1. Boasa Sitindangi Ni Jahowa halak na marlas ni roha? (Ida gombar di mula ni parsiajaran.)

HALAK na marlas ni roha do Sitindangi Ni Jahowa. Rap mengkel jala rap mangkata-hatai do nasida tingki marsaor, di parpunguan, di kebaktian, dohot di acara ramah tamah. Boasa boi songon i? Ala mananda Jahowa do nasida, i ma “Debata na marlas ni roha”. Jala lomo do roha ni nasida maniru Ibana. (1 Tim. 1:11; Ps. 16:11) Holan Jahowa do na boi parohon las ni roha. Lomo do rohana asa las rohanta. Alani i, godang do cara na dibahen Ibana asa marlas ni roha hita.​—5 Mus. 12:7; Pjm. 3:12, 13.

2, 3. (a) Songon dia do halak na marlas ni roha? (b) Aha do na mambahen hita maol marlas ni roha?

² Songon dia molo hamu, las do rohamuna? Halak na marlas ni roha ndang sai marungut-ungut nang pe mangadopi sitaonon. Didok di Bibel, marlas ni roha do halak na dipasu-pasu Debata. Alai ra, adong do na mambahen hita gabe ndang marlas ni roha. Angka aha ma i?

³ Umpamana, marujung ngolu na tahaholongi, adong  keluarganta na dipecat, marsirang, di PHK, jotjot adong parbadaan di jabu, jotjot direhei dongan sakarejo manang dongan sasingkola. Dibahen na so denggan tu hita manang dipenjara alani haporseaonta. Asing ni i, mura-mura hita marsahit manang posa sahitta. Ra marsahit stres hita. On ma na mambahen hita ndang marlas ni roha. Alai ingot ma, ‘Parhuaso na gok las ni roha’ do Jesus. Lomo rohana mangapuli angka halak, asa marlas ni roha nasida. (1 Tim. 6:15; Mat. 11:28-30) Tingki marjamita Jesus di Dolok, dipaboa Jesus do angka halak na songon dia na boi marlas ni roha, nang pe godang hasusaan ala Sibolis dope na mangarajai portibi on.

4, 5. Aha do na ingkon taulahon asa boi tongtong marlas ni roha?

⁴ “Marlas ni roha ma na mamboto ringkot ni marale-ale tu Debata, ai nasida do nampuna Harajaon banua ginjang i.” (Mat. 5:3) On ma na parjolo dipaboa Jesus jala na rumingkot. Molo sai taharingkothon do parale-aleonta tu Debata, na patuduhon lomo do rohanta mananda Debata. Tahaporluhon do pangurupion dohot tudu-tuduna. Songon dia do hita mangido i? Taparsiajari ma Bibel, oloi ma Debata, jala tabahen ma ulaon manomba Jahowa gabe na rumingkot di ngolunta. Molo taulahon i, las ma rohanta. Gabe lam pos ma rohanta tu janji ni Debata na laho saut satongkin nai. Jadi, “pangkirimon na parohon las ni roha” naung taparsiajari sian Bibel, boi patoguhon hita.​—Tit. 2:13.

⁵ Ringkot do tongtong togu parale-aleonta tu Jahowa. Jadi manang aha pe na masa di ngolunta, boi ma hita tongtong marlas ni roha. I do alana didok si Paulus, “Sai marlas ni roha ma hamu alani Tuhan. Hudok ma muse: Marlas ni roha ma hamu!” (Plp. 4:4) Asa jonok tu Jahowa, tapangido ma bisuk sian Ibana. Didok do di Bibel, “Martua ma jolma na jumpangan hapistaran dohot jolma pangalapan roha. Hau hangoluan do Ibana di angka na mandahopi, jala manang ise na marsitiopan tusi martua do.”​—Poda 3:13, 18.

