Tubu di taon 1948 do au di sada huta na gelleng di sabola barat daya ni Nigeria. Di taon i, tardidi ma udakku si Moustapha dohot abangku siakkangan si Wahabi. Tikki marumur sia taon au, mate ma bapakku. Massai lungun do rohakku. Didok si Wahabi ma tu au, boi do annon bapa mulak mangolu muse. Tarapul ma rohakku jala gabe tergerak ma au marsiajar Bibel. Tardidi ma au di taon 1963. Dang leleng dukkon i, tardidi ma muse dua abangku dohot sada adekku.

Di taon 1965 rap ma au dohot abangku si Wilson di Lagos jala hunikmati do pergaulan dohot akka perintis biasa di huria Igbobi. Ala semangat jala sai marlas ni roha nasida huida, taronjar ma rohakku gabe perintis. Ujungna di bulan Januari 1968, gabe perintis ma au.

Adong ma sahalak donganta na melayani di Betel na margoar si Albert Olugbebi. Diatur ibana ma sada pertemuan khusus tu hami akka na poso. Dipaboa ibana ma taringot na dihaporluhon perintis istimewa di bagian utara ni Nigeria. Huingot dope na didok donganta si Olugbebi. Didok ibana, “Poso dope hamu. Boi do dipakke hamu tikkimuna dohot gogomuna tu Jahowa. Godang dope ulaon na boi diulahon hamu!” Ala lomo rohakku  maniru Panurirang Jesaya, gabe huisi ma formulir tu perintis istimewa.—Jes. 6:8.

Di bulan Mei 1968, ditugasson ma au gabe perintis istimewa di kota Kano, di sabola utara ni Nigeria. Tikki ditugasson au, masa ma porang Biafran (1967-1970). Alani porang i godang do jolma na susa jala mate. Mangararat ma muse porang i sahat tu timur ni Nigeria. Adong ma sahalak donganta na paposson rohakku asa unang lao au tu sabola utara ni Nigeria i. Alana dang lomo rohana gabe celaka au disi. Alai hudok ma tu ibana, “Mauliate ma ala dipikkirhon ho do au. Alai molo Jahowa do na mangido au di penugasan on, dang ragu au pasti dongananna do au.”

Massai ngeri do mangida akka na masa tikki porang di Kano. Alani porang i gabe hancur do kota i. Tikki marbarita sipata diida hami do bakke na tarbunu alani porang. Adong do piga-piga huria di Kano. Alai didok akka donganta, melarikan diri do godangan nasida. Holan hira-hira 15 penyiar ma na tinggal. Mabiar do nasida jala marmetmet ni roha. Las hian do roha ni nasida tikki diboto nasida adong onom perintis istimewa na ro tusi. Gabe dipatogu jala semangat ma nasida. Diurupi hami ma nasida asa ro marpungu, marbarita na uli, jala mambahen laporan jam dinas dohot publikasi na ditempatton tu kantor cabang.

Mulai ma hami akka perintis istimewa marsiajar bahasa Hausa. Tikki dibege halak na disi barita Harajaon di bahasa ni nasida, gabe godang ma halak na manangihon hami. Alai dang lomo roha ni anggota ni agama mayoritas di Kano molo marbarita na uli hami. Alani i porlu do hami hati-hati. Di sada tikki, hea ma au dohot donganku dilele sahalak bawa na maniop piso. Ala umhatop hami marrikkat sian ibana, gabe dang boi be hami dapotna! Nang pe adong bahaya sisongon i, dibahen Jahowa do “dame” ngolunami jala lam martamba do akka penyiar. (Ps. 4:8) Saonari adong lobi 500 penyiar di 11 huria di Kano.

Di bulan Agustus 1968 dung piga-piga bulan au di Kano, ditugasson ma au rap dohot dua perintis istimewa na asing tu Niamey ibukota ni Republik  Niger. Gabe diboto hami ma molo Niger di daerah Afrika barat on, termasuk do sada sian piga-piga daerah na ummohop di portibi on. Marsiajar ma hami songon dia marbarita na uli di daerah na mohop. Jala marsiajar ma muse hami bahasa Prancis. Nang pe adong tantangan sisongon i, pos do rohanami tu Jahowa jala marbarita na uli ma hami dohot piga-piga donganta na tinggal disi. Dang pola sadia leleng, adong ma piga-piga halak na olo manjalo buku Pengetahuan yang Membimbing Kepada Kehidupan yang Abadi. Bahkan adong do na sappe mangalului hami lao mangido bukku i!

