1. Songon dia do Jesus marbarita na uli saleleng di tano on, jala songon dia do akka siseanna maniru ibana? (Ida gambar sampul.)

SALELENG di tano on Jesus toktong do semangat ibana marbarita na uli. Jala lomo do rohana asa songon i tong akka siseanna. (Joh. 4:35, 36) Alani i saleleng rap Jesus dohot akka siseanna semangat do nasida marbarita na uli. (Luk. 10:1, 5-11, 17) Alai dung ditakkup jala dipamate Jesus, hea do dang semangat be akka siseanna i marbarita na uli. (Joh. 16:32) Dung hehe Jesus, dipaingot Jesus ma nasida asa toktong fokus marbarita na uli. Alani i dung nakkok Jesus tu surgo semangat ma nasida marbarita na uli. Sappe didok akka musuna ma songon on, “Ida ma, nungnga rarat ajaranmuna i tu sude huta na di Jerusalem.”​—Ul. 5:28.

2. Aha do buktina na dipasu-pasu Jahowa do ulaon marbarita na uli?

² Jesus do na langsung mangatur ulaon marbarita na uli di abad na parjolo jala dipasu-pasu Jahowa do i. Misalna, di ari Pentakosta taon 33 M, adong do hira-hira 3.000 halak na tardidi. (Ul. 2:41) Mulai sian i torus do tamba godang ni akka sisean. (Ul. 6:7) Jala nungnga dipaboa Jesus hian, lam godang do halak manjalo barita na uli na tapasahat di tikki ari parpudi.​—Joh. 14:12; Ul. 1:8.

3-4. Boasa maol di piga-piga daerah marbarita na uli jala aha do na lao tabahas di artikel on?

³ Sude do hita berupaya asa toktong semangat marbarita na uli. Adong do piga-piga donganta na mura mangulahon i, ala nasida tinggal di inganan na godang halak berminat marsiajar Bibel. Gariada tenaga nama na hurang. Alai adong do akka donganta na so mura mangulahon i, ala di daerah nasida jarang do halak di jabu. Molo adong pe halak di jabu dang pola berminat halak i.

 ⁴ Molo tinggal hamu di daerah sisongon i, boi do artikel on mangurupi hamu. Dung i tabahas ma pengalaman ni akka donganta na berupaya manjuppangi akka halak tikki marbarita na uli. Jala tabahas ma songon dia hita asa toktong marlas ni roha nang pe adong akka halak na so berminat tu barita na tapasahat.

5. Situasi na songon dia do na mambahen akka donganta maol manjuppangi akka halak?

⁵ Godang do akka donganta mandok maol do manjuppangi akka halak di jabu ni nasida. Alana godang do na tinggal di apartemen manang di perumahan na ketat pengamananna. Adong do satpam na manjaga disi na so paloasson halak na asing masuk, molo so adong undangan sian halak na tinggal di apartemen manang perumahan i. Na asing bebas do marbarita na uli sian jabu tu jabu, alai holan saotik do juppang ni nasida halak. Molo akka donganta na asing muse, ikkon dao do marbarita na uli tu huta-huta hape holan saotik do halak na tinggal disi. Adong do muse akka donganta na tinggal di daerah na dao-dao jarak ni jabu disi hape dang sae adong halak di jabu. Molo songon i do situasi di daerahta unang ma menyerah hita. Saonari tabahas ma aha na porlu taulahon asa boi hita toktong semangat marbarita na uli.

6. Aha do na boi tatiru sian panjala dekke?

⁶ Dipatudos Jesus do ulaon marbarita na uli songon na manjala dekke. (Mrk. 1:17) Molo dang pittor dapot ni panjala i dekke, dang pittor menyerah nasida. Gariada disesuaihon nasida ma tikki, inganan, dohot cara ni nasida manjala dekke. Boi do tatiru akka panjala dekke on tikki marbarita na uli. Saonari taparrohahon ma songon dia carana.

