1-2. Aha do na diparsiajari sahalak sintua tikki mangalehon nasehat?

 PIGA-PIGA taon naung salpu, ro ma dua sintua mangunjungi sahalak donganta borua naung leleng dang ro marpungu. Sada sian sintua i langsung mambagihon piga-piga ayat na patuduhon boasa massai penting ro tu parpunguan. Dirippu nasida do marhasil nasida patoguhon donganta borua i. Hape tikki naeng mulak akka sintua i didok donganta borua i ma, “Lak so olo do hamu manukkun songon dia situasikku.” Boasa songon i didok donganta borua i? Ala pittor dilehon nasida do nasehat, dang jolo disukkun songon dia situasina. Ujungna dang adong dihilala donganta borua i lapatan ni nasehat ni nasida i.

² Mangingot pengalamanna i didok sintua i ma, “Mulana hurippu do na so diargai donganta borua i hami. Alai hupikkiri ma muse, gabe husadari ma holan fokus tu ayat naung hupersiappon i do au. Dang hupikkiri songon dia situasi ni donganta borua i. Harusna jolo husukkun do nian, aha na masa tu ibana, aha masalahna, jala songon dia mangurupi ibana.” Godang do parsiajaran na dapot ni sintua i sian pengalamanna i. Saonari ditanda do ibana sahalak sintua na rade mangurupi jala na olo mangattusi perasaan ni halak.

3. Ise do na boi mangalehon nasehat di huria?

 ³ Memang sintua do na martanggung jawab mangalean nasehat tu akka halak na porlu dipasingot di huria. Alai akka dongan di huria pe boi do pasingotton dongan na asing. Misalna, sahalak donganta bawa manang donganta borua boi do mangalehon nasehat na sian Bibel tu dongan  na asing. (Ps. 141:5; Poda 25:12) Dung i akka donganta borua na matua pe boi do mangalehon nasehat tu “akka borua na poso” songon na dipaboa di Titus 2:3-5. Asing ni i akka natua-tua pe porlu do mangalehon nasehat tu ianakkonna. Memang tu akka sintua do dibahen artikel on. Alai sude do hita boi mandapot manfaat songon dia carana mangalehon nasehat jala boi “parohon las ni roha” nasehat na talehon i.​—Poda 27:9.

4. Aha do na lao tabahas di artikel on?

⁴ Di artikel on tabahas ma opat sukkun-sukkun on: (1) Aha do motifta mangalehon nasehat? (2) Memang porlu do talehon nasehat i? (3) Ise do seharusna na mangalehon nasehat? (4) Songon dia carana asa marlapatan nasehatta i?

5. Aha do motif ni sintua tikki mangalehon nasehat, jala songon dia ibana mangulahon i? (1 Korint 13:4, 7)

⁵ Holong do roha ni akka sintua tu dongan sahaporseaon. Alani i dipasingot nasida do halak na hampir mangulahon na sala. (Gal. 6:1) Alai sebelum mangalehon nasehat, ikkon dipikkiri akka sintua do hata ni si Paulus taringot holong. Didok, “Halak na marholong ni roha i sabar, burju . . . Tahan manaon sude hasusaan, porsea di sasude, toktong paimahon akka na denggan di sasude, sabar jala togu do haporseaonna tikki mangadopi manang aha pe.” (Jaha 1 Korint 13:4, 7.) Molo dirimangi akka sintua ayat on, gabe boi ma nasida patuduhon holong tikki mangalehon nasehat. Molo boi dirasahon sasahalak na parduli do sintua na mangalehon nasehat i, gabe lam mura ma ibana mangulahon nasehat i.​—Rom 12:10.

6. Aha do na boi ditiru akka sintua sian si Paulus?

⁶ Sitiruon na denggan do si Paulus tu akka sintua. Misalna barani do si Paulus pasingotton halak Kristen di Tessalonik. Alai sebelum pasingotton, jolo dipuji si Paulus do nasida ala toktong do nasida setia jala dang menyerah. Diakkui si Paulus do na sabar nasida manaon hasusaan jala toktong setia nang pe dianiaya. (1 Tes. 1:3; 2 Tes. 1:4) Bahkan didok si Paulus gabe teladan do halak i tu akka dongan na asing. (1 Tes. 1:8, 9) Pasti las do roha ni halak i mambege pujian ni si Paulus! Takkas ma massai holong do roha ni si Paulus tu nasida. I do alana gabe boi dilehon si Paulus sipasingot na denggan marhite dua suratna tu halak Kristen di Tessalonik.​—1 Tes. 4:1, 3-5, 11; 2 Tes. 3:11, 12.

7. Boasa maol sasahalak manjalo nasehat?

⁷ Boha do jadina molo dang denggan caratta mangalehon nasehat? Sahalak sintua na berpengalaman mandok, “Nang pe denggan sipasingot i alai molo dang pakke holong hita pasingotton, olo do gabe maol sasahalak manjalo nasehat i.” Aha parsiajaranna tu hita? Unang ma alani jut ni rohatta tapasingot sasahalak, alai alani holong ni rohatta ma tapasingot ibana asa mura dijalo nasehatta i.

