Tanggal 6 Mei 2017, adong 130 Saksi na dohot paiasson hutan Bryukhovychi di jonok ni huta Lviv di Ukraina. Akka Saksi na dohot tu ulaon on marumur sian 22 sahat tu 80 taon. Nasida karejo jala tading di kantor cabang Saksi Jahowa na adong di jonok ni hutan i. Saleleng tolu jom, dipaias nasida do hutan i sampe 50 hektar jala adong 600 kilo sampah naung dipapungu nasida.

Adong sahalak insinyur na manguluhon Pusat Penangkaran Hutan dan Pengeboran Lviv, i ma si Mykhailo Splavinskyi. Didok ibana, “Saksi Jahowa do kelompok na parjolo mangurupi ulaon paiasson hutan ganup taon. Jala nungnga diulahon nasida i sian taon 2014.”

Ninna si Splavinskyi adong dua na mambahen godang sampah di hutan on. Na parjolo, ala adong do akka halak na mambolokkon sampah tuson. Na paduahon, adong akka truk na mamboan akka sampah bangunan dohot sampah na asing, jala dibolokkon ma tuson.

Akka sampah na di hutan i boi do gabe masalah. Didok si Splavinskyi, “Leleng do asa hancur akka sampah on. Jala boi do i mambahen aek gabe kotor jala gabe tambah masalah.” Akka sampah kaca pe boi do mambahen kebakaran molo hona mata ni ari. Jala akka kaca dohot jarum suntik bahaya do i tarlumobi tu dakdanak. Didok si Splavinskyi, “Ikkon dipaias do i asa dang gabe masalah.”

Dang mura paiasson hutan na bolakna 3.300 hektar. Didok si Splavinskyi, “Holan lima halak do penjaga ni hutan i. Dang mungkin boi paiasson nasida i sude. Jadi, ganup taon dipangido hami do tu akka halak asa dohot mangurupi paiasson hutan on.”

Dipakke akka Saksi do sarung tangan, diboan do plastik dohot gair-gair. Dipapungu nasida do akka botol, ban mobil, akka kaca, bosi-bosi, akka plastik dohot jarum suntik. Sahalak panjaga ni hutan i na margoar Ihor Fedak mandok, “Daerah na dipaias akka Saksi i, na iasan bah.”

Nang pe dang disuru, dipapulik Saksi do sampah kaca, harotas, dohot plastik. Jadi, boi ma didaur ulang. Perusahaan daur ulang sampah do na mendaur ulang i. Sian taon 2016, hepeng ni nasida sandiri do na dipakke Saksi, lao membiayai daur ulang i. Didok si Fedak, “Mauliate ma hudok tu akka Saksi Jahowa ala nga diurupi hami. Massai arga do sude na dibahen nasida i.”

Las do roha ni akka Saksi ala boi mangurupi paiasson hutan i ganup taon. Gabe ias ma hutan i, jala makkorhon na denggan do i tu akka halak. Sahalak Saksi na margoar si Volker mandok, “Dang maila au dohot paiasson sampah on. Ulaon na sangap do di au molo boi parohon na denggan tu akka halak. Jala las do rohakku.” Songon i ma pakkilalaan ni akka Saksi na asing.

Didok si Anzhelika ma muse, “Dang huparsoalhon ise na mambolokkon sampah i. Alai aha ma na porlu bahenon asa ias.” Si Lois na marumur 78 taon dohot do mangurupi ulaon on. Didok ibana, “Tumagon do molo pittor tapaias sampah, sian apala muruk tikki mardalan ala mangida akka sampah i.”

Didok si Wieslaw, “Somalna tikki marbarita, diida halak rapi-rapi do pakkeannami jala mardasi. Alai dang maila hami molo kotor alani paiasson hutan, manang mangulahon ulaon na asing molo parohon na denggan do i tu akka halak.”