1. Haboion aha do na adong di hita na boi mangurupi hita maniru Jahowa?

DITOMPA Jahowa hita mardongan haboion mangantusi songon dia panghilalaan ni angka dongan na asing, nang pe ndang tataon na dihilala nasida. (Jaha Epesus 5:1, 2.) Songon dia haboion on mangurupi hita boi maniru Jahowa? Jala boasa porlu manat hita mamangke haboionta on?

2. Songon dia panghilalaan ni Jahowa tingki susa hita?

² Nunga dibagabagahon Jahowa tu hita hangoluan na sun denggan na so adong be sitaonon. Angka na nimiahan ni tondi dohot ”birubiru na asing” boi manatap hangoluan salelengna, di surgo manang di tano on. (Johannes 10:16; 17:3; 1 Korint 15:53) Alai diantusi Jahowa do holso ni rohanta tingki manaon na bernit hita saonari on. Hansit do roha ni Jahowa tingki masa hasusaon tu angka naposo ni Jahowa najolo di tano Misir. ”Dohot ibana (Debata) targogot.” (Jesaya 63:9) Jala, tingki bangso Israel pajongjonghon bagas joro jala nasida mabiar tu angka musu, diantusi Jahowa do panghilalaan nasida i. Dipapos Ibana nasida:  ”Ai manang ise na manjama hamu, anak ni matana (Debata) jinamana disi.” (Sakaria 2:12) Dos songon sada ina na manghaholongi ianakhonna, dihaholongi Jahowa angka naposoNa jala lomo rohaNa mangurupi nasida. (Jesaya 49:15) Maniru holong ni Jahowa ma hita tingki taantusi panghilalaan nasida jala boi bahenonta songon di situasi nasida.—Psalmen 103:13, 14.

3. Boha do panghilalaan ni Jesus tu hasusaan ni jolma?

³ Diantusi Jesus do panghilalaan ni angka jolma tingki susa nasida nang pe ndang hea dihilala hasusaan nasida i. Umpamana, diantusi ibana do hasusaan ni jolma. Digabusi angka sintua ni malim jolma di tingki i, jala dibahen angka parenta na borat na so sian Debata. Mabiar do jolma tu angka sintua ni malim on. (Mateus 23:4; Markus 7:1-5; Johannes 7:13) Nang pe ndang mabiar jala ndang porsea Jesus tu gabus ni angka sintua ni malim i, alai boi do diantusi ibana panghilalan ni jolma na disi. Tingki diida Jesus roa ni pambahenan nasida, malengleng ateatena. Ndang adong na mangurupi nasida, ”songon birubiru na so marparmahan” (Mateus 9:36) Sian Debata do Jesus marsiajar laho manghaholongi jolma huhut ”marasi roha jala pardengganbasa.”—Psalmen 103:8.

4. Tingki diida Jesus hasusaan ni jolma, aha do na diulahon ibana?

⁴ Tingki diida Jesus hasusaan ni jolma, diurupi ma nasida alani holongna. Dos songon Amana do ibana. Umpamana, tingki dao sisean ni Jesus marbarita na uli mansai loja dihilala nasida jala porlu maradi di inganan na so ribur. Alai diida Jesus godang halak na paimahon ibana. Diantusi do molo nasida manghaporluhon pangurupion sian ibana. Alani i, ”gabe godang ma dipodahon tu nasida,” nang pe loja Jesus.—Markus 6:30, 31, 34.

5, 6. Molo naeng maniru holong ni Jahowa hita, aha do na ingkon taulahon? Bahen tudosan. (Ida ma gombar di mula ni parsiajaran.)

⁵ Asa adong holong di hita songon holong ni Jahowa, aha do na porlu taulahon? Pingkirhon ma pengalaman ni donganta on. Adong sada donganta baoa na poso, goarna si Alan. Dipingkirhon si Alan do hata ni Jesus na mandok: ”Ia i na pinangido muna, naeng bahenon ni halak tu hamu, i ma bahen hamu tu nasida.” (Lukas 6:31) Disungkun ibana ma dirina, ’Aha do na huhirim asa bahenon ni jolma tu ahu?’ Jala ninna ma, ’lomo rohangku asa marbola nasida rap dohot ahu!’ Alai ndang boi be marlojong angka donganta na matua on tarlumobi laho marbola. Jadi, na ingkon sungkunon ni si Alan tu dirina i ma, ’aut sugari matua ahu songon nasida, aha do na huhirim bahenon ni jolma tu ahu?’

