1. Aha do na mambahen godang halak bingung?

ADONG do marribu gareja na mangakku nungnga sittong cara ni nasida manomba Debata. Ala sude do gareja mandok songon i, gabe bingung do akka halak jala sukkun-sukkun di rohana, “Na dia do agama na sittong?” Aha do na mambahen pos rohatta Saksi Jahowa do agama na sittong? Jala aha do buktina na lomo do roha ni Jahowa tu caratta manomba Ibana? Saonari taida ma akka bukti na boi paposson rohatta.

2. Boasa boi massai togu pos ni roha ni si Paulus tu hasittongan? (1 Tessalonik 1:5)

² Massai togu do pos ni roha ni si Paulus tu hasittongan, jala dang holan perasaanna sajo i. (Jaha 1 Tessalonik 1:5.) Ringgas do ibana marsiajar Bibel. Pos do roha ni si Paulus “sian Debata do sude Surat na Badia i jala dilehon marhite panogu-noguon ni tondi parbadia”. (2 Tim. 3:16) Ala ringgas ibana marsiajar Bibel, gabe dapot ni si Paulus ma akka bukti na patuduhon molo Messias i, i ma Jesus. Alai molo akka pamimpin agama Jahudi, dang porsea tu akka bukti i. Mangakku do nasida mangajarhon na sittong taringot tu Debata, alai dang sesuai tu pangalahona. (Tit. 1:16) Molo si Paulus, dang dipillit si Paulus na dia na dihaporseai ibana sian Hata ni Debata. Alai berupaya do ibana mangajarhon dohot mangulahon “sude lomo ni roha ni Debata”.​—Ul. 20:27.

3. Memang ikkon sude do taralusi sukkun-sukkunta asa boi togu haporseaotta? (Ida kotak “‘ Tung so Habilangan do’ Sakkap dohot Ulaon ni Jahowa.”)

 ³ Godang do halak mandok molo agama na sittong i, ikkon boi mangalusi sude sukkun-sukkun termasuk ma i sukkun-sukkun na so adong alusna di Bibel. Masuk akkal do i? Taida ma hata ni si Paulus taringot on. Didok ibana do tu halak Kristen di abad na parjolo, “Uji hamu ma sasude, pastihon hamu ma dia na sittong.” (1 Tes. 5:21) Alai diakkui si Paulus do muse “dang sude dope” diboto ibana. Didok ibana, “Ai songon na markaca tu tombaga do hita saonari, dang takkas dope na taida i.” (1 Kor. 13:9, 12) Jadi dang sude dope Surat na Badia i diboto si Paulus, sarupa songon hita. Nang pe songon i, adong do na diboto si Paulus taringot Jahowa dohot akka janjina. I ma na mambahen pos roha ni si Paulus tu hasittongan.

4. Boha do carana mambuktihon naung sittong caratta manomba Debata saonari, jala songon dia do tanda ni agama na sittong i?

⁴ Sada cara lao mambuktihon naung sittong do caratta saonari manomba Debata, i ma mambandingkon tu cara ni Jesus manomba Debata. Di parsiajaran on tabahas ma tanda ni agama na sittong, i ma (1) holan manomba Debata, (2) mangargai goar ni Jahowa, (3) makkaholongi hasittongan, jala (4) makkaholongi akka dongan.

5. Aha do na boi taparsiajari sian cara ni Jesus manomba Debata?

⁵ Ala holong roha ni Jesus tu Jahowa, holan Jahowa do na disomba ibana tikki di surgo manang di tano on. (Luk. 4:8) Diajarhon Jesus do tong tu akka siseanna asa holan Jahowa na disomba nasida. Jesus dohot akka siseanna, dang hea mamakke patung lao manomba Debata. Sabotulna dang boi tabahen  manang aha pe na manarupahon Debata ala dang boi taida Ibana. (Jes. 46:5) Alai boha do molo adong na mambahen patung ni akka halak na dipasangap, jala martangiang tu patung i? Di patik na paduahon didok Jahowa, “Unang bahen hamu patung, manang gambar na suman tu manang aha pe na adong di langit, di tano on . . . Unang marsomba hamu tu akka i.” (2 Mus. 20:4, 5) Sian patik ni Jahowa on, takkas ma taboto dang lomo rohana molo tasomba patung.

6. Songon dia do Saksi Jahowa maniru cara beribadat ni halak Kristen di abad na parjolo?

⁶ Akka halak na mamparsiajari sejarah mandok, holan Debata do na disomba halak Kristen na parjolo. Misalna bukku “Sejarah Gereja Kristen” (History of the Christian Church) paboahon, “Molo halak Kristen di abad na parjolo, holan mambayakkon adong patung di inganan ni nasida beribadat pe, nungnga magigi nasida.” Songon i do tong Saksi Jahowa. Dang olo hita martangiang tu patung ni akka santo manang tu suru-suruan. Bahkan dang martangiang hita tu Jesus. Jala dang olo hita manomba akka lambang ni negara, misalna salut tu bendera. Nang pe adong halak na mamaksa hita mangulahon i, alai taihutton ma hata ni Jesus on, “Jahowa Debatam do na ikkon sombaonmu.”​—Mat. 4:10.

