1. Boasa ikkon tabahen persiapan sebelum bencana?

 MOLO tabahen persiapan, boi do hita selamat. Biasana akka halak na mambahen persiapan, boi do selamat tikki masa bencana jala boi do muse mangurupi na asing. Sada organisasi kemanusiaan di Eropa mandok, “Molo tabahen persiapan, boi do i paluahon hita.”

2. Boasa ikkon tabahen persiapan sebelum ro hasusaan bolon? (Mateus 24:44)

² Satokkin nai lao masa nama “hasusaan bolon”. (Mat. 24:21) Alai i dang songon godang bencana na asing, nungnga taboto memang ikkon masa do i. Hira-hira 2.000 taon naung salpu, dipaingot Jesus do akka siseanna asa mangarade tu ari i. (Jaha Mateus 24:44.) Molo rade hita, gabe ummura ma hita martahan mangalewati hasusaan bolon i, jala boi mangurupi na asing mangulahon na sarupa.​—Luk. 21:36.

3. Songon dia do sifat sabar jala togu, asi ni roha, dohot holong mambahen hita rade tu hasusaan bolon?

³ Porlu do adong di hita tolu sifat na penting asa boi hita rade tu hasusaan bolon. Boha do molo dipangido hita paboahon barita panguhuman tu akka halak jala adong paraloan sian nasida? (Pgk. 16:21) Di situasi sisongon i, ikkon toktong do hita sabar jala togu. Taoloi ma Jahowa jala porsea ma hita tu Ibana na linggomanna do hita. Boha do molo taboto adong akka donganta na agoan arta? (Hab. 3:17, 18) Porlu do di hita asi ni roha asa tergerak hita mangurupi nasida. Tikki marsada akka bangso menyerang hita, songon dia do reaksitta molo dipangido hita asa rap tinggal saleleng piga-piga tikki dohot dongan sahaporseaon? (Hes. 38:10-12) Porlu do togu holongta tu akka dongan asa boi hita mangalewati situasi na maol on.

4. Songon dia do Bibel manjujui hita asa toktong sabar jala togu, patuduhon asi ni roha, dohot holong?

⁴ Di Bibel dijujui do hita asa toktong sabar jala togu,  patuduhon asi ni roha, dohot patuduhon holong. Misalna Lukas 21:19 mandok, “Molo toktong hamu setia jala martahan, mangolu ma hamu.” 1 Petrus 3:8 mandok, ‘Marasi ni roha ma hamu sude.’ 1 Tessalonik 4:9, 10 mandok, “Nungnga diajari Debata hamu asa marsihaholongan. . . . Alai hujujui hami ma hamu akka dongan, asa lam marsitutu hamu mangulahon i.” Sasittongna disurat do akka ayat i tu akka sisean ni Jesus naung toktong sabar jala togu, patuduhon asi ni roha, dohot patuduhon holong. Alai ikkon torus do nasida marsiajar patuduhon akka sifat i. Hita pe songon i do. Alani i, di artikel on tabahas ma songon dia halak Kristen di abad na parjolo patuduhon akka sifat i. Dung i, tabahas ma songon dia hita boi maniru nasida jala mambuktihon na rade hita mangadopi hasusaan bolon.

5. Boasa boi halak Kristen di abad na parjolo toktong sabar jala togu nang pe mangadopi tantangan?

⁵ Porlu do sabar jala togu halak Kristen di abad na parjolo. (Heb. 10:36) Sarupa do tantangan na diadopi nasida dohot halak na asing di tikki i. Alai, diadopi nasida do muse tantangan na asing ala gabe halak Kristen. Godang do sian nasida na dianiaya pamimpin agama Jahudi, pamarettaon ni Rom, bahkan dianiaya keluarga ni nasida sandiri. (Mat. 10:21) Olo do muse ro tantangan sian bagasan huria. Ikkon berupaya do halak Kristen asa unang dipengaruhi ajaran ni halak na murtad na berupaya mambahen huria dang marsada. (Ul. 20:29, 30) Alai toktong do nasida martahan. (Pgk. 2:3) Boasa boi songon i? Ala dirimangi nasida do teladan ni akka halak na toktong sabar jala togu na disurat di Bibel, songon si Job. (Jak. 5:10, 11) Martangiang do nasida mangido gogo sian Jahowa. (Ul. 4:29-31) Jala fokus do nasida tu upa na lao lehonon ni Jahowa tu nasida molo toktong martahan.​—Ul. 5:41.

