1-2. (a) Aha do na dibahen piga-piga pamaretta tu naposo ni Jahowa, alai songon dia do reaksi ni nasida? (b) Boasa boi toktong las rohatta nang pe dianiaya? (Ida gambar sampul.)

 SAONARI adong do lobi sian 30 negeri na mangorai ulaon ni Saksi Jahowa. Bahkan akka pamaretta di piga-piga negara memenjarahon akka donganta sahaporseaon. Aha do kesalahan ni nasida? Molo sian sudut pandang ni Jahowa, dang adong kesalahan ni nasida. Akka na denggan do na diulahon nasida songon manjaha dohot mamparsiajari Bibel, marbarita na uli, jala ro tu parpunguan. Asing ni i, toktong do nasida netral di urusan politik. Nang pe godang tantangan, alai toktong do akka donganta i mampartahatton kesetiaanna tu Jahowa jala marlas ni roha do nasida mangulahon i.

² Molo taida poto ni akka dongan na adong di sampul, tarida do na marlas ni roha nasida nang pe mandapot paraloan sian pamaretta. Alana diboto nasida, kesetiaan ni nasida i mambahen las roha ni Jahowa. (Ps. 15:1, 2) Didok Jesus, “Marlas ni roha ma halak na manaon na haccit alani hasittongan . . . Marlas ni roha jala marolop-olop ma hamu, ai balga do upamuna.”​—Mat. 5:10-12.

3. Sesuai tu Ulaon ni Apostel 4:19, 20, aha do na diulahon akka apostel tikki dianiaya, jala boasa songon i?

³ Sarupa do na dialami akka donganta saonari dohot na dialami akka apostel di abad na parjolo. Dianiaya do nasida  ala marbarita taringot Jesus. Jotjot do pengadilan tinggi ni halak Jahudi mangorai nasida “makkatahon jala mangajarhon manang aha pe marhite goar ni Jesus”. (Ul. 4:18; 5:27, 28, 40) Alai aha do na diulahon nasida? (Jaha Ulaon ni Apostel 4:19, 20.) Diboto nasida Jesus do na manuru nasida asa marbarita tu akka halak taringot ibana. (Ul. 10:42) Alani i barani do si Petrus dohot si Johannes mewakili akka apostel mandok urrikkot do di nasida mangoloi Debata sian akka hakim di pengadilan i. Jala didok nasida do dang mungkin gabe so nasida marbarita taringot Jesus. Hira songon on ma didok nasida tu akka hakim i, ‘Sittong do menurut hamu gabe hualo hami Debata holan lao mangoloi hamu?’

4. Sesuai tu Ulaon ni Apostel 5:27-29, aha do na boi taparsiajari sian akka apostel i?

⁴ Gabe sitiruon na denggan do akka apostel i tu hita sude. Songon nasida, ikkon ‘urrikkot do di [hita] mangoloi Jahowa sian jolma’. (Jaha Ulaon ni Apostel 5:27-29.) Dung dilissingi akka apostel i, dipalao ma nasida sian pengadilan ni halak Jahudi. Alai marlas ni roha do nasida, “ai didok roha ni nasida, na patut do nasida manaon na haccit alani goar ni Jesus i”. Jala dukkon i, toktong do nasida marbarita na uli.​—Ul. 5:40-42.

5. Sukkun-sukkun aha do na lao tabahas di artikel on?

⁵ Tikki taida contoh ni akka apostel i olo do ra sukkun-sukkun rohatta: Songon dia do nasida patuduhon na urrikkot di nasida mangoloi Debata sian jolma alai tetap ‘unduk tu pamaretta’? (Rom 13:1) Songon dia do hita boi mangihutton hata ni si Paulus asa “unduk tu pamaretta dohot tu akka parhuaso” alai tetap setia tu Debata? Lao tabahas ma alus ni sukkun-sukkun i di artikel on.​—Tit. 3:1.

