1-2. Boasa situasitta disarupahon songon sahalak doli-doli na poso na dipaboa di paragraf 1?

 BAYAKKON MA sahalak doli-doli na poso na tubu di keluarga na mora. Di sada tikki, dibunu ma natua-tuana. Pasti lungun hian do rohana mamboto i. Alai dapotna do muse barita na upparah sian i. Diboto ibana ma, hape massai godang do utang ni natua-tuana jala ikkon hatop ibana mambayar i. Gabe dang dapotna arta ni natua-tuana i, gariada ikkon mambayar utang do ibana. Sebenarna, dang na lao boi ibana mambayar sude utang i.

² Boi ma tadok songon doli-doli i do situasitta. Sempurna do natua-tuatta si Adam dohot si Hawa jala tinggal di Paradeiso do nasida. (1 Mus. 1:27; 2:​7-9) Sasittongna, boi do nasida mangolu saleleng ni lelengna. Alai, di pudian ni ari gabe mardosa do nasida. Akibatna diusir Jahowa ma nasida sian Paradeiso jala dang boi mangolu salelengna. Aha do na diwarisson nasida tu gellengna? Dipaboa di Bibel, “Masuk do dosa i tu portibi on marhite sada jolma jala dosa i parohon hamatean. Nungnga rarat hamatean i tu sude jolma, ala nungnga mardosa sude jolma.” (Rom 5:12) Jadi na diwarisson si Adam tu hita, i ma dosa na mambahen hita gabe mate. Dosa na diwarisson si Adam i songon utang na balga na so boi tabayar.—Ps. 49:8.

 3. Boasa dosatta disarupahon songon “utang”?

 ³ Disarupahon Jesus do dosa songon “utang”. (Mat. 6:12; Luk. 11:4) Tikki mardosa hita, songon na marutang do hita tu Jahowa. Adong arga na ikkon tabayar ala mardosa hita. Molo dang dibahen Jahowa pengaturan lao manesa dosatta, ikkon mate do hita sude jala dang adong harapan lao mangolu muse.—Rom 6:​7, 23.

 4. (a) Molo dang adong bantuan, aha do na masa tu sude jolma na mardosa? (Psalmen 49:​7-9) (b) Aha do lapatan ni hata “dosa” na dipaboa di Bibel? (Ida kotak “ Dosa”.)

⁴ Manang aha pe na tabahen, dang boi hita paulakkon hangoluan na dipamago si Adam dohot si Hawa. (Jaha Psalmen 49:​7-9.) Molo dang diurupi Jahowa hita, dang adong harapanta di ari na naeng ro manang dang boi hita dipahehe. Gabe sarupa ma hita songon binatang, na mate jala dang boi mulak mangolu muse.—Pjm. 3:19; 2 Ptr. 2:12.

 5. Songon dia do Jahowa mangurupi hita lao mambayar utang ni dosatta? (Ida gambar sampul.)

⁵ Pikkirhon ma muse cerita taringot doli-doli di mula ni artikel on. Songon dia do pakkilalaanna molo adong sahalak bawa na mora mambayar sude utangna i? Pasti las hian do roha ni doli-doli i jala pittor dijalo do bantuan i. Songon bawa na mora i do Jahowa. Dilehon Ibana do bantuan lao mambayar utang dosa na diwarisson si Adam tu hita. Didok Jesus, “Songon on do balga ni holong ni roha ni Debata tu portibi on, pola do Anakna na sasada i dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.” (Joh. 3:16) Asing ni i, ala adong bantuan on, gabe boi ma hita marale-ale muse tu Jahowa.

 6. Aha do na lao tabahas di artikel on, jala boasa?

⁶ Aha do na porlu taulahon asa boi mandapot manfaat sian bantuan na dilehon Jahowa? Lao mangalusi sukkun-sukkun i, tabahas ma piga-piga istilah na adong di Bibel jala aha do lapatanna. Molo tarimangi aha naung diulahon Jahowa lao manesa dosatta, gabe lam taargai ma Ibana.

LOMO DO ROHA NI JAHOWA ASA MARALE-ALE HITA DOHOT IBANA

 7. (a) Aha do muse na dipamago si Adam dohot si Hawa? (b)  Ala pinoppar ni si Adam dohot si Hawa hita, aha do na tahaporluhon? (Rom 5:​10, 11)

⁷ Dang holan kesempatan lao mangolu salelengna na dipamago si Adam dohot si Hawa. Alai, gabe sega do tong hubungan ni nasida tu Jahowa. Sasittongna sebelum mardosa, bagian sian keluarga ni Debata do si Adam dohot si Hawa. (Luk. 3:38) Alai ala dang dioloi nasida Jahowa, dang diloas Jahowa be nasida  gabe bagian sian keluargana. On terjadi sebelum adong dope pinoppar ni nasida. (1 Mus. 3:​23, 24; 4:1) Dang adong nanggo sada sian hita na gabe bagian sian keluarga ni Jahowa. Jadi porlu do hita diurupi asa boi hita padenggatton hubungatta tu Jahowa. (Jaha Rom 5:​10, 11.) Maksudna, ikkon diurupi do hita asa gabe ale-ale ni Jahowa, dang gabe musuna be. Jala na luar biasa, Jahowa do na parjolo bertindak lao mangurupi hita. Dibahen Ibana do dalan asa boi hita gabe ale-alena muse. Songon dia carana?

