1. Boasa boi pos rohatta lam tu dengganna nama situasi ni portibi on? 

 MOLO taida godang masalah na masa saonari, olo do ra gabe marpikkir hita dang mungkin lam tu dengganna keadaan ni portibi on. Godang do halak dang marsihaholongan be bahkan tu keluargana sandiri. Akka halak lam jahat, lam kasar, jala lam egois. Godang do halak saonari na so porsea tu akka pamimpin. Alai sabotulna keadaan ni portibi on, boi do paposson rohatta lam tu dengganna nama situasitta. Boasa boi songon i? Alana sifat ni akka jolma na jahat i patuduhon nungnga digenapi be surirang ni Bibel taringot “ari parpudi”. (2 Tim. 3:1-5) Jala i pe paposson rohatta nungnga mamaretta Jesus gabe Raja di Harajaon ni Debata. Gabe takkas ma taida nungnga saut surirang i. Alai dang holan on surirang taringot Harajaon ni Debata naung digenapi, adong dope na asing. Alani i, denggan do molo tabahas akka surirang i asa lam togu haporseaotta tu Jahowa.

2. Aha do na lao tabahas di artikel on, jala boasa ikkon taparsiajari i? (Ida gambar sampul.)

² Di artikel on lao tabahas ma: (1) surirang na mangurupi hita mamboto nandigan Harajaon ni Debata mamaretta, (2) surirang na mangurupi hita mamboto nungnga gabe Raja Jesus di surgo, jala (3) surirang na paboahon na lao dihancurhon do musu ni Debata. Taparsiajari ma annon songon dia akka surirang i saling berkaitan songon potongan-potongan gambar na membentuk sada gambar na lengkap. Dung i taida ma aha pengaruh ni akka surirang i tu hita. Penting do taboto i, alana hita mangolu di ujung ni ari parpudi.

3. Aha do na taboto sian surirang di Daniel 7:13, 14?

³ Sian surirang di Daniel 7:13, 14 taboto ma Jesus do na paling cocok gabe Raja, jala dang adong na boi manggattihon ibana gabe Raja di Harajaon ni Debata. Di surirang i dipaboa, marlas ni roha do akka halak sian ganup bangso “marhobas tu ibana”. Adong dope muse surirang na asing di bukku Daniel na patuduhon nungnga mulai mamaretta Jesus di Harajaon ni Debata tikki marujung “pitu masa”. Nandigan do Jesus mulai mamaretta?

4. Sesuai tu Daniel 4:10-17, nandigan do Kristus mulai mamaretta gabe Raja? (Ida muse surat na di toru.)

⁴ Jaha Daniel 4:10-17, surat na di toru. “Pitu masa” na dipaboa di ayat i lelengna 2.520 taon. Dimulai ma i sian taon 607 SM, tikki dihancurhon halak Babel harajaon na parpudi di Jerusalem na mewakili pamarettaon ni Jahowa. Marujung do “pitu masa” i di taon 1914, tikki dilantik Jahowa Jesus gabe Raja di Harajaon ni Debata. Alana ibana do “na marhak lao mandapot i”. *​—Hes. 21:25-27.

5. Aha do manfaatna molo taparsiajari surirang taringot “pitu masa” i?

⁵ Aha do manfaat ni surirang on tu hita? Surirang taringot “pitu masa” boi paposson rohatta pasti digenapi Jahowa do akka janjina. Dibahen Jahowa do jongjong Harajaonna sesuai tu waktu naung ditetappon Ibana. Jadi pasautonna do tong sude surirang na asing pas di tikkina. Alani i, pos ma rohatta “dang na lao tarlambat” ari ni Jahowa i.​—Hab. 2:3.

6. (a) Akka tanda aha do na patuduhon nungnga mulai mamaretta Kristus di surgo? (b) Aha do na taboto sian surirang di Pangungkapon 6:2-8?

⁶ Tikki di tano on Jesus, dipaboa ibana do akka tanda na boi mangurupi akka siseanna mamboto andigan ibana mulai mamaretta di surgo. Dipaboa Jesus do lao masa porang, haraparon, gempa bumi, dohot sahit “di godang inganan”, termasuk ma i pandemi COVID-19. Akka peristiwa i ma na gabe tanda haroro ni Kristus. (Mat. 24:3, 7; Luk. 21:7, 10, 11) Lobi sian 60 taon dung dipahehe Jesus tu surgo, dilehon ibana ma parnidaan tu Apostel Johannes na paposson roha ni akka siseanna pasti do masa akka tanda i. (Jaha Pangungkapon 6:2-8.) Masa do akka tanda i dung mamaretta Jesus gabe Raja di surgo di taon 1914.

