Godang hian do saonari bahan pornografi a di portibi on. Boi do tarida akka na cabul di iklan, dunia mode, film, musik, di akka majalah, di televisi, video game, handphone, dohot di situs web. Jala baru-baru on, nungnga adong be i di aplikasi berbagi foto na adong di internet. Saonari on nungnga gabe bagian ni ngolu ni jolma be pornografi. Lam godang do halak na mangida pornografi jala lam godang do inganan na paradehon i. Boi didok unggodang ma i sian na hea masa saleleng on.—Ida kotak “ Fakta taringot Pornografi.”

Nungnga muba tong batasan ni akka jolma tu bahan pornografi. Didok Profesor Gail Dines, “Akka bahan pornografi na dianggap parah najolo, nungnga dianggap jolma be i saonari hal na biasa.”

Boha molo hamu? Menurut hamu, holan hiburan do pornografi i, holan otik do bahayana, manang boi do i manegai pikkiran? Didok Jesus, “Pasti denggan do parbue ni hau na denggan. Alai anggo hau na so denggan, pasti dang hasea parbuena.” (Mateus 7:17) Aha do akibatna molo diida sasahalak bahan pornografi? Asa boi taboto alusna, tabahas ma jo sukkun-sukkun na rikkot taringot pornografi.

NA DIDOK AKKA AHLI: Boi do pornografi mambahen halak gabe kecanduan. Dipatudos akka peneliti dohot terapis do i tu kokain.

Adong sahalak bawa na margoar si Brian. b Sering do ibana mangida bahan pornografi di internet. Didok ibana, “Dang adong na boi pasohon au. Hira na kesurupan do au. Olo do sappe makkitir jala haccit ulukku molo dang huida i. Berusaha do au pasohon i, alai dukkon martaon-taon tong dope au kecanduan.”

Molo nungnga kecanduan sasahalak tu pornografi, biasana ditabunihon nasida do i. Dang olo nasida manceritahon i tu na asing jala sering nasida margabus. Godang do halak na kecanduan i gabe merasa kesepian, maila, mabiar, depresi, jala muruk. Di piga-piga kasus adong do na sappe naeng manikkot. Songon on ma na didok si Serge na hampir tiap ari mandownload bahan cabul tu handphonena, “Gabe sering ma au papulikkon dirikku sian halak na asing jala mandele do au. Gabe merasa bersalah do tong au, hira na so marguna ma huhilala dirikku, kesepian, jala hira na so boi be au kaluar sian i. Maila jala mabiar do au paboahon i tu halak asa boi diurupi.”

Adong do tong akibatna nang pe holan satokkin manang dang sengaja hita mangida bahan pornografi. Tikki paboahon hatorangan di jolo ni Komite Senat Amerika Serikat, didok Dr. Judith Reisman, sahalak peneliti di bidang pornografi, “Otomatis do tarsippan gambar pornografis di utok-utok ni jolma. Jala boi do i mambahen muba reaksi kimia ni otak. Torus ma i lokkot di pikkiran ni jolma. Jala maol manang dang boi i dihapus sian otak.” Songon on ma na didok si Susan na marumur 19 taon, na so sengaja mangida situs pornografi, “Lokkot do akka gambar i di pikkiranku jala boi do i toppu ro muse tu pikkiranku. Hira na so boi i huhapus sian pikkiranku.”

INTINA: Boi do halak gabe diparhatoban pornografi jala boi do i mambahen sega halak i.—2 Petrus 2:19.

NA DIDOK AKKA AHLI: “Godang do suami istri dohot keluarga na gabe sursar alani pornografi.”—The Porn Trap, oleh Wendy dan Larry Maltz.

Boi do pornografi manegai perkawinan dohot keluarga alana

• Boi do i mambahen dang adong be kepercayaan, keintiman, dohot holong di sada perkawinan.—Poda 2:12-17.

• Boi do i mambahen halak gabe egois, dang parduli jala dang puas tu pasanganna.—Epesus 5:28, 29.

• Boi do i mambahen gabe dang denggan pikkiran dohot hasrat seksual ni halak.—2 Petrus 2:14.

• Boi do i mambahen sasahalak mangulahon seks na so patut tu pasanganna.—Epesus 5:3, 4.

• Boi do i mambahen halak gabe dang setia tu pasanganna, termasuk ma i dang setia di bagasan pikkiranna.—Mateus 5:28.