6. Aha do na boi taparsiajari sian donganta si Merita?

⁶ Hita pe boi do sabar jala togu molo taratur hita mamparsiajari dohot mangarimangi teladan ni akka halak na disurat di Bibel dohot sian publikasitta. On ma na diulahon si Merita sahalak donganta borua di Albania. Boi do ibana sabar jala togu nang pe adong penganiayaan sian keluargana. Didok ibana, “Hona do tu rohakku tikki mamparsiajari teladan ni si Job. Massai susa do ngoluna, jala dang diboto ibana ise na mambahen ibana susa. Alai didok si Job do, ‘Sappe mate au, toktong do au setia tu Debata!’ (Job 27:5) Huboto ma dang sadia dope sitaonon na huadopi on martimbakkon na masa tu si Job. Dang songon ibana, huboto do ise na mambahen susa au.”

7. Nang pe dang balga dope masalah na taadopi saonari, aha do na porlu taulahon?

⁷ Asing ni i, boi do hita toktong sabar jala togu molo jotjot hita martangiang tu Jahowa jala tapaboa sude holso ni rohatta tu Ibana. (Plp. 4:6; 1 Tes. 5:17) Mungkin saonari dang balga dope masalah na diadopi hamu. Alai nang pe songon i tikki lungun rohamuna, bingung, manang tikki dang diboto hamu aha na lao ulahononmuna torus do hamu mangalului petunjuk ni Jahowa? Molo torus hamu mangido tu Debata asa diurupi toktong sabar jala togu mangadopi masalahmuna ganup ari, gabe dang ragu be hamu martangiang tu Jahowa tikki ro masalah na umbalga di ari na naeng ro. Jala di tikki i, gabe pos ma rohamuna na diboto Jahowa do cara dohot tikki na terbaik lao mangurupi hamu.​—Ps. 27:1, 3.

8. Sian pengalaman ni si Mira, molo sabar jala togu hita saonari songon dia do i boi mangurupi hita di ari na naeng ro? (Jakobus 1:2-4) (Ida gambar.)

⁸ Boi do hita martahan tikki masa hasusaan bolon haduan, molo toktong hita sabar jala togu tikki mangadopi hasusaatta saonari. (Rom 5:3) Godang do donganta mandok tikki marhasil nasida mangadopi sada situasi na  maol, gabe lam mura ma nasida martahan tikki ro muse sitaonon na asing. Boasa? Tikki marhasil nasida martahan alani bantuan ni Jahowa, gabe pos ma roha ni nasida na lomo do roha ni Jahowa mangurupi nasida. (Jaha Jakobus 1:2-4.) On ma na dihilala si Mira, sahalak perintis di Albania. Diakkui si Mira do sipata hea do ibana merasa holan ibana ma na paling godang masalahna di portibi on. Alai belakangan diingot ibana ma muse songon dia Jahowa mangurupi ibana saleleng 20 taon na parpudi on. Gabe didok ibana ma tu dirina, ‘Toktong ma ho setia tu Jahowa. Molo menyerah ho saonari, gabe sia-sia ma sude bantuan ni Jahowa tu ho saleleng on.’ Hamu pe boi do songon i. Rimangi ma songon dia Jahowa nungnga mangurupi hamu asa toktong sabar jala togu. Pos ma rohamuna diida Jahowa do upayamuna asa toktong martahan, jala pasti lehononna do upa tu hamu. (Mat. 5:10-12) Hasilna, tikki ro annon hasusaan bolon i, gabe lam bertekad ma hamu asa toktong martahan.

9. Songon dia do halak Kristen na di Antiokia Siria patuduhon asi ni roha?

⁹ Parrohahon ma tikki masa haraparon na parah tu halak Kristen na di Judea. Dung dibege akka dongan na di huria Antiokia Siria taringot bencana i, gabe asi ma roha ni nasida tu akka dongan na di Judea. Alani i, diputusson nasida ma lao mangurupi akka dongan i. Gabe “sapandapot ma akka sisean papunguhon silehon-lehon sesuai tu na tarbahen ni nasida be lao mangurupi akka dongan na di Judea”. (Ul. 11:27-30) Nang pe dao inganan ni akka dongan na hona bencana i, alai berupaya do halak Kristen na di Antiokia mangurupi nasida.​—1 Joh. 3:17, 18.