7. Boasa dung gabe Raja Jesus lam sursar keadaan ni portibi on?

⁷ Boasa dung gabe Raja Jesus lam sursar keadaan ni portibi on? Taboto ma alusna sian Pangungkapon 6:2. Dipaboa do disi na parjolo diulahon Jesus dung gabe Raja, i ma marporang mangalo Sibolis dohot akka suru-suruan na jahat. Sian Pangungkapon bindu 12, taboto ma talu do Sibolis. Ujungna gabe disappatton ma ibana tu tano on rap dohot akka suru-suruan na jahat. Muruk hian do Sibolis jala dibahen ma susa jolma. Akibatna gabe “marjea” ma tano on.​—Pgk. 12:7-12.

8. Ala nungnga taida digenapi akka surirang taringot Harajaon ni Debata, aha do manfaatna tu hita?

⁸ Aha do manfaat ni surirang on tu hita? Akka na masa di portibi on dohot pangalaho ni akka jolma na lam jahat, paposson rohatta nungnga gabe Raja Jesus di surgo. Jadi unang pola jut rohatta molo taida  godang halak na kejam jala egois saonari, ala taboto do pangalaho ni nasida i menggenapi surirang ni Bibel. Jala i mambuktihon nungnga mamaretta Harajaon ni Debata di surgo. (Ps. 37:1) Taingot ma, lam jonok hita tu Armagedon lam tu sursarna do annon keadaan ni portibi on. (Mrk. 13:8; 2 Tim. 3:13) Mandok mauliate do hita tu Jahowa Bapakta na parholong i, ala nungnga diurupi Ibana hita mamboto boasa massai godang hasusaan di portibi on.

9. Songon dia do kuasa dunia na parpudi digombarhon di Daniel 2:28, 31-35, jala mulai nandigan do i adong?

⁹ Jaha Daniel 2:28, 31-35. Nungnga taida masa surirang on saonari. Di nipi ni si Nebukadnesar, dipaboa do aha na lao masa “di ujung ni akka ari i”, i ma dung mulai mamaretta Kristus gabe Raja di surgo. Dipaboa do muse disi taringot musu ni Jesus, i ma kuasa dunia na parpudi na digombarhon songon ‘pat ni patung na sian bosi na marcampur tano liat’. Nungnga mamaretta kuasa dunia on, jala mulai ma i masa saleleng Perang Dunia I tikki bekerja sama Inggris dohot Amerika Serikat membentuk kuasa dunia Anglo-Amerika. Sian patung na adong di nipi si Nebukadnesar i, taboto ma dua informasi na patuduhon berbeda do kuasa dunia on sian akka kuasa dunia na sebelumna. Aha ma i?

10. (a) Songon dia do surirang ni si Daniel tergenap tu kuasa dunia Anglo-Amerika? (b) Boasa ikkon manat hita tu “tano liat” i? (Ida kotak “ Unang ma Terpengaruh tu Tano Liat i!”)

¹⁰ Na parjolo, patung na di nipi ni si Nebukadnesar i paboahon molo kuasa dunia Anglo-Amerika dibahen sian bosi na marcampur  tano liat. Berbeda do i sian kuasa dunia sebelumna na dibahen sian bahan na karas jala na kuat, songon mas manang perak. Tano liat manggombarhon ‘rakyat’. (Dan. 2:43) Songon na taida saonari, balga do pengaruh ni akka rakyat di pemilihan umum. Berkampanye do nasida lao mandapot hak-hak ni nasida. Asing ni i, jotjot do nasida demonstrasi. Bergabung do muse nasida tu serikat buruh. Alani tindakan ni akka rakyat on, gabe maol ma kuasa dunia Anglo-Amerika mencapai tujuan ni nasida.

11. Aha do muse beda ni kuasa dunia Anglo-Amerika tu akka kuasa dunia sebelumna, jala aha do pengaruh ni i tu hita?

¹¹ Na paduahon, patung na di nipi ni si Nebukadnesar i paboahon Anglo-Amerika ma kuasa dunia na parpudi. Alana digombarhon do on sebagai pat ni patung i di bagian “mataniari ni patna sahat tu jari-jarina”. Jadi dang na lao adong kuasa dunia na asing na lao manaluhon Anglo-Amerika. Alana haduan lao dihancurhon Harajaon ni Debata do i di Armagedon rap dohot sude pamarettaon na di portibi on. *​—Pgk. 16:13, 14, 16; 19:19, 20.

12. Surirang ni si Daniel na dia dope na boi patoguhon rohatta?

¹² Aha do manfaat ni surirang on tu hita? Surirang ni si Daniel on mangalehon bukti, na tutu hita mangolu di ari parpudi. Lobi sian 2.500 taon naung salpu nungnga dipaboa si Daniel hian, dung kehancuran ni Babel adong muse opat nai kuasa dunia na lao mangarajai naposo ni Debata. Jala dipaboa ibana do Anglo-Amerika ma na gabe kuasa dunia na parpudi. On paposson rohatta hancurhonon ni Harajaon ni Debata ma sude pamarettaon ni jolma satokkin nai, jala lao mamaretta ma Harajaon i di saluhut portibi on.​—Dan. 2:44.

13. Sesuai tu Pangungkapon 17:9-12, ise do “raja na paualuhon” dohot “sappulu raja” i? Jala songon dia do surirang i digenapi?

