Hea do tubu di rohamu sungkunkungkun sisongon on? Molo hea, ndang holan hamu na songon i. Torop halak di liat portibi on mangarimangi sungkunsungkun na ringkot on. Boi do tadapot alusna?

Marjuta halak mandok, ”Boi!” Boasa? Alana nunga dapot nasida alus na pas tu sungkunsungkun na sian Bibel. Lomo do rohamu mamboto aha na didok ni Bibel? Jala hamu pe boi mandapot laba sian parsiajaran Bibel na so manggarar na pinarade ni Sitindangi Ni Jahowa. *

Tutu do, tingki mangalului alusna sian Bibel, deba mandok: ”Ndang adong tingkingku.” ”Maol hian antusan.” Adong muse na mandok ”Annon sai ro hamu!” Alai na deba nai asing muse do pandapotna. Dilehon nasida tingkina laho mangantusi aha na diajarhon ni Bibel. Taida ma pigapiga pangalaman:

• ”Nunga lao ahu tu gareja Katolik dohot Protestan, Kuil ugamo Hindu, dohot Wihara ugamo Budha, jala marsingkola di singkola teologia. Alai godang dope sungkunsungkunku taringot Debata na so taralusi. Dung i ro ma sahalak Sitindangi Ni Jahowa tu jabungku. Lomo rohangku manangihon alusna na sian Bibel, gabe olo ma ahu marsiajar Bibel.”—Gill, Inggris.

• ”Godang do sungkunsungkunku taringot hangoluan, alai pastor di gareja nami ndang mangalehon alus na pas. Alai sahalak Sitindangi Ni Jahowa mangalusi sungkunsungkunhu mamangke Bibel. Tingki disungkun halak i tu ahu olo dope mangantusi na asing, las rohangku mangoloi.”—Koffi, Benin.

• ”Nunga leleng sungkunsungkun rohangku songon dia do panghilalaan ni halak naung mate. Porsea do ahu ndang adong be pardomuan ni na mate tu na mangolu, alai lomo rohangku mamboto songon dia alus ni Bibel. Alani i, marsiajar Bibel ma ahu tu donganku sahalak Sitindangi.”—José, Brasil.

• ”Sai hujahai Bibel alai ndang boi huantusi. Dung i ro ma Sitindangi Ni Jahowa jala tangkas ma dipatorang angka surirang ni Bibel. Lomo dope rohangku laho mangantusi angka na asing.”—Dennize, Meksiko.

• ”Sungkunsungkun do rohangku, disarihon Debata do ahu? Dung i martangiang ma ahu tu Debata na adong di Bibel. Marsogot nai dituktuk Sitindangi ma pintu ni jabungku jala huoloi ma marsiajar Bibel.”—Anju, Nepal.

Sude pangalaman on paingothon hita tu hata ni Jesus: ”Martua ma na umboto na pogos partondionna.” (Mateus 5:3, Bibel Siganup Ari) Tutu, nunga disuanhon hian di roha ni sude jolma asa manarihon na porlu tu partondion. Holan Debata do na boi manggohi haporluon i, marhite hataNa, i ma Bibel.

Aha do na hombar tu marsiajar Bibel? Aha do labana tu hita? Dialusi ma sungkunsungkun on di artikel na mangihut.