1, 2. (a) Aha do imbar ni Jahowa sian angka parhuaso tingki maradophon naposona? (b) Aha do na laho taulas di parsiajaran on?

JOLMA na gogo jotjot do mangarajai manang mangatur donganna. (Mat. 20:25; Pjm. 8:9) Alai ndang songon i molo Jahowa! Nang pe parhuaso Ibana jala Pargogo na so hatudosan, diantusi Ibana do hagaleon ni jolma. Diantusi Ibana do pangkilalaanta dohot na tahaporluhon. Diboto Jahowa do na gale hita jala diboto do sadia godang na boi taulahon. Alani i, ndang hea dipangido Ibana na so tolap taulahon.​—Ps. 103:13, 14.

² Sian Bibel boi do taparsiajari songon dia Jahowa mangantusi angka naposona. Adong tolu contoh. Na parjolo, tingki poso si Samuel diurupi Jahowa do paboahon barita panguhuman tu si Eli, Sintua ni Malim. Na paduahon dipapos Jahowa do roha ni si Musa tingki didok rohana, ndang tolap ibana mamboan halak Israel ruar sian Mesir. Jala na patoluhon, diantusi Jahowa do hagaleon ni halak Israel tingki diboan kaluar sian Mesir. Sian angka sitiruon  on, aha do na boi taparsiajari taringot Jahowa jala songon dia hita boi maniru Ibana?

3. Di tingki borngin, aha do na masa tu si Samuel, jala sungkun-sungkun aha do na gabe ro tu rohanta? (Ida gombar di mula ni parsiajaran.)

³ Sian dakdanak, nunga marhobas di tabernakel si Samuel. (1 Sam. 3:1) Tingki borngin, naeng modom ma si Samuel, masa ma na so hea masa di ngoluna. * (Jaha 1 Samuel 3:2-10.) Adong na manjou ibana. Dirimpu si Samuel do Sintua ni Malim Eli na manjou i. Pintor hehe ma ibana jala marlojong mandapothon si Eli. Didok ibana ma, “Ida ma, dison do ahu, ai dijou ho do ahu.” Alai didok si Eli ma, “Ndang ahu manjou ho.” Dung masa i sampe dua hali, gabe diantusi si Eli ma Jahowa do na manjou si Samuel. Jadi dipaboa si Eli ma tu si Samuel, aha na ingkon dohononna molo masa i muse. Jala diulahon si Samuel do i. Boasa ndang dipaboa Jahowa tu si Samuel na Ibana do na manjou i? Ndang adong dipaboa di Bibel alusna. Alai, dibahen Jahowa pe songon i, ra ala diantusi Jahowa do songon dia pangkilalaan ni si Samuel.

4, 5. (a) Aha do na diulahon si Samuel tingki laho paboahon barita panguhuman ni Jahowa tu si Eli? (b) Aha do na boi taparsiajari taringot Jahowa sian carita on?

⁴ Jaha 1 Samuel 3:11-18. Didok do di Patik ni Jahowa, ingkon sangap do na poso tu angka na matua. Tarlumobi tu na adong tanggung jawabna. (2 Mus. 22:28; 3 Mus. 19:32) Bayangkon ma, na poso songon si Samuel tingki manogot dope laho mandapothon si Eli, jala ingkon barani paboahon barita panguhuman ni Debata. Didok di Bibel, “Mabiar do anggo si Samuel paboahon pangungkapon i tu si Eli.” Diurupi Debata do si Eli mamboto na Ibana do manjou si Samuel. Jadi, didok si Eli ma tu si Samuel asa unang ditabunihon ibana Hata ni Debata. Alani i, “Dipaboa si Samuel ma hata i luhut tu ibana.”

⁵ Alai, ndang tarsonggot be roha ni si Eli mambege i. Alana nunga dipaboa hian barita i marhite ‘sada panurirang ni Debata’. (1 Sam. 2:27-36) Sian carita on, taboto ma marbisuk do Jahowa jala diantusi do hita.

6. Aha do na boi taparsiajari sian cara ni Debata mangurupi si Samuel?

⁶ Molo poso dope hamu, pengalaman ni si Samuel paboahon, diantusi Jahowa do hasusaan jala pangkilalaanmuna. Ra maila jala mabiar do hamu marbarita tu na umtua manang ingkon gabe imbar hamu sian donganmu na poso. Pos ma rohamuna urupan ni Jahowa do hamu. Pasahat ma holso ni rohamuna tu Ibana di bagasan tangiang. (Ps. 62:9) Rimangi ma angka contoh ni  naposo na disurat di Bibel, umpamana songon si Samuel. Caritahon ma tu donganmuna na poso manang na umtua sian hamu, na hea mangadopi situasi songon na diadopi hamu. Ra paboaon ni nasida do songon dia Jahowa mangurupi nasida di na so panagaman.