10. Songon dia do carana hita patuduhon asi ni roha tu akka dongan na hona bencana? (Ida gambar.)

¹⁰ Saonari pe boi do tapatudu asi ni roha molo taboto adong akka dongan na susa alani bencana alam. Pasti lomo do rohatta mangurupi nasida. Ra olo do tasukkun tu sintua, di proyek penanggulangan bencana na dia ma hita boi mangurupi. Asing ni i, talehon do muse sumbangan tu ulaonta di liat portibi on manang tatangiakkon do akka donganta na gabe korban bencana. b (Poda 17:17) Misalna di taon 2020, adong lobi sian 950 Panitia Penanggulangan Bencana na dibahen di liat portibi on. Panitia on mangurupi akka dongan na makkaporluhon bantuan saleleng pandemi COVID-19. Mandok mauliate do hita tu akka donganta bawa dohot borua na bekerja keras di panitia on. Ala asi roha ni nasida tu akka dongan sahaporseaon, rade do nasida mangalehon bantuan materi jala patoguhon akka dongan asa toktong manomba Jahowa. Asing ni i, di piga-piga situasi dohot do nasida paturehon manang mambangun muse jabu dohot inganan parpunguan.​—Bandingkon tu 2 Korint 8:1-4.

11. Boasa gabe dipasangap Jahowa molo tapatudu asi ni roha?

¹¹ Olo do diparrohahon halak na asing pengorbanan na tabahen dohot asi ni roha na tapatudu dukkon masa bencana. Misalna, di taon 2019, masa ma Badai Dorian di Kepulauan Bahama jala sega ma sada Bale Harajaon. Tikki dipature akka donganta Bale i, dipangido nasida ma sahalak kontraktor na so Saksi paradehon sude akka na porlu tu ulaon i. Didok kontraktor i ma, “Hulean pe gratis pakkeonmuna . . . akka peralatan dohot bahan-bahan. Jala hulean pe parkarejo lao mangurupi hamu . . . Holan tu organisasimuna do hubahen songon on, alana terkesan do au mangida songon dia hamu mangurupi dongan sahaporseaonmuna.” Godangan akka halak di  portibi on dang mananda Jahowa. Alai diida nasida do songon dia Saksi Jahowa mangurupi dongan sahaporseaon ni nasida. Massai las do rohatta mamboto gabe tertarik do akka halak mananda Jahowa, Debata parasi ni roha ala tapatudu asi ni roha tu na asing.​—Eps. 2:4.

12. Molo tapatudu asi ni roha saonari, boasa i boi mambahen hita rade mangadopi hasusaan bolon? (Pangungkapon 13:16, 17)

¹² Boasa ikkon tapatudu asi ni roha saleleng hasusaan bolon? Alana nungnga dipaboa di Bibel molo akka halak na so olo mendukung pamarettaon di portibi on, lao mangadopi hasusaan saonari dohot saleleng hasusaan bolon. (Jaha Pangungkapon 13:16, 17.) Alani i porlu do akka donganta diurupi mandapot sude na dihaporluhon nasida. Tikki ro annon Rajatta Jesus Kristus manguhumi akka halak, anggiat ma hita dianggap ibana halak na marasi ni roha jala na tama masuk tu Harajaonna.​—Mat. 25:34-40.

13. Sesuai tu Rom 15:7, songon dia do halak Kristen di abad na parjolo patuduhon holong tu dongan sahaporseaon?

¹³ Ditanda do halak Kristen di abad na parjolo ala marsihaholongan nasida. Alai mura do nasida mangulahon i? Parrohahon ma songon dia situasi di huria Rom. Piga-piga sian nasida halak Jahudi do, i ma halak na sian gelleng diajari taringot Patik ni si Musa. Alai na deba ro sian bangso na asing, jala marragam do latar belakang ni nasida. Adong do halak Kristen na gabe hatoban, jala na asing halak na merdeka, bahkan adong do ra hatoban ni nasida. Aha do na mangurupi nasida asa toktong marsihaholongan? Dijujui Apostel Paulus do nasida asa ‘burju manjalo donganna na asing’. (Jaha Rom 15:7.) Aha do lapatanna? Hata “manjalo” di ayat on lapatanna burju manjakkon sasahalak, mamboan ibana tu jabu manang patandahon ibana tu akka dongan na asing. Misalna, didok si Paulus do tu si Pilemon asa denggan manjalo hatobanna si Onesimus na hea lari sian si Pilemon. (Plm. 17) Asing ni i, dijakkon si Priskilla dohot si Akuila do si Apollos na so pola godang mamboto ajaran ni halak Kristen, jala ‘ditogihon nasida do ibana makkata-hatai’. (Ul. 18:26) Dang diloas halak Kristen perbedaan ni nasida mambahen nasida gabe dang marsada. Gariada, dijakkon nasida do akka dongan na asing.

