Tchwe ye pe be pou a mfemfe tchum bemte a, pe djouʼ ne yôkpe paʼ fo David a : “Yô ! Paʼ a boung, bing ŋwègne bi mfe ne pemte tchwe tchum thamte !” (Mghôm ghamte 133:1) Thamte yôkpe te né sôʼ ye pe poʼ pe. Baya mo le ne pe, be é ghe taʼ ywe ye é gô ghe te ne pômte ya bô a.

1. Pou djô ya ywe msya tchetche temlaʼ Si ?

O ghô ne taʼ tchouʼte bemte tchum mouʼ goung, mouʼtchwe be o ka fing ne po djouʼ ghôm ye pou bo gôm tsuʼou a; daʼge o gô youʼ ne o m paʼ tchwe ye o pe kwaʼ we o a. Nweke ? Nekele ne goung demtchaʼ awè, pe gwim pe taʼ tchi mŋwaʼgne ne jiʼte Bible. Pe neng daʼte koungne tchetche pe. Ke pe tchwe ba ne ya tsuʼ le, goung yôkpe awè “sé tso Jéova, neng be gamte é tchum thamte.”—Sofoni 3:9, ywe ne thoute.

2. Pe fing ne ghe la te ne gre ge thamte pe si ?

“Po koungne wô wô ne tum dôlô te pwa.” (1 Pètro 1:22) O fing ne ying ne khète yeng m tchi ge ke ? Tse ne pe tchu mnye mou ne mdôti ma mye pyeshe pô gre a, a tcheng ge o pe dé pe m ma pepoung mye a be wap ghe a. Ke pe tcheng ne pe daʼ pou a pô pye wap khoung ywe ye o khoung a; tela tcheng ne jye mfemfe pye wap them ne she mtsuʼ a. Ghe goung ywe ye o fing a, ne ne gwaʼ mkwègne tchwepoung mye o fing ne tchwaʼdzu gre ne pyeshe pô a.—Ké 1 Pètro 2:17. *

3. Tchwe ye po fe o te bo djouʼgne a pe, o gô ghe la ?

A be pe tamte, daʼge be pe pô mving. Pe be she mtchum gre potse, a pôk pyeshe pô, ke djè wap le. Ghôm Si gôm bi pe ge : “Po le mhô mô . . . tchwyèʼ wô wôwô,” a neng kwiʼ ge : “dendeng paʼ a be Tchyepô le mhô mô tchwyèʼ wô a, ba wô yô po ghe pe poʼo.” (Ké Kolosai 3:13.) She mtam, pe gre potse tsye a bôk Jéova a, daʼge é tchousi yôkpe. É byap ge ba wôkpe, pe pe tchousi mfe pôkpe. O sè djô ge o ghe ywe a po djè mo, o le khète ne ghe ge hwite pe si.—Ké Matio 5:23, 24. *

 PING TCHENG NE GÔ DZE

4. Loʼ mkwègne tchwepoung mye o fing ne tchwadzu gre ne pyeshe pô a

Pe bo tcheng ne koung goung mfe pôkpe awè. Daʼge a te be goung mtchwe awè hwi ne ping taʼ mo ye é te be paʼ wôkpe a pe. Ke fing ne kwite o ? Ké Mfaʼ 10:34, 35, neng gômte ne mhente menge :

• Jéova bing ge goung tchi pô awè ghamte é. Ya bô gô ghe la ne you tchi ne be djô pyeshe pô pye po a pou te them ne taʼ tsuʼ a ?

• O bo tcheng ne waʼ ma mkwègne tchwepoung ye pou sè ne pyeshe pô tsuʼ ye o tchwe ne a ?

Ké 2 Korinto 6:11-13, neng gômte ne hente yenge :

• Ne you ne sè, o fing ne fouʼ ne o ha ne mfemfe pye po a pou te bemte them ne taʼ tsuʼ a pe m tchi ge ke ?

5. Le pountum tchousi neng tcheng hwite

Jéova de pountum tchousi yôkpe, ba m be ye é te gô laʼ ghe sômywe ye a gô tcheng ge pe tchousi é ne a pe. Ké Mghôm ghamte 86:5, neng gômte ne mhente menge :

• Yeng khè dagne wôkpe ke ne tchousi ye Jéova gre bi pe a ?

• Nweke o ŋwègne ge Jéova tchousi o ?

• A be she mtchum tchuô ne youʼgne pou a pyeshe pô tchweke ?

Pe fing ne foʼte Jéova m tchi ge ke, te ne tchwe tchum thamte pou a mfe pôkpe ? Ké Mghôm jyenwe 19:11, neng gômte ne hente yenge :

• Taʼ mo ghe ywe a pôk o, ke djè o le, be o fing ne ghe la te ne nyapte nwe bô ?

 A be she mtchum, wôkpe né ghe potse tsye a gô yè pyeshe pô a. Tchwe o bô, a tcheng ge pe ghe la ? Yô VIDÉO, neng gômte ne hente yenge.

• Tchum vidéo, sita yôkpe gre la te ne bing gre ge hwite pe si ?

 YE NE KHAMTE

O fing ne kwite ne ghe ge thamte pe tchum bemte, tchye m ne ne pe tchousi mfemfe, neng be daʼte koungne bi pou.

O lagne ke ?

• O fing ne loʼ ne pe tchwadzu gre mkwègne tchwepoung ne pyeshe pô m tchi ge ke ?

• O gô ghe la tchwe ye taʼ nwe tchetche wô po fe o tchum bemte a ?

• Nweke o po tcheng ne foʼte Jéova, be tchousi pyeshe pô ?