1. Ala godang do na marpangalaho na so denggan, ra aha do na gabe tapingkirhon?

ALA mangolu hita di “ari parpudi”, ndang denggan pangalaho ni angka halak saonari. Holan ‘mangkaholongi dirina sandiri do jolma, holongan di hepeng, marhata manggang, patimbohon diri’, jala “ndang diboto mangorom diri”. (2 Tim. 3:1-3). Alani i, gabe maol ma hita mangulahon parenta ni Debata. Alana, molo naeng mangulahon na didok Bibel, ingkon marserep ni roha do hita. Alai, ra olo do gabe didok rohanta denggan do ngolu ni nasida jala marlas ni roha do, hape ndang denggan pangalahona. (Ps. 37:1; 73:3) Ra, gabe sungkun-sungkun ma rohanta, ‘Tutu do adong labana molo olo ahu mangurupi na asing? Jala molo marserep ni roha ahu, tong do diargai halak?’ (Luk. 9:48) Molo tarihut-ihut hita songon angka halak na mangkaringkothon diri, boi do gabe sega parale-aleonta tu angka donganta. Jala boi do gabe maol ditanda angka halak molo hita Sitindangi. Alai molo tatiru angka naposo ni Jahowa na marserep ni roha, dapotta ma pasu-pasu.

2. Aha do na boi taparsiajari sian naposo ni Debata na disurat di Bibel?

 ² Molo tajaha jala tarimangi angka sitiruon sian naposo ni Debata na disurat di Bibel, boi do gabe togu haporseaonta. Jadi, aha do na mambahen nasida gabe ale-ale ni Debata? Songon dia do nasida palashon roha ni Debata? Boasa nasida tongtong togu mangulahon na sintong?

3, 4. (a) Aha do na dilehon Jahowa laho patoguhon haporseaonta? (b) Boi do holan mandapot parbinotoan patoguhon haporseaonta?

³ Diparade Jahowa do sude na tahaporluhon asa togu haporseaonta. Dapotta do poda dohot angka sitiruon sian Bibel. Asing ni i, adong do jw.org, angka sijahaonta, JW Broadcasting, parpunguan dohot angka kebaktian. Alai, ndang holan parbinotoan na tahaporluhon. I do alana didok Jesus, “Sipanganonku i ma mangulahon lomo ni roha ni na marsuru ahu jala pasaehon ulaonna.”​—Joh. 4:34.

⁴ Dipatudos Jesus do mangulahon lomo ni roha ni Debata i songon mangallang sipanganon. Molo taallang sipanganon na marvitamin gabe sehat ma hita. Suang songon i ma, lam togu do haporseaonta tingki mangulahon lomo ni roha ni Debata. Umpamana, hea do loja hamu tingki laho marbarita hape dung mulak sian i gabe las rohamuna?

5. Aha do labana molo marbisuk hita?

⁵ Molo taulahon na dipangido Jahowa, didok do hita marbisuk. (Ps. 107:43) Jala angka halak na marbisuk mandapot godang pasu-pasu. Didok Bibel, “Ndang tarpatudos tusi. . . . Hau hangoluan do Ibana di angka na mandahopi, jala manang ise na marsitiopan tusi martua do.” (Poda 3:13-18) Jala didok Jesus do, “Marlas ni roha ma hamu molo diulahon hamu i.” (Joh. 13:17) Jadi, marlas ni roha do angka sisean ni Jesus molo tongtong diihuthon nasida na niajarhonna dohot sitiruon na binahenna. Jala, i ma gabe na umringkot di ngolu ni nasida.

6. Boasa ingkon tongtong taulahon naung taparsiajari?

⁶ Saonari, ingkon tongtong do taulahon angka naung taparsiajari. Umpamana, songon sahalak parbengkel adong do parbinotoanna marbengkel dohot angka alatna. Alai, asa malo marbengkel ingkon dipangke ibana do parbinotoanna dohot angka alatna i. Jadi, nang pe gok pengalamanna marbengkel alai ingkon tongtong do ibana mamangke parbinotoanna dohot angka alat i asa lam malo marbengkel. Suang songon i ma tingki parjolo sahali hita marsiajar Bibel. Tontu las do rohanta ala nunga taulahon naung tajaha i. Alai, asa tongtong hita marlas ni roha ingkon ganup ari do taulahon na taparsiajari i.

7. Aha do na ingkon tabahen dung taulas sitiruon on?

⁷ Di parsiajaran on laho taulas ma piga-piga situasi na boi mambahen hita gabe maol marserep ni roha. Jala taulas ma muse songon dia angka naposo ni Debata boi tongtong marserep ni roha. Alai, unang ma holan tajaha manang taparsiajari i. Na umringkot i ma molo tarimangi jala pintor taulahon ma i.

8, 9. Aha do na boi taparsiajari sian Ulaon ni Apostel 14:8-15 taringot serep ni roha ni si Paulus? (Ida gombar di mula ni parsiajaran.)