8. Aha do na porlu dipikkirhon sahalak sintua tikki naeng mangalehon nasehat?

⁸ Unang ma buru-buru akka sintua mangalehon nasehat. Denggan do jolo dipikkirhon sintua, ‘Memang porlu do hunasehati ibana? Memang sala do na diulahon ibana i? Toho do naung melanggar prinsip ni Bibel ibana manang na holan masalah pilihan pribadi do on?’ Ikkon manat  do sintua menasehati asa unang ‘asal dipandok hatana’. (Poda 29:20) Molo dang yakin sahalak sintua na porlu do sasahalak dipasingot, denggan do jolo disukkun ibana sintua na asing atik na tutu do adong prinsip ni Bibel na dilanggar.​—2 Tim. 3:16, 17.

9. Aha do na boi taparsiajari sian nasehat ni si Paulus taringot cara marpakkean dohot dandanan? (1 Timoteus 2:9, 10)

⁹ Tabayakkon ma jo situasi on. Misalna sahalak sintua naeng mangalehon nasehat taringot cara marpakkean manang dandanan ni sahalak donganta. Sebelum menasehati, denggan do jolo dipikkirhon ibana sukkun-sukkun on, ‘Memang adong do prinsip ni Bibel na patuduhon na sala cara marpakkeanna i?’ Asa unang holan menurut pandapot pribadina nasehatna i, boi do disukkun ibana sintua na asing manang halak Kristen na matang di huria. Boi do dibahas nasida hata ni si Paulus taringot cara marpakkean dohot dandanan. (Jaha 1 Timoteus 2:9, 10.) Di ayat i didok si Paulus, ikkon “pakkean na tama mardongan toruk ni roha dohot bisuk” do pakkean ni halak Kristen. Alai dang adong dibahen si Paulus daftar ni baju na boi dohot na so boi dipakke. Jadi diboto si Paulus do, sude do halak Kristen boi mambahen pilihan pribadi taringot pakkean, asal ma unang maralo tu prinsip ni Bibel. Jadi molo diida sintua pakkean ni sasahalak nungnga patuduhon toruk ni roha dohot bisuk, dang porlu be ibana dipasingot.

10. Aha do na porlu taingot asa boi taargai pilihan ni dongan na asing?

¹⁰ Taingot ma boi do marasing-asing pilihan pribadi ni dua halak Kristen na matang, jala dang sala pilihan ni nasida i. Jadi unang ma tapaksahon donganta mangihutton pilihan pribaditta.​—Rom 14:10.

11-12. Sebelum menasehati, aha do na porlu dipikkirhon sahalak sintua, jala boasa?

¹¹ Adong do muse na porlu dipikkirhon akka sintua, ‘Molo memang porlu do sasahalak dinasehati, ise do na cocok menasehati ibana?’ Misalna, sebelum mangalehon nasehat tu donganta borua naung menikah manang tu sahalak dakdanak, ikkon jolo disukkun sintua do kepala keluargana. Bisa jadi kepala keluargana i merasa undenggan do molo ibana sandiri na menasehati. * Manang boi do dohot kepala keluarga i tikki dinasehati anggota keluargana. Jala songon na dipaboa di  paragraf 3 nakkin, sipata boi do akka donganta borua naung matua dipangido lao menasehati donganta borua na poso.

¹² Adong do muse na porlu dipikkirhon akka sintua. Sebelum mangalehon nasehat,  bisa jadi adong sahalak sintua na marpikkir, ‘Memang au do na paling cocok mangalehon nasehat i manang dongan na asing?’ Misalna adong dongan na kecil hati, merasa dang mararga dirina. Molo adong do sintua na hea mengalami perasaan na sarupa, ibana ma na cocok mangalehon nasehat tu donganta i. Ala boi do dihilala ibana songon dia perasaanna, jala boi dilehon ibana hata na pas lao patoguhon donganta i. Alai sasittongna sude do sintua bertanggung jawab lao patoguhon akka dongan, jala mangalehon nasehat na sian Bibel. Jadi nang pe dang hea sahalak sintua mengalami situasi na sarupa songon donganta i, boi do ibana mangalehon nasehat molo memang porlu.

13-14. Boasa ikkon rade sintua manangihon?

¹³ Rade manangihon. Tikki mempersiappon nasehat, porlu do dipikkirhon sintua, ‘Songon dia do situasina? Aha do na masa tu ibana? Adong do masalahna na so huboto dope? Aha do na paling dihaporluhon ibana saonari?’

