida paradehon Bibel, asa boi dijaha halak. Umpamana songon si John Wycliffe. Maringanan di Inggris do ibana taon 1300an. Didok rohana sude ma nian halak boi manjaha Bibel. Alai di tingki i, disurat tangan dope Bibel jala ndang tartuhor. Holan saotik do halak na boi manuhor Bibel. Jala muse godangan halak buta huruf. Alani i holan saotik do halak Inggris na boi mangantusi isi ni Bibel. Adong do nian angka halak na manangihon panjahaion Bibel di gareja. Alai di hata Latin do i dibahen, hata na so pola diantusi angka halak. Antong songon dia do Jahowa mangurupi angka halak asa boi manjaha Bibel di bagasan hata ni nasida sandiri?​—Poda 2:1-5.

11. Aha do pangkorhon ni Bibel na diterjemahon si Wycliffe?

¹¹ Taon 1382, diterjemahon si John Wycliffe dohot angka donganna ma Bibel tu hata Inggris. Jala jotjot do on dipangke angka halak na digoari punguan Lollard. Mansai lomo do roha ni nasida tu terjemahan i. Laho ma nasida tu hutahuta di Inggris jala dijahahon nasida ma i tu angka halak. Dilehon nasida do muse pigapiga buku na adong di Bibel naung disalin tu angka halak na dijumpangi nasida. Alani i, gabe ditanda halak ma muse Bibel.

12. Songon dia do pamimpin ni gareja mangida si Wycliffe dohot ulaonna?

¹² Sogo do roha ni pamimpin ni gareja mangida si John Wycliffe, Bibelna, dohot angka siihuthon ibana. Disiksa nasida do halak Lollard jala ditutung nasida do Bibel ni si Wycliffe na dapot nasida. Nang pe nunga mate si Wycliffe, diongkal nasida do muse  holiholina, ditutung jala dibolongkon tu sunge Swift. Alai nang pe songon i, godang do halak na marlomo ni roha laho mangantusi isi ni Bibel. Jala ndang boi gareja mangambati nasida. Maratus taon dungkon i, diterjemahon ma Bibel tu angka hata na boi diantusi godangan halak. On dibahen di Eropa manang di inganan na asing.

13. Aha do na mambahen pos rohanta? Jala aha do pangkorhonna tu hita?

¹³ Angka panurat ni Bibel najolo, manurat Hata ni Debata na dipasahat marhite tondi parbadia. Alai ndang songon i na masa tu angka penerjemah ni Bibel. Songon penerjemah ni Bibel Septuaginta, Bibel ni si Wycliffe, Bibel Batak Toba, manang terjemahan na asing. Alai songon na taulas, nang pe godang ambatambat tongtong do hot hata ni Debata. Tangkas ma digohi Jahowa do janjiNa. Alani i, pos ma rohanta sai na saut do sude janji ni Jahowa.​—Jos. 23:14.

14. Aha do labana molo taparsiajari taringot cara ni Jahowa mangalinggomi Bibel?

¹⁴ Denggan do molo taparsiajari songon dia Jahowa mangalinggomi HataNa. On mambahen gabe lam pos rohanta jala lam tahaholongi ma Ibana. * Boasa dilehon Jahowa Bibel tu hita? Jala boasa marjanji Ibana laho mangalinggomi i? Ala holong rohaNa tu hita, jala lomo rohaNa mangajarhon angka na parohon laba tu hita. (Jaha Jesaya 48:17, 18.) Gabe taronjar ma rohanta laho mangkaholongi jala mangoloi Ibana.​—1 Joh. 4:19; 5:3.

15. Aha do na laho taulas di artikel na mangihut?

¹⁵ Mansai tahaholongi do hata ni Debata. Alai songon dia do asa boi gumodang laba na tadapot tingki manjaha Bibel? Tingki marbarita, songon dia do hita mangurupi angka halak asa ringgas manjaha Bibel? Songon dia do angka dongan na manguluhon di huria mamangke Bibel tingki mangajar? Taulas ma sungkunsungkun on di artikel na mangihut.