1. Aha do na gabe tanda di sude ulaon ni Debata sian mulai panompaon?

MARSADA ni roha do Jahowa dohot Jesus sian mula ni panompaon. Parjolo do Jesus ditompa sian angka na asing. Dung i, rap karejo ma Jahowa dohot Jesus jala Jesus ”uju i di lambungna pande”. (Poda 8:30) Naposo ni Jahowa pe, marsada do di sude ulaonnasida. Umpamana, si Noak dohot keluargana rap paulihon parau. Halak Israel rap paulihon tabernakel jala rap mamboan tabernakel i pinda sian sada inganan tu inganan na asing. Di bagas joro, angka parende dohot parmusik rap mangendehon pujian tu Jahowa. Sude on boi diulahon naposo ni Debata ala marsada do nasida mangulahon i.—1 Mus. 6:14-16, 22; 4 Mus. 4:4-32; 1 Kron. 25:1-8.

2. (a) Aha do na boi tatiru sian halak Kristen di abad na parjolo? (b) Sungkunsungkun aha do na laho taparsiajari?

² Halak Kristen di abad na parjolo pe tongtong do nasida  marsada. Songon na nidok ni apostel Paulus, marsada do nasida nang pe marasingasing ulaon ni nasida. Sude nasida mangihuthon Jesus Kristus, Pemimpin ni nasida. Dipatudos apostel Paulus do nasida tu ruas ni pamatangta na marasingasing, alai sude marsada. (Jaha 1 Korint 12:4-6, 12.) Songon dia do hita saonari? Songon dia do hita boi marsada di ulaon marbarita na uli, di huria dohot di keluarga?

3. Aha do parnidaon na ro tu si Johannes?

³ Di abad na parjolo, apostel Johannes mandapot parnidaon taringot pitu surusuruan na mamalu sarune. Tingki surusuruan na palimahon mamalu sarune, diida si Johannes ma ”bintang sada madabu sian langit tu tano”. Dilehon ma kunci tu bintang i laho mambungka pintu ni banua toru. Ruar ma timus sian i jala marharuaran ma angka sihapor sian timus i. Didok do tu sihapor i asa unang disegai angka hau manang angka suansuanan. Alai, diharati nasida do angka jolma ”na so marsahap [materai] di pardompahanna”. (Pgk. 9:1-4) Diboto si Johannes do angka sihapor boi manegai songon na hea masa di Mesir. (2 Mus. 10:12-15) Angka sihapor na diida ni apostel Johannes on, manggombarhon halak Kristen na miniahan na paboahon barita panguhuman tu agama palsu. Jala, marjuta halak na mangkirim mangolu di tano on rap dohot nasida. Ulaon marbarita on, mangurupi godang halak manadingkon agama palsu jala malua sian huaso ni Sibolis.

4. Aha do ulaon ni naposo ni Jahowa saonari jala songon dia do nasida boi denggan mangulahon i?

⁴ Nunga disuru hita pasahathon ”barita na uli” tu sude halak di liat portibi on andorang so ro dope ujungna. Sada ulaon na balga do on! (Mat. 24:14; 28:19, 20) Ingkon tatogihon do sude ”na mauas” minum sian ”aek hangoluan”, lapatanna ingkon taajarhon do hasintongan sian Bibel tu sude na olo manjangkon. (Pgk. 22:17) Alai, sude i boi taulahon molo marsada hita jala masiurupan dohot dongan di huria.—Eps. 4:16.

5, 6. Songon dia do parsadaanta tarida di ulaon marbarita?

⁵ Asa boi pajumpang dohot godang halak, ingkon diuluhon do ulaonta marbarita. Tudutudu sian huria mangurupi hita boi mangulahon on. Dung sae parpunguan laho marbarita, tapasahat ma barita na uli taringot Harajaon ni Debata. Talehon ma buku jala nunga marjuta godang ni buku naung disarhon di liat portibi on. Sipata, di tingki naung ditontuhon, adong do kampanye laho marbarita. Tingki dohot hita tu ulaon on, marsada do hita dohot marjuta halak di liat portibi on rap pasahathon barita na sarupa! Hita pe, rap dohot surusuruan na mangurupi naposo ni Debata pasahathon barita na uli.—Pgk. 14:6.

