Ai na Dipaksa Saksi Jahowa do Akka Halak asa Ganti Agama?

PANGOLU

Dang. Nungnga hea adong hatorangan taringot on di majalahnami, i ma di Menara Pengawal, “Sala do molo mamaksa halak asa ganti agama.” a Hami dang mamaksa halak, alana:

Dang hea Jesus mamaksa halak asa manjalo ajaranna. Diboto ibana do holan saotik na manjakkon ajaranna. (Mateus 7:13, 14) Tikki piga-piga halak dang olo be gabe siseanna jala dang lomo be rohanasida tu ajaranna, dang dipaksa Jesus nasida lao mangihutton ibana.—Johannes 6:60-62, 66-68.
Diajari Jesus do akka siseanna asa unang mamaksa halak lao ganti agama. Alani i, dang hea sisean ni Jesus mamaksa halak asa manangihon barita na uli taringot Harajaon ni Debata. Alai, nasida mangalului na olo manangihon.—Mateus 10:7, 11-14.
Marisuang do molo ganti agama alani dipaksa, alana Debata marlomo ni roha asa hita manomba Ibana sian ias ni rohanta.—5 Musa 6:4, 5; Mateus 22:37, 38.

Ai na lao mamaksa halak asa ganti agama do umbahen na marbarita na uli hami?

Tutu do hami pasahatton barita sian Bibel “sahat ro di ujung ni tano on,” jala hami mangulahon i “di hatoropan, nang marsasajabu pe,” songon na diajarhon Bibel. (Ulaon ni Apostel 1:8; 10:42; 20:20) Songon halak Kristen di abad na parjolo, sipata didok do hami mamaksa halak asa ganti agama. (Ulaon ni Apostel 18:12, 13) Alai dang tutu i. Hami dang mamaksa halak lao mangihutton haporseaonnami. Alai, porsea do hami asa sude halak mamboto aha na diajarhon Bibel jala boi ma nasida mambahen haputusan hombar tu aha naung diparsiajari nasida. Hami dang mamaksa halak asa ganti agama. Dang adong partalian ni ulaonnami on tu politik jala hami dang marjanji mangalehon pangurupion manang hepeng lao mangalului ruas.

Imbar do hami sian nasida na mandok dirina Kristen alai mangulahon na so dihalomohon Kristus. b

Marhak do sasahalak lao mangganti agamana?

Dang diihutton si Abraham agama ni keluargana

I do, Bibel mandok marhak do sasahalak mangganti agamana. Disurat do di Bibel taringot piga-piga halak na mangganti agamana jala manomba Debata na sittong. Umpamana, si Abraham, si Rut, piga-piga halak di Aten, jala apostel Paulus. (Josua 24:2; Rut 1:14-16; Ulaon ni Apostel 17:22, 30-34; Galatia 1:14, 23) Asing ni i, adong do disurat di Bibel taringot sasahalak na manadikkon panombaon na sittong, nang pe sala haputusan na binahenna i.—1 Johannes 2:19.

Hak ni sasahalak lao mangganti agama ditolopi Deklarasi Universal Hak Asasi Manusia. Deklarasi on ma na dipakke Perserikatan Bangsa-Bangsa “lao mambahen uhum taringot hak asasi ni jolma di liat portibi on.” Deklarasi on mandok boi do sasahalak “mangganti agamana manang haporseaonna” jala “boi mangalului, manjalo jala mangalehon hatorangan dohot informasi,” umpamana taringot haporseaon ni nasida. c Tutu do, ganup halak ikkon mamparsangapi hak ni sasahalak lao makkaporseai haporseaonna jala manjua hatorangan na so dijalo nasida.

Na so diparsangapi do adat dohot hasomalan ni keluarga molo ganti agama ni sasahalak?

Dang. Bibel mangajarhon hita ikkon mamparsangapi sude halak, dang soal aha agama ni nasida. (1 Petrus 2:17) Asing ni i, dioloi Saksi Jahowa do paretta ni Bibel lao mamparsangapi natua-tua, nang pe nasida dang sahaporseaon.—Epesus 6:2, 3.

Alai, dang sude halak satolop tu ajaran ni Bibel taringot on. Sahalak borua di Zambia mandok, “Di hutanami, molo adong halak na ganti agama, . . . didok ma ibana dang mamparsangapi keluarga dohot dongan na asing.” Dihilala borua on do sisongon i tikki poso dope ibana. Tikki i, marsiajar Bibel ibana dohot Saksi Jahowa jala dibahen ibana ma haputusan lao mangganti agamana. Didok ibana, “Natua-tuakku mandok nungnga hansit hubahen rohanasida. Makkirim do ahu asa satolop nasida tu haputusan naung hubahen. . . . Dang na so huparsangapi keluargaku ala hupillit marsihohot tu Jahowa jala dang be mangihutton adat ni agama.” d

a Ida ma Menara Pengawal 1 Januari 2002, alaman 12, paragraf 15.

b Umpamana, hira-hira taon 785 DM, diparettahon si Charlemagne ma lao pamatehon manang ise pe na so olo gabe halak Kristen di Saxony. Adong do muse Perjanjian Perdamaian Augsburg na ditandatangani akka halak na marbadai di Imperium Romawi Suci di taon 1555 DM. Isi ni Perjanjian i, ganup halak na mamaretta di luatna ikkon maragama Katolik Rom manang Lutheran jala rayatna pe ikkon mangihutton agama i. Sude na so olo mangoloi ikkon dipalao sian luat i.

c Akka hak sisongon on pe dipaboa do di Piagam Afrika tentang Hak Asasi Manusia dan Bangsa, Deklarasi Amerika tentang Hak dan Kewajiban Manusia, Piagam Arab tentang Hak Asasi Manusia 2004, Deklarasi Hak Asasi Manusia ASEAN (Punguan ni Angka Negara di Asia Tenggara), Konvensi Eropa Mengenai Hak Asasi Manusia, dohot Perjanjian Internasional tentang Hak-Hak Sipil dan Politik. Alai nang pe songon i, dang marsitutu akka negeri na parsidohot tu perjanjian on lao mangulahon isi ni perjanjian i.

d Jahowa, i ma goar ni Debata na sittong na disurat di Bibel.