6. (a) Ise do “pamaretta” na dipaboa di Rom 13:1, jala ikkon songon dia do sikapta tu nasida? (b) Aha do na taboto sian hata ni Jesus tu si Latus?

⁶ Jaha Rom 13:1. “Pamaretta” na didok di ayat on, i ma akka halak na mamaretta jala na marhuaso tu na asing. Berupaya do  nasida mambahen akka peraturan asa tertib jala taratur sudena. Jala di piga-piga situasi, dilindungi nasida do akka naposo ni Jahowa. (Pgk. 12:16) Alani i taoloi ma nasida. Contohna tabayar ma pajak jala tapasangap ma nasida. (Rom 13:7) Alai taingot ma, boi pe akka pamaretta i marhuaso ala na diloas Jahowa dope nasida. Songon i do na didok Jesus tu Gubernur ni Rom, i ma si Pontius Latus. Tikki didok si Latus boi do ibana paluahon manang pamatehon Jesus, didok Jesus ma mangalusi, “Dang marhuaso ho tu au, molo so Debata na mangalehon huaso i tu ho.” (Joh. 19:11) Sian hata ni Jesus on taboto ma, terbatas do huaso ni sude pamaretta na adong di portibi on.

7. Di situasi na songon dia do hita dang porlu unduk tu pamaretta, jala aha do na porlu diingot pamaretta?

⁷ Halak Kristen ikkon unduk do tu peraturan na dibahen pamaretta, saleleng dang maralo i tu hukum ni Debata. Alai dang olo nasida unduk molo disuru mangulahon na dihasogohon Jahowa manang molo diorai nasida mangulahon lomo ni roha ni Jahowa. Misalna adong do pamaretta na mamaksa akka bawa na poso di negarana asa dohot wajib militer. * Adong do muse pamaretta na mangalarang Bibel Terjemahan Tano na Imbaru dohot publikasita. Dilarang do muse hita marbarita na uli dohot marpungu lao beribadat. Alai ikkon diingot akka pamaretta do, molo dianiaya nasida sisean ni Jesus, ikkon martanggung jawab do nasida tu Debata. Alana diparrohahon Jahowa do aha na diulahon nasida.​—Pjm. 5:8.

8. Aha do beda ni Jahowa dohot akka pamaretta di portibi on, jala boasa ikkon taboto on?

⁸ Memang adong do huaso ni akka pamaretta lao mamaretta akka rakyatna jala mambahen na denggan tu nasida. Alai dang berarti parhuaso na sempurna jala na untimbo nasida. Holan Jahowa do Parhuaso na sempurna jala na untimbo sian sude pamaretta. Jotjot do didok di Bibel holan Jahowa “Debata Natumimbul”.​—Dan. 7:18, 22, 25, 27.

9. Parnidaan taringot aha do na dilehon tu si Daniel?

⁹ Dilehon Jahowa do parnidaan tu Panurirang Daniel na patuduhon umbalga do huaso ni Jahowa sian sude pamaretta na di tano on. Diida si Daniel do adong opat binatang buas na manggombarhon akka kuasa dunia songon Babel, Media Persia, Junani, Rom, dohot Anglo-Amerika. (Dan. 7:1-3, 17) Dung i diida si Daniel ma Jahowa hundul di tahtana na di surgo lao mangadili. (Dan. 7:9, 10) Dilehon do muse parnidaan na asing tu si Daniel na gabe peringatan tu akka pamaretta di tikkitta saonari on.

10. Sesuai tu Daniel 7:13, 14, 27, tu ise do dilehon Jahowa hak lao mamaretta tano on, jala aha do na boi taparsiajari sian i?

¹⁰ Jaha Daniel 7:13, 14, 27. Buaton ni Jahowa do huaso ni akka pamaretta saonari jala lehononna do i tu na asing, na pantas jala na umgogo sian nasida. Ise ma i? Jesus Kristus “na songon anak ni jolma” dohot si 144.000, akka ‘na badia na marhobas tu Debata Natumimbul i’. Rap mamaretta ma nasida “saleleng ni lelengna”. (Dan. 7:18) Holan Jahowa do na marhak mangulahon i. Takkas ma holan Jahowa do “Debata Natumimbul”.