⁶ Nang pe poso dope si Alan, marsitutu do ibana laho mangarimangrimangi boha do panghilalaanna molo nunga matua ibana. Dilehon ibana do roha dohot tingkina laho manghatai dohot manangihon angka donganta naung matua on. Dung i, diboto ibana ma molo nasida maol manjaha Bibel jala maol marbarita na uli sian jabu tu jabu. Diparrohahon si Alan ma na boi do ibana mangurupi nasida jala naeng mangurupi nasida sian nasa gogona. Tingki taantusi panghilalaan ni donganta jala tapatudu holong tu nasida, na maniru Debata Jahowa ma hita disi.—1 Korint 12:26.

7. Songon dia hita boi mangantusi hasusaan ni angka donganta?

⁷ Ndang sai mura laho mangantusi hasusaan ni angka halak, tarlumobi molo ndang hea tahilala. Umpamana, godang angka donganta susa alani sahit manang adong pangarupaon manang ala nunga lam matua nasida. Na asing manaon sitaonon na umborat alani godang sipingkironna na so marnasae manang alani lungun ni roha na malobihu. Deba  alani dosa na diulahon di tingki naung salpu. Deba nai alani sahalakna pagodanggodanghon ianakhonna manang ala paraloan na ro sian keluarga na so sahaporseaon. Ganup hita marsadasada sai adong do sitaononta be. Alai hasusaan na umborat i ma molo ndang sai sapingkiran hita. Alai nang pe ndang sapingkiran hita, tubu do di roha laho patudu holong jala naeng mangurupi nasida. Jadi, aha do na ingkon taulahon? Ganup hita marsadasada manghaporluhon pangurupion na marasingasing. Molo denggan tatangihon nasida jala marsitutu laho mangantusi panghilalaan nasida, taboto ma songon dia laho mangurupi nasida. Boi ma tapaingot nasida taringot panghilalaan ni Jahowa tu hasusaan nasida manang talehon pangurupion tu nasida. Molo taulahon on, na maniru Jahowa ma hita disi.—Jaha Rom 12:15; 1 Petrus 3:8.

8. Aha do na mambahen Jesus gabe sahalak na pardenggan basa?

⁸ Pardenggan basa do Jahowa tu saluhut jolma. (Lukas 6:35) Songon Amana i do Jesus pardenggan basa. Aha do na mangurupi Jesus gabe pardenggan basa tingki di tano on? Boi dirimangrimangi ibana songon dia panghilalaan ni halak tu panghataion dohot parniulaonna. Umpamana, sada borua na mangulahon na rorang ro manjonok tu ibana. Tumatangis ibana manetekhon iluilu di pat ni Jesus. Boi do diparrohahon Jesus na mangangku sala jala manolsoli do borua i di angka saluhut dosana. Aut sugari ndang dijangkon Jesus, boi mambahen mandele borua i. Jadi dipuji Jesus do borua i taringot usaha dohot angka na denggan na diulahon ibana. Jadi disalpuhon Jesus ma saluhut angka dosana. Suang songon i, dipatudu Jesus do lambok ni roha tingki manghatai ibana dohot halak Parise na so manghalomohon na diulahon Jesus tu borua i.—Lukas 7:36-48.

9. Aha do na boi mangurupi hita asa gabe pardenggan basa songon Jahowa? Bahen tudosan.

⁹ Songon dia hita boi maniru Jahowa gabe pardenggan basa? Tapingkiri ma jo andorang so tahatahon manang so taulahon sada ulaon asa boi hita lambok tu dongan jala ndang mambahen hansit roha nasida. Na digoari halak Kristen didok si Paulus ”Na so patut parbadabada anggo naposo ni Tuhan i, alai tama basar maradophon saluhut.” (2 Timoteus 2:24) Umpamana, pingkirhon ma songon dia hita boi mardenggan basa di situasi on: Molo toketa ndang mangulahon ulaonna dohot denggan, aha do na ingkon taulahon? Molo adong donganta ndang ro marpungu pigapiga bulan, aha do na laho dohononta tu ibana? Tingki marbarita na uli jala didok parjabu ndang adong tingkina laho manghatai, boha do hita patuduhon molo sahalak na pardenggan basa do hita? Molo disungkun tunggani boru muna taringot aha na laho ulahononmu, songon dia do hita patuduhon denggan ni basa tingki manghatai tu ibana? Jadi porlu tarimangi songon dia do panghilalaan ni halak. Rimangi ma songon dia panghorhon ni panghataionta tu nasida. Dung i taboto ma aha na laho taulahon jala tahatahon asa boi gabe pardenggan basa songon Jahowa.—Jaha Poda 15:28.

