Boasa Dang Marnatal Saksi Jahowa?

PANGOLU

Pandapot ni godangan halak

Nasida mandok: Saksi Jahowa dang marnatal ala dang porsea nasida tu Jesus.

Na Sasittongna: Halak Kristen do hami. Porsea do hami holan marhite Jesus Kristus do boi mandapot haluaon.—Ulaon ni Apostel 4:12

Nasida mandok: Marbadai do dibahen hamu na markeluarga, ala diajari hamu nasida asa unang marnatal.

Na Sasittongna: Dihaholongi hami do akka keluarga. Alani i, dipakke hami do Bibel lao mambahen martua na markeluarga

Nasida mandok: Ala dang marnatal hamu, gabe dang diboto hamu patuduhon basa ni roha, haburjuon, dohot dame di portibi on.

Na Sasittongna: Marsitutu do hami patuduhon dame dohot basa ni roha ganup ari. (Poda 11:25; Rom 12:18) Umpamana, ulaon marbarita dohot parpunguannami hombar do tu paretta ni Jesus, i ma, “Sibasabasa do i tu hamu; antong, basabasahon hamu ma i!” (Mateus 10:8) Jala, porsea do hami holan Harajaon ni Debata do na parohon dame tu portibi on.—Mateus 10:7

Boasa Dang Marnatal Saksi Jahowa?

Jesus mangalehon paretta asa taulahon ari parningotan hamamatena, dang ari hatutubuna.—Lukas 22:19, 20.
Akka apostel dohot sisean ni Jesus di abad na parjolo dang marnatal. New Catholic Encyclopedia mandok, “ari Hatutubu ni Jesus on dibahen hira-hira taon 243 [D.M.],” marratus taon dukkon mate apostel na parpudi.
Dang adong tanda na patuduhon molo Jesus tubu tanggal 25 Desember; dang adong dipaboa di Bibel tanggal piga Jesus tubu.
Porsea do hami molo Natal dang dihalomohon Debata, ala Natal hasomalan ni halak parbegu.—2 Korint 6:17.

Boasa Olo Saksi Jahowa Dihasogohon Ala Dang Marnatal?

Nang pe diboto godang halak molo Natal hasomalan ni halak parbegu jala dang hombar tu Bibel, alai tong do nasida marnatal. Alani i, porlu do pikkirhonon ni nasida: Boasa halak Kristen dang boi mangulahon i? Boasa gabe parsoalan i?

Dijujui Bibel do hita asa mamakke pikkiran lao manimbangi lomo ni roha ni Debata. (Rom 12:1, 2) On mangajari hita asa mangargai hasittongan. (Johannes 4:23, 24) Diargai hami do pandapot ni halak. Alai, diihutton hami do prinsip ni Bibel nang pe gabe sogo roha ni halak mangida hami.

Nang pe dang marnatal, diargai hami do hak ni halak lao marnatal. Dang olo hami mangorai halak lao marnatal.