7, 8. Sian dia do taboto na diantusi Jahowa do pangkilalaan ni si Musa?

⁷ Marumur 80 taon ma si Musa mandapot tanggung jawab sian Jahowa. Ingkon diurupi ibana do bangso Israel asa malua sian parhatobanan di Mesir. (2 Mus. 3:10) Ra songgot do roha ni si Musa tingki mandapot tugas i. Alana, parmahan do ibana, jala nunga 40 taon tading di Midian. Didok si Musa do, “Ise ma ahu pola, tung dapothononku raja Firaun i, tung paruaronku halak Israel sian Misir?” Dipapos Jahowa do si Musa, didok do, “Hudongani pe ho”. (2 Mus. 3:11, 12) Marjanji do muse Jahowa tu ibana, ‘sai tangihonon’ ni sintua ni Israel do ibana. Alai disungkun si Musa do, “Ra tung ndang porsea nasida di ahu, jala ndang tangihononna.” (2 Mus. 3:18; 4:1) Didok roha ni si Musa, sala do Jahowa mamillit ibana. Alai sabar do Jahowa maradophon si Musa. Gariada dilehon Jahowa do tu si Musa huaso laho mambahen tanda halongangan. Sasintongna si Musa ma jolma na parjolo na didok di Bibel na dilehon Jahowa huaso.​—2 Mus. 4:2-9, 21.

⁸ Nang pe songon i, sai adong dope sidalian ni si Musa. Didok ibana do ndang malo ibana mangkatai. Alani i, didok Debata ma tu ibana, “Hudongani pe pamanganmi, hupodahon pe tu ho sidohononmu.” Pintor olo do si Musa? Ndang, dipangido do asa na asing disuru. Gabe muruk ma Jahowa. Nang pe songon i, diantusi Jahowa do  pangkilalaan ni si Musa i. Jadi disuru ma si Aron mandongani si Musa.​—2 Mus. 4:10-16.

9. Asa boi si Musa gabe pamimpin na jago, songon dia do Jahowa mangurupi ibana?

⁹ Aha do na taboto taringot Jahowa sian carita on? Ala parhuaso do Jahowa, boi hian do pangkeonna huasona laho pabiar-biarhon si Musa asa mangoloi. Alai ndang dibahen songon i, gariada burju jala sabar do Jahowa. Dipapos do roha ni si Musa na serep roha i, jala sai urupanna do ibana. Marhasil do cara i? Marhasil! Gabe pamimpin na jago do si Musa tu naposo ni Debata. Ditiru ibana do cara ni Jahowa i. Lambok jala olo do Ibana mangantusi na asing.​—4 Mus. 12:3.

10. Molo tatiru Jahowa na olo mangantusi na asing, aha do labana tu hita?

¹⁰ Aha do parsiajaranna tu hita? Molo sahalak suami, ama, manang sintua do hamu, adong do tanggung jawabmu tu na asing. Alani i, tiru hamu ma Jahowa. Ingkon lambok, sabar, jala olo mangantusi angka keluargamuna dohot angka dongan di huria. (Kol. 3:19-21; 1 Ptr. 5:1-3) Molo ditiru hamu do Debata Jahowa dohot Jesus Kristus, i ma si Musa na umbalga, gabe olo ma angka dongan paboahon na di rohana tu hamu jala boi ma urupanmuna nasida. (Mat. 11:28, 29) Gabe sitiruon ma hamu di nasida.​—Heb. 13:7.

11, 12. Songon dia do Jahowa paposhon roha ni halak Israel tingki kaluar sian Mesir?

¹¹ Ra lobi sian tolu juta ma halak Israel na kaluar sian Mesir taon 1513 SM. Adong do sian nasida dakdanak, na matua, na cacat manang na marsahit. Alani godang ni nasida, dihaporluhon do Pamimpin na manarihon jala mangantusi nasida. Jahowa ma Pamimpin na songon i. Jala dipillit ma si Musa laho mangulahon i. Gabe ndang mabiar halak Israel nang pe ingkon manadingkon jabu ni nasida.​—Ps. 78:52, 53.