⁶ Las do rohanta manjaha Buku Tahunan taringot ulaon marbarita na uli di liat portibi on! Asing ni i, marsada do hita di liat portibi on manggokkon halak asa ro tu kebaktian. Di kebaktian, rap hita manangihon jamita, drama dohot pertunjukan na patoguhon  rohanta mangulahon na dumenggan tu Jahowa. Marsada do hita muse tingki ro tu ari Parningotan hamamate ni Jesus 14 Nisan ganup taon. (1 Kor. 11:23-26) Rap marpungu hita di ari na sarupa dung bot mata ni ari, mandok mauliate tu Jahowa jala mangoloi parenta ni Jesus. Di minggu andorang so ari Parningotan, rap do hita manggokkon halak asa ro tu ulaon na ringkot on.

7. Aha do na boi taulahon molo marsada hita?

⁷ Ndang godang na sega bahenon ni sada sihapor. Ndang tolap molo holan sahalakta marbarita na uli tu sude halak. Alai, ala rap do hita mangulahon ulaon on, boi ma hita mangurupi godang halak mananda Jahowa, mamuji jala pasangaphon Ibana.

8, 9. (a) Aha do tudosan dibahen si Paulus tu halak Kristen na manggombarhon ringkot ni parsadaan? (b) Songon dia do hita boi marsada di huria?

⁸ Dipatorang apostel Paulus tu halak Epesus songon dia mangaradoti huria. Didok ibana, sude na di huria i porlu mambahen hamajuon di partondion jala lam gok di saluhutna. (Jaha Epesus 4:15, 16.) Dibahen si Paulus do pamatangta gabe tudosan na boi mangurupi halak Kristen asa marsada di huria jala mangihuthon Jesus, i ma ulu ni huria. Didok ibana, denggan do taratur sude angka ruas ni daging i jala dipadomu na sada tu na sada marhite angka urat i. Sude hita, na poso manang na matua, aha do na ingkon taulahon?

⁹ Jesus mamillit angka sintua mangaradoti huria. Lomo do roha ni Jesus asa tapasangap jala taihuthon tudutudu ni sintua. (Heb. 13:7, 17) Olo do sipata ndang mura mangulahon i. Alai, boi do hita diurupi Jahowa. Tondi parbadiaNa mangurupi hita mangihuthon tudutudu na nilehon ni angka sintua. Godang do na boi taulahon di huria molo serep rohanta jala marsada dohot angka sintua. Molo taulahon i, marsada ma huria jala lam togu ma holongta tu dongan sahaporseaon.

10. Songon dia do angka parhobas mangurupi huria marsada? (Ida gombar di mula ni parsiajaran.)

¹⁰ Parhobas di huria pe, mangurupi huria asa tongtong marsada. Diurupi nasida do angka sintua, alani i tadok ma mauliate tu sude na diulahon ni nasida. Umpamana, ingkon paradeon nasida do godang publikasi na dipangke marbarita na uli, manjangkon sude na ro tu parpunguan jala paiashon manang padengganhon Bale Harajaon. Molo taurupi angka donganta baoa on, patuduhon na marsada do hita manomba Jahowa jala mangihuthon tudutuduNa.—Bandingkon tu Ul. 6:3-6.

11. Songon dia do angka na poso mangurupi huria marsada?

¹¹ Adong do angka sintua naung martaontaon mangaradoti huria. Olo do ala naung matua, ndang godang be na boi diulahon nasida di huria. Alai, boi ma urupan ni angka na poso sintua di huria molo nunga diajarajari hian nasida. Lam godang na diulahon ni parhobas di huria, boi ma nasida gabe sintua. (1 Tim. 3:1, 10) Pigapiga angka sintua na poso na mambahen hamajuon nunga gabe sintua kaliling jala mangurupi angka donganta  di pigapiga huria. Alani i, las do rohanta molo rade angka na poso marhobas mangurupi dongan sahaporseaon.—Jaha Psalmen 110:3; Parjamita 12:1.

12, 13. Aha do na boi mangurupi keluarga boi marsada?

¹² Songon dia do bahenonta asa boi marsada sude anggota keluarganta? Panombaon na sasaripe boi mangurupi hita. Molo natuatua rap marsiajar taringot Jahowa dohot ianakhonna, boi do lam togu holong ni nasida. Saleleng panombaon na sasaripe, boi do nasida marlatik taringot aha na laho dipasahat tingki marbarita na uli na mambahen nasida lam denggan marbarita. Lam jotjot nasida manaringoti hasintongan, lam togu ma holong ni nasida tu Jahowa jala lam solhot ma nasida di keluarga i.