10, 11. Songon dia do hita boi marsiajar sian Jahowa gabe sahalak na marbisuk? Bahen tudosan.

¹⁰ Marbisuk do Jahowa, jala boi do diida Ibana aha na laho masa tu ari na naeng ro. Nang pe ndang taboto aha na laho masa tu ari na naeng ro, alai boi do hita marbisuk. Songon dia? Andorang so mambahen sada haputusan, porlu tapingkirhon manghorhon aha do on tu hita dohot tu halak? Unang ma hita songon halak Israel. Ndang dipingkirhon aha pangkorhonna tu nasida molo ndang dioloi Debata Jahowa. Ndang  arga di nasida paralealeonna tu Jahowa dohot sude naung pinatupa ni Jahowa tu nasida. Ala diantusi si Musa do on jala diantusi ibana molo halak Israel laho mangulahon angka na geduk, didok ibana: ”Ai bangso parroha mago do nasida, jala ndang adong roha panimbangon di bagasan roha nasida. Oe aut marbisuk ma nasida nian marateatehon hata i, asa diantusi roha nasida nian na masa tu nasida sogot!”—5 Musa 31:29, 30; 32:28, 29.

¹¹ Umpamana, tingki mardalani hamu rap dohot hallet muna, ingot ma somalna tingki lomo roha tu sasahalak, maol do mangarajai panghilalaan dohot giotgiot ni daging na sala. Dibahen i, unang ma ulahon hamu na boi manegai paralealeon muna na arga tu Jahowa. Alai marbisuk ma hamu, padao hamu ma angka na boi mangelaela tu ulaon na sala. Tangihon ma sipasingot na marbisuk sian Jahowa: ”Molo dibereng na bisuk ro parmaraan, dipasiding do i; alai ianggo na loahon, ditorushon do dalanna gabe marmara ma ibana.”—Poda 22:3, Bibel Siganup Ari.

12. Songon dia do pingkiranta boi parohon jea tu hita?

¹² Sahalak na marbisuk boi mangarajai pingkiranna. Pingkiranta boi mangurupi manang boi parohon jea tu hita. Songon api boi do mangurupi alai boi do mambahen jea. Tingki tu na denggan tapangke api, boi mangalompa sipanganon na tabo. Alai molo so manat tapangke boi do manutung jabunta manang boi pamate hita. Suang songon i ma, denggan do molo talehon pingkiranta laho mamingkirhon angka na boi taparsiajari sian Jahowa. Alai molo angka na rorang do tapingkirhon songon pangalangkupon, lam leleng gabe tubu ma roha laho mangulahon i. Sega ma paralealeonta tu Jahowa.—Jaha Jakobus 1:14, 15.

13. Aha do na sai dipingkiri si Hawa taringot parngoluonna?

¹³ Boi do hita marsiajar sian borua na parjolo i ma si Hawa. Nunga dipatikhon Jahowa na so jadi panganon ni Si Adam dohot si Hawa parbue ni hau sian ”hau parbinotoan ni na denggan dohot na roa.” (1 Musa 2:16, 17) Alai balik do dipaboa Sibolis tu si Hawa: ”Ndang na tutu hamu mate. Ai diboto Debata do sadari dipangan hamu sian i, tonggor ma mata muna, gabe doshon Debata hamu umboto na denggan dohot na roa.” Maranganangan do si Hawa lam denggan parngoluonna molo boi mamutushon sandiri aha na dumenggan. Jala sai i ma dipingkirpingkiri ibana: ”dung i, sai dipanotnoti boruboru i ma parbue i, jala pia matana marnida.” Dung i aha ma na masa? ”Jadi diputikhon sian parbuena i jala dipangan, dilehon ma dohot tu sinondukna sian i, gabe dipangan.” (1 Musa 3:1-6) Hinorhon ni i, ”bongot dosa i tu  portibi on marhite sian sada halak jala marhite dosa i ro hamatean.” (Rom 5:12) Sasintongna, ndang porlu pingkirhonon ni si Hawa angka na sala!