7. Aha do hasilna molo tasesuaihon jadwalta marbarita na uli?

⁷ Tasesuaihon ma jadwalta. Asa boi juppangta akka halak di jabu ni nasida ikkon tapikkirhon do tikki sadihari nasida di jabuna. Ai manang na boha pe pasti mulak do nasida tu jabuna be. Godang do donganta mandok unjotjot do juppang ni nasida halak di jabu, molo marbarita na uli nasida tikki botari manang tikki borngin. Biasana tikki i nungnga santai be akka halak jala olo ditogihon makkatai. Saonari tabereng ma pengalaman ni donganta sahalak sintua na margoar si David. Hea do ibana marbarita na uli tu sada daerah alai dang adong juppangna halak disi. Jadi mulak ma muse ibana dohot patnerna tusi dung botari. Didok ibana ma, “Dung mulak hami muse, heran do au ternyata godang hian do halak di jabu.” *

8. Aha do na boi taparsiajari sian Parjamita 11:6?

⁸ Songon ayat tema ni artikel on, unang ma hita menyerah tikki marbarita na uli. (Jaha Parjamita 11:6.) Si David naung dipaboa nakkin dang olo ibana menyerah. Hea do ibana marbarita na uli tu sada jabu alai dang hea juppangna halak disi. Ala torus ibana marbarita na uli, ujungna juppang ma ibana dohot parjabu i. Ternyata berminat do parjabu i marsiajar Bibel. Didok parjabu i ma, “Nungnga ualu taon au tinggal dison, alai dang hea dope juppangku nanggo sada Saksi Jahowa.” Didok si David ma, “Molo nga juppang hita dohot parjabu i olo do halak i manangihon barita na tapasahat.”

9. Aha do na diulahon piga-piga donganta asa boi lam godang halak juppang ni nasida?

 ⁹ Tasesuaihon ma inganan marbarita. Ala maol manjuppangi akka halak di jabu ni nasida, adong do akka penyiar na menyesuaihon inganan ni nasida marbarita na uli. Misalna marbarita na uli ma nasida di dalan jala mamakke rak beroda. Gabe boi ma nasida marbarita na uli tu akka halak na tinggal di apartemen na so boi dijuppangi langsung tu jabuna be. Jala akka donganta na asing pe mandok, unggodang do halak na olo manangihon barita na tapasahat manang manjalo publikasitta molo marbarita na uli hita tu nasida di taman, di pasar, manang di daerah bisnis. Donganta si Floiran pengawas wilayah di Bolivia mandok, “Biasana antara jam 1 siang sappe jam 3 botari do hami marbarita na uli di pasar dohot di daerah bisnis, alana dang pola sibuk be akka halak di tikki i. Gabe boi ma hami makkata-hatai dohot nasida jala adong do na olo marsiajar Bibel.”

10. Aha do na porlu tasesuaihon asa boi hita marbarita na uli tu sude halak?

¹⁰ Tasesuaihon ma cara marbarita na uli. Bayangkon ma nungnga berupaya hamu menyesuaihon jadwalmuna asa boi juppangmuna sasahalak, alai dang marna juppang hamu. Attong adong dope cara na asing asa boi marbarita tu ibana? Parrohahon ma pengalaman ni si Katarína. Didok ibana, “Hubahen do surat tu akka halak na so juppangku di jabuna. Hubahen ma di suratti na lao dokkonokku hian molo juppangku ibana.” Aha do na taparsiajari sian donganta on? Tasesuaihon ma  caratta asa boi hita marbarita na uli tu sude halak.

11. Boasa dang olo akka halak manangihon barita na tapasahat?

¹¹ Adong do piga-piga alasanna boasa dang olo akka halak manangihon barita na tapasahat. Adong do halak na merasa dang porlu diboto ibana taringot Debata manang taringot Bibel. Dang porsea halak i tu Debata ala pagodanghu hasusaan di portibi on. Jala dang porsea halak i tu Bibel ala diida nasida munafik do akka pamimpin agama na mangakku mangihutton isi ni Bibel. Adong do muse halak na manolak barita na tapasahat ala pasibukhu karejo, mangurus keluarga manang urusan na asing. Hape dang diboto halak i boi do Bibel mangurupi nasida mangulahon i sude. Attong songon dia do carana asa boi hita marbarita na uli tu halak na so berminat tu barita na tapasahat?

