Lao mangingot ari hamamate ni Jesus, i ma na didok “Borngin Parningotan ni Tuan”, diihutton hami do sesuai tu na didok ni Bibel. (1 Korint 11:20) Alai godang do halak saonari na mangarayahon i, dang sesuai tu na didok di Bibel.

 Tujuan ni Borngin Parningotan on, i ma lao mangingot jala mandok mauliate tu tobusan ni Jesus na mate humokkop hita. (Mateus 20:28; 1 Korint 11:24) Jala dang sada sakramen on manang ritual manang kegiatan keagamaan na mambahen sasahalak asa dipasu-pasu manang asa disesa dosana. a Didok di Bibel, dang ala na mangulahon ritual keagamaan asa disesa dosatta, alai ikkon porsea do hita tu Jesus.​—Rom 3:25; 1 Johannes 2:1, 2.

 Diparettahon Jesus do tu akka siseanna asa dirayahon nasida Borngin Parningotan ni Tuan. Alai dang takkas dipaboa Jesus sadia jotjot i ikkon diulahon nasida. (Lukas 22:19) Didok piga-piga halak, ikkon dirayahon nasida do i ganup bulan, ganup minggu, ganup ari, piga-piga hali di bagasan sadari manang ikkon jotjot dirayahon. Alai adong do piga-piga na ikkon taparrohahon.

 Dibahen Jesus do Borngin Parningotan pas di tikki perayaan Paska ni halak Jahudi. Jala di tikki i do tong ibana mate. (Mateus 26:1, 2) Alai dang na kebutulan i masa. Dipatudos Bibel do tobusan ni Jesus i dohot biru-biru ni Paska. (1 Korint 5:7, 8) Sahali sataon do perayaan ni Paska i dirayahon. (2 Musa 12:1-6; 3 Musa 23:5) Alani i do Borngin Parningotan ni Jesus on diulahon halak Kristen di abad na parjolo sahali sataon. b Jala sesuai tu na didok di Bibel, i ma na diihutton Saksi Jahowa.

 Cara ni Jesus mangulahon Borngin Parningotan on dang holan mangurupi hita sadia jotjot lao mangulahon i, alai andigan hita ikkon mangulahon i. Dibahen Jesus Borngin Parningotan i dung bonom mataniari tanggal 14 Nisan 33 M sesuai tu kalender ni halak Jahudi. (Mateus 26:18-20, 26) Songon na diulahon halak Kristen di abad na parjolo, songon i ma na diulahon hami ganup taon pas di tanggal 14 Nisan. c

 Nang pe tanggal 14 Nisan 33 M di ari jumat, alai boi do tong ari i dang sarupa ganup taon. Jadi lao manottuhon andigan do tanggal 14 Nisan ganup taon dibahen hami ma cara na sarupa songon di jaman ni Jesus. Alai dang dipakke hami cara na dibahen di kalender ni halak Jahudi modern. d

 Dipakke Jesus do roti na so marragi dohot anggur merah sisa sian perayaan Paska lao tu ulaon di Borngin Parningotan. (Mateus 26:26-28) Songon na dibahen Jesus, dibahen hami do roti na so marragi na so dicampur dohot na asing dohot anggur na murni na so dicampur manang aha pe, alai dang jus anggur.

 Songon akka agama na asing, dipakke do ragi lao mambahen roti i. Hape di Bibel, jotjot do ragi i dipakke lao manggombarhon dosa dohot hajahaton. (Lukas 12:1; 1 Korint 5:6-8; Galatia 5:7-9) Jadi, holan roti na so marragi do na cocok manggombarhon daging ni Jesus na so mardosa. (1 Petrus 2:22) Adong do muse na diulahon nasida na so sesuai tu na didok Bible. Digatti nasida do anggur murni dohot jus anggur, ala diorai piga-piga gereja do penggunaan alkohol. Hape dang adong didok Bibel dang boi manginum alkohol.​—1 Timoteus 5:23.

 Holan lambang do roti na so marragi na manggombarhon daging ni Jesus dohot anggur merah na manggombarhon mudar ni Jesus na dibahen di Borngin Parningotan i. Dang na gabe muba secara mukjizat roti i gabe daging ni Jesus jala anggur i gabe mudar ni Jesus, songon na dipikkirhon piga-piga halak. Lao mamboto taringot i, parrohahon ma piga-piga alasan na didok di Bibel.

•   Di patik ni Debata diorai do sasahalak mangallang mudar. (1 Musa 9:4; Ulaon ni Apostel 15:28, 29) Molo diparettahon Jesus do akka siseanna manginum mudarna, berarti na manuru nasida do Jesus disi asa mangalanggar patik ni Debata. Alai dang mungkin didok Jesus asa bahenon ni nasida songon i. Alana dang hea diparettahon Jesus manang ise pe mangalanggar patik ni Debata.​—Johannes 8:28, 29.

•   Molo tutu do diinum akka siseanna i mudar ni Jesus, dang mungkin didok Jesus “na lao diusehon” mudarna. Hata on patuduhon na so dipelehon Jesus dope dirina di tikki i.​—Mateus 26:28.

•   “Dang na lao mulak-ulak [Jesus] mamelehon dirina”. (Heber 9:25, 26) Jadi molo muba do roti i gabe daging ni Jesus jala anggur i gabe mudar Jesus na dibahen di tikki Borngin Parningotan ganup taon, berarti na mulak-ulak do Jesus mamelehon dirina.

•   Didok Jesus do, “Toktong ma ulahon on bahen parningotan di au.” Dang didok ibana ‘torus ma pelehon au’.​—1 Korint 11:24.

 Godang do halak na porsea molo roti i muba gabe daging ni Jesus, jala anggur gabe mudar ni Jesus, sesuai tu ajaran na dihaporseai nasida sian akka ayat na adong didok di Bibel. Contohna, godang do terjemahan ni Bibel na mandok tikki didok Jesus taringot anggur, diterjemahon do i gabe “On ma mudarhu”. (Mateus 26:28) Alai sasittongna hata ni Jesus i ikkon diterjemahon gabe, “On ma manggombarhon mudarhu.” e Alana, jotjot do Jesus mamakke contoh tikki mangajari.​—Mateus 13:34, 35.

 Di tikki Borngin Parningotan na diulahon Saksi Jahowa, holan saotik do halak na mangallang roti dohot na manginum anggur. Boasa?

 Mudar ni Jesus na durus lao mambahen sah “parjanjian na imbaru” na lao manggattihon parjanjian na dibahen Debata dohot bangso Israel najolo. (Heber 8:10-13) Holan halak na dohot tu parjanjian baru i do na boi mangallang roti jala manginum anggur di tikki Borngin Parningotan. Jadi dang sude halak Kristen na dohot, alai holan “halak na tarjou” na dipillit Debata do. (Heber 9:15; Lukas 22:20) Nasida ma na lao mamaretta rap dohot Jesus di surgo. Jala didok di Bibel holan 144.000 do godang ni nasida.​—Lukas 22:28-30; Pangungkapon 5:9, 10; 14:1, 3.

 Akka “punguan na metmet” on, nasida do na lao mamaretta rap dohot Kristus. Alai akka na dohot tu “punguan bolon”, nasida ma na lao mangolu salelengna di tano on. (Lukas 12:32; Pangungkapon 7:9, 10) Nang pe dang dohot hita mangallang roti dohot manginum anggur di Borngin Parningotan, alai mandok mauliate do hita ala rade Jesus mangalehon dirina gabe tobusan tu hita.​—1 Johannes 2:2.