¹³ Jaha Pangungkapon 17:9-12. Alani Perang Dunia I, sursar ma portibi on. Dung i masa ma akka peristiwa na asing na menggenapi surirang taringot ari parpudi. Berupaya do akka pamaretta mambahen asa dame portibi on. Di bulan Januari 1920 dibahen nasida ma organisasi Liga Bangsa-Bangsa. Ujungna digatti ma goarna i gabe Perserikatan Bangsa-Bangsa (PBB) di bulan Oktober 1945. Di Bibel digoari do organisasi on “raja na paualuhon”. Alai dang termasuk i kuasa dunia. Alana kekuasaan ni “raja na paualuhon” on bergantung tu kuasa-kuasa politik na mendukung organisasi i. Di Bibel digoari ma nasida “sappulu raja”.

14-15. (a) Songon dia do surirang di Pangungkapon 17:3-5 taringot “Babel na Balga” digenapi? (b) Aha do na masa tu akka pendukung ni agama na so sittong?

¹⁴ Jaha Pangungkapon 17:3-5. Dilehon Debata do muse parnidaan na asing tu si Johannes. Diida ibana ma sada boru-boru na so hasea, i ma “Babel na Balga” na manggombarhon sude agama na so sittong. Sian parnidaan i aha ma na taboto? Saleleng on bekerja sama do agama na so sittong dohot akka kuasa politik jala saling mendukung do nasida. Alai satokkin nai sogo ma roha ni kuasa politik tu agama na so sittong. Bahenon ni Debata ma akka kuasa politik i “mangulahon lomo ni rohana”. Pakkeon ni Debata ma nasida, i ma “sappulu raja” i, lao manghancurhon sude agama na so sittong di liat portibi on.​—Pgk. 17:1, 2, 16, 17.

 ¹⁵ Sian dia taboto nungnga jonok be kehancuran ni Babel na Balga i? Songon na taboto, dikalilingi sunge Euprat na balga do kota Babel najolo. Saonari pe, Babel na Balga dikalilingi “aek” na manggombarhon akka pendukungna. (Pgk. 17:15) Alai na lao “mahiang” do aek i. Lapatanna, moru ma pendukung ni agama na so sittong. (Pgk. 16:12) Nungnga tergenap surirang i saonari. Godang do halak na so porsea be tu agama. Jala tikki adong pe masalah ni nasida, dang tu akka pamimpin agama be nasida mangido bantuan.

16. Aha do manfaatna dung taboto surirang taringot PBB dohot kehancuran ni Babel na Balga?

¹⁶ Aha do manfaat ni surirang on tu hita? Pos ma rohatta nungnga mangolu di ari parpudi hita. Alana nungnga taida adong PBB jala nungnga moru be pendukung ni agama na so sittong. Alai nang pe saonari lam godang halak na so mendukung Babel na Balga, dang i na mambahen agama na so sittong hancur. Songon naung dipaboa nakkin, Jahowa do na mangonjar roha ni “sappulu raja” i (kuasa politik na mendukung PBB), lao “mangulahon lomo  ni rohana”. Pakkeon ni Debata ma annon kuasa politik i manghancurhon Babel na Balga. Gabe tarsonggot ma akka halak mangida i. * (Pgk. 18:8-10) Balga do pengaruh ni i tu sude jolma na adong di portibi on. Gabe lam susa do annon parngoluon ni jolma. Alai hita naposo ni Jahowa, dang tarsonggot. Gariada marlas ni roha do hita. Boasa? Adong dua alasanna. Na parjolo ala nungnga hancur agama na so sittong, musu ni Jahowa. Na paduahon, on paposson rohatta satokkin nai dipalua nama hita sian portibi na jahat on!​—Luk. 21:28.

17-18. (a) Songon dia do carana patoguhon haporseaotta tu Jahowa? (b) Aha do na lao tabahas di artikel na mangihut?

¹⁷ Si Daniel paboahon adong do tikkina “massai godang ma parbinotoan na sittong” di tano on. Jala saonari ma i masa. (Dan. 12:4, 9, 10) Ala nungnga taida masa surirang i, pasti gabe lam taargai ma Bibel jala gabe tapasangap ma Jahowa. (Jes. 46:10; 55:11) Alani i, toktong ma berupaya hita patoguhon haporseaotta tu Jahowa. Ringgas ma hita marsiajar Bibel jala taurupi ma halak asa boi gabe ale-ale ni Jahowa. Pos ma rohatta, sai jagaon ni Jahowa do akka halak na porsea tu Ibana. Jala ‘toktong do lehononna hadameon’ tu nasida.​—Jes. 26:3.

¹⁸ Di artikel na mangihut, lao tabahas ma akka surirang na paboahon aha na lao masa tu huria Kristen saleleng ari parpudi. Taida ma songon dia akka surirang i saling berkaitan jala mambuktihon na tutu do hita mangolu di ari parpudi. Taida ma muse songon dia Jesus Rajatta i manguluhon akka siseanna saonari.