14. Aha do sipasingot na nidok ni Bibel taringot parmainanon?

¹⁴ Ndang na parmainanon na diulahon si Hawa. Alai Bibel mandok unang ma tapingkirpingkirhon taringot parmainanon. Didok Jesus: ”Manang ise na mamereng boruboru huhut marsangkap na roa, nunga saut dilangkupi i di bagasan rohana.” (Mateus 5:28) Si Paulus pe pasingothon: ”Unang ma sarihon hamu daging muna laho manungguli hisaphisap.”—Rom 13:14.

15. Arta dia ma na umarga di hita, jala boasa?

¹⁵ Bibel pe mandok ingkon talehon do roha dohot pingkiranta laho pasonanghon roha ni Jahowa ndang laho mamingkirhon hamoraon. Nata pe mamora sasahalak, ndang boi hamoraon i paluahon ibana. (Poda 18:11) Didok Jesus na dipaotooto do sasahalak molo dipapungu arta di portibi on, ndang na patujolohon lomo ni roha ni Jahowa. Alai ndang ”mamora ibana di Debata.” (Lukas 12:16-21) Alai molo tapapungupungu ”arta di banua ginjang” jala mangulahon na dihalomohon rohaNa, las ma rohaNa jala hita pe marlas ni roha. (Mateus 6:20; Poda 27:11) Paralealeon tu Jahowa dao umarga sian manang aha pe.

16. Aha do na boi mangurupi hita tingki holsoan?

¹⁶ Molo adong do giot ni rohanta naeng mamora di portibi on, boi do i mambahen hita lam holsoan. (Mateus 6:19) Didok Jesus, maol do halak na sai holsoan laho patujolohon Harajaon ni Debata di parngoluon nasida. (Mateus 13:18, 19, 22) Pigapiga halak holsoan tu angka mara na boi tipa tu nasida. Alai molo maholsohu hita, boi do on mambahen sahit manang gabe humurang ma haporseaonta tu Jahowa. Sasintongna, ingkon pos do rohanta tu Jahowa na boi mangurupi hita. Bibel mandok ”holsoholso di bagasan roha ni baoa patungki ibana, alai anggo hata na denggan pahinsahon rohana muse.” (Poda 12:25) Jadi, molo holsoan hita, patolhas ma i tu dongan sahaporseaon na tangkas mananda hamu. Boi do pangidoonmu pangurupion sian natuatua, dongan saripe, aleale muna asa manjujui hamu marpos ni roha tu Jahowa jala asa unang maholsohu hita.

17. Songon dia do Jahowa boi mangurupi tingki holsoan hita?

¹⁷ Umantusan do Jahowa sian ise pe taringot panghilalaanta jala boi mangurupi tingki holsoan hita. Si Paulus manurathon: ”Unang holsohon hamu agia aha; alai sandok pabotohon hamu ma tu Debata pangidoan muna marhitehite tangiang dohot elehelek mardongan mauliate! Jala dame ni Debata na sumurung sian saluhut roha, i ma mangaramoti angka ateate dohot pingkiran muna di bagasan Jesus Kristus!” (Pilippi 4:6, 7) Jadi tingki holsoan hamu, pingkirhon ma pangurupion na boi dilehon Jahowa marhitehite angka donganta, sintua, naposo haposan, surusuruan, dohot Jesus asa sai togu paralealeon muna tu Ibana.

18. Songon dia do haboionta laho mangarimangrimangi boi mangurupi hita?

¹⁸ Songon naung taparsiajari, na maniru Jahowa ma hita molo tapangke haboionta laho mangantusi panghilalaan ni dongan na asing. (1 Timoteus 1:11; 1 Johannes 4:8) Marlas ni roha ma hita molo tapatudu holong dohot denggan ni basa tu halak na asing. Molo tapingkiri panghorhon ni parniulaonta jala molo tapasiding roha na maholsohu. Tarimangi ma songon dia parngoluonta di pamarentaon ni Harajaon ni Debata jala taulahon ma na dumenggan na boi taulahon laho maniru Jahowa.—Rom 12:12.