1-2. Songon dia do asa dijalo Debata ibadatta?

 AHA do na dipikkirhon hamu molo dibege hamu hata “ibadat”? Olo do ra na dibayakkon hamu sahalak bawa na martangiang tikki borngin sebelum modom. Manang olo do ra dibayakkon hamu sada keluarga na rap marsiajar Bibel.

² Akka na diulahon nasida i termasuk do ibadat tu Jahowa. Dijalo Jahowa do ibadat ni nasida i? Pasti dijalo Jahowa do i molo sesuai tu lomo ni rohana, molo dipatudu nasida holong tu Ibana, jala dipasangap nasida Ibana. Jadi songon i ma nian hita. Holong do rohatta tu Jahowa. Taboto do holan Ibana na ikkon disomba. Alani i, lomo do rohatta mangalean na terbaik tu Ibana.

3. Aha do na lao tabahas di artikel on?

³ Di artikel on, naeng tabahas ma ibadat na songon dia do na dijalo Debata di tikki najolo. Tabahas ma muse ualu cara manomba Debata saonari. Tikki tabahas i, tapikkiri ma aha na porlu taulahon asa lam denggan caratta beribadat tu Jahowa. Jala tabahas ma boasa ibadat na sittong i mambahen hita marlas ni roha.

4. Sebelum ro Jesus tu tano on, songon dia do akka halak patuduhon holongna tu Jahowa?

⁴ Najolo sebelum ro Jesus tu tano on, adong do akka  bawa na setia songon si Abel, si Noak, si Abraham, dohot si Job na patuduhon holongna tu Jahowa. Boha do cara ni nasida patuduhon i? Dioloi nasida do Jahowa, marhaporseaon tu Ibana, jala dibahen nasida do pengorbanan. Memang dang dipaboa di Bibel songon dia dibahen halak i manomba Jahowa. Alai taboto do, dipasangap nasida do Jahowa jala diterima Jahowa do ibadat ni nasida. Dukkon jaman ni si Musa, dilehon Jahowa ma tu halak Israel patik. Dipaboa do disi songon dia cara na sittong manomba Ibana.

5. Dung mate Jesus jala dipahehe, porlu dope taihutton Patik ni si Musa?

⁵ Dung mate Jesus jala dipahehe, dang pola ikkon mangihutton Patik ni si Musa be akka halak na naeng manomba Jahowa. (Rom 10:4) Alana nungnga adong be patik na imbaru na ikkon diihutton halak Kristen, i ma “patik ni Kristus”. (Gal. 6:2) Cara ni nasida mangihutton “patik ni Kristus”, i ma maniru teladanna jala mangihutton ajaranna, dang manghapal daftar peraturan na boi dohot na so boi diulahon songon patik ni si Musa. Ikkon berupaya do hita mangihutton Kristus asa marlas ni roha hita jala tabahen las roha ni Jahowa.—Mat. 11:29.

6. Aha do parsiajaran na boi tadapot sian artikel on?

⁶ Tabahas ma ualu cara manomba Debata. Setiap mambahas akka cara i tasukkun ma diritta, ‘Aha do naung hubahen asa lam denggan au mangulahon cara on?’ Olo do ra hita merasa nga denggan be caratta manomba Jahowa saleleng on. Alai olo do ra, adong dope na ikkon tapadenggan. Alani i, porlu do tapangido tu Jahowa asa diurupi hita mamareso diritta, asa boi tabahen na undenggan lao manomba Ibana.

7. Songon dia do perasaan ni Jahowa mambege tangiang na tapasahat sian ias ni roha?

⁷ Martangiang ma hita. Di Bibel, dipatudos do tangiang i songon dupa. Najolo dipelehon do dupa di tabernakel manang di bagas joro. (Ps. 141:2) Lomo do roha ni Jahowa manganggo uap ni dupa i. Dos songon i ma, lomo do roha ni Jahowa mambege tangiang na sian ias ni roha nang pe sederhana hata na tapakke tikki na martangiang i. (Poda 15:8; 5 Mus. 33:10) Tikki martangiang hita jala tapaboa na holong rohatta tu Jahowa, jala taargai sude na dilehon tu hita, pasti las do roha ni Jahowa mambege i. Las do muse rohana molo tapaboa tu Ibana aha na takhawatirhon dohot na taharappon. Jadi sebelum martangiang, ikkon jolo tapikkirhon do aha na naeng tadokkon. Molo tabahen songon i, sarupa ma i songon na mangalean dupa na terbaik tu Jahowa.

8. Songon dia do carana mamuji Debata?

⁸ Tapuji ma Jahowa. (Ps. 34:1) Tapuji do Jahowa molo tapaboa akka sifat dohot akka ulaonna. Molo tarimangi akka na denggan naung dilehon Jahowa tu hita, gabe tergerak ma hita mamuji Ibana sian nasa rohatta. Sada cara lao mamuji Debata, i ma marbarita na uli. Di Bibel, didok do ulaon marbarita na uli “pelean” tu Debata. (Heb. 13:15) Songon tangiang na ikkon dipersiappon, hita pe sebelum lao marbarita na uli, ikkon jolo persiapan do. Pasti lomo do rohatta mangalean pelean na undenggan tu Debata. Jala molo persiapan hita, gabe lam semangat ma hita marbarita na uli.