¹⁴ Sebelum menasehati, denggan do dipikkirhon sintua prinsip di Jakobus 1:19 na mandok, “Ganup halak ikkon hatop manangihon, manat makkatai, lambat tarrimas.” Olo do sahalak sintua merasa nga mamboto aha na masa tu sasahalak, alai toho do i? Di Poda 18:13 paingotton hita, “Manang ise na mangalehon alus andorang so dibege dope parsoalan na sasittongna, haotoon do i jala pailahon dirina sandiri.” Jadi molo naeng diboto sintua songon dia keadaan ni sasahalak, denggan do jolo disukkun ibana langsung tu halakna jala ikkon rade do ibana manangihon. Taingot ma muse pengalaman ni sintua di awal ni artikel nakkin. Ujungna disadari ibana ma, harusna sebelum manjahahon ayat ni Bibel, denggan do jolo disukkun donganta i, “Boha do keadaanmuna saonari? Aha do na masa tu hamu? Aha do na boi diurupi hami?” Molo rade akka sintua manangihon, gabe mura ma nasida patoguhon jala mangurupi akka dongan.

15. Songon dia do akka sintua mangihutton prinsip na di Poda 27:23?

¹⁵ Berupaya ma mananda sude akka dongan. Songon na dipaboa di awal ni artikel on, mangalehon nasehat dang sae holan paboahon piga-piga ayat manang paboahon aha na ikkon ulahonon ni donganta. Ikkon boi do dihilala akka donganta na botul-botul hita parduli tu nasida, lomo rohatta mangattusi situasi ni nasida, jala lomo rohatta mangurupi nasida. (Jaha Poda 27:23.) Jadi porlu do akka sintua berupaya akrab tu akka dongan sahaporseaon.

16. Songon dia do carana asa marlapatan nasehat na dilehon akka sintua?

¹⁶ Dang lomo roha ni akka sintua molo  adong dongan na marpikkir, holan naeng pasingotton do molo makkatai sintua tu sasahalak. Alai lomo do roha ni akka sintua makkata-hatai tu akka dongan, na patuduhon na parduli do nasida. Sahalak sintua na berpengalaman mandok, “Molo taulahon songon i, gabe akrab ma hita tu akka dongan. Gabe ummura ma hita mangalehon nasehat tu nasida.” Jala akka dongan pe gabe ummura ma manjalo nasehat sian akka sintua.

17. Boasa porlu sintua lambok jala sabar tikki mangalehon nasehat?

¹⁷ Sabar jala lambok. Porlu do akka sintua sabar jala lambok tikki sasahalak dang pittor mangulahon nasehat na sian Bibel. Unang ma kesal sintua molo dang pittor diulahon nasehat na dilehon i. Porlu do ditiru nasida Jesus. Bibel mandok, “Dang diponggolhon [Jesus] batang ni bulu naung maropuk. Jala dang bahenonna mittop sumbu na mellep.” (Mat. 12:20) Boi do ditangiakkon sintua halak na dinasehati i asa mangattusi boasa ibana porlu dinasehati jala songon dia carana mangulahon i. Porlu do memang tikki di sasahalak lao mamikkirhon nasehat na dilehon tu ibana. Jadi molo lambok jala sabar do sintua menasehati, gabe lam mura ma donganta i manangihon sipasingot i. Alai porlu do diingot sintua, ikkon sian Bibel do nasehatna i.

18. (a) Aha do na ikkon taingot tikki mangalehon nasehat? (b) Aha do na porlu dipikkirhon natua-tua sebelum mangalehon nasehat tu anakna? (Ida kotak dohot gambar.)

¹⁸ Marsiajar sian pengalaman. Ala dang sempurna hita, bisa jadi dang mura di hita mangulahon aha naung taparsiajari di artikel on. (Jak. 3:2) Molo tung pe sala caratta mangalehon nasehat, marsiajar ma hita padenggatton i. Molo boi dihilala akka dongan holong na tapatudu tu nasida, lam mura ma nasida manalpuhon hasalaatta, nang pe hea tabahen haccit roha ni nasida.​—Ida kotak “ Na Porlu Diingot Akka Natua-tua”.

19. Songon dia do carana asa nasehat na talehon i parohon las ni roha?

¹⁹ Memang dang mura mangalehon nasehat, alana hita dohot halak na tanasehati i dang sempurna. Alai toktong ma taingot akka saran naung tabahas di artikel on. Sebelum mangalehon nasehat ikkon tapastihon do motifta. Tapastihon ma memang porlu do sasahalak i dinasehati manang na dang. Jala tapikkirhon ma ise do na cocok mangalehon nasehat i. Asing ni i, porlu do tong tasukkun kabarna jala mangattusi situasina. Berupaya ma hita mamboto songon dia perasaanna. Lambok ma hita jala berupaya ma akrab tu ibana. Toktong ma taingot on: Tujuanta mangalehon nasehat dang holan sekedar asa marlapatan nasehat i, alai asa boi “parohon las ni roha” tu na manangihon i.​—Poda 27:9.