¹² Songon dia do Jahowa paposhon roha ni naposona asa unang mabiar? Taratur do dibahen Jahowa punguan ni halak Israel i tingki kaluar sian Mesir. (2 Mus. 6:26) Ala taratur do nasida dibahen, gabe boi ma diida nasida songon dia Jahowa manjaga jala mangalinggomi nasida. Dilehon Jahowa ma muse di nasida ‘ombun tingki arian’  jala “sondang ni api” tingki borngin, asa diboto nasida na sai dilinggomi Jahowa do nasida. (Ps. 78:14) Ringkot do dipapos roha ni halak Israel, ala adong dope na laho diadopi nasida.

13, 14. (a) Songon dia do Jahowa mangurupi halak Israel tingki di Laut Rara? (b) Songon dia do Jahowa patuduhon na Ibana do na umgogo sian halak Mesir?

¹³ Jaha 2 Musa 14:19-22. Bayangkon ma molo rap hamu dohot halak Israel di tingki i. Tontu busisaon do hamu. Nunga ro tentara ni Mesir di pudimuna jala Laut Rara di jolomuna. Alai ro ma Jahowa mangurupi. Ombun na di jolomuna pinda tu pudi mangambati tentara Mesir. Holom ma di tentara ni Mesir alai tiur ma di jolo ni halak Israel. Dungkon i, diida hamu ma si Musa mangangkat tungkotna tu laut i. Jala ro ma alogo na mansai gogo sian timur. Bola ma laut i jala gabe adong ma dalan. Rap mardalan ma hamu dohot keluargamuna, angka halak Israel, dohot angka pinahanmuna. Longang do ra rohamu ala mahiang do tano i. Gabe mura ma mardalan. Halak na lambat mardalan pe boi hatop sahat.

¹⁴ Jaha 2 Musa 14:23, 26-30. Tingki i, dilele si Firaun siginjang roha jala na oto i do hamu dohot halak Israel. Diangkat si Musa ma muse tungkotna tu atas ni laut gabe mardomu ma muse aek i, diauphon aek i ma si Firaun dohot angka tentarana. Ndang adong nanggo sada sian nasida na malua!​—2 Mus. 15:8-10.

15. Parsiajaran aha muse na tadapot taringot Jahowa sian carita on?

 ¹⁵ Adong do parsiajaran na asing na taboto taringot Jahowa sian carita on. Debata na taratur do Ibana, alani i pos do rohanta jala ndang mabiar be hita. (1 Kor. 14:33) Songon parmahan na sai mamparrohahon jala manarihon biru-biruna, dos songon i ma do Jahowa mangurupi hita. Dilinggomi do halak Israel sian musu ni nasida. On paposhon jala patoguhon rohanta, ala nunga lam jonok ajal ni portibi on.​—Poda 1:33.

16. Aha do labana molo taparsiajari cara ni Jahowa paluahon halak Israel?

¹⁶ Saonari, tong do sada punguan hita disarihon Jahowa. Diurupi do hita asa tongtong marale-ale dohot Ibana. Dilinggomi do hita sian musunta. Jala tongtong do urupanna hita tingki ro haporsuhon bolon. (Pgk. 7:9, 10) Jadi nang pe poso dope, matua, marsahit-sahit manang cacat hita, unang ma mabiar tingki masa haporsuhon bolon. * Gariada gabe lam barani ma hita! Taingot ma hata ni Jesus na mandok, “Dirgak ma hamu; pasindak hamu ma ulumuna, ai nunga jonok haluaonmuna.” (Luk. 21:28) Jala nang pe ro Gog na sian Magog na umgogo sian tentara Mesir mangaroro hita, pos ma rohanta linggoman ni Jahowa do hita. (Hes. 38:2, 14-16) Alana, molo Jahowa ndang muba. Laho patuduon ni Jahowa do na parholong jala paluaonna do angka naposona.​—Jes. 26:3, 20.

17. (a) Aha do labana molo taparsiajari taringot Jahowa sian angka contoh na disurat di Bibel? (b) Aha do na laho taulas di parsiajaran na mangihut?

¹⁷ Nunga taulas piga-piga contoh songon dia Jahowa mangantusi, mamparrohahon, manogu-nogu jala paluahon naposona. Huhut diparsiajari hamu angka carita on, manat ma rimangi angka hatorangan na baru dope diboto hamu taringot Jahowa. Molo tongtong diparsiajari hamu angka parange ni Jahowa, lam togu ma haporseaon dohot holongmuna tu Ibana. Di parsiajaran na mangihut taulas ma songon dia cara maniru Jahowa tingki maradophon keluarganta, donganta di huria dohot tingki marbarita.