12. Songon na didok di Pilippi 2:4, aha do na porlu taulahon tikki marbarita na uli?

¹² Tapatudu ma na parduli hita tu nasida. Godang do halak na gabe olo manangihon barita na tapasahat, ala diida nasida parduli hita tu halak i. (Jaha Pilippi 2:4.) Donganta si David naung dipaboa nakkin mandok, “Molo adong halak na mandok dang berminat ibana tu barita na tapasahat, unang ma pittor tabukka ayat ni Bibel manang talean publikasi. Lebih baik ma tadok, ‘Boi do huboto alani aha dang berminat hamu?’” Boi do dirasahon akka halak, na parduli hita tu nasida. Jadi nang pe dang diingot halak i aha na tadok, alai biasana diingot do songon dia sikapta tu nasida. Bahkan nang pe dang olo parjabu i mambege barita na tapasahat, tetap ma hita ramah, asa boi dihilala halak i na parduli hita tu nasida.

13. Songon dia do carana asa lam berminat halak tu barita na tapasahat?

¹³ Molo parduli hita tu halak na tajuppangi, pasti olo do hita menyesuaihon barita na tapasahat tu kebutuhan ni nasida. Misalna tapikkirhon ma, adong do taida dakdanak di jabu i? Molo adong, bisa jadi berminat do halak i mamboto cara mandidik anakkon manang cara mambahen bahagia keluarga. Adong do diida hamu CCTV di jabu i? Molo adong, olo do ra mabiar parjabu i tu parjahat. Alani i, pasti las do roha ni halak i molo tapaboa dang adong be haduan parjahat di tano on. Manang na songon dia pe situasi ni halak na tajuppangi, berupaya ma hita paposson roha ni nasida boi do Bibel mangurupi halak i. Si Katarína, naung dipaboa nakkin  mandok, “Sai huingot do songon dia Bibel mambahen lam denggan ngolukku.” Hasilna, gabe pos ma roha ni si Katarína pasahatton barita na uli jala boi do i diida akka halak.

14. Sesuai tu Poda 27:17, aha do manfaatna molo adong patnerta tikki marbarita?

¹⁴ Tajalo ma saran sian dongan na asing. Di abad na parjolo dipatudu si Paulus do tu si Timoteus songon dia cara marbarita dohot mangajari. Jala dipangido ibana do asa diajarhon si Timoteus i tu na asing. (1 Kor. 4:17) Songon si Timoteus, pasti lomo do rohatta marsiajar sian akka dongan na marpengalaman. (Jaha Poda 27:17.) Saonari taida ma pengalaman ni donganta si Shawn. Hea do ibana marbarita di daerah na holan saotik pendudukna, jala bangga hian do halak disi tu agama ni nasida. Alai boi do ibana toktong marlas ni roha tikki marbarita na uli. Didok ibana, “Sai huupayahon do marpatner tikki marbarita. Jadi di pardalanan, boi ma hami makkata-hatai jala masiurupan asa lam denggan marbarita. Misalna dung sae sian sada jabu, hubahas hami boha do nakkin caranami marbarita na uli tu parjabu i. Molo adong na hurang pas, hubahas hami ma cara na undenggan molo adong muse situasi na songon i.”

15. Boasa porlu martangiang hita tikki marbarita na uli?

¹⁵ Martangiang ma tu Jahowa. Tiap lao marbarita na uli, tapangido ma asa diurupi Jahowa hita. Porlu do hita diurupi tondi parbadia asa boi taulahon i. (Ps. 127:1; Luk. 11:13) Alai tikki martangiang hita, ikkon jelas do tapaboa tu Jahowa aha pangidoatta. Misalna, tapangido ma asa dipatudu tu hita dia halak na berminat. Dung i berupaya ma hita marbarita na uli tu sude halak asa sesuai tu tangiangta i.

