Sukkun-Sukkun sian na Manjaha
Songon dia do artikel “Sai Dipabadia ma Goarmu” na adong di Joujou Paboahon Juni 2020 patakkasson pangattusiotta taringot goar ni Jahowa dohot hakna mamaretta?
Di artikel i, taparsiajari do sada parsoalan na paling penting tu sude jolma dohot suru-suruan, i ma pabadiahon goar ni Jahowa. Termasuk ma i taringot hak ni Jahowa lao mamaretta dohot kesetiaan ni jolma tu Ibana.
Boasa tadokkon pabadiahon goar ni Jahowa i parsoalan na paling penting? Tabahas ma tolu alasanna.
Sian mulai masa pemberontakan di Taman Eden, torus do diparoa-roa Sibolis goar ni Jahowa manang reputasina
Parjolo, diparoa-roa Sibolis do goar ni Jahowa manang reputasina di Taman Eden. Dibahen Sibolis do sukkun-sukkun tu si Hawa na mambahen ibana marpikkir dang burju Jahowa, jala dang masuk akkal petunjuk tu nasida. Dung i, dipabalik Sibolis do hata ni Jahowa. Didok ibana do pargabus Jahowa. Alani i ma digoari ibana “Sibolis”, lapatanna “pargabus”. (Joh. 8:44) Ala porsea si Hawa tu gabus ni Sibolis i, gabe dang unduk be ibana tu Debata jala dialo ibana do pamarettaon ni Debata. (1 Mus. 3:1-6) Sahat tu saonari, diparoa-roa Sibolis dope goar ni Jahowa, jala didok ibana do gabus taringot Jahowa. Alani i do ra akka halak na porsea tu gabus ni Sibolis i, gabe dang unduk tu Debata. Alai di naposo ni Debata, hajahaton na massai balga do tuduhan ni Sibolis i. On do na mambahen godang sitaonon dohot hajahaton di portibi on.
Na paduahon, tetap do Jahowa pabadiahon goarna sian sude tuduhan. Tujuanna asa parohon manfaat tu sude toppaanna. Massai penting do on di Jahowa. Didok Ibana, “Pasti pabadiaokku do goarhu na sangap i.” (Hes. 36:23) Takkas do didok Jesus on ma parsoalan na paling penting na ikkon ditangiakkon sude naposo ni Jahowa na setia. Didok Jesus, “Sai dipabadia ma goarmu.” (Mat. 6:9) Bibel pe jotjot do paboahon na massai penting pabadiahon goar ni Jahowa. Misalna didok, “Puji ma Jahowa alani goarna na sangap i.” (1 Kron. 16:29; Ps. 96:8) “Marende ma hamu mamuji goarna na sangap i.” (Ps. 66:2) “Pasangapokku ma goarmu saleleng ni lelengna.” (Ps. 86:12) Hea do Jahowa makkatai sian surgo, i ma tikki Jesus di bagas joro na di Jerusalem. Didok Jesus do, “Ale Amang, pasangap ma goarmi.” Dialusi Jahowa ma, “Nungnga hupasangap i, jala pasangapokku do i muse.”—Joh. 12:28. a
Na patoluhon, ala lomo do roha ni Jahowa asa goarna na badia i dipuji saleleng ni lelengna. Pikkirhon ma: Dung sae ujian na parpudi di ujung ni Pamarettaon Saribu Taon ni Kristus, songon dia do perasaan ni akka suru-suruan dohot jolma taringot reputasi ni Jahowa di tikki i? Dang porlu be jolma mambuktihon kesetiaan ni nasida. Nungnga sempurna be nasida jala nungnga taruji. Lao jaloon ni nasida ma hangoluan na saleleng ni lelengna. Jala dang porlu be nasida mambuktihon cara ni Jahowa do na terbaik lao mamaretta. Asing ni i, sude na adong di surgo dohot di tano on nungnga marsada jala unduk tu pamarettaon ni Jahowa. Nang pe songon i, toktong dope goar ni Jahowa na paling penting di naposona?
Di tikki i, nungnga dipabadia be goar ni Jahowa jala bebas sian tuduhan. Alai goar ni Jahowa i dope na paling penting di sude naposo ni Jahowa na di surgo dohot na di tano on. Alana sai idaon ni nasida nama akka ulaon ni Jahowa na palongang roha. Coba ma bayakkon. Alani serep ni roha ni Jesus, dipasahat ibana do sude pamarettaonna tu Jahowa, asa “gabe holan Debata ma na mangarajai sasudena”. (1 Kor. 15:28) Dung i, sude akka jolma na di portibi on mandapot “hasangapon songon na dilehon tu akka anak ni Debata”. (Rom 8:21) Jala pasautton ni Jahowa ma sude lomo ni rohana lao pasadahon sude toppaan na di surgo dohot na di tano on gabe sada keluarga.—Eps. 1:10.
Dung masa i annon, songon dia do perasaan ni keluarga ni Jahowa na adong di surgo dohot di tano on? Gabe tergerak ma rohatta mamuji goar ni Jahowa. Marhite panogu-noguon ni tondi parbadia, disurat si Daud do, “Sai dipuji ma Debata Jahowa . . . Sai anggiat ma dipuji goarna na sangap i saleleng ni lelengna.” (Ps. 72:18, 19) Sai adong do alasanta lao mamuji goar ni Jahowa saleleng ni lelengna.
Goar ni Jahowa manggombarhon sude taringot Ibana. Tikki tapikkirhon taringot goar ni Jahowa, gabe taingot ma holongna. (1 Joh. 4:8) Jala gabe sai taingot do alani holong ni Jahowa do umbahen na ditoppa hita jala diparade Ibana tobusan. Asing ni i, taingot do muse sai dipatudu Jahowa do holongna tikki mamaretta. Alai dang sae holan i, boi do torus tahilala holong ni Jahowa saleleng ni lelengna. Jala on ma na mangonjar rohatta asa lam jonok tu Bapakta na di surgo i, jala marende mamuji goarna na sangap i saleleng ni lelengna.—Ps. 73:28.