9. Songon halak Israel najolo, manfaat aha do na tadapot molo ro tu parpunguan? Paboa hamu ma pengalamanmuna.

 ⁹ Ro ma tu parpunguan. Najolo didok Jahowa do tu halak Israel, “Tolu hali di bagasan sataon ikkon ro do akka bawa tu jolo ni Jahowa Debatamuna di inganan na pinillitna i.” (5 Mus. 16:16) Lao mandalatton paretta ni Jahowa i, ikkon ditinggalhon nasida do jabu dohot ladangna. Nang pe songon i marjanji do Jahowa tu nasida, “Molo ro hamu . . . tu jolo ni Jahowa, dang adong halak na lao mangarampas luatmuna i.” (2 Mus. 34:24) Jadi ikkon marhaporseaon do halak Israel tu Jahowa asa boi nasida mangihutton paretta ni Jahowa lao ro tu perayaan i. Alai molo olo nasida mangoloi Debata, dapotan godang pasu-pasu ma nasida, gabe lam takkas ma diattusi nasida patik ni Debata, dirasahon nasida ma holong ni Jahowa, jala boi ma nasida masipatoguan dohot halak Israel na asing. (5 Mus. 16:15) Saonari pe, boi do tadapot godang pasu-pasu molo berupaya hita torus ro marpungu. Jala pasti las do roha ni Jahowa molo tapersiappon komentar na denggan.

10. Boasa tadok marende bagian na massai penting tikki beribadat tu Jahowa?

¹⁰ Marende ma mamuji Jahowa. (Ps. 28:7) Di jaman ni halak Israel, bagian na massai penting do marende tikki beribadat tu Jahowa. Alani i do dipillit Raja Daud 288 halak Lepi gabe parende di bagas joro. (1 Kron. 25:1, 6-8) Saonari pe, boi do hita patuduhon holongta tu Jahowa tikki marende hita mamuji Ibana. Jala taingot ma dang na ikkon bagak suaratta asa boi hita marende mamuji Jahowa, ala dang i na uppetting. Coba ma jo tapikkirhon on, ‘jotjot do hita sala makkatai’, alai dang gabe sai sip hita di parpunguan manang gabe dang olo marbarita na uli. (Jak. 3:2) Sarupa ma, molo tung pe dang bagak suaratta, unang ma gabe dang marende hita mamuji Jahowa.

11. Sesuai tu Psalmen 48:13, boasa porlu dibahen natua-tua jadwal ibadat keluarga?

¹¹ Belajar pribadi ma jala ajarhon ma i tu anakkonmuna. Tikki ari Sabat, ikkon so do halak Israel sian karejona asa boi unggodang waktu ni nasida patoguhon hubunganna tu Jahowa. (2 Mus. 31:16, 17) Disi do muse unggodang tikki ni nasida mangajarhon taringot Jahowa dohot akka sifatna tu gellengna. Saonari pe porlu do taparade tikkitta asa boi hita taratur manjaha jala mamparsiajari Bibel. Hasilna boi ma hita lam jonok tu Jahowa. Jala termasuk do i bagian sian ibadatta tu Jahowa. (Ps. 73:28) Porlu do tong dibahen akka natua-tua ibadat keluarga, asa boi diurupi nasida gellengna lam akrab tu Jahowa.—Jaha Psalmen 48:13.

12. Di Bibel didok do ulaon pajongjokkon tabernakel ibadat tu Jahowa, aha ma na boi taparsiajari sian i?

¹² Dohot ma mambangun jala mangarawat Bale Harajaon. Didok di Bibel, ibadat tu Jahowa do ulaon mambangun tabernakel dohot mambahen akka peralatanna. (2 Mus. 36:1, 4) Jadi ulaonta saonari lao mambagun jala mangarawat Bale Harajaon dohot akka fasilitas teokratis, termasuk do i bagian sian ibadatta tu Jahowa. Godang do akka donganta na gabe relawan tusi. Taargai ma sude pengorbanan ni nasida. Semangat do nasida muse marbarita na uli jala adong do sian nasida na naeng gabe perintis. Alani i, molo diida akka sintua memenuhi syarat do nasida gabe perintis, berupaya ma akka sintua manjujui nasida asa dohot tu dinas  perintis. Memang dang sude hita saonari boi gabe relawan pembangunan, alai sude do hita boi mangarawat akka fasilitas teokratis.