11. Aha dope na didok si Daniel na patuduhon Debata Natumimbul do Jahowa i?

¹¹ Aha na diida si Daniel di parnidaan i sesuai do tu na dipaboa ibana sebelumna.  Didok ibana, “[Debata na di surgo] do na mamillit dohot na manggatti akka raja.” Didok ibana muse, “Natumimbul i do Parhuaso ni harajaon na adong di tano on. Jala lehononna do harajaon i tu manang ise pe lomo ni rohana.” (Dan. 2:19-21; 4:17) Hea do Jahowa mamillit manang mangalengserhon akka raja na adong di portibi on? Hea. Taida ma contohna.

12. Paboa ma contohna songon dia Jahowa mangalengserhon akka raja najolo. (Ida gambar.)

¹² Takkas do dipatudu Jahowa dao do umbalga huasona sian sude pamaretta na adong di portibi on. Taida ma tolu contohna. Najolo massai kejam do si Firaun raja ni Mesir mamparhatoban naposo ni Jahowa. Mulak-ulak do ditolak ibana pangidoan ni Jahowa lao paluahon nasida. Alai ujungna dipalua Jahowa do bangsona i. Jala dilonokkon ma si Firaun di Laut Merah. (2 Mus. 14:26-28; Ps. 136:15) Songon i do tong si Belsasar, raja ni Babel. Hea do sada tikki mambahen pesta ibana. Di pesta i, ‘ginjang do rohana maradoppon Tuan na di surgo i’, jala ‘akka debata sian perak dohot na sian mas do na dipuji ibana’, dang Jahowa. (Dan. 5:22, 23) Alani i, dipaila Jahowa ma raja na sombong i. Laos di borngin i, mate tarbunu ma si Belsasar jala dipasahat ma harajaonna i tu halak Media dohot Persia. (Dan. 5:28, 30, 31) Songon i do tong na masa tu Raja Herodes Agripa I na sian Palestina. Dipamate ibana do Apostel Jakobus. Dung i dipenjarahon do Apostel Petrus jala berencana do ibana mambunu si Petrus. Alai digagalhon Jahowa do rencana ni si Herodes i. “Dibahen suru-suruan ni Jahowa ma ibana marsahit”, dung i mate ma ibana.​—Ul. 12:1-5, 21-23.

13. Paboa ma contohna songon dia Jahowa manaluhon gabungan ni akka pamaretta.

¹³ Dipatudu Jahowa do muse na umbalga huasona nang pe bergabung akka pamaretta lao mangalo Ibana. Misalna hea do diurupi Jahowa halak Israel manaluhon 31 raja ni Kanaan jala mambuat sebagian besar Tano na Dijanjihon. (Jos. 11:4-6, 20; 12:1, 7, 24) Asing ni i, diurupi Jahowa do halak Israel lao manaluhon Raja Ben-hadad dohot 32 raja ni Siria na asing.​—1 Raj. 20:1, 26-29.

14-15. (a) Aha do didok Raja Nebukadnesar dohot Raja Darius taringot Jahowa? (b) Aha do na didok panurat Psalmen taringot Jahowa dohot bangsona?

 ¹⁴ Jotjot do dipatudu Jahowa holan Ibana do “Debata Natumimbul”. Sada tikki, dibangga-banggahon Raja Nebukadnesar ma gogona dohot huasona ‘lao patuduhon balga ni hasangaponna’. Ala dang diakkui ibana holan Jahowa do na layak dipasangap, dibahen Jahowa ma ibana gabe rittik. Dung waras si Nebukadnesar, dipuji ibana ma “Natumimbul” i. Jala didok ibana holan Jahowa do na toktong mamaretta saleleng ni lelengna. Didok ibana muse, “Dang adong na boi mangabbati lomo ni rohana.” (Dan. 4:30, 33-35) Belakangan tikki dipalua Jahowa si Daniel sian lubang singa, didok Raja Darius ma tu akka rakyatna, “Habiari hamu ma Debata ni si Daniel. Ai Ibana do Debata na mangolu jala toktong do Ibana adong saleleng ni lelengna. Dang boi dihancurhon harajaonna jala mamaretta do Ibana saleleng ni lelengna.”​—Dan. 6:7-10, 19-22, 26, 27.