6. Aha do muse na ingkon taulahon asa tongtong marlas ni roha?

⁶ Asa torus tahilala las ni roha, ingkon tongtong do taulahon naung taparsiajari sian Bibel. I do alana didok Jesus, “Nunga diboto hamu angka i, alai marlas ni roha ma hamu molo diulahon hamu i.” (Joh. 13:17; jaha Jakobus 1:25.) Ringkot do on taulahon laho patuduhon na tutu do holong rohanta tu Jahowa jala asa tongtong marlas ni roha. Alai songon dia do asa las rohanta, tingki susa pangkilalaanta? Taulas ma aha do muse na didok Jesus tingki marjamita ibana di Dolok.

7. Boasa halak na marsak boi marlas ni roha?

⁷ “Marlas ni roha ma na marsak, ai siapulon do nasida.” (Mat. 5:4) Ra sungkun-sungkun do rohanta, ‘Songon dia do halak na marsak boi marlas ni roha?’ Hata ni Jesus on ndang tu sude halak na marsak. Alana angka parjahat pe tong do marsak manang susa ala borat ni sitaonon “di ari parpudi” on. (2 Tim. 3:1) Boasa songon i? Ala ndang marale-ale nasida tu Debata. Holan dirina do na dipingkirhon. Ndang ringkot di nasida ulaon manomba Debata. I do na mambahen ndang marlas ni roha nasida. Jadi na didok Jesus dison, taringot angka halak na mangkaringkothon parale-aleon tu Debata. Marsak do nasida ala mangida angka halak ndang olo manomba Debata, jala ndang diulahon lomo ni roha ni Debata. Marsak do nasida ala mardosa dope nasida. Tong do marsak nasida ala gok na masa di portibi on na mambahen halak gabe mabiar. Alai nang pe songon i, boi do nasida tongtong marlas ni roha. Alana diparrohahon Jahowa do nasida, diapuli marhite Bibel jala dilehon do las ni roha dohot hangoluan.​—Jaha Hesekiel 5:11; 9:4.

8. Boasa hita boi marlas ni roha molo lambok rohanta?

⁸ “Marlas ni roha ma na lambok roha, ai nasida do na laho manean tano on.” (Mat. 5:5) Boasa hita boi marlas ni roha molo lambok rohanta? Alana molo halak na kasar jala garang, boi do jotjot parohon parsoalan. Alai dung marsiajar Bibel, dipatudu nasida ma “pangalaho na imbaru”. Gabe adong ma di nasida “holong ni roha, haburjuon, toruk ni roha, lambok ni roha, jala sabar”. (Kol. 3:9-12) Ujungna gabe dame ma dihilala nasida, boi marale-ale tu na asing, jala las ma roha ni nasida. Jala didok do di Bibel, nasida ma na laho “manean tano on”.​—Ps. 37:8-10, 29.

9. (a) Aha do maksud ni Jesus tingki mandok na lambok roha laho “manean tano on”? (b) Aha do na mambahen angka halak na “mauas male tu hasintongan” boi marlas ni roha?

⁹ Aha do maksud ni Jesus tingki mandok na lambok roha laho “manean tano on”? Angka na dipillit Debata na laho mangolu di surgo, dohot do manggohi hata on dung mamarenta nasida gabe raja dohot malim sian surgo tu tano on. (Pgk. 20:6) Asing ni i muse, adong do marjuta halak na so marpangkirimon tu surgo laho manean tano on. Mangolu salelengna, gabe sempurna, jala mangkilala hadameon dohot las ni roha ma annon nasida. Jadi angka halak na dipillit na laho mangolu di surgo dohot halak na marpangkirimon di tano on, marlas ni roha ala “mauas male tu hasintongan”. (Mat. 5:6) Dung salpu sude hajahaton sian portibi on, gabe mura ma nasida mangulahon parenta ni Debata. (2 Ptr. 3:13) Di portibi na imbaru, las ma roha ni halak na tigor, jala ndang be marsak nasida alani hajahaton na dibahen parjahat.​—Ps. 37:17.

10. Songon dia do halak na marasi ni roha?

¹⁰ “Marlas ni roha ma parasi roha,  ai na laho dapotan asi ni roha do nasida.” (Mat. 5:7) Asa boi gabe halak na marasi ni roha ingkon burju do, lambok jala olo marasi ni roha tu halak na susa. Alai, ndang holan i na diulahon halak na marasi ni roha. Alana didok Bibel do molo marasi ni roha, ingkon adong do na binahenna laho mangurupi na asing.

