Ne goung demtchaʼ awè, pômneng be wap ghe mtchi ne be djô mlouʼ bampaam be a ka hwegne. She pô khoung ne pe she mtam nwe mlouʼ bampaam pou a mso pap. She pe de khète ne tchyete laʼ nwe mlouʼ bampaam. She pô bing be nwe te bam. Bible gôm ge ke ne mlouʼ bampaam ?

1. A be a pôk ne nwe mlouʼ bampaam a ?

Bible te khengne ge pou nwe mlouʼ pe. Tse poʼo, tchwe ye Bible gôm nwe ne medou potse pepoung tsye Si be é ha bi pe a, a gôm nwe ba ne “mlouʼ ye a gre ge tum momsoung ŋwègne a.” (Mghôm ghamte 104:14, 15) She pebè ba pedjwi dendeng pye Bible gôm nwe ne pou a, le be nwe mlouʼ bampaam.—1 Timotio 5:23.

2. Bible ha ma mthôk bi pô pye wap de khète ne nwe mlouʼ bampaam a ?

Jéova khengne ge taʼ mo nwe mlouʼ téʼ, ba m be ye a te bo tchwe paʼ tchwe ye é pam a pe. (Galata 5:21) Ghôm tsye gôm ge : “Ke pe tchetche pô pye wap nwe mlouʼ téʼ a.” (Mghôm jyenwe 23:20) Poʼo, a pe ge pe le khète ne nwe—ba m tchwe ye pe do pe a—pe te gô nwe téʼ te a ghe ge pe le ping sè nwe pepoung pe, gre ge pe ghôm nwe ke gre potse te kyep ne yôkpe le pe, ke pe le ping gre ne tuô le pe. A pe ge pe ka fing ne kyep ne yôkpe ne nwe mlouʼ téʼ, be dze gô pe ne le khète ne tchyete ping nwe.

3. Pe fing ne ning deng ne mkhète mye pyeshe pô de ne mlouʼ a m tchi ge ke ?

Baya mo le gô le khète pe do é ne nwe mlouʼ ke gè le. Pe te gô fyèʼ taʼ mo ye é le khète ne pe nwe pe mouywe é a pe, pe le neng tsegne mo ye é te bo tcheng ne nwe mlouʼ a pe, ne nwe pe. (Roma 14:10) Pe de khète ne tchyete nwe mlouʼ bampaam, be ye ne nwe gô pakgne pyeshe pô a. (Ké Roma 14:21.) Pe te ‘tcheng pe daʼ yôkpe nwe pe, pe tcheng ba ye pyeshe pô.ʼ—Ké 1 Korinto 10:23, 24.

 PING TCHENG NE GÔ DZE

4. Le khète be ye o gô nwe ke gè a le

Yéso le djô ne nwe mlouʼ bampaam m tchi ge ke ? Ne ne gre paʼ ne, pe yô dendze msya ye é le ghe a. Ké Yohané 2:1-11, neng dou gômte ne mhente menge :

• Msya yenge dagne wôkpe ke, ne tchi paʼ Yéso ne djô mlouʼ bampaam, ba pô pye wap nwe mlouʼ a ?

• Paʼ Yéso late kengne ge pou ke nwe mlouʼ bampaam a, taʼ kritè gô yô mo ye é le khète ne nwe mlouʼ a m tchi ge ke ?

Daʼge, ba m paʼ taʼ kritè fing ne nwe mlouʼ bampaam a, a gô pe ne ghe jyenwe be ye ne she mtchwe, é le khète ne tchyete nwe a. Ké Mghôm jyenwe 22:3, neng sè nwe ne tchi paʼ o fing ne ying ne khète ye a tchum khè yeng a, tchwe ye o dze potse menge a :

• O gô feng metwa, kwè, ke le taʼ mesing faʼ le.

• O be tsum.

• Taʼ dôkta ghôm bou ge o ke nwe mlouʼ bampaam.

• A tchuô bou ne kyep ne o ne nwe mlouʼ téʼ.

• Mtchoʼ gôpnaʼ te bing ge o nwe mlouʼ bampaam pe.

• O be pou a taʼ mo ye é le khète ne tchyete ping nwe mlouʼ bampaam dou ge é le ji be, é le pe kyep ne é jye, ne ne nwe téʼ a.

O gô ha mlouʼ bampaam bi pô tchwe taʼ dina lômdye ke ne mouʼ dina a ? Ne ne djô ywe ye a fing ne kwite o ne le khète a, yô VIDÉO.

Ké Roma 13:13 ba 1 Korinto 10:31, 32. Tchwe ye o ming ne ké baya khè le, ghômte ne hente yenge :

• Ne ying ne khète Bible yenge fing ne kwite o ne le taʼ khète ye a gô poung bi Jéova a m tchi ge ke ?

 5. Yap taʼ dze ne deng ye o gô nwe a

A pe be o le khète ne nwe mlouʼ o kamte ywe yeng : ba m be ye Jéova te khengne ge pe nwe mlouʼ a pe, é khengne ge pe nwe mlouʼ te a yôm téʼ. Nweke ? Ké Ozé 4:11, 18, neng gômte ne hente yenge :

• Ke fing ne ŋwak tchwe ye taʼ mo nwe mlouʼ a yôm téʼ a ?

Ke fing ne kwite wôkpe ne tchyete nwe mlouʼ a yôm téʼ ? A tcheng ge pe jye yôkpe deng, jye dze ye pe gô nwe tingne ne a. Ké Mghôm jyenwe 11:2, neng gômte ne hente yenge :

• Nweke a be a poung ne yap taʼ dze ye o te gô nwe mlouʼ ne te twôk a ?

6. Ywe ye a fing ne kwite taʼ mo ne yaʼ ne ping be nwe téʼ a

 YE NE KHAMTE

Jéova be é le ha mlouʼ bi pe ge a ghe ge pe pe ŋwègne, daʼge é khengne ge pe nwe téʼ ba ge pe nwe te bam.

O lagne ke ?

• Bible gôm ge ke ne mlouʼ bampaam ?

• Ne nwe mlouʼ téʼ de ma potse tchwepoung sôʼô ?

• Pe fing ne ning deng ne mkhète mye pyeshe pô de ne mlouʼ bampaam a m tchi ge ke ?