13. Boasa porlu talehon sumbangan?

¹³ Talean ma sumbangan. Mangalean sumbangan bagian sian ibadat tu Jahowa do i. Najolo dang boi ro halak Israel tu jolo ni Jahowa molo so adong diboan manang aha. (5 Mus. 16:16) Dipangido Jahowa do nasida mangalean sumbangan sesuai tu kesanggupanna be. Sumbangan i bukti na diargai nasida do sude na dilehon Jahowa tu nasida. Saonari pe boi do tong hita patuduhon na taargai sude na dilehon Jahowa tu hita. Rade ma hita mangalean sumbangan lao mendukung ulaon ni organisasi sesuai tu kesanggupanta be. Songon na didok si Paulus, “Lomo do roha ni Debata tu halak na mangalehon sian ias ni rohana. Lomo do roha ni Debata tu halak na mangalehon sian na tolapna, dang sian na so tolapna.” (2 Kor. 8:4, 12) Jadi pasti diargai Jahowa do sude sumbangan na talehon sian ias ni rohatta, dang soal sadia godangna.—Mrk. 12:42-44; 2 Kor. 9:7.

14. Sesuai tu Poda 19:17, boasa ikkon taurupi akka dongan na butuh bantuan?

¹⁴ Taurupi ma akka dongan na butuh bantuan. Marjanji do Jahowa tu halak Israel, molo burju nasida tu na pogos pasu-pasuon ni Jahowa do nasida. (5 Mus. 15:7, 10) Jadi hita pe, taurupi ma akka dongan na porlu dibantu. Molo di Jahowa, bantuanta i dos do songon pelean tu Ibana. (Jaha Poda 19:17.) Contohna, najolo dilehon halak Kristen di Pilippi do bantuan tu si Paulus tikki di penjara ibana, jala didok si Paulus do bantuan nasida i “pelean na angur, na mambahen las roha ni Debata”. (Plp. 4:18) Alani i, taparrohahon ma akka dongan na porlu diurupi. Las do roha ni Jahowa molo talehon gogo, tenaga, tikki, dohot hepengta lao mangurupi akka dongan. Alana, bagian sian ibadat tu Jahowa do i.​—Jak. 1:27.

15. Nang pe ikkon godang tikki dohot upaya na tabahen lao melayani Jahowa, alai boasa dang gabe beban i di hita?

¹⁵ Godang do tikki dohot upaya na tabahen lao melayani Jahowa. (1 Joh. 5:3) Alai las do rohatta mangulahon i, dang gabe beban i di hita. Alana holong do rohatta tu Jahowa. Coba ma jo tabayakkon sahalak dakdanak na berupaya mambahen gambar na bagak lao mangalean hadiah tu bapakna. Ikkon dilehon ibana do tikkina lao mambahen gambar i. Alai las do rohana, ala holong rohana tu bapakna i. Jadi songon dakdanak i, molo holong rohatta tu Jahowa, pasti las do rohatta mangalehon godang tikki dohot gogotta lao melayani Ibana.

16. Sesuai tu Heber 6:10, songon dia do Jahowa mangida upayatta lao palasson rohana?

¹⁶ Dang diharappon natua-tua na parholong, ikkon sarupa hadiah na dilehon akka gellengna. Alana marasing-asing do kesanggupan ni akka gellengna i. Songon i do Jahowa, diboto Ibana do kesanggupanta be. Adong do sian hita na boi mangalehon unggodang tu Jahowa sian na boi dilehon dongan na asing. Alai olo do ra terbatas na boi talean, mungkin alani umur, kesehatan, manang alani tanggung jawab keluarga. Nang pe songon i, unang ma kecil hati hita. (Gal. 6:4) Alana diargai Jahowa do sude upayatta i. Apalagi ma molo talehon na undenggan jala sian ias  ni rohatta. (Jaha Heber 6:10.) Taingot ma diboto Jahowa do sude na di rohatta. Lomo do rohana marlas ni roha hita melayani Ibana jala mambahen pengorbanan na sesuai tu kemampuanta.

17. (a) Songon dia do carana mangatasi molo adong na maol taulahon sian ualu cara i? (b) Aha do na boi taparsiajari sian kotak “ Asa Tamba Las ni Rohamuna”?

¹⁷ Songon dia do molo adong na maol taulahon sian ualu cara nakkin misalna belajar pribadi manang marbarita na uli? Sabotulna molo nga lam jotjot taulahon i, gabe lam mura ma hita mangulahon i. Boi do tabandingkon i songon na marlatik mamakke alat musik. Molo jarang do hita marlatik, pasti dang godang kemajuan na tabahen. Alai boha do molo rutin hita mangulahon i setiap ari? Awalna sasatokkin do hita latihan, lam leleng tatambai ma waktuna. Molo taida adong hasil ni upayatta i, lam tanikmati ma i. Jadi songon i ma tong tabahen molo tahilala adong sian ualu cara nakkin na maol taulahon.

18. Aha do na uppetting di ngolutta jala aha do hasilna molo taulahon i?

¹⁸ Berupaya do hita mambahen na undenggan melayani Jahowa, ala i do na uppetting di ngolutta. Hasilna, marlas ni roha ma hita, adong ma tujuan hidupta, jala boi ma hita manomba Jahowa saleleng ni lelengna. (Poda 10:22) Asing ni i, dame ma rohatta ala taboto sai diurupi Jahowa do hita tikki susa. (Jes. 41:9, 10) Alani i toktong ma hita marlas ni roha manomba Jahowa. Ai Ibana do na ‘tama manjalo hasangapon dohot hamuliaon’ sian akka toppaanna.​—Pgk. 4:11.