11. Aha do parsiajaran sian tudosan Jesus taringot halak Samaria?

¹¹ Jaha Lukas 10:30-37. Tudosan ni Jesus taringot halak Samaria manggombarhon denggan ni marasi ni roha. Ala marasi ni roha do halak Samaria i, gabe olo do ibana mangurupi baoa na hona rampok i. Dung dipaboa Jesus tudosan i, didok ibana ma, “Laho ma ho, bahen ma songon i”. Alani i, tarimangi ma, ‘Hutiru do asi ni roha ni halak Samaria i? Asi do rohangku tu dongan sahuria, i ma na matua, na mabalu, manang dakdanak na so Sitindangi natua-tuana? Rade do ahu mangapuli na marsak laho patoguhon nasida?’​—1 Tes. 5:14; Jak. 1:27.

12. Boasa las rohanta molo marasi ni roha?

¹² Boasa marasi ni roha boi parohon las ni roha? Alana molo marasi ni roha hita sarupa do i songon mangalehon tu sasahalak. Jesus pe mandok parohon las ni roha do molo adong na talehon tu sasahalak. Jala taboto, las do roha ni Jahowa tingki taulahon i. (Ul. 20:35; jaha Heber 13:16.) Taringot halak na marasi ni roha didok Raja Daud do, “Ramotan jala pangoluon ni Jahowa do ibana, martua do ibana bahenonna di tano on”. (Ps. 41:2, 3) Molo marasi ni roha hita tu na asing, gabe marasi ni roha ma Jahowa tu hita. Jala tahilala ma las ni roha saleleng ni lelengna.​—Jak. 2:13.

13, 14. Boasa porlu ias rohanta?

¹³ Didok Jesus, “Marlas ni roha ma na ias roha, ai idaon ni nasida do Debata.” (Mat. 5:8) Jadi asa ias rohanta, ingkon tongtong do tajaga pingkiran dohot sangkap ni rohanta. Ringkot do on taulahon, asa boi hita dijangkon Jahowa.​—Jaha 2 Korint 4:2; 1 Tim. 1:5.

 ¹⁴ Molo ias roha ni sasahalak, boi do ibana marale-ale dohot Jahowa. Didok Bibel, “Marlas ni roha ma halak na manunsi juba ni nasida.” (Pgk. 22:14) Jadi aha do lapatan ni nasida “manunsi juba ni nasida”? Lapatanna, angka halak na dipillit laho mangolu salelengna di banua ginjang, tama do nasida di adopan ni Jahowa. Jala angka halak na marpangkirimon mangolu di tano on, gabe boi ma nasida marale-ale dohot Jahowa. Ala tigor do pangalaho ni nasida di adopan ni Jahowa. I do alana didok Bibel, “Nunga disunsi nasida jubah nasida jala bontar dibahen di bagasan mudar ni Anak ni Biru-biru i.”​—Pgk. 7:9, 13, 14.

15, 16. Songon dia halak na ias roha boi “marnida Debata”?

¹⁵ Didok Jahowa, “Ndang tarbahen manang ise jolma hian marnida Ahu, laos mangolu ibana.” (2 Mus. 33:20) Jadi songon dia do halak na ias roha boi ‘marnida Debata’? Lapatan ni “marnida” di hata Junani i ma, laho mambayangkon, mangantusi, manang laho mananda. Jadi ‘marnida Debata’ lapatanna, tangkas mananda songon dia Debata. Jala, lomo rohanta laho maniru parangena. (Eps. 1:18) Jesus ma sitiruon na dumenggan na patuduhon parange ni Debata. I do alana boasa boi didok ibana, “Manang ise na mangida ahu, nunga diida ibana Ama i.”​—Joh. 14:7-9.

¹⁶ Asing ni i, hita boi ‘marnida Debata’ tingki tahilala sandiri songon dia Ibana mangurupi hita. (Job 42:5) Jala, taida do Debata molo tongtong taingot janji ni Jahowa tu angka na marsihohot jala na ias roha. Jala dung dipahehe angka halak na dipillit Debata laho tu surgo, idaon ni nasida ma Jahowa.​—1 Joh. 3:2.