DIPARADE JAHOWA DO DALAN LAO MANESA DOSATTA

 8. Aha do na dibahen Jahowa?

⁸ Dibahen Jahowa do dalan asa boi jolma pardosa marale-ale muse dohot Ibana. Lapatanna, dibahen Jahowa do dalan lao manggatti hangoluan na dipamago si Adam tu na sarupa nilaina. Rom 3:25 mandok, ‘Dibahen Debata gabe pelean, asa boi halak mardame tu Ibana.’ Hasilna, boi ma hita sude mardame jala marale-ale muse dohot Jahowa.

 9. Aha do na dibahen Jahowa asa boi diampuni dosa ni halak Israel?

⁹ Najolo, dibahen Jahowa do dalan tu halak Israel asa boi diampuni dosa ni nasida jala boi marale-ale tu Ibana. Ikkon dibahen halak Israel do sada perayaan ganup taon. Digoari ma i Ari Pardamean. Di perayaan i, dipelehon Sintua ni Malim do akka binatang asa boi diampuni dosa ni bangso i. Alai, akka binatang na dipelehon i dang boi benar-benar manesa dosa ni halak Israel, alana dang ussangap binatang sian jolma. Nang pe songon i, molo tutu do halak Israel i bertobat jala dilehon nasida akka pelean na dipangido Jahowa, rade do Jahowa mengampuni nasida. (Heb. 10:​1-4) Asing ni i, akka pelean na dilehon halak Israel di Ari Pardamean dohot di tikki na asing, mangurupi nasida menyadari jolma pardosa do nasida, jala porlu do nasida diurupi Jahowa asa boi benar-benar disesa dosa ni nasida.

10. Aha do na dibahen Jahowa asa benar-benar disesa dosa ni sude jolma?

¹⁰ Aha do na dibahen Jahowa asa benar-benar disesa dosa ni sude jolma? Dibahen Jahowa do dalan asa dipelehon Jesus ngoluna lao manesa dosa ni godang halak, “holan sahali ro di saleleng ni lelengna”. (Heb. 9:28) Dung i, dilehon Jesus ma “ngoluna lao manobus godang jolma”. (Mat. 20:28) Aha do tobusan i?

DIBAYAR JESUS DO UTANG NI DOSATTA

11. (a) Songon na dipaboa di Bibel, boasa ikkon dibayar arga ni tobusan i? (b) Ise do na boi mambayar arga ni tobusan i?

¹¹ Songon na dipaboa di Bibel, nungnga ditottuhon Jahowa hian, asa boi benar-benar disesa dosatta, ikkon dibayar do arga ni tobusan i. Dung i, boi ma hita gabe ale-alena. Aha do tobusan na ikkon dibayar lao paluahon sude pinoppar ni si Adam? Ingot ma, nga mago be harapan lao mangolu saleleng ni lelengna dibahen si Adam dohot si Hawa. Ikkon sarupa do arga ni tobusan i tu na dipamago si Adam. (1 Tim. 2:6) Jadi, na boi mambayar tobusan i, i ma sahalak bawa naung dewasa (1) na sempurna; (2) na boi mangolu saleleng ni lelengna di tano on; dohot (3) na rade mangalehon ngoluna gabe tobusan tu hita. Jadi, hangoluan ni bawa na sempurna i ma na boi manggatti hangoluan naung dipamago si Adam.

12. Boasa boi Jesus mambayar arga na pas lao manobus sude jolma?

¹² Tabahas ma tolu alasan boasa Jesus boi mambayar arga ni tobusan i. (1) Sempurna do ibana jala dang mardosa. (1 Ptr. 2:22)  (2) Ala dang mardosa ibana, gabe boi ma ibana mangolu salelengna di tano on. (3) Rade do ibana mangalehon ngoluna lao manobus hita. (Heb. 10:​9, 10) Ala sempurna Jesus, sarupa do ibana songon si Adam sebelum mardosa. (1 Kor. 15:45) Jadi ala mate Jesus manobus hita, gabe boi ma dibayar ibana arga na pas tu hangoluan na dipamago si Adam i. (Rom 5:19) I do alana didok Bibel, Jesus do “si Adam na parpudi”. Dang porlu adong halak na sempurna na asing lao mambayar hangoluan na dipamago si Adam. Alana, nungnga mate Jesus lao manobus hita holan sahali “ro di saleleng ni lelengna”.—Heb. 7:27; 10:12.

13. Aha do na mambahen hita boi gabe ale-ale ni Jahowa?

¹³ Aha do na mambahen hita boi gabe ale-ale ni Jahowa? Dibahen Jahowa do dalan lao manesa dosatta, jala dilehon Jesus do ngoluna na sempurna lao mambayar arga na pas lao manobus dosatta.—Eps. 1:7; Heb. 9:14.