7. Aha do beda ni Saksi Jahowa dohot agama na asing?

⁷ Saonari, godang do halak na mangidolahon pamimpin agama na terkenal, sappe hira na disomba halak i nama pamimpin agama i. Godang do halak ro tu gareja ni pamimpin agama i lao mambege jamitana. Olo do halak i manuhori akka bukku nasida, jala disumbangkon halak i do godang hepeng lao mendukung pamimpin agama i. Piga-piga halak porsea situtu do tu sude hata ni pamimpin agama i, hira na mangida Jesus do nasida mangida halak i. Alai hita dang songon i. Memang taargai do akka dongan na mamimpin di organisasitta. Alai dang sappe taidolahon nasida. Alana didok Jesus, “Na marhaha maranggi do hamu sude.” (Mat. 23:8-10) Dang olo hita mangidolahon manang ise pe. Misalna mangidolahon pamimpin agama manang pamimpin politik. Dang olo hita mendukung akka ulaon ni nasida. Toktong do hita netral, ala dang bagian sian portibi on hita. On ma na patuduhon berbeda do hita sian agama na asing na mangakku Kristen.​—Joh. 18:36.

8. Sian dia taboto na lomo do roha ni Jahowa tapasangap goarna jala tapaboa i tu akka halak?

⁸ Hea do Jesus martangiang songon on, “Ale Amang, pasangap ma goarmi.” Dialusi Jahowa do tangiangna i sian surgo marhite soara na gogo. Jala marjanji do Jahowa pasangaponna do goarna i. (Joh. 12:28) Dipasangap Jesus do goar ni Jahowa saleleng pelayananna di tano on. (Joh. 17:26) Songon Jesus, hita pe bangga do mamakke goar ni Jahowa jala paboahon i tu akka halak. On ma sada tanda ni siihutton agama na sittong.

9. Songon dia do halak Kristen di abad na parjolo pasangappon goar ni Debata?

⁹ Dang leleng dung dipajongjong huria Kristen di abad na parjolo, “dipillit Debata do deba sian nasida gabe bangso na pasangappon goarna”. (Ul. 15:14) Bangga do nasida mamakke goar ni Jahowa jala paboahon i tu akka halak. Jotjot do dipakke nasida goar ni Jahowa tikki marbarita na uli jala tikki manurat Bibel. * Jadi takkas do dipatudu nasida, holan nasida do bangso na pasangappon goar ni Debata.​—Ul. 2:14, 21.

10. Aha do na patuduhon holan Saksi Jahowa do na pasangappon goar ni Jahowa?

 ¹⁰ Tutu do holan organisasi ni Saksi Jahowa na pasangappon goar ni Jahowa? Taida ma buktina. Saonari godang do akka pamimpin agama na manabunihon goar ni Debata. Dihapus nasida do muse goar ni Debata di terjemahan Bibel ni nasida. Jala adong do na mangorai anggota garejana, asa unang mamakke goar ni Debata. * Alai molo hita Saksi Jahowa dang songon i. Tapasangap do goar ni Jahowa di ngolutta. Tabuktihon do i sian pangalahotta. Berupaya do hita mamaritahon goar ni Jahowa di liat portibi on. (Jes. 43:10-12) Taterjemahon do Bibel na mamakke goar ni Jahowa, i ma Bibel Terjemahan Tano na Imbaru. Jala dicetak ma i lobi sian 240 juta. Asing ni i, tabahen do muse publikasi lobi sian 1.000 bahasa na mamakke goar ni Jahowa.

11. Songon dia halak Kristen di abad na parjolo patuduhon na dihaholongi nasida do hasittongan?

¹¹ Holong do roha ni Jesus tu hasittongan, i ma hasittongan taringot tu Debata dohot akka janjina. Jala tarida do i sian parniulaon ni Jesus. Semangat do Jesus paboahon hasittongan i tu akka halak. (Joh. 18:37) Songon Jesus, dihaholongi akka siseanna do hasittongan. (Joh. 4:23, 24) I do alana didok si Petrus molo halak Kristen mardalan di “dalan hasittongan”. (2 Ptr. 2:2, surat na di toru) Ala dihaholongi halak Kristen di  abad na parjolo do hasittongan, dang olo nasida mangihutton ajaran ni pamimpin agama, mangihutton tradisi, dohot cara marpikkir ni jolma na maralo tu hasittongan. (Kol. 2:8) Agama na sittong saonari pe, berupaya do “mangihutton hasittongan”. Dipastihon nasida do sude na dihaporseai dohot na diulahon nasida di parngoluonna, sesuai tu hata ni Jahowa.​—3 Joh. 3, 4.

12. Tikki diida Punguan na Mangaradoti Organisasi adong pangattusionta na porlu disesuaihon, aha do na diulahon nasida jala boasa?