14. Songon dia do si Anna dohot suamina patuduhon holong?

¹⁴ Hita pe boi do patuduhon holong tu akka donganta molo olo hita gabe dongan ni nasida, jala mangalehon tikki rap dohot nasida. Molo tabahen songon i, biasana gabe tergerak ma tong nasida lao patuduhon holongna tu hita. (2 Kor. 6:11-13) Parrohahon ma pengalaman ni si Anna dohot suamina. Ditugasson do nasida gabe misionaris tu sada negeri di Afrika Barat. Dang leleng dung pinda nasida tusi, masa ma pandemi COVID-19. Jadi dang hea dope nasida pajuppang dohot akka dongan di huria ni nasida na baru. Alai songon dia do nasida patuduhon holongna? Dipakke nasida do video-conference asa boi makkata-hatai dohot akka dongan disi, jala paboahon na massai lomo do roha ni nasida mananda akka dongan i. Godang do keluarga na mandok mauliate tu holong na dipatudu nasida. Hasilna, jotjot do akka dongan i manelepon manang mangirim pesan tu nasida. Boasa berupaya misionaris i asa boi mananda akka dongan di huria ni nasida na baru? Si Anna mandok, “Dang tarhalupahon au holong na dipatudu akka dongan tu au dohot tu keluargakku di tikki susa nang sonang. Alani i gabe tergerak ma au patuduhon holong tu akka dongan.”

15. Aha do na boi taparsiajari sian donganta si Vanessa? (Ida gambar.)

¹⁵ Di huriatta, olo do marragam latar belakang dohot kepribadian ni akka donganta. Boi do lam balga holongta tu nasida molo berfokus hita tu akka sifat ni nasida na denggan.  Donganta na margoar si Vanessa na melayani di Selandia Baru hea do merasa maol kompak tu piga-piga halak di huriana ala berbeda kepribadianna. Alai diputusson ibana ma asa unang menghindari nasida, gariada mangalehon tikki rap bergaul dohot nasida. Ala songon i dibahen ibana, boi ma diida donganta on aha do na mambahen nasida dihaholongi Jahowa. Didok ibana, “Dukkon gabe pengawas wilayah suamikku, jotjot do hami pajuppang dohot akka dongan na berbeda kepribadianna. Jala gabe lam mura ma au kompak dohot nasida. Saonari, lomo do rohakku mardongan tu akka halak na berbeda latar belakangna. Pasti Jahowa pe songon i do, alana diloas Ibana do akka halak sian marragam latar belakang ro manomba Ibana.” Molo marsiajar hita mangida na asing songon cara ni Jahowa mangida nasida, on patuduhon na holong do rohatta tu nasida.​—2 Kor. 8:24.

16. Boasa ikkon tahaholongi akka dongan sahaporseaon? (Ida gambar.)

¹⁶ Massai penting do patuduhon holong tu akka donganta saleleng hasusaan bolon. Songon dia do Jahowa melindungi hita tikki dimulai hasusaan bolon i? Parrohahon ma aha na didok Jahowa tu naposona tikki diserang Kota Babel najolo. Didok Ibana, “Ale bangsokku, masuk ma hamu tu akka kamarmuna, jala tutup hamu ma pintu na di pudimuna. Martabuni ma hamu satokkin, sahat tu na salpu rimas i.” (Jes. 26:20) Marlakku do tong hata on tu hita saleleng hasusaan bolon haduan. Hata ‘kamar’ di ayat i olo do lapatanna huriatta. Marjanji do Jahowa jagaonna do hita saleleng hasusaan bolon molo torus marsada dohot akka donganta. Alani i, sian saonari ikkon marsitutu do hita asa botul-botul makkaholongi akka dongan sahaporseaon. Alana on ma sada na manottuhon selamat do hita manang na dang.

17. Aha do manfaatna molo tabahen persiapan mulai sian saonari sebelum masa hasusaan bolon?

¹⁷ Parohon hasusaan tu sude jolma do “ari ni Jahowa, ari na balga i”. (Sep. 1:14, 15) Naposo ni Jahowa pe pasti susa do. Alai molo nungnga tabahen persiapan sian saonari, boi ma hita toktong tenang jala boi mangurupi na asing. Boi do hita sabar jala togu mangadopi tantangan manang aha pe. Tapatudu do asi ni roha tikki marsitaonon akka dongan sahaporseaon, jala tabahen do na terbaik paradehon na porlu tu nasida. Asing ni i molo tahaholongi akka donganta, boi ma hita tetap marsada dohot nasida di ari na naeng ro. Pos ma rohatta lehonon ni Jahowa do upa tu hita, i ma hangoluan na salelengna di tano na imbaru, jala dang masa be disi akka bencana dohot hasusaan.​—Jes. 65:17.