DIPALUA JAHOWA DO HITA SIAN DOSA DOHOT HAMATEAN JALA DIDOK DO HITA HALAK NA SITTONG

14. Aha do na lao tabahas?

¹⁴ Aha do manfaat na tadapot ala dilehon Jahowa tobusan tu hita? Asa boi tadapot alusna, tabahas ma lapatan ni dua istilah na dipakke di Bibel na mangurupi hita mangattusi aha do manfaat sian pengampunan na dilehon Jahowa.

15-16. (a) Di Bibel, aha do lapatan ni hata “dipalua”? (b) Boha do perasaanta ala dipalua sian dosa dohot hamatean?

¹⁵ Didok di Bibel ala nungnga dibayar Jesus arga ni tobusan i, gabe boi ma hita dipalua. Didok Apostel Petrus, “Diboto hamu do, nungnga dipalua hamu sian dalan ngolu na so marlapatan naung dijalo hamu sian akka ompumuna. Jala dang akka na olo sega songon perak manang mas na paluahon [as. “manobus”] hamu sian i. Alai mudar ni Kristus na arga i do na paluahon hamu, na songon mudar ni anak ni biru-biru na so adong cacatna jala na ias.”—1 Ptr. 1:​18, 19; surat na di toru.

¹⁶ Alani tobusan ni Jesus, gabe boi ma hita dipalua sian dosa dohot hamatean na mambahen hita marsitaonon. (Rom 5:21) Mandok mauliate do hita tu Jahowa dohot tu Jesus alana nungnga dipalua hita marhite mudar ni Jesus.—1 Kor. 15:22.

17-18. (a) Aha do maksudna didok Jahowa hita halak na sittong? (b) Aha do manfaatna tu hita?

¹⁷ Bibel mandok, dianggap Jahowa do akka naposona gabe halak na sittong. Maksudna, dang dituntut Jahowa be hita lao mambayar utang ni dosa na taulahon. Nang pe songon i, dang muba aturan ni Jahowa taringot tu hatigoranna. Didok Jahowa pe hita gabe halak na sittong, dang alani upaya sian diritta. Jala dang na berarti setuju Jahowa tu akka dosa na taulahon. Alai diampuni Jahowa pe dosatta, ala tapatudu do haporseaon tu Ibana dohot tu Jesus na mangalehon tobusan tu hita.—Rom 3:24; Gal. 2:16.

¹⁸ Attong, aha do manfaatna tu hita? Piga-piga halak na didok Jahowa gabe halak na sittong dipillit lao mamaretta rap dohot Kristus di surgo jala gabe akka anak ni Debata. (Tit. 3:7; 1 Joh. 3:1) Nungnga diampuni Jahowa be dosa ni nasida. Di adopan ni Jahowa, hira na so hea do nasida mangulahon dosa i. Alani i ma gabe memenuhi syarat ma nasida lao mamaretta di Harajaonna. (Rom 8:​1, 2, 30) Asing ni i, akka halak na lao mangolu saleleng ni lelengna di tano on, didok Jahowa do tong nasida gabe halak na sittong dohot ale-alena. Nungnga diampuni Jahowa dosa ni nasida. (Jak. 2:​21-23)  Punguan bolon na malua annon sian Armagedon, dang na lao mate nasida jala boi mangolu salelengna. (Joh. 11:26) Lao dipahehe do akka “halak na burju” dohot “halak na jahat” naung mate. (Ul. 24:15; Joh. 5:​28, 29) Ujungna, sude naposo ni Jahowa na setia di tano on “mandapot hasangapon songon na dilehon tu akka anak ni Debata”. (Rom 8:21) Pasti tarpaima do hita tikki gabe sempurna jala boi gabe anak ni Debata!

19. Ala dilehon Jahowa dohot Jesus bantuan tu hita, aha do pengaruhna tu hita? (Ida kotak “ Pengampunan ni Jahowa”.)

¹⁹ Sasittongna, sarupa do situasitta songon situasi ni doli-doli na dibahas di mula ni artikel on. Ikkon dibayar ibana do utang ni natua-tuana na balga. Hape dang sanggup ibana mangulahon i. Alai, mandok mauliate do hita tu Jahowa ala dilehon do bantuan tu hita. Dibahen Jahowa do dalan lao paluahon hita sian dosa, jala dilehon Jesus do ngoluna gabe tobusan. Molo marhaporseaon hita tu Jesus Kristus, boi ma hita dipalua sian dosa dohot hamatean. Jala tikki diampuni Jahowa dosatta, hira na dang hea hita mangulahon dosa i di adopan ni Jahowa. Na paling penting sian sasudena, gabe denggan ma muse hubungatta jala boi marale-ale dohot Bapakta, Jahowa.

20. Aha do na lao tabahas di artikel na mangihut?

²⁰ Molo tarimangi sude na diulahon Jahowa dohot Jesus tu hita, pasti mandok mauliate godang do hita tu nasida. (2 Kor. 5:15) Alana, molo dang adong bantuan sian nasida, dang adong harapan di hita. Alai, aha do manfaat sian pengampunan na dilehon Jahowa tu hita ganup marsada-sada? On ma na lao tabahas di artikel na mangihut.