1, 2. Aha do na mambahen jolma marimbar sian binatang?

SUMURUNG do utohutok ni jolma sian na asing. Umpamana, boi do jolma marsiajar sada bahasa. Jala bahasa mambahen hita boi manjaha, manurat, mangkatai dohot mangantusi aha na tatangihon. Gabe boi ma hita martangiang dohot mangendehon ende pujian tu Jahowa. Ndang diantusi angka ilmuwan songon dia utohutok ni jolma boi mangulahon on.

² Sada silehonlehon sian Jahowa do molo boi mangantusi sada bahasa. (Ps. 139:14; Pgk. 4:11) Godang do na mambahen hita marimbar sian binatang. Ditompa Jahowa do jolma ”tumiru rupana”. Diloas do hita mambahen haputusan sandiri di ngolunta. Alani i, tapangke ma haboionta mangantusi bahasa laho manomba dohot mamuji Jahowa.—1 Mus. 1:27.

3. Aha do dilehon Jahowa asa marbisuk hita?

³ Marhite Bibel, dipaboa Jahowa do tu hita songon dia manomba dohot mamuji Ibana. Nunga dipatupa  Bibel lobi sian 2.800 bahasa. Molo tarimangi Bibel, taantusi ma songon dia pingkiran ni Jahowa. (Ps. 40:6; 92:6; 139:17) Pingkiran ni Jahowa mambahen hita marbisuk jala manogu hita tu hangoluan salelengna.—Jaha 2 Timoteus 3:14-17.

4. Aha do lapatan ni hata mangarimangi, jala aha do sungkunsungkun na laho taulas?

⁴ Lapatan ni hata mangarimangi, i ma mangalehon pingkiran laho pahusorhusor ulaon ni Jahowa. (Ps. 77:12; Poda 24:1, 2) Godang do laba na tadapot molo tarimangi aha na taparsiajari taringot Jahowa dohot Jesus. (Joh. 17:3) Di artikel on, taulas ma sungkunsungkun on: Asa mura tarimangi, songon dia do isara manjaha na denggan? Aha do na ingkon tarimangi? Jala aha do na ingkon taulahon asa tongtong mangarimangi jala mandapot laba sian i?

5, 6. Aha do na mangurupi asa taingot jala taantusi na tajaha?

⁵ Adong do ulaon na so pola talehon pingkiranta. Umpamana, marhosa, mardalan pat dohot marsepeda. Alai, tingki manjaha ingkon talehon do pingkiranta. Ra, olo do tu na asing pingkiranta tingki manjaha. Aha do na boi taulahon asa unang masa on? Ringkot do mangalehon pingkiran asa taantusi lapatan ni na tajaha. Dung sae sada paragraf manang subjudul tajaha, rimangi ma aha na ringkot di paragraf i. Pingkirhon ma aha parsiajaranna tu hamu, jala marsitutu ma mangantusi.

⁶ Ilmuwan paboahon, ingkon marsoara do hita manjaha asa mura taingot. Alani i do, Sitompa hita mandok tu si Josua asa marsoara manjaha buku ni Patik i huhut sai dipingkirpingkiri. (Jaha Josua 1:8.) Molo marsoara hita manjaha Bibel, lam mura ma hita mamingkirhon dohot mangingot na tajaha.

7. Andigan do tingki na denggan laho mangarimangi? (Ida gombar di mula ni parsiajaran.)

⁷ Ingkon marsitutu do hita asa boi mangarimangi jala mangalehon pingkiran tingki marsiajar. Alani i, unang ma tingki loja hita mangulahon on, jala tapillit ma inganan na so adong manggugai pingkiranta. Tingki laho modom do si Daud mangarimangi sude ulaon ni Jahowa. (Ps. 63:7) Molo Jesus, dilului do inganan na so adong manggugai pingkiranna laho mangarimangi dohot martangiang tu Jahowa.—Luk. 6:12.

8. (a) Aha do na boi tarimangi? (b) Songon dia do pangkilalaan ni Jahowa molo tabaritahon taringot Ibana?