⁸ Lomo do roha ni Debata “asa malua saluhut jolma jala boi mandapot parbinotoan na bagas taringot tu hasintongan i”. (1 Tim.  2:4) Jadi, songon dia do pangkilalaanmuna tu halak na so mananda hasintongan dope? Songon si Paulus, marbarita na uli do ibana tu angka halak naung mamboto taringot Jahowa i ma halak Jahudi. Alai, tong do ibana marbarita tu angka halak sisomba gana-ganaan. Jala, ingkon marserep ni roha do ibana tingki marbarita na uli tu angka halak sisongon i. Boasa?

⁹ Tingki baru dope si Paulus gabe misionaris, laho ma ibana tu kota Listra dohot si Barnabas. Alai gabe dibahen halak Likaonia do si Paulus dohot si Barnabas, songon angka debata ni nasida. Jala dijou do si Paulus dohot si Barnabas debata Zeus dohot Hermes. Alai, gabe ginjang do roha ni si Paulus dohot si Barnabas ala dibahen songon i? Gabe didok roha ni nasida do, on ma tingkina marlas ni roha dung ditaon nasida hasusaan di dua luat na parpudi na dijumpangi nasida? Dirimpu nasida do gabe dalan do on asa lam godang halak mambege barita na uli? Ndang songon i! Gariada, sogo do roha ni nasida. Jala gogo do didok nasida, “Boasa bahenonmu songon on? Jolma na gale do hami songon hamu.”​—Ul. 14:8-15.

10. Boasa ndang didok roha ni si Paulus dohot si Barnabas ndang umjago nasida sian halak Likaonia?

¹⁰ Sarupa jolma na mardosa do si Paulus dohot si Barnabas songon halak Likaonia. Jadi tingki didok si Paulus songon i, ndang na laho mandok na sarupa do Debata ni nasida songon debata ni halak Likaonia. Jala ndang gabe didok roha ni si Paulus dohot si Barnabas nunga jago nasida. Alana Debata do na mamillit nasida gabe misionaris. (Ul. 13:2) Asing ni i marhite tondi parbadia dipillit do nasida gabe na marpangkirimon tu surgo. Jadi, diboto nasida do, molo olo halak Likaonia manjangkon barita na uli boi do halak Likaonia mandapot pangkirimon na sarupa.

11. Songon dia do hita maniru serep ni roha ni si Paulus tingki marbarita?

¹¹ Songon si Paulus, unang ma tarimpu gabe sumurung hita sian na asing ala marbarita manang mangulahon sude ulaon na dilehon Jahowa. Jadi, on ma sada cara patuduhon serep ni roha. Alani i tarimangi ma, ‘songon dia do pangkilalaanku taringot halak na hujumpangi tingki marbarita? Olo dope ahu paimbar-imbarhon halak na hujumpangi, manang olo dope ahu pintor curiga tu halak tingki marbarita’? Sude Sitindangi Ni Jahowa marsitutu do manjumpangi halak na olo manangihon barita na uli. Gariada adong do donganta na marsitutu marsiajar bahasa na asing manang hasomalan sian bangso dohot suku na so apala dihalomohon halak. Alai, ndang na dirimpu angka donganta on nasida do na umdenggan sian angka halak na dijumpangi nasida. Gariada marsitutu do nasida mangurupi angka halak na olo manangihon.

12. Songon dia do si Epapras manarihon angka dongan?

¹² Cara na asing laho patuduhon serep ni roha i ma manangiangkon angka donganta na “naung mandapot haporseaon na arga” songon hita. (2 Ptr. 1:1) Umpamana songon si Epapras. Holan tolu hali do ibana disurat di Bibel. Tingki dipenjara si Paulus di Rom, dipaboa ibana do tu halak Kristen di Kolosse taringot si Epapras. Didok ibana, “Sai marsitutu do ibana manangiangkon hamu.” (Kol. 4:12) Jala didok ibana do si Epapras, “donganku na tarhurung”. (Plm. 23) Jadi nang pe si Epapras tarhurung  songon si Paulus alai sai diingot ibana do angka dongan di huria. Tangkas do ditanda si Epapras angka donganna. Tarida do i sian tangiangna. Didok ibana do goar ni angka dongan sahuria di tangiangna. Jadi, hita pe boi do manangiangkon angka dongan. Jala marlaba do tangiangta i tu angka dongan.​—2 Kor. 1:11; Jak. 5:16.

13. Songon dia do hamu maniru si Epapras tingki martangiang?

¹³ Ise do na laho ditangiangkon hamu? Ra, angka donganta di huria na marungkil mangadopi hasusaan. Manang angka dongan na mangadopi ela-ela. Boi do muse ditangiangkon hamu angka donganta na adong goarna di jw.org di artikel na marjudul “Saksi-Saksi Yehuwa yang Dipenjarakan Karena Iman Mereka”. (Ida ma RUANG BERITA > BERITA HUKUM.) Jala boi do muse ditangiangkon hamu angka dongan na marhabot ni roha ala baru ditadingkon na dihaholongi nasida. Tangiangkon ma muse angka dongan na susa ala mara dohot porang na baru masa di inganan ni nasida, dohot na susa di parhepengon. Jadi, godang do donganta na porlu tatangiangkon. Molo tatangiangkon nasida, on patuduhon na taparrohahon do na ringkot di angka dongan. (Plp. 2:4) Jala ditangihon Jahowa do tangiang sisongon on.