16. Asa lam denggan hita marbarita na uli, boasa ikkon belajar pribadi hita?

¹⁶ Belajar pribadi ma hita. Bibel mandok, ikkon ‘takkas do taboto lomo ni roha ni Debata’. (Rom 12:2) Molo takkas taboto hasittongan taringot tu Debata, gabe lam pos ma rohatta paboahon i tikki marbarita na uli. Si Katarína, naung dipaboa di paragraf sebelumna mandok, “Ikkon lam bagas do huparsiajari piga-piga ajaran ni Bibel asa lam togu haporseaonku. Jadi tikki marsiajar au, hulului ma bukti na patuduhon adong do Panoppa, tutu do Bibel i Hata ni Debata, jala tutu do adong organisasi ni Debata saonari di tano on.” Ala belajar pribadi si Katarína, gabe lam togu ma haporseaonna jala lam semangat ma ibana marbarita na uli.

17. Boasa toktong semangat Jesus marbarita na uli?

¹⁷ Toktong do Jesus semangat marbarita na uli nang pe adong halak na so olo manangihon ibana. Boasa? Ala diboto Jesus do na porlu botoon ni akka halak hasittongan. Jala lomo do rohana asa godang halak na manjalo barita na uli taringot tu Harajaon. Diboto Jesus do muse, adong do halak na so berminat hian, gabe olo manangihon. Jala i do na masa tu keluargana. Saleleng tolu satonga taon Jesus marbarita na uli, dang adong nanggo sada pe adek ni Jesus na gabe siseanna. (Joh. 7:5) Alai dung hehe ibana, gabe halak Kristen do nasida.​—Ul. 1:14.

18. Boasa ikkon torus hita marbarita na uli?

¹⁸ Dang boi tapastihon ise na olo gabe Saksi Jahowa. Adong do piga-piga halak na so pittor olo marsiajar Bibel. Jala adong do muse halak na memang dang  olo manangihon barita na tapasahat. Alai molo toktong hita burju tu nasida jala toktong hita semangat, gabe ‘dipuji nasida ma Debata’.​—1 Ptr. 2:12.

19. Aha do na taparsiajari sian 1 Korint 3:6, 7?

¹⁹ Nang pe hita na marbarita na uli jala na mangajari akka halak, alai Jahowa do na mambahen i marhasil. (Jaha 1 Korint 3:6, 7.) Si Getahun, donganta na di Etiopia mandok, “Saleleng 20 taon lobi, holan au do Saksi Jahowa di hutakku. Alai saonari nungnga adong be hami 14 penyiar, 13 ma naung tardidi termasuk ma i istrikku dohot tolu gellengku. Saonari adong do hira-hira 32 halak hadirin parpunguannami.” Las hian do roha ni si Getahun ala torus ibana marbarita na uli, jala sabar paimahon Jahowa manarik akka halak gabe Saksina.​—Joh. 6:44.

20. Boasa disarupahon hita songon tim penyelamat?

²⁰ Massai arga do di Jahowa hangoluan ni jolma. Alani i ma dilean Ibana tu hita tugas rap saulaon dohot Anakna, lao menyelamatton sude halak sebelum ro panutup ni jaman on. (Hag. 2:7) Dipatudos do ulaonta marbarita songon ulaon ni tim penyelamat. Sarupa do hita songon anggota tim penyelamat na martugas menyelamatton halak na terjebak di pertambangan. Nang pe holan saotik do anggota tim penyelamat i na marhasil menyelamatton halak na terjebak i, alai sudena i boi marhasil alani kerja sama ni tim i do. Songon i ma tong hita, memang dang taboto sadia godang halak na selamat sian portibi ni Sibolis on, alai boi do dipakke Jahowa hita sude mangurupi nasida. Si Andreas, na tinggal di Bolivia mandok, “Dang alani kerja keras ni sahalak penyiar boi tardidi sahalak parsiajar Bibel, alai ala kerja sama do hita sude.” Jadi toktong ma hita semangat marbarita na uli. Molo torus hita semangat, pasu-pasuon ni Jahowa ma hita, jala torus ma hita marlas ni roha.