⁸ Asing ni na tajaha di Bibel, adong dope na boi tarimangi. Umpamana, tingki taida na tinompa ni Jahowa, tasungkun ma dirinta, ”Aha do na boi huparsiajari sian on taringot Jahowa?” Dung i, mandok mauliate ma hita tu Jahowa jala tapaboa ma tu na asing. (Ps. 104:24; Ul. 14:17)  Las do roha ni Jahowa tingki tarimangi, tatangiangkon jala tabaritahon tu na asing taringot Ibana. Bibel paboahon tu hita, ”Tarsurat di adopanna sada buku parningotan di halak angka sihabiari Jahowa dohot angka na pasangap goarna.”—Mal. 3:16.

9. (a) Aha do na didok si Paulus tu si Timoteus? (b) Aha do na porlu tapingkiri hombar tu ulaon marbarita?

⁹ Apostel Paulus mandok tu si Timoteus asa mangarimangi songon dia jamitana, pangalahona dohot pangajarionna mangkorhon tu na asing. (Jaha 1 Timoteus 4:12-16.) Hita pe boi do mangulahon on. Umpamana, talehon ma tingki laho mamingkirhon aha na porlu tu parsiajar Bibelta. Tapingkiri ma sungkunsungkun dohot tudosan na mangurupi parsiajar Bibelta lam togu di partondion. Molo taulahon on, lam togu ma haporseaonta jala lam hiras ma rohanta mangurupi halak marsiajar Bibel. Marlaba do molo olo hita mangarimangi andorang so marbarita na uli. (Jaha Esra 7:10.) Ra, boi do tajaha sada bindu sian buku Ulaon ni Apostel asa lam hiras rohanta marbarita. Boi do muse tarimangi ayat ni Bibel dohot buku na laho tapasahat andorang so marbarita. (2 Tim. 1:6) Tapingkirhon ma hata na laho tapasahat tu halak na tajumpangi. Molo taulahon on, lam denggan ma hita mamangke Bibel tingki marbarita.—1 Kor. 2:4.

10. Aha do muse na boi tarimangi?

 ¹⁰ Tarimangi ma catatan na tabahen tingki manangihon jamita di parpunguan dohot parpunguan bolon. Tingki mangulahon on, tasungkun ma dirinta, ”Aha do na huparsiajari sian Hata ni Debata dohot organisasiNa?” Tarimangi ma muse parbinotoan na dipaboa marhite majalah Joujou Paboahon dohot Sadarlah! na dipabinsar ganup bulan. Tarimangi ma publikasi na baru dirilis di parpunguan bolon. Tingki manjaha sada pengalaman di Buku Tahunan, tarimangi ma songon dia on marlaba tu hita. Tingki tajaha majalah manang buku, tagarisi ma aha na ringkot huhut tabahen catatan na porlu. On boi mangurupi hita tingki paradehon na porlu laho manjumpangi muse, penggembalaan manang marjamita. Na rumingkot, molo tarimangi na tajaha, boi ma i hona tu rohanta. Jala taronjar ma rohanta mandok mauliate tu Jahowa ala dilehon parsiajaran na denggan.

11. Aha do buku na rumingkot laho tarimangi jala songon dia do on mangurupi hita? (Ida surat na di toru.)

¹¹ Buku na rumingkot laho tarimangi, i ma Bibel. Alai, songon dia do molo di sada tingki diorai hamu manjaha Bibel? * Ndang adong na boi mangambati hita mangarimangi aha naung taparsiajari, songon ayat hasolomon ni rohanta dohot ende pujipujian. (Ul. 16:25) Marhite tondi parbadia boi ma taingot aha naung hea taparsiajari na mangurupi hita marsihohot.—Joh. 14:26.

12. Songon dia do hamu mangatur asa boi manjaha Bibel ganup ari?

¹² Songon dia do hamu mangatur tingki asa boi manjaha Bibel ganup ari? Pigapiga ari di bagasan saminggu, tajaha jala tarimangi ma panjahaion Bibel na adong di Singkola Panghobasion Teokratis. Di ari na asing, tajaha ma poda dohot ulaon ni Jesus sian buku Mateus, Markus, Lukas dohot Johannes. (Rom 10:17; Heb. 12:2; 1 Ptr. 2:21) Asa lam tangkas taantusi aha na masa di ngolu ni Jesus, talului ma hatorangan sian publikasi na asing.—Joh. 14:6.