14. Boasa Jahowa gabe sitiruon taringot rade manangihon?

¹⁴ Cara na asing muse, i ma rade manangihon. Didok di Jakobus 1:19, hita ingkon “hatop manangihon.” Jahowa ma na gabe sitiruon taringot rade manangihon. (1 Mus. 18:32; Jos. 10:14) Umpamana, rimangi ma pangkataion ni si Musa dohot Jahowa na disurat di 2 Musa 32:11-14. (Jaha.) Sasintongna, ndang ingkon dipaboa si Musa aha na di rohana, alai dipaloas Jahowa do si Musa paboahon songon dia pangkilalaanna. Jadi, olo jala sabar do hamu manangihon poda ni donganta, nang pe hea ibana  mangulahon na sala di tingki naung salpu? Gari Jahowa, ditangihon do tangiang ni angka halak na marhaporseaon.

15. Songon dia do ahu maniru Jahowa laho mangargai angka dongan?

¹⁵ Serep do roha ni Jahowa tingki manangihon naposona songon si Abraham, si Rahel, si Musa, si Josua, si Manoa, si Elia, dohot si Hiskia. Alani i, tasungkun ma dirinta, ‘Olo do ahu maniru Jahowa asa mangulahon na sarupa? Molo adong sipaingot na denggan sian angka dongan, olo do ahu mangargai nasida? Olo do ahu manangihon jala mangulahon sipaingot na i? Adong do piga-piga angka dongan di huria dohot keluargangku na mangkaporluhon pangurupionku? Molo songon i, aha ma na laho ulahononku?’​—1 Mus. 30:6; Pangh. 13:9; 1 Raj. 17:22; 2 Kron. 30:20.

16. Songon dia do si Daud tingki direhei si Simei?

¹⁶ Serep ni roha mangurupi hita mangorom diri tingki dibahen na so denggan tu hita. (Eps. 4:2) Boi do tajaha taringot sitiruon i di 2 Samuel 16:5-13. (Jaha.) Dipaboa disi molo si Simei, i ma tondong ni Raja Saul na mangarehei jala mandangguri si Daud dohot naposona. Sasintongna, boi do si Daud mangalo si Simei. Alai, sabar do si Daud mangadopi i. Jadi, boasa ma si Daud boi mangorom dirina? Boi do dapotta alusna di buku Psalmen pasal na patoluhon.

17. Aha do na diulahon si Daud asa boi sabar, jala songon dia hita boi maniru ibana?

¹⁷ Tingki si Daud manurat Psalmen pasal tolu, mangadopi hasusaan do ibana. Alana anakna si Absalom marsangkap mambunu ibana. Jala di tingki i do muse si Simei mandangguri ibana. Alai, boi do tongtong sabar ibana mangadopi i sude. Songon dia carana? Didok si Daud do di Psalmen 3:5, “Joujou do soarangku tu Jahowa, jadi dialusi Ibana ahu jalojalo sian dolok habadiaonna.” Songon si Daud, martangiang ma hita tingki adong na mambahen na so denggan tu hita. Jala lehonon ni Jahowa do tondi parbadiana asa boi hita martahan. Alani i, boi do hamu mangorom dirimuna jala manalpuhon hasalaan ni halak na mambahen na so denggan tu hamu? Jala pos do rohamuna tu Jahowa na laho urupanna jala pasu-pasuonna hamu tingki manaon i?

18. Aha do labana molo taulahon na dipangido Jahowa?

¹⁸ Poda 4:7 di Bibel siganup ari mandok, “Mangalului habisuhon i do apala na rumingkot.” Nang pe ringkot adong parbinotoan asa boi marbisuk, alai ndang cukup holan mamboto jala mangantusi na sasintongna. Alai, ingkon boi do hita mambahen haputusan. Gari porngis ndang diboto aha na laho masa, alai dipapungu do sipanganonna tu ari marsogot. On patuduhon, marbisuk do porngis. (Poda 30:24, 25) Didok do Jesus “habisuhon ni Debata”, ala tongtong do ibana palashon roha ni Amana. (1 Kor. 1:24; Joh. 8:29) Jadi, pasu-pasuon ni Debata do hita molo marbisuk laho mangulahon na denggan jala tongtong marserep ni roha. (Jaha Mateus 7:21-23.) Jadi, molo tongtong hamu marserep ni roha, boi do on patoguhon angka dongan di huria asa taronjar marserep ni roha. Sabar jala tongtong ma mangulahon na denggan. Molo tongtong hamu marserep ni roha, boi ma hamu marlas ni roha saleleng ni lelengna.