Dung i diboto hami ma dang lomo roha ni pamaretta tu Saksi Jahowa. Di bulan Juli 1969, dibahen ma kebaktian wilayah na parjolo di negara i. Adong ma hira-hira 20 halak hadirinna jala adong dua penyiar baru na lao tardidi. Alai di ari na parjolo kebaktian i, ro ma polisi jala dipaso ma acara i. Diboan nasida ma perintis istimewa dohot pengawas wilayah tu kantor polisi. Dung disukkuni hami, disuru nasida ma asa melapor hami muse marsogotna i. Tikki diboto hami boi do annon pamaretta mambahen masalah, diatur ma asa adong jamita pandidion di sada jabu pribadi. Dung i dididi ma na dua halak i di sada sunge.

Piga-piga minggu dukkon i, dipangido pamaretta ma asa kaluar au dohot lima perintis istimewa na asing sian Niger. Holan 48 jom do dilean nasida tikki tu hami. Jadi dibahen hami ma pengaturan sandiri. Unduk do hami tu nasida jala pittor lao ma hami tu kantor cabang di Nigeria. Disi dilean ma muse tugas na baru tu hami.

Ditugasson ma au tu sada huta na margoar Orisunbare di Nigeria. Lomo do rohakku marbarita na uli disi jala adong do piga-piga studikku. Rap marbarita do au dohot kelompok kecil na tinggal disi. Alai dung onom bulan, diundang kantor cabang ma muse au mulak tu Niger. Mulana tarsoggot jala gugup do au. Alai lomo do rohakku pajuppang muse dohot akka dongan di Niger!

Mulak ma muse au tu Niamey. Sadari dung sahat au disi, pajuppang ma au tu sahalak pengusaha Nigeria na mamboto molo au sahalak Saksi. Dung i godang ma sukkun-sukkunna taringot Bibel. Jadi huurupi ma ibana marsiajar Bibel. Dung boi dipaso ibana marisap jala minum-minum, gabe tardidi ma ibana. Las do rohakku marbarita na uli dohot akka dongan di piga-piga inganan di Niger. Huida do saleleng martaon-taon godang do na manjalo hasittongan. Tikki parjolo sahali au sahat dison, adong do 31 Saksi di negara on. Alai tikki hutinggalhon Niger, adong ma 69 Saksi.

Di bulan Desember taon 1977, mulak ma au tu Nigeria manjalo pelatihan. Di ujung ni pelatihan sitolu minggu i, dijahahon donganta si Malcolm Vigo kordinator Panitia Cabang ma tu au sada surat sian kantor cabang Sierra Leone.  Akka donganta na disan mangalului sahalak perintis lajang na sehat jala na boi makkatai bahasa Inggris dohot Prancis, asa boi gabe pengawas wilayah di Guinea. Dipaboa donganta si Vigo ma tu au nungnga dilatik be au tu penugasan on. Takkas do dipaboa ibana dang mura penugasan on. Alani i didok ibana ma tu au, “Pikkirhon ma andorang so dijalo ho penugasan on.” Pittor hualusi ma, “Ala Jahowa do na manuru au lao tusi, ikkon lao do au.”

Lao ma au tu Sierra Leone jala pajuppang dohot akka dongan di kantor cabang. Sahalak anggota Panitia Cabang paboahon tu au, “Dang godang diboto hami informasi taringot ulaon marbarita di Guinea.” Nang pe kantor cabang on do na martanggung jawab tu ulaon marbarita na uli disi, dang boi nasida berkomunikasi tu akka dongan na disan alani situasi politik di negara i. Jala nungnga piga-piga hali dicoba, dang boi wakil ni kantor cabang masuk tu negara on. Alani i dipangido ma au asa lao tu ibukota Guinea, i ma Conakry. Jala mangido izin sian pamaretta asa boi tinggal disi.

