SAONARI, godang do halak na sai naeng dihormati jala dipasangap. Bahkan nang pe nga dibahen songon i, didok roha ni nasida ikkon ussangap do muse bahenon tu nasida. Boasa songon i? Alana, ginjang do roha ni nasida jala dang diboto mandok mauliate. Songon i ma pangalaho ni akka halak saonari di ari parpudi on.—2 Tim. 3:2.

Sian najolo, nungnga adong akka halak na ginjang rohana. Contohna, si Adam dohot si Hawa. Didok roha ni nasida, marhak do nasida manottuhon dia na denggan dohot na sala. Akibatna, gabe sude ma jolma susa alani pambahenan ni nasida i. Asing ni i, Raja Usia. Didok rohana, marhak do ibana manutung dupa di bagas joro. Hape sasittongna dang marhak ibana mangulahon i. (2 Kron. 26:​18, 19) Asing ni i muse, halak Parise dohot halak Saduse. Didok roha ni nasida, ala pinoppar ni si Abraham nasida, ikkon denggan do cara ni Debata maradoppon nasida.—Mat. 3:9.

Saonari pe, godang do tong halak na ginjang rohana. Jala molo dang manat hita, boi do tong hita gabe songon nasida. (Gal. 5:26) Olo do ra didok rohatta, tama do hita dihormati jala dipasangap. Alai, boha ma carana asa unang songon i cara marpikkirta? Asa taboto carana, taparsiajari ma songon dia do pandangan ni Jahowa taringot on. Adong dua prinsip ni Bibel na boi mangurupi hita.

Jahowa do na marhak manottuhon aha na tama jalootta. Misalna:

• Di keluarga, ikkon sangap do dibahen istri tu suamina. Jala ikkon dihaholongi suami do istrina. (Eps. 5:33) Molo nungnga menikah sasahalak, holan tu pasanganna do boi dipatuduhon ibana minat romantis. (1 Kor. 7:3) Akka dakdanak,  ikkon dioloi nasida do natua-tuana. Jala akka natua-tua, ikkon dihaholongi jala diurupi nasida do akka gellengna.—2 Kor. 12:14; Eps. 6:2.

• Di huria, ikkon taargai do akka sintua. Alana, nungnga bekerja keras nasida lao mangurus huria. (1 Tes. 5:12) Nang pe songon i, dang marhak nasida mamaretta akka dongan di huria.—1 Ptr. 5:​2, 3.

• Ikkon talehon do pajak tu pamaretta jala tahormati nasida. Alana, nungnga dilehon Debata hak tu nasida lao mamaretta.—Rom 13:​1, 6, 7.

Massai holong do roha ni Jahowa tu hita; dilehon Ibana do akka na denggan lobi sian na tama jalootta. Ala mardosa hita, patut do hita mate. (Rom 6:23) Alai ala holong hian roha ni Jahowa tu hita, dilehon Ibana do godang pasu-pasu. (Ps. 103:​10, 11) Boi pe dapotta akka pasu-pasu i alani asi ni roha ni Debata na massai balga i do, dang ala na tama hita manjalo i.—Rom 12:​6-8; Eps. 2:8.

Manat ma asa unang tatiru pangalaho ni akka halak di portibi on. Molo dang manat hita, olo do gabe tadok di rohatta ikkon ussangap do hita sian halak na asing. Hea do dipaboa Jesus sada tudosan na patuduhon mura do cara marpikkir sisongon i adong di diritta. Di tudosanna i, adong ma piga-piga parkarejo na karejo di ladang anggur. Di mulana, setuju do nasida manjalo upa sadinar di bagasan sadari. Adong ma muse akka parkarejo na asing na dijou nappunasa ladang i asa karejo disi. Dung botari, dilehon ma gaji ni nasida. Sarupa do gaji ni akka parkarejo i, bahkan gaji ni na holan karejo sajom. Alai, gabe marungut-ungut ma akka parkarejo na karejo mulai sian manogot i. Didok nasida, ikkon unggodang do gaji ni nasida. Alana, nungnga loja nasida karejo sadari manipat, jala didadang mata ni ari. (Mat. 20:​1-16) Sian tudosan on, Jesus lao mangajarhon tu akka siseanna ikkon puas do nasida tu sude naung dilehon Debata tu nasida.

Mandok mauliate ma, jala unang taharappon bantuan lobi sian na tama jalootta. (1 Tes. 5:18) Tatiru ma Apostel Paulus. Dang dipangido ibana asa dilehon akka dongan na di Korint kebutuhanna, hape marhak do ibana mandapot i. (1 Kor. 9:​11-14) Jadi songon si Paulus, mandok mauliate  ma hita tu sude pasu-pasu naung dilehon Jahowa, jala unang ma taharappon lobi sian na tama jalootta.

Toktong ma serep rohatta. Molo adong sasahalak na holan dirina na dipikkirhon, olo do gabe didok rohana marhak do ibana mandapot manang aha pe lobi sian na tama jaloonna. Alai asa unang gabe songon i hita, ikkon serep do rohatta. Alana molo serep rohatta, boi ma tabolokkon cara marpikkir sisongon i.

Panurirang Daniel ma sitiruon na denggan taringot marserep ni roha. Wajar do nian molo didok rohana ikkon dipasangap jala dihormati ibana. Alana ganteng do ibana, malo, godang keterampilanna, jala pinoppar ni akka raja do ibana. (Dan. 1:​3, 4, 19, 20) Alai serep do roha ni si Daniel, jala i ma na mambahen holong roha ni Jahowa tu ibana.—Dan. 2:30; 10:​11, 12.

Saonari, godang do halak na ginjang rohana. Alai, sai anggiat ma dang tatiru pangalaho ni nasida i. Jadi, toktong ma mandok mauliate tu sude pasu-pasu naung dilehon Jahowa tu hita alani asi ni rohana na massai balga i.