¹³ Songon dia do tungganedoli dohot tungganeboru boi marsada? (Mat. 19:6) Molo rap nasida mangkaholongi Jahowa huhut manomba Ibana, martua jala marsada ma parsaripeonna. Nasida pe ingkon rap patuduhon pangargaion, songon si Abraham dohot si Sarah, si Isak dohot si Rebekka, si Elkana dohot si Hana. (1 Mus. 26:8; 1 Sam. 1:5, 8; 1 Ptr. 3:5, 6) Molo diulahon na mardongan saripe songon on, marsada jala togu ma paralealeon ni nasida tu Jahowa.—Jaha Parjamita 4:12.

14. Molo na mardongan saripe ndang sahaporseaon, aha do na boi ulahononmu asa tongtong togu parsaripeonmu?

¹⁴ Tangkas do dipaboa di Bibel, ndang boi hita marhasohotan tu halak na so manomba Jahowa. (2 Kor. 6:14) Alai, adong do na mamillit marhasohotan tu halak na so manomba Jahowa. Manolsoli ma nasida ala ndang olo dongan saripena i gabe Sitindangi. Na asing marhasohotan tu na mangoloi Jahowa, alai dongan saripena maninggalhon huria. Molo masa songon on, ingkon marsitutu do halak Kristen asa togu pardongansaripeonna marhite mangihuthon poda ni Bibel. Ndang sai mura i. Umpamana, si David tungganedoli ni si Mary, ndang olo be ro marpungu. Alai, tongtong do marsitutu si Mary mangulahon ulaonna di jabu jala patuduhon parange na denggan. Diajari do onom anakna taringot Jahowa jala sai ro tu parpunguan dohot kebaktian. Dung magodang ianakhonna, ndang rap be si Mary dohot nasida, alai tongtong do si Mary manomba Jahowa nang pe maol dihilala. Sada tingki, olo ma muse si David manjaha majalah jala ro tu parpunguan. Jotjot do diparade pahompuna na marumur onom taon hundulan di parpunguan. Molo ndang ro si David, didok pahompuna i ma, ”Ndang huida ompung di parpunguan.” Dung 25 taon, mulak ma si David tu Jahowa, las ma roha ni si Mary jala rap ma muse nasida manomba Jahowa.

15. Songon dia do naung leleng marhasohotan mangurupi na baru marhasohotan?

¹⁵ Dilului Sibolis do dalan mambahen susa keluarga. I do alana asa sai marsada na mardongan saripe. Pingkirhon ma, aha na boi mambahen togu pardongansaripeonmu. Molo hamu nunga leleng mardongan saripe, sitiruon ma hamu tu na baru  marhasohotan. Togihon ma na baru marhasohotan tu panombaon na sasaripe na binahenmu. Marhite i, boi botoonna ingkon tongtong do nasida marsada jala patuduhon pangargaion nang pe naung leleng marhasohotan.—Tit. 2:3-7.

16, 17. Aha do na dihirim ni naposo ni Debata na marsada?

¹⁶ Tingki halak Israel laho tu perayaan di Jerusalem, rap laho do nasida dohot dongan na asing. Diparade nasida do sude na porlu. Dung i, rap borhat ma nasida jala masiurupan di pardalanan. Di bagas joro, rap nasida sude mamuji jala manomba Jahowa. (Luk. 2:41-44) Saonari, ala hita mangarade mangolu di tano na imbaru, ingkon marsada jala masiurupan do hita dohot dongan na asing. Boi do pingkirhononmu mangulahon on?

¹⁷ Godang halak di portibi on ndang sahata jala jotjot marbadai. Alai, mandok mauliate do hita tu Jahowa ala mananda hasintongan jala mangkilala hadameon! Laho manomba Debata, sude naposo ni Jahowa di liat portibi on manomba Ibana songon na dihalomohonNa. Tarlumobi di ari parpudi on, ingkon tamba togu do parsadaan ni nasida. Songon na disurirangkon si Jesaya dohot si Mika, rap ma hita nangkok ”tu dolok ni Jahowa”. (Jes. 2:2-4; jaha Mika 4:2-4.) Marlas ni roha ma di ari na naeng ro ala sude jolma di tano on marsada ni roha jala rap masiurupan manomba Jahowa!