17. Boasa marlas ni roha sibahen dame?

¹⁷ Dung i didok Jesus ma muse, “Marlas ni roha ma sibahen dame.” (Mat. 5:9) Hita pe boi do marlas ni roha molo tabahen marragam cara asa mardame dohot na asing. Alana didok si Jakobus, “Parbue ni angka ulaon na denggan disuan di bagasan dame tu angka halak sibahen dame.” (Jak. 3:18) Jadi, molo adong parsoalanmuna dohot sasahalak di huria manang di keluargamuna, pangido ma pangurupion ni Jahowa asa boi hamu gabe sibahen dame. Dung i, lehononna ma tondi parbadia na mangurupi hamu mangulahon angka parange na denggan. On boi mambahen hamu marlas ni roha. Didok Jesus ringkot do tabahen marragam cara laho mardame. Didok ibana, “Molo diboan ho silehon-lehonmu tu langgatan, jala disi gabe diingot ho adong donganmu na marsogo ni roha  tu ho, tadingkon ma silehon-lehonmi di jolo ni langgatan i. Laho ma ho mardame dohot donganmi. Dung pe i, asa ro ho muse pasahathon silehon-lehonmi.”​—Mat. 5:23, 24.

18, 19. Boasa halak Kristen boi tongtong marlas ni roha nang pe disusai?

¹⁸ “Marlas ni roha ma hamu molo dileai, dibahen na hansit tu hamu, jala dipatubu-tubu hata na so tutu dompak hamu alani ahu.” Aha do lapatan ni hata ni Jesus on? Ibana laho mandok, “Ai songon i do angka panurirang manaon angka na hansit najolo. Marlas ni roha jala marolop-olop ma hamu, ai balga do upamuna di banua ginjang.” (Mat. 5:11, 12) Jadi, tingki dipungkuli angka Apostel jala diorai marbarita, ‘kaluar ma nasida sian adopan ni Sanhedrin, alai las do roha ni nasida’. Ndang na gabe marlas ni roha nasida ala dipungkuli. Alai, nasida marlas ni roha “ala diboto tama do nasida dileai alani goar” ni Jesus.​—Ul. 5:41.

¹⁹ Nang pe mangadopi hasusaan ala mangihuthon Jesus, tongtong do marlas ni roha angka Sitindangi. (Jaha Jakobus 1:2-4.) Songon angka apostel, ndang na gabe marlas ni roha hita ala diorai manomba Jahowa. Alai sai taingot ma, molo tongtong do hita marsihohot tu Jahowa sai urupanna do hita asa boi martahan. Songon na masa tu donganta si Henryk Dornik dohot abangna, na dipamasuk tu kamp pengungsi di bulan Agustus 1944. Angka panjaga disi mandok, “Ndang adong gunana molo tasusai nasida, alana tumagon do di nasida mate alani haporseaonna.” Didok si Henryk do, “Ndang na lomo rohangku mate, alai tong do las rohangku ala barani jala boi tongtong marsihohot tu Jahowa. Lam jonok do ahu tu Jahowa ala sai martangiang ahu. Diurupi Jahowa do ahu.”

20. Boasa parohon las ni roha molo manomba Jahowa hita?

²⁰ Ala tongtong hita marsihohot, las ma roha ni Jahowa tu hita. Jala hita pe gabe marlas ni roha do nang pe disusai halak dohot keluarganta ala manomba Jahowa, manang ala marsahit, jala ala lam matua hita. (1 Tim. 1:11) Jala hita pe marlas ni roha do ala Jahowa, i ma “Debata na so margabus”, na mangalehon pangkirimon na sun denggan. (Tit. 1:2) Molo dung saut janjina i, ndang ingotonta be angka sitaononta saonari. Bayangkon ma denggan ni ngolunta di paradeiso haduan jala las ni roha na tahilala! Tontu, las do rohanta alani, ‘gok ni hadameon’ disi haduan.​—Ps. 37:11.