13, 14. Boasa ringkot mangarimangi ulaon ni Jahowa dohot Jesus? Aha do pangkorhon ni on?

¹³ Molo tarimangi taringot Jahowa dohot Jesus, on mangurupi hita gabe halak na matoras di partondion jala marhaporseaon na togu. (Heb. 5:14; 6:1) Molo holan saotik talehon tingki laho mangarimangi ulaon ni Debata, boi do sega paralealeonta tu Jahowa jala ndang tahalomohon be Debata. (Heb. 2:1; 3:12) Jesus paingothon, molo ndang tatangihon Hata ni Debata ”di bagasan roha na bonar jala na denggan” gabe ndang marhabengeton be hita.  Jala mura ma hita ”hapusohan binahen ni pangkolsohon, hamoraon dohot hahisapon ni ngolu on”.—Luk. 8:14, 15.

¹⁴ Alani i, tongtong ma tarimangi Bibel asa lam tatanda Jahowa. Dung i, taronjar ma rohanta maniru parange ni Jahowa. (2 Kor. 3:18) Tongtong ma taparsiajari taringot Debata jala tatiru ma Ibana salelengna. Sada hak na sumurung do on!—Pjm. 3:11.

15, 16. (a) Aha do labana tu hita ala mangarimangi ulaon ni Jahowa dohot Jesus? (b) Boasa maol hita mangarimangi? Jala aha do na boi taulahon?

¹⁵ Mangarimangi ulaon ni Jahowa dohot Jesus, mangurupi hita marsihohot di hasintongan. Molo hiras rohanta marbarita na uli, on marpangkorhon tu donganta dohot tu halak na tajumpangi. Jala molo tarimangi songon dia Jahowa patuduhon holongNa marhite tobusan, lam solhot ma hita tu Ibana. (Rom 3:24; Jak. 4:8) Si Mark sian Afrika Selatan, dipenjara saleleng tolu taon ala ni haporseaonna. Didok ibana ma, ”Tabo do huhilala mangarimangi ulaon ni Debata. Molo sai tarimangi ulaon ni Jahowa, sai adong do pangantusion na imbaru taboto taringot Ibana. Tingki marmetmet ni roha jala marsak ahu, hujaha jala hurimangi ma Bibel. Dame ma pingkiranku dung huulahon on.”

¹⁶ Maol do mangatur tingki laho mangarimangi Bibel di tingkinta saonari. Si Patrick sian Afrika mandok, ”Marragam do na hupingkiri ganup ari. On mambahen ahu jotjot holsoan. Alani i, andorang so hurimangi Hata ni Debata, ingkon martangiang do ahu asa tiur pingkiranku. Dung huulahon on, huhilala ma lam solhot ahu tu Jahowa jala tiur ma pingkiranku laho mangantusi Bibel.” (Ps. 94:19) Godang do laba na tadapot molo tajaha jala tarimangi Bibel ganup ari.—Ul. 17:11.

17. Songon dia do hamu mangatur tingki asa boi mangarimangi?

¹⁷ Adong do na tibu dungo asa boi manjaha, mangarimangi dohot martangiang. Na asing mangulahon on tingki arian. Ra, borngin andorang so modom do tingkimuna na denggan manjaha Bibel. (Jos. 1:8) Na rumingkot ”parhaseang hamu ma tingki” laho mangarimangi Hata ni Debata ganup ari.—Eps. 5:15, 16.

18. Aha do janji ni Debata tu halak na mangarimangi jala mangulahon hataNa?

¹⁸ Marjanji do Jahowa mangalehon pasupasu tu halak na mangarimangi jala marsitutu mangulahon hataNa. (Jaha Psalmen 1:1-3.) Jesus mandok, ”Martua ma angka na umbege hata ni Debata jala na umpeopsa!” (Luk. 11:28) Alai na rumingkot, molo tarimangi Hata ni Debata ganup ari, on mambahen las roha ni Jahowa. Marlas ni roha ma hita saonari jala mangolu salelengna di tano na imbaru.—Jak. 1:25; Pgk. 1:3.