¹² Dang didok Saksi Jahowa, naung diattusi nasida sude isi ni Bibel. Olo do sipata adong na sala dibahen nasida tikki mangajarhon ajaran ni Bibel manang tikki mambahen petunjuk. Dang heran hita disi. Bibel pe mandok dang boi sahali sude taboto taringot tu Debata. (Kol. 1:9, 10) Jala martahap do muse dipaboa Jahowa hasittongan i tu hita. Jadi asa boi lam taattusi hasittongan, ikkon sabar do hita. (Poda 4:18) Tikki diida Punguan na Mangaradoti Organisasi adong pangattusion na porlu disesuaihon, pittor hatop do dibahen nasida perubahan. Molo akka gareja saonari dibahen nasida pe penyesuaian, lao pasonakkon anggotana do manang asa lam terkenal nasida. Hape Saksi Jahowa, dibahen nasida pe penyesuaian asa lam jonok do tu Debata jala asa lam denggan mangihutton dalan ni Jesus. (Jak. 4:4) Jadi tabahen pe penyesuaian dang lao mangihutton cara marpikkir ni jolma, alai mangihutton hata ni Debata i ma Bibel. Takkas ma, massai holong do rohatta tu hasittongan!​—1 Tes. 2:3, 4.

13. Aha do sifat na paling penting na dipatudu siihutton agama na sittong, jala songon dia do Saksi Jahowa patuduhon sifat i saonari?

¹³ Godang do akka sifat na denggan na dipatudu halak Kristen di abad na parjolo. Alai sifat na paling penting na dipatudu nasida, i ma holong. Didok Jesus, “Molo marsihaholongan hamu, botoon ni sude jolma ma na siseanku hamu.” (Joh. 13:34, 35) Saonari diihutton Saksi Jahowa do tong hata ni Jesus on. Marsihaholongan do hita jala marsada dohot akka dongan di liat portibi on. Dang adong agama na asing na songon hita. Nang pe sian marragam suku dohot bangso, alai marsada do hita songon sada keluarga. Tarida do holong i sian akka parpunguan ni Saksi Jahowa. On ma bukti na paposson rohatta, na tasomba do Jahowa marhite cara na sittong.

14. Sesuai tu Kolosse 3:12-14, boha do caratta patuduhon holong tu na asing?

¹⁴ Bibel mandok, “Marsitutu ma hamu marsihaholongan.” (1 Ptr. 4:8) Sada cara hita patuduhon holong i, rade ma hita manalpuhon hasalaan ni halak jala sabar ma hita mangadopi hahurangan ni akka donganta. Sai burju ma hita tu sude akka dongan di huria, ramah ma hita tu nasida bahkan tu akka dongan na hea mambahen haccit rohatta. (Jaha Kolosse 3:12-14.) Molo tapatudu holong na sisongon i, i ma bukti molo hita siihutton agama na sittong.

15. Aha do muse na tatiru sian halak Kristen di abad na parjolo?

¹⁵ Taihutton do muse sitiruon na dibahen halak Kristen di abad na parjolo. Misalna, sarupa do caratta diorganisasi songon cara ni nasida. Adong do di hita pengawas wilayah, akka sintua, dohot parhobas. (Plp. 1:1; Tit. 1:5) Jala songon nasida, taihutton do aturan ni Jahowa taringot seks dohot pernikahan. Taargai do pandangan ni Jahowa taringot mudar jala taihutton do i. Dibahen do muse pengaturan pemecatan molo adong di huria na so olo mangihutton paretta ni Jahowa.  Sudena on patuduhon, na tatiru do halak Kristen di abad na parjolo.​—Ul. 15:28, 29; 1 Kor. 5:11-13; 6:9, 10; Heb. 13:4.

16. Aha do na taparsiajari sian Epesus 4:4-6?

¹⁶ Didok Jesus godang do halak na lao mangakku gabe siseanna. Alai diboto Jesus do dang na tutu nasida sude mangihutton ibana. (Mat. 7:21-23) Bibel pe paboahon molo di ari parpudi, godang do halak ‘idaon songon na manomba Debata’. (2 Tim. 3:1, 5) Alai takkas do didok di Bibel, holan ‘sada haporseaon’ manang sada agama do na dihalomohon roha ni Jahowa.​—Jaha Epesus 4:4-6.

17. Ise do siihutton agama na sittong saonari?

¹⁷ Ise do siihutton agama na sittong saonari? Nungnga tabahas sitiruon na dibahen Jesus dohot halak Kristen di abad na parjolo taringot cara na sittong manomba Debata. Ise do na maniru cara ni nasida saonari? Nungnga taida akka buktina, holan Saksi Jahowa do na maniru nasida. Sada hasangapon do di hita boi gabe bagian sian naposo ni Jahowa jala mamboto hasittongan taringot Jahowa dohot akka janjina. Jadi sai toktong ma gomos tatiop hasittongan i.