Tikki sahat au di Conakry, lao ma au tu kedutaan ni Nigeria jala pajuppang ma au dohot duta besar. Hupaboa ma na lomo rohakku marbarita na uli di Guinea. Disuru ibana ma asa unang tinggal au disi alana boi do au ditakkup, bahkan boi upparah sian i. Didok ibana, “Mulak ma ho tu Nigeria jala disi ma ho marbarita.” Alai hudok ma, “Ikkon dison do au tinggal.” Jadi dibahen ibana ma surat tu mentri dalam negeri Guinea lao mangurupi au jala diurupi nasida do au.

Dang leleng dukkon i, mulak ma au tu kantor cabang di Sierra Leone jala hupaboa ma tu akka dongan songon dia keputusan ni pamaretta. Marsurak marlas ni roha ma akka dongan tikki dibege nasida songon dia Jahowa mamasu-masu pardalananku. Diloas pamaretta do au tinggal di Guinea!

Mulai taon 1978 sahat tu taon 1989, gabe pengawas wilayah ma au di Guinea, Sierra Leone. Jala gabe pengawas wilayah pengganti ma au di Liberia. Di mulana jotjot do au marsahit. Jala sipata olo do au marsahit tikki melayani di daerah na terpencil. Alai berupaya do akka donganta mamboan au tu rumah sakit.

Hea ma di sada tikki marsahit na parah au alani malaria dohot cacingan. Dung malum au huboto ma, nungnga dihatai akka donganta hape didia au naeng dikuburhon. Nang pe nungnga hea au naeng mate, alai dang hea au tarpikkir lao maninggalhon penugasanku. Alana pos do rohakku holan Debata do na boi manjaga hita. Jala nang pe ikkon mate hita, boi do ibana pahehehon hita.

Di taon 1988 pajuppang ma au dohot si Dorcas, sahalak perintis na makkaholongi Jahowa jala na serep roha. Menikah ma hami jala dohot ma ibana mangurupi au di tugashu sebagai pengawas wilayah. Pekerja keras do ibana jala rela berkorban. Hea do hami mardalan pat 25 kilometer sian sada huria tu huria na asing sambil mamboan tasnami. Molo dao do huria i, manuppang ma hami tu  kendaraan na lewat. Mardalan ma kendaraan i lambat-lambat, ala margambo jala marlubang-lubang dalan i.

Sahalak na barani do si Dorcas. Uppamana, sipata ikkon diseberangi hami do sunge na godang buaya disi. Hea ma tikki naeng kunjungan tu sada huria, ikkon mamakke kano do hami menyeberang alana putus jembatanna. Tikki kaluar si Dorcas sian kano i, madabu ma ibana tu sunge na bagas i. Dang adong sian hami na boi marlange jala adong buaya di sunge i. Uttung ma adong doli-doli na olo marlange lao menyelamatton si Dorcas. Gabe trauma do hami alani na masa i. Nang pe songon i, dilanjutton hami do tugasnami.

Di awal taon 1992, songgot do rohanami mamboto nungnga hamil si Dorcas. Ikkon diputusson hami do torus do hami gabe perintis istimewa manang na dang. Didok rohanami do, “Hadiah sian Jahowa do on!” Alani i, dibahen hami ma goar ni borunami i si Jahgift. Dung marumur opat taon si Jahgift, tubu ma ibotona jala dibahen hami ma goarna si Eric. Benar-benar hadiah sian Jahowa do anakkonnami on tu hami. Saonari si Jahgift gabe komuter di kantor penerjemahan di Conakry, jala si Eric gabe parhobas di huria.

Ala ikkon mangurus gellengnami, so ma si Dorcas sian perintis istimewa. Nang pe songon i tetap do ibana merintis biasa. Molo au tetap do perintis istimewa. Dung balga gellengnami, boi ma muse si Dorcas gabe perintis istimewa. Saonari gabe misionaris ma hami na dua di Conakry.

Tudia pe Jahowa mamboan au, tusi do au lao. Jotjot do hami na dua makkilala na dijaga jala dipasu-pasu Jahowa do hami. Ala Jahowa do na diandalhon hami, dang marsak be hami songon halak na mengandalhon materi. Marsiajar do hami sian pengalamannami, holan “Debata sipalua” i do na boi manjaga hami. (1 Kron. 16:35) Pos do rohakku jagaon ni Jahowa do sude halak na mengandalhon Ibana, “songon halak na manjaga arta na arga na manippan i di bagasan sada tas”.—1 Sam. 25:29.