Di Bibel, diorai do suami dohot istri dang “setia” tu pasanganna. (Maleaki 2:16) Jadi boi do gabe hancur perkawinan ni nasida molo adong sian nasida na mangalakkup jala boi do i ujungna mambahen nasida gabe marsirang. Akibatna susa ma gellengna.

Boi do tong bahan pornografi manegai dakdanak. Songon on ma na didok si Brian na dipaboa nakkin, “Tikki marumur sappulu taon, dapottu ma majalah porno puna ni bapak tikki marmeami au. Jadi gabe lomo ma rohakku mangida akka gambar di majalah i sip-sip, nang pe dang huboto boasa lomo rohakku mangida akka gambar sisongon i. I ma mulana gabe kecanduan au sahat tu na balga.” Menurut sada penelitian, boi do pornografi mambahen sahalak remaja gabe pahatophu mangulahon seks. Boi do i mambahen nasida gabe sering mangulahon seks na so patut, kekerasan seksual, jala dang stabil emosi dohot psikologis ni nasida.

INTINA: Boi do pornografi manegai keluarga. Jala boi do i parohon lungun ni roha dohot masalah.—Poda 6:27.

NA DIDOK BIBEL: ‘Pamate hamu ma sian dirimuna . . . seks na so patut, akka ulaon na ramun, giot-giot ni daging na so boi dirajai, roha na jahat, dohot hahisapon.’—Kolosse 3:5.

Boi didok, sogo do roha ni Debata Jahowa c tu pornografi. Alai on dang patuduhon sala mangulahon seks. Debata do na mambahen suami dohot istri boi mangulahon seks asa marlas ni roha nasida, marsihaholongan, jala marlas ni roha ala boi i mambahen gabe adong gelleng ni nasida.—Jakobus 1:17.

Molo songon i, boasa pos rohatta pasti sogo do roha ni Debata tu pornografi? Parrohahon ma piga-piga alasan on.

• Diboto Ibana do pornografi boi manegai hangoluan.—Epesus 4:17-19.

• Dihaholongi jala dijaga Ibana do hita sian bahaya.—Jesaya 48:17, 18.

• Lomo do roha ni Jahowa asa toktong denggan sada perkawinan dohot keluarga.—Mateus 19:4-6.

• Lomo rohana asa ias pangalahotta jala taargai hak ni na asing.—1 Tessalonik 4:3-6.

• Lomo rohana asa taargai organ reproduksitta jala tapakke i tu na denggan.—Heber 13:4.

• Diboto Jahowa do pornografi i patuduhon pandangan na sala, egois, jala kejam taringot seks.—1 Musa 6:2; Judas 6, 7.

INTINA: Boi do pornografi mambahen sega hubungan ni sasahalak tu Debata.—Rom 1:24.

Alai dipatudu Jahowa do asi ni roha tu akka halak na berusaha pasohon kecanduanna tu pornografi. Didok Bibel, “Na burju jala parasi roha do Jahowa, lambat tarrimas jala gok do holong ni roha di Ibana. Ai takkas do diboto Ibana songon dia hita ditoppa, diingot Ibana do hita orbuk.” (Psalmen 103:8, 14) Ditogihon Ibana do akka halak na serep marroha asa berusaha mandapot “asi ni rohana dohot haburjuonna” asa boi ibana diurupi Debata di tikki na dihaporluhon.—Heber 4:16; ida kotak “ Paluahon Diri sian Pornografi.”

Godang do halak naung diurupi Debata. Bermanfaat do i? Parrohahon ma na didok Bibel taringot akka halak na marhasil pasohon hasomalanna na so denggan, “Nungnga dipaias be hamu saonari, dipabadia, jala didok mangulahon na sittong di bagasan goar ni Tuan Jesus Kristus dohot marhite tondi parbadia.” (1 Korint 6:11) Songon Apostel Paulus, gabe boi ma nasida mandok, “Margogo do au di sude na masa, ala dilehon Debata do huaso tu au.”—Pilippi 4:13.

Songon on ma na didok si Susan naung boi pasohon kecanduanna tu pornografi, “Holan Jahowa do na boi mangurupi hita. Jadi molo tapangido asa diurupi Ibana hita jala taihutton petunjukna, pasti diurupi Ibana do hita. Dang pasombuonna hita kecewa.”