¹⁵ Didok panurat Psalmen do, “Sursar do dibahen Jahowa rencana ni akka bangso, jala sundat do dibahen Ibana lomo ni roha ni nasida.” Didok ibana muse, “Marlas ni roha ma bangso na Debatana Jahowa, bangso na pinillitna gabe appunana.” (Ps. 33:10, 12) On ma alasanna boasa ikkon toktong hita setia tu Jahowa.

16. Boasa boi pos rohatta paluaon ni Jahowa do hita sian “hasusaan bolon”? (Ida gambar.)

¹⁶ Ala nungnga taboto aha na diulahon Jahowa najolo, gabe pos ma rohatta pasti paluaon ni Jahowa do akka naposona na setia saleleng “hasusaan bolon”. (Mat. 24:21; Dan. 12:1) Tikki marsada Gog na sian Magog manang gabungan ni akka bangso di portibi on lao menyerang naposo ni Debata pasti paluaon ni Jahowa do  nasida. Nang pe marsada 193 negara na bergabung tu Perserikatan Bangsa-Bangsa, alai dang tolap nasida mangalo Debata Natumimbul dohot akka tentarana na di surgo! Didok Jahowa do, “Bahenokku ma sangap dirikku, pabadiaokku ma dirikku jala patuduokku ma i di jolo ni godang bangso. Botoon ni nasida ma na Au do Jahowa.”​—Hes. 38:14-16, 23; Ps. 46:10.

17. Aha do na lao masa tu akka raja na di tano on, dohot akka naposo ni Jahowa na setia?

¹⁷ Serangan ni Gog na sian Magog tu naposo ni Jahowa ma na memulai porang Armagedon. Disi ma hukumon ni Jahowa “akka raja na di tano on”. (Pgk. 16:14, 16; 19:19- 21) Alai “holan halak na tigor marroha do na lao tinggal di tano on, jala halak na setia do na lao mangingani i”.​—Poda 2:21.

18. Boasa olo halak Kristen dianiaya bahkan dipamate? (Daniel 3:28)

¹⁸ Sian najolo, godang do halak Kristen na rade dianiaya bahkan dipamate ala holong roha ni nasida tu Jahowa. Toktong do nasida setia tu Ibana, songon tolu halak Heber na setia najolo. Nang pe disappatton nasida tu api na marnala-nala, alai toktong do nasida setia tu Jahowa Debata Natumimbul i, jala dipalua do nasida.​—Jaha Daniel 3:28.

19. Boasa massai penting mampartahatton kesetiaanta tu Jahowa?

¹⁹ Hea do dipaboa si Daud boasa massai penting mampartahatton kesetiaanta tu Jahowa. Didok ibana, “Jahowa do na mangadili akka bangso. Tikki diadili Ho au ale Jahowa, ingot ma setia do au tu Ho jala huulahon do lomo ni roham.” (Ps. 7:8) Didok si Daud muse, “Sai ramoti ma au ala setia jala tigor do au marroha, ai tu Ho do au marpos ni roha.” (Ps. 25:21) Takkas ma asa boi hita botul-botul marlas ni roha di ngolutta, ikkon toktong do hita setia dang soal aha na masa! Molo taulahon i boi ma tahilala na didok panurat Psalmen, “Marlas ni roha ma halak na setia . . . , na mardalan mangihutton patik ni Jahowa.”